Drew Nacino

Sasalang na sa plenary debate ng senado ang panukalang batas na layong bigyan ng buwanang pensyon ang mga indigent persons with disabilities (PWD).

Dedepensahan ang Senate Bill 1602 o “Disability Support Fund Act” ni Senador Imee Marcos, na sponsor ng bill, sa oras na magbalik-sesyon ang kongreso sa Enero.

Kabilang naman sa mga may-akda sina Senators Risa Hontiveros, Lito Lapid, Ronald Dela Rosa at Ramon Revilla, Junior.

Sa ilalim ng naturang bill, tatanggap ang mga mahirap na PWD ng P2,000 kada buwan.

Bukod pa ito sa tinatanggap na benepisyo ng mga PWD, gaya ng diskwento sa pagbili ng pagkain at gamot.

Inirerekomenda rin ng panukalang batas na i-prayoridad sa disability support fund ang mga batang may kapansanan at adults na mayroong moderate at severe disability sa unang tatlong taon ng implementasyon.

Nasa 300 pamilya o mahigit 1,200 katao na ang apektado ng pagbaha bunsod ng malakas na ulan dulot ng amihan sa ilang bahagi ng Palawan.

Kinumpirma ng Provincial Disaster Risk Reduction and Management Office (PDRRMO) na karamihan sa mga apektado ay mula sa mga mababang lugar sa mga bayan ng Bataraza at Brooke’s Point.

Sa Bataraza, nasa 230 pamilya o mahigit 1,000 katao ang nananatili sa apat na evacuation centers.

Tinaya sa 60 pamilya o mahigit 220 katao sa coastal area ng Barangay Bancao-Bancao sa Puerto Princesa City ang nagsilikas din dahil sa naglalakihang alon.

Isang bahay naman sa Brooke’s Point ang napinsala habang dalawang iba pa ang nawasak habang 142 ang napinsala sa Bataraza at 28 iba pa ang nasira.

Naglabas na ang ilang local government unit ng guidelines sa paggamit at pagbebenta ng mga paputok at pailaw sa bisperas ng bagong taon.

Sa Quezon City, nilimitahan na ng LGU ang pagbebenta sa shopping malls upang matiyak ang kaligtasan ng kanilang constituents.

Ayon kay QC Department of Public Order and Safety Head General Elmo San Diego, sa mga mall na lamang maaaring bumili ng pailaw at paputok pero dapat ay may permit mula sa kanilang tanggapan.

Bawal naman ang magsindi ng pailaw o paputok sa labas ng bahay dahil may mga itinalaga anyang firecracker zones.

Samantala, binawi ng Valenzuela City LGU ang kanilang firecracker ban bagkus ay nagpasa ng ordinasang nagpapahintulot sa paggamit at pagbebenta ng mga pailaw at paputok at iba pang legal pyrotechnic devices.

Gayunman, nilinaw ng lokal na pamahalaan na tatalima sila kautusan ng national government sa oras na maglabas ito ng sariling guidelines.

Una nang inihayag ng DILG na dapat ay alinsunod sa Implementing Rules and Regulations ng Fire Code of the Philippines at Republic Act 7183 ang mga ipinatutupad na ordinansa ng mga LGU.

Nagsimula nang magmahal ang mga bilog na prutas, limang araw bago ang pagdiriwang ng bagong taon.

Sa pag-iikot ng DWIZ sa Divisoria, Maynila, naglalaro na sa P15 pataas ang kada piraso ng mansanas habang mayroon ding nagbebenta ng P50 kada pack ng limang piraso;

P50 hanggang P70 ang kada kilo ng kiat-kiat;ubas, P200 kada kilo; ponkan, P10 kada piraso; orange o kahel, P25 kada piraso; peras, P30 kada piraso at lemon, P20 kada piraso.

Inaasahang tataas pa ang demand sa prutas habang papalapit ang tradisyunal na media noche pero inihahanda na ng mga nagtitinda ang kanilang stock para sa mga last-minute buyer.

Samantala, nananatiling mataas ang presyo ng karneng baboy at manok sa ilan pang pamilihan.

Nanawagan sa publiko si Information and communications Technology Undersecretary Anna Mae Yu Lamentillo na tumalima sa bagong tatag na Sim Registration Law.

Magugunitang nilagdaan ni Pangulong Bongbong Marcos noong Oktubre ang naturang batas na layong sugpuin ang lumalalang insidente ng mga text scam, misinformation at spam messages.

Ayon kay Lamentillo, lalabanan din ng batas ang human trafficking, online sexual abuse at exploitation sa mga bata.

Wala naman anyang gagastusin kahit singko ang mga subscriber sa implementasyon ng Sim Registration Law.

Alinsunod sa naturang batas, kailangan nang iparehistro ang sim card ng subscribers gamit ang pangalan, petsa ng kapanganakan, kasarian, postal address at valid government identification na may kasamang litrato.

Muling ipinaalala ni Lamentillo na ang kabiguan na magparehistro sa loob ng anim na buwan ay magreresulta sa deactivation ng sim o hindi na ito magagamit ng subscriber.

All systems go na ang mga telecommunication company o telco para sa implementasyon ng Sim Registration Law, simula ngayong araw.

Aminado si Atty. Ariel Tubayan, Senior Legal Counsel ng Globe, na isa sa nakikita nilang hamon ang mga hindi pamilyar sa registration platform o paano ito gamitin at kung saan magpaparehistro ang isang subscriber.

Inihalintulad ng Globe ang sim registration sa pagsubok na kanila anyang kinaharap sa mobile number portability.

Sa kabila nito, tiniyak ni Tubayan na nakahanda ang mga impormasyon at video kung paano maiparerehistro ang sim sa kanilang website.

Kumpiyansa naman ang nasabing telco na makapagpaparehistro ang nasa walumpu’t pitong milyon nilang subscriber sa loob lamang ng 15 araw.

Sa panig ng PLDT at Smart Communications, inihayag ni Corporate Communications Chief Cathy Yang na nakalatag na ang lahat ng kanilang platforms matapos sumailalim sa ilang serye ng test.

Samantala, inamin ni DITO Telecommunications Chief Administrative Officer, Atty. Adel Tamano na ang pagdadalawang-isip ng mga subscriber na iparehistro ang kanilang numero ang isa sa posibleng problema na harapin kaugnay ng sim registration.

Tiniyak ng Philippine Ports Authority (PPA) na walang stranded na mga pasahero sa mga pantalan ngayong holiday season sa kabila ng masamang panahon.

Batay sa datos ng PPA, 175 pantalan na kanilang pinangangasiwaan ang operational ngayong Christmas season.

Tinaya ng PPA sa 45,000 ang pasahero, na binubuo ng 25,000 sumakay ng mga barko at iba pang sea vessel habang 20,000 ang mga bumabang pasahero.

Samantala, inihayag ng Philippine Coast Guard (PCG) na sa ilalim ng “Oplan Biyeheng Ayos: Pasko 2022” na wala ring stranded na mga biyahero at mga barko.

Batay naman sa datos ng PCG hanggang kahapon, kabuuang 82,000 pasahero ang kanilang na-monitor o mahigit 42,000 outbound passengers at 40,000 inbound passengers sa lahat ng pantalan.

Umakyat na sa 13 ang nasawi sa pagbaha bunsod ng malakas na pag-ulang dala ng shear line sa ilang bahagi ng bansa.

Pinaka-marami o pito ang naitala sa Northern Mindanao partikular sa Misamis Occidental, apat sa Eastern Visayas habang dalawa sa Bicol region.

Ayon sa Office of the Civil Defense (OCD), tatlo ang sugatan habang 17 indibidwal ang nawawala.

Tinaya naman ng OCD sa 27,000 pamilya o mahigit 100,000 katao na ang apektado ng kalamidad.

Kabilang sa mga apektado ang MIMAROPA, Bicol Region, Eastern Visayas, Zamboanga Peninsula, Northern Mindanao at Bangsamoro Autonomous Region in Muslim Mindanao.

Samantala, ilang bayan sa Surigao Del Sur ang nakararanas pa rin ng pagbaha dahil sa malakas na pag-ulan.

Naka-umang na rin ang dagdag singil sa tubig sa Enero ng susunod na taon dulot ng environmental charge na binabayaran ng mga customer.

Ipinaliwanag ni Manila Water Spokesman Jeric Sevilla na ang environmental charge ang magpapalaki ng bayarin sa tubig.

Ayon kay Sevilla, kung 20 cubic meters ang kunsumo halimbawa, magiging 25% na o katumbas ng P82 ang environmental charge sa basic charge na mahigit P300.

Sa panig na Maynilad, mananatili naman sa 20% ang environmental charge subalit madaragdagan pa rin ang bill dahil tataas din ang basic charge.

Samantala, nilinaw ni Metropolitan Waterworks and Sewerage System Chief Regulator Patrick Ty na tinaasan ng Manila Water ang environmental charge sa dahil mas malaki na ang kanilang sewered lines.

Mahigit 470 pasahero ang nag-pasko sa Port of Romblon makaraang hindi makapaglayag ang kanilang barko dahil sa masamang lagay ng panahon.

Ayon kay Batangas at Romblon Port Manager Joselito Sinocruz, umaga noong Sabado, bisperas ng pasko nang umalis sa Romblon port ang barko ng Starhorse Shipping Lines patungong Sibuyan Island.

Gayunman, napilitan anyang bumalik ang nasabing vessel dahil sa naglalakihang alon.

Tinangka pa ng barko na bumiyahe dakong alas-5:00 ng hapon subalit hindi na pinayagan ng Philippine Coast Guard.

Galing sa Lucena City sa Quezon Province ang barko na may lulan din ng 10 Rolling Cargoes.