Drew Nacino

Bangkay na nang matagpuan sa Matnog, Sorsogon ang isang mangingisdang taga-Catanduanes na nawawala simula pa noong Lunes, Disyembre 26.

Kinilala ang mangingisdang si Noel Zafe, 58 anyos, na narekober sa baybayin ng Barangay Paghuliran dakong alas-12:00 ng tanghali kahapon.

Ayon kay Mark Joseph Matira, Head of Operations ng Municipal Disaster Risk Reduction and Management Council ng Virac, isa si Zafe sa limang mangingisda na hindi na nakauwi noong bisperas ng pasko.

Maliban dito, nakita na rin anya ang bangkay ng isa pang mangingisdang si Arnel Araojo, 43 anyos sa baybayin ng Barangay Calanaga sa Rapu-Rapu, Albay.

Samantala, nagpapatuloy ang paghahanap sa tatlo pang kasamahan ni Zafe na sina Dante David, 41 anyos; Domingo Borilla Junior, 33 anyos at Jason Mandasoc, 31 anyos.

Bukod dito, pinaghahanap pa rin ang iba pang mangingisda mula naman sa bayan ng Viga, Catanduanes na Sinaringo Tupig, Willy Uchi, Jobert Teaño at Juanito Estrella Junior.

Disyembre 21 nang mangisda ang mga biktima sakay ng motorized banca at inaasahan sanang uuwi noong 23 pero hindi na nagawang makabalik pa.

Inaasahang darami pa ang mga pasaherong mag-uuwian ng Metro Manila pagkatapos ng pagdiriwang ng bagong taon sa Enero.

Ito ang inihayag ni Ramon Legazpi, Manager ng araneta Center Bus Port sa Cubao, Quezon City matapos ang pagdagsa ng mga pasaherong nagbalik-Metro Manila matapos magpasko sa mga probinsya.

Ayon kay Legazpi, sa ngayon ay umaabot na sa 2,000 hanggang 3,000 ang average daily passenger volume sa nasabing terminal.

Gayunman, inaasahang madaragdagan pa ito dahil tiyak na sasagarin ng ilang biyahero ang kanilang bakasyon hanggang bagong taon.

Sa Paranaque Integrated Terminal Exchange (PITX) naman, pumalo na sa mahigit 190,000 ang mga pasaherong bumiyahe nitong Lunes, Disyembre 26.

Ito na sa ngayon ang pinakamataas na bilang ng mga pasahero sa PITX simula nang magbukas ang naturang terminal.

Aminado si PITX Spokesman Jason Salvador na ikinabigla nila ang bulto ng mga pasahero noong Lunes bagaman hanggang 200,000 pasahero ang kayang i-accommodate ng terminal kada araw.

Tiniyak naman ni Salvador na lagi silang nakahanda sa pagbuhos ng mga biyahero, lalo pagtapos ng bagong taon.

Isinulong ni Senador Imee Marcos ang imbestigasyon ng senado sa patuloy na pagsirit ng presyo ng lokal na sibuyas.

Bunsod itong pagbaha ng mga imported agricultural products at talamak na smuggling ng mga ito mula sa ibang bansa.

Sa kanyang Senate Resolution 350, inihayag ni Marcos, Chairperson ng Senate Committee on Social Justice, Welfare and Rural Development, na ang retail price ng sibuyas ay P400 hanggang P500 na kada ang kilo.

Ayon sa senador, dapat matukoy ang sanhi at tiyaking hindi papatayin ng panawagang importasyon ang local onion industry.

Nag-ugat ang resolusyon ng mambabatas sa babala ni Samahang Industriya ng Agrikultura President Rosendo So na posibleng tumaas pa ang presyo ng sibuyas dahil umano sa supply shortage.

Nagsanib-puwersa ang mga otoridad sa pag-inspeksiyon ng mga tindahan ng paputok at pa-ilaw sa Bocaue, Bulacan, apat na araw bago ang bagong taon.

Magkatuwang na binusisi ng Bureau of Fire Protection, Philippine National Police, Department of Trade and Industry at lokal na pamahalaan ang mga firecracker store sa kahabaan ng Governor Halili Avenue kahapon.

Inalam ng mga nasabing ahensya kung sumusunod ang mga tindahan sa requirements at kung mayroong mga smoke alarm o fire extinguisher ang mga ito.

Ininspeksiyon din ang mga bubong ng mga establisyimento kung may posibleng leak.

Pinayuhan naman ng mga otoridad ang publiko at nagbebenta na mga ligal na paputok at pa-ilaw lamang ang itinda at bilhin.

Inirekomenda rin nila na lumahok na lang sa community fireworks display upang makaiwas sa posibleng firecracker-related injuries.

Hindi pa rin ikinukunsidera ng Department of Agriculture (DA) ang pag-aangkat ng sibuyas sa kabila ng pagdoble ng presyo nito sa ilang pamilihan, lalo sa Metro Manila.

Ayon kay DA Deputy Spokesperson Rex Estoperez, tinitingnan pa nila kung saan nagkukulang ang gobyerno kahit batid naman nilang hindi perpekto ang kanilang sistema.

Sa ngayon anya ay sumampa na sa P520 ang kada kilo ng presyo ng sibuyas sa ilang palengke habang ang farm gate price ay nasa P300 kada kilo kumpara sa P170 na SRP noong Oktubre.

Nilinaw ni Estoperez na “supply and demand” ang nagdidikta ng presyo kaya’t kung mababa ang supply o produksyon, otomatikong tumataas ang presyo.

Bagaman mayroong supply ng sibuyas, hindi naman ito sobra kumpara sa mataas na demand.

Aminado rin ang opisyal na mahihirapan silang diktahan ang presyo ng nasabing produkto dahil mataas ang production cost nito bukod sa paghihigpit sa SRP at maaaring walang magsasakang magbenta.

Samantala, inaasahan naman ng kagawaran ang harvest season ng sibuyas sa mga susunod na buwan subalit hindi pa nila mabatid kung gaano karami ang produksyon lalo’t may mga tumamang bagyo sa bansa.

Nakatakdang isailalim sa maintenance shutdown ang Malampaya natural gas sa susunod na taon.

Ito ang inihayag ni Energy Sec. Raphael Lotilla, na may layuning masolusyonan ang problema sa mataas na singil sa kuryente.

Ayon sa kalihim, bumuo na sila ng contingency measures upang masiguro na walang magiging brownout sa ilang bahagi ng Luzon sa gitna ng kanilang maintenance shutdown sa February 4 hanggang 18, 2023.

Sinabi ni Lotilla na dahil sa energy shift na gagawin mula sa natural gas, posibleng tumaas ang singil sa kuryente sa susunod na taon.

Sa kabila nito, tiwala ang opisyal na malalampasan ng bansa ang mga pagtaas ng singil sa kuryente sa susunod na taon.

Usap-usapan ngayon sa social media ang planong paglipat ni dating Nba Most Valuable Player James Harden sa Houston Rockets mula sa Philadelphia 76ers.

Nabatid na tinitimbang pa ni Harden kung mananatili ito sa koponan o lilipat ng ibang team sa pamamagitan ng Free Agency.

Matatandaang pumirma ng $68.6-M ang atleta para sa two-year contract nito sa Sixers.

Si Harden ay mayroon g average na 24.9 points, 5.6 rebounds at 6.9 assists sa 959 career games sa NBA.

Nagsimula nang bumigat ang daloy ng trapiko sa ilang expressway kasabay ng pagbabalik-Metro Manila ng libu-libong bakasyonistang nag-pasko sa mga probinsya.

Dakong ala-5:00 kaninang madaling araw nang magsimulang bumuhos ang mga sasakyan sa ilang bahagi ng North Luzon Expressway (NLEX).

Bumper-to-bumper ang daloy ng trapiko mula Balintawak Toll Plaza hanggang Harbor Link Interchange.

Ganito rin ang naging sitwasyon sa ilang bahagi ng South Luzon Expressway, partikular sa Bicutan toll plaza.

Samantala, sa EDSA naman, usad-pagong ang mga sasakyan sa bahagi ng Cubao at kanto ng Aurora Boulevard maging sa EDSA-Ortigas.

Pinayuhan naman ng MMDA mga motorista na magbaon ng mahabang pasensya dahil inaasahan pa hanggang mamayang hapon ang bugso ng mga motoristang nag-uuwian mula sa mahabang bakasyon.

Sumampa na sa 593 ang kaso ng chikungunya sa bansa simula Enero hanggang Disyembre 3.

Kumpara ito sa 89 chikungunya cases o tumaas ng 566% sa kaparehong panahon noong isang taon.

Batay sa disease surveillance report ng Department of Health, pinaka-marami ang naitalang kaso sa CALABARZON, 154; Central Visayas, 127 at Davao Region, 111.

Wala namang naitalang nasawi sa nasabing sakit ngayong taon at noong 2021.

Ang chikungunya virus ay kumakalat sa pamamagitan ng kagat ng lamok.

Ilan sa mga sintomas nito ay lagnat at matinding pananakit ng kasu-kasuan.

Gayunman, bihira ang malubang kaso at namamatay sa chikungunya.

Madilim na bagong taon ang nagbabadyang sumalubong sa mga taga-Occidental Mindoro.

Ito’y makaraang kumpirmahin ng Occidental Mindoro Electric Cooperative (OMECO) ang napipinto muling pag-shutdown ng planta ng Occidental Mindoro Consolidated Power Corporation (OMCPC), simula Enero 1 ng susunod na taon.

Itinuturong dahilan ang umano’y kulang at delay na pagbayad ng subsidy ng National Power Corporation (NPC) sa OMCPC kaya’t nagkakaproblema sila sa pagbili ng krudo.

Mula sa P310-M na utang ng NPC sa OMCPC para sa buwan ng Disyembre, P33-M pa lamang ang naibibigay na kulang umano pambili ng krudo upang paganahin ang planta.

Sa kabuuan, aabot na sa mahigit P1.1-B ang utang ng NPC batay sa mga kautusan ng Energy Regulatory Commission at mga inaprubahang power supply agreement, kabilang ang 50% subsidy penalty.

Iginiit ng OMCPC na tatagal lamang ang kanilang fuel supply hanggang December 31 at kahit sila ay nagkaroon din ng utang na P360-M simula noong Oktubre sa kanilang fuel supplier.

Samantala, nakikipag-ugnayan na ang OMECO sa lahat ng regulators at provincial leaders upang hindi matuloy ang naka-umang na shutdown.