Drew Nacino

Ibinasura ng korte suprema ang petisyon ng Philippine Health Insurance Corporation (PhilHealth) laban sa kautusan ng Commission on Audit na pumipigil sa pagpapalabas ng P83-M budget para sa kanilang mga opisyal at tauhan noong 2014.

Sa 21 pahinang desisyon ng supreme court (SC) na inilabas ngayong Disyembre, pinagtibay nito ang desisyon ng COA na pagkaitan ang mga PhilHealth official at personnel ng nasabing halaga na para sana sa birthday gifts at education allowance.

Ito’y dahil hindi aprubado ni dating Pangulong Noynoy Aquino ang naturang pondo.

Ayon sa SC, nilabag ng PhilHealth ang mga konsepto ng “fiscal autonomy at institutional authority” para sa pagsasaayos ng kompensasyon ng mga tauhan “in good faith”.

Ibinalik naman umano ito sa ayos sa ibinabang desisyon ng komisyon.

Batay sa isang desisyon noong 2016, napatunayan na walang diskresyon ang PhilHealth sa pagdetermina ng kompensasyon ng kanilang mga opisyal.

Nabigo rin umano ang PhilHealth na tukuyin ang mga partikular na “Acts of grave abuse” na sinasabi nilang nagawa ng COA.

Umaasa ang mga negosyanteng Filipino-Chinese na makababawi at makababangon muli ang sektor ng turismo sa inaasahang pagbabalik ng mga Chinese tourist sa bansa sa susunod na taon.

Ito’y sa kabila ng pinaka-matindi umanong COVID-19 surge na nararanasan sa China.

Ayon sa Federation of Filipino Chinese Chambers of Commerce and Industry, makatutulong ang pagdagsa ng mga turista mula sa China sa paglago ng ekonomiya ng Pilipinas sa 6.5% hanggang 7.5%.

Mas naka-e-engganyo rin anila ang pasya ng China na itigil na ang mandatory quarantines sa inbound travellers na nangangahulugang hindi na kailangang sumailalim sa quarantine ng ilang araw ang mga bibisita at umuuwi ng China.

Sa datos ng Department of Tourism simula nang magbukas muli ang Pilipinas para sa foreign tourists noong Pebrero, aabot sa 1.65-M ang tourist arrivals hanggang nitong Disyembre 1.

Gayunman, nasa 33,000 Chinese lamang ang naitala ngayong taon kumpara sa 1.74-M noong 2019 o bago ang COVID-19 pandemic.

Karagdagang 257 COVID-19 cases ang naitala ng Department of Health (DOH) kahapon.

Ito na sa ngayon ang pinaka-mababang daily infections simula noong Hunyo 15 kung saan 256 cases ang naitala at ikalawang araw na mababa pa sa 300 ang kaso.

Ayon sa DOH, bumaba pa sa 14,695 ang active cases ng COVID-19 habang bahagya pang umakyat sa 4,062 thousand ang total caseload.

Kabilang na rito ang 3,983,000 recoveries at 65,309 death toll.

Nangunguna pa rin ang National Capital Region sa mga rehiyong may pinaka-maraming kaso sa nakalipas na dalawang linggo na 4,272;sinundan ng CALABARZON, 1,907 at Central Luzon, 909.

Hiniling ng Globe telecom sa National Telecommunications Commission (NTC) na obserbahan sa loob ng tatlong araw simula kahapon ang kanilang Sim Registration Portal.

Ito’y upang matiyak ang mas maayos na registration para sa kanilang customer matapos pansamantalang maging “inaccessible” ang Globe Sim Registration Portal na new.globe.com.ph/simreg.

Ayon sa nasabing telco, ipinarating na nila sa NTC ang nasabing issue sa Sim Registration Portal.

Inako rin ng Globe ang lahat ng sisi sa sinapit na aberya at handang harapin ang anumang regulatory penalty kung papatawan.

Umapela rin ang telco sa kanilang mahigit 87-M subscriber ng pasensya at pang-unawa kasabay ng pagtiyak na ginagawa ng kumpanya ang makakaya nito upang maibigay ang maayos na serbisyo sa kanilang customers.

Inatasan na ng Chinese government ang mga local health authorities na maglagay na ng mas maraming hospital beds at magsanay ng karagdagang personnel sa dahil sa tumitinding COVID-19 surge.

Kinumpirma ni Jiao Yahui, Director ng Medical Affairs Department ng National Health Commission (NHC), na may sapat pang critical care beds pero umaabot na sa rurok ang COVID-19 cases kaya’t malapit na ring maabot ang hospital capacity sa mga probinsya.

Batay sa leaked memorandum ng NHC, aabot na sa halos 250-M ang tinamaan ng COVID-19 sa China sa nakalipas na 20 araw ngayong Disyembre.

Gayunman, hindi pa ito bineberipika ng mismong Chinese government dahil na rin sa news blackout.

Kabilang naman sa nakararanas ng matinding surge ang mga lalawigan ng Zhejiang at Sichuan kung saan nasa isang milyong kaso na ang naitatala kada araw.

Isang potensyal na super spreader event ang nakatakdang pagbisita ni Pangulong Bongbong Marcos sa China sa Enero.

Ito ang babala ni dating National Task Force Against COVID-19 Adviser, Dr. Tony Leachon sa gitna ng pinaka-matindi umanong COVID-19 surge sa Tsina sa nakalipas na halos tatlong taon nang magsimula ang pandemya.

Ayon kay Leachon, dapat kumpirmahin ng pangulo mula sa Departments of Foreign Affairs at Health ang tunay na sitwasyon ng COVID-19 cases sa China.

Dapat din anyang mabatid kung binigyan na ng bivalent vaccine ang pangulo nang bumiyahe ito sa New York, USA para sa kanyang pagdalo sa United Nations Summit.

Batay sa pinaka-huling datos ng provincial government ng Zhejiang, China hanggang nitong Sabado, aabot na sa isang milyon kada araw ang COVID-19 cases dahil sa pinaniniwalaang pagkalat ng bagong Omicron subvariant na BF.7.

Gayunman, ipinatigil ng Chinese government ang paglalabas ng COVID-19 daily case report kaya’t palaisipan pa rin kung ano na ang sitwasyon.

Maliban sa Zhejiang, nakararanas din ng matinding COVID-19 surge ang ilan pang karatig lalawigan na posibleng magpatuloy hanggang Pebrero o Marso kasabay ng Lunar New Year.

Hindi pipigilan ng Department of Health (DOH) ang pagbiyahe ni Pangulong Bongbong Marcos sa China sa gitna ng panibago at pinaka-matindi umanong COVID-19 surge sa nasabing bansa.

Ayon kay DOH Officer-in-Charge Maria Rosario Vergeire, nasa Office of the President na ang desisyon kung itutuloy ni Pangulong Marcos ang kaniyang biyahe.

Hindi anya dapat maging hadlang ang paglobo ng kaso ng COVID-19 sa Tsina upang matigil sila sa paggampan sa kanilang mga tungkulin.

Ipinunto ni Vergeire na mahalaga ang pagbisita ni PBBM sa ibang bansa para sa ekonomiya ng Pilipinas.

Inabisuhan na anya nila ang Office of the President hinggil sa sitwasyon ng COVID-19 sa China at sa ngayon ang mahalaga ay bakunado na ang punong ehekutibo at kanyang delegasyon at sumusunod sa minimum public health standards.

Enero 3 hanggang 6 ng susunod na taon nakatakdang bumiyahe ang pangulo patungong China.

Naka-code white alert na ang lahat ng government hospital sa bansa para sa posibleng firework-related injuries, tatlong araw bago ang New Year’s Revelry.

Sa ilalim ng code white alert, 24 oras naka-standby ang emergency services, mga doktor at nurse.

Kabilang sa mga naghahanda ang East Avenue Medical Center sa Quezon City na naglatag na ng mga medical equipment, gamot at disinfectant sa kanilang emergency ward.

Ganito rin ang sitwasyon sa Philippine General Hospital at Jose Reyes Memorial Medical Center sa lungsod ng Maynila.

Batay sa datos ng Department of Health, umabot na sa 25 ang firecracker-related injuries hanggang kahapon.

Inihayag ni DOH Officer-in-Charge Maria Rosario Vergeire ang nasabing bilang ay 14% na mataas sa 22 cases na naitala sa kaparehong panahon noong isang taon.

Nangungunang sanhi ng injuries ang boga, whistle bomb, kwitis at 5-star.

Nagsimula nang mamalimos ang ilang residente sa Oroquieta City matapos ang pagbaha bunsod ng malakas na pag-ulan sa Misamis Occidental, maging sa iba pang bahagi ng Northern Mindanao at Visayas.

Pagkain at maiinom na tubig ang pangunahing pangangailangan ng mga residenteng nasalanta ng flashfloods sa nasabing lugar.

Kabilang sa mga pinaka-apektado ang Barangay Talic kung saan ilang bahay, puno at sasakyan ang nawasak o napinsala ng pagbaha habang na-wash-out ang hanging bridge na nagdurugtong sa Poblacion Dos at Barangay Taboc Norte.

Aminado si Mayor Lemuel Meyrick Acosta na nakababahala ang sitwasyon kaya’t nagpapasaklolo na siya sa national government.

Bukod sa pagkain at tubig, kailangan din anya ng kanilang mga kababayan ang generator sets para sa mga ospital at maibalik sa normal ang linya ng komunikasyon sa lungsod.

Sa pagtaya ng Office of the Civil Defense – Region 10, siyam na ang patay habang tatlo ang nawawala sa naturang lugar.

Naglabas na ng kautusan si Manila Mayor Honey Lacuna-Pangan sa paggamit ng mga paputok at iba pang uri ng pyrotechnic devices para sa ligtas na pagsalubong sa bagong taon.

Batay sa apat na pahinang Executive Order 58, ang lahat ng uri ng mga paputok at pyrotechnics ay dapat ilaan lamang sa tamang lugar sa bawat komunidad na may kaukulang permiso mula sa Bureau of Permits.

Papayagan lamang ang pagsisindi ng baby rocket, bawang, maliit na trianggulo, el diablo, sinturon ni hudas, kwitis at lahat ng may limitado lamang na pulbura.

Pwede rin ang pyrotechnic devices, gaya ng sparklers, luces, jumbo, regular at special fountain, roman candle, trompillo, whistle device, butterfly at iba pang uri ng “pa-ilaw”.

Mahigpit namang ipinagbabawal ang paggamit, paggawa, pagbebenta at distribusyon ng iba pang uri ng paputok at pyrotechnic devises, tulad ng super lolo, lolo thunder, five star, og, pla-pla;

Pillbox, watusi, piccolo, giant whistle bomb, super bawang, goodbye philippines, goodbye earth, bin laden, coke in can at iba pang magdudulot ng panganib sa buhay at mga ari-arian.