Drew Nacino

Muling pina-aalalahanan ng Department of Health (DOH) ang mga magulang na gabayang maigi ang kanilang mga anak ngayong magba-bagong taon.

Ito’y sa gitna nang patuloy na pagtaas ng bilang ng firecracker-related injuries, kung saan pabata nang pabata ang mga nabibiktima.

Halimbawa na lamang sa Jose R. Reyes Memorial Medical Center (JRRMMC) sa Maynila, mas maraming biktima ng paputok na edad 18 pababa.

Ayon kay JRRMMC Chief, Dr. Emmanuel Montaña, pawang edad 18 pababa ang karaniwang nagiging biktima ng fireworks-related injuries simula 2017 hanggang 2021 kaysa mga nakatatanda.

Gayunman, karamihan ng mga nasusugatan ay hindi naman nagpapaputok o hindi aktibo sa paggamit ng firecracker kundi kadalasang nanonood lamang.

Sa ngayon ay wala pang naitatalang firecracker-related injuries ang nasabing ospital dahil na rin umano sa epektibong “Iwas Paputok” campaign ng DOH.

Samantala, aminado si Health Officer-In-Charge Maria Rosario Vergeire na medyo nasabik ang publiko sa selebrasyon ng bagong taon, lalo’t hindi naman gaanong nakapagdiwang sa nakalipas na dalawang taon dahil sa COVID-19 pandemic.

Target ng Department of Information and Communications Technology (DICT) na tapusin sa susunod na taon ang paglalagay ng karagdagang free WiFi sites.

Ito, ayon kay DICT Undersecretary Anna Mae Lamentillo, ay upang paigtingin ang digital transformation efforts sa buong bansa.

Ayon kay Lamentillo, layunin nilang makapaglagay ng 9,762 additional sites sa mga pampublikong lugar at 162 sites sa state universities at colleges.

Sa kasalukuyan anya ay mayroong 4,757 live sites sa Metro Manila at 75 lalawigan sa ilalim ng digitalization initiative ng gobyerno.

Kabilang ang digitalization sa mga prayoridad ng administrasyon ni Pangulong Bongbong Marcos at kanyang direktiba sa kagawaran na tiyakin ang universal connectivity at palakasin ang e-governance.

Layunin ng nasabing hakbang paghusayin ang serbisyo ng gobyerno sa taumbayan.

Umabot na sa mahigit 6-M sim cards ang nairehistro sa bansa.

Batay ito sa datos ng National Telecommunications Commission (NTC) sa ikatlong araw ng implementasyon ng Sim Registration Law.

Pinaka-marami ang nagparehistro sa Globe telecom, 2.7-M; Smart, 2.6-M at DITO Telecommunity, 760,000.

Mayroon lamang anim na buwan o 180 araw ang mga subscriber para irehistro ang kanilang gamit na sim cards upang hindi ma-deactivate ang mga ito.

Nitong Martes, Disyembre 27 nang umarangkada ang sim registration.

Gumugulong na ang imbestigasyon ng Department of Agriculture (DA) sa dahilan ng pagpalo ng presyo ng pulang sibuyas sa P720 kada kilo.

Inihayag ni DA Assistant Secretary Kristine Evangelista na price manipulation at smuggling ang tinitingnan nilang anggulo sa pagsirit sa P720 ng presyo ng kada kilo ng sibuyas.

Posible anyang may nag-hohoard ng nasabing agricultural product na dahilan ng pagtaas ng presyo nito.

Ayon kay Evangelista, kailangan ng kooperasyon ng retailers upang matunton at mahuli ang onion traders na nagbebenta nang sobrang mahal.

Sa isyu naman ng smuggling, nakatatanggap umano si DA Assistant Secretary James Layug ng mga lead sa tulong ng Bureau of Customs.

NitongMiyerkules ay inirekomenda ng kagawaran na itaas sa P250 ang suggested retail price ng pulang sibuyas simula ngayong araw.

Umakyat na sa 32 ang nasawi sa flashfloods bunsod ng malakas na pag-ulang dala ng shear line sa ilang bahagi ng Visayas at Mindanao.

Ayon kay NCR-OCD Information Officer Diego Agustin Mariano, pinaka-marami o labing-anim ang naitala sa Northern Mindanao.

24 naman ang nawawala kabilang ang 12 sa Bicol region.

Samantala, nasa 450,000 katao o mahigit 124,000 pamilya na ang apektado ng kalamidad.

Pawang mga residente ang mga ito ng MIMAROPA, Bicol, Western Visayas, Central Visayas, Eastern Visayas, Zamboanga, Northern Mindanao, Davao, CARAGA at Bangsamoro Autonomous Region in Muslim Mindanao.

Sa nasabing bilang ng mga naapektuhang populasyon, nasa 56,000 katao na ang nananatili sa evacuation center.

Sumadsad sa 20.5 degrees celsius ang temperatura sa Metro Manila, kahapon.

Ito na sa ngayon ang pinaka-malamig na araw sa pagsisimula ng 2022-2023 amihan season.

Naitala ng pagasa ang mababang temperatura sa science Garden Monitoring Station sa Quezon City,alas-6:10 ng umaga.

Bumagsak naman sa 12.6 degrees celsius ang temperatura sa Baguio City; 18.2 degrees celsius sa Tanay, Rizal; 18.6 degrees celsius sa Casiguran, Aurora;

18.8 degrees celsius sa Malaybalay, Bukidnon; 19.6 degrees celsius sa Laoag City, Ilocos Norte; 19.7 degrees celsius sa Tuguegarao City, Cagayan at 19.8 degrees celsius sa Abucay, Bataan.

Inaasahan naman ng PAGASA na titindi pa ang malamig na panahon sa pagitan ng Disyembre ngayong taon at Pebrero ng susunod na taon dahil sa amihan.

Suportado ng Private Hospitals Association of the Philippines Incorporated (PHAPI) ang pagpapalawig sa state of calamity sa bansa hanggang sa unang quarter ng susunod na taon.

Sa gitna ito ng banta ng panibagong COVID-19 Omicron subvariants.

Ayon kay PHAPI President, Dr. Jose Rene De Grano, hindi pa naman tuluyang naglalaho ang COVID-19 dahil nanganganak pa rin ito ng mga bagong subvariant.

Kailangan anyang obserbahan at i-monitor kung bababa ang mga kaso sa susunod na tatlong buwan bago tuluyang magpasya kung aalisin na ang state of calamity.

Kamakailan ay hiniling ng DOH kay Pangulong Bongbong Marcos na palawigin ang state of calamity na nakatakdang mapaso sa Sabado, Disyembre 31.

Samantala, inihayag ni De Grano na nananatiling mababa o low risk ang COVID-19 admissions sa mga pribadong pagamutan pero dapat maghanda ang mga ospital sa posibleng pagsirit muli ng kaso matapos ang holiday season.

Aabot na sa mahigit 2-M sims ang rehistrado sa unang dalawang araw ng sim registration.

Pinaka-marami sa mga nakapag-rehistro hanggang kahapon ay pawang customer ng Globe na aabot sa 1.5-M.

Sa kabila ito ng ilang aberyang naranasan noong Martes dahilan upang pansamantalang hindi ma-access ang registration websites ng nasabing telco.

Nakapagtala naman ang DITO Telecommunity ng mahigit 530,000 registered sims hanggang kahapon.

Bagaman hindi pa isinasapubliko ng Smart ang kanilang second-day figure, nasa 400,000 sims naman ang rehistrado sa unang araw ng implementasyon.

Una nang ipinag-utos ng National Telecommunications Commission sa mga naturang telco na magsumite ng report na nagdedetalye kung ano ang nangyari sa unang araw ng registration.

Target ng gobyerno na maabot sa 2.6-M ang international tourist arrivals sa susunod na taon.

Ito ang pinaka-mababang tourist arrival projection sa low scenario ng Department of Tourism batay sa kanilang isinumiteng report kay Pangulong Bongbong Marcos.

Gayunman, maaaring umaabot sa 6.4-M ang daragsang dayuhang turista kung sa high scenario.

Simula noong Pebero, nasa 2.4-M ang foreign tourist arrivals nang magbukas muli ang Pilipinas para sa mga dayuhan.

Naghain na ng motion for reconsideration ang PhilHealth kaugnay ng desisyon ng korte suprema na nagbabawal sa pagpapalabas ng P83-M benefits na ipinamahagi nito sa mga opisyal at empleyado noong 2014.

Ayon kay PhilHealth Corporate Communications Department Senior Manager Rey Baleña, nakapaghain na ng petisyon ang PhilHealth at umaasa silang magiging positibo ang tugon dito ng supreme court (SC).

Marami anyang mga empleyado ang nakatanggap ng nasabing mga benepisyo, taliwas sa mga ulat na mga opisyal lamang ang nabigyan.

Dahil dito, aminado si Baleña na magiging mahirap ang pagbabalik ng nasabing halaga.

Nauna nang ipinag-utos ng SC sa PhilHealth na ibalik ang nasa P83-M na halaga ng benefits na ipinamahagi ng PhilHealth bilang education allowance at birthday gifts.

Iginiit ng kataas-taasang hukuman na kailangang aprubado ng ehekutibo at Department of Budget and Management ang anumang benepisyong ipapamahagi ng PhilHealth sa mga empleyado at opisyal nito.