Drew Nacino

Karagdagang 369 daily Covid-19 cases ang naitala ng DOH kahapon o isang araw matapos ang pagdiriwang ng bagong taon.

Ito na sa ngayon ang pinaka-mababang single-day tally sa nakalipas na limang araw at ika-11 sunod na beses na mas mababa sa 1,000 new cases na naitala simula noong December 22.

Sumadsad naman sa 12,660 kahapon ang active cases, na pinaka-mababa sa halos anim na buwan, kumpara sa 13,061 noong linggo.

Batay sa datos ng DOH, nasa 4,065,173 na ang total caseload habang nadagdagan ng 777 ang recoveries kaya’t umakyat na sa 3,987,000 ang gumaling.

Nadagdagan naman ng 18 ang fatalities dahilan upang sumampa sa 65,415 ang death toll.

Nangunguna pa rin ang Metro Manila sa may pinaka-maraming bagong Covid cases sa nakalipas na dalawang linggo, 3,050; sinundan ng CALABARZON, 1,431; Central Luzon, 682 at Western Visayas, 374.

Buena manong bigtime oil price hike ang sumalubong sa mga motorista ngayong unang Martes ng bagong taon.

Epektibo alas 12:01 kaninang hatinggabi, inilarga ng Caltex ang dagdag P2.10 sa kada litro ng diesel; P2.90 sa gasolina habang P3.05 sa kerosene.

Sinundan ito ng kahalintulad na price increase ng Shell, Petron, PTT Philippines, Jetti Petroleum, Flying V, Seaoil at Petrogazz, kaninang alas-6 ng umaga.

Mamayang alas-4:01 naman ng hapon aarangkada rin ang malakihang dagdag presyo ng Cleanfuel.

Ito na sa ngayon ang ikatlong sunod na linggong nagpatupad ng price hike ang mga kumpanya ng langis sa gasolina at kerosene o gaas.

Isa sa mga dahilan nito ang muling pagbubukas ng ekonomiya at pagluluwag ng China sa kanilang travel restrictions sa kabila ng pinaka-matindi umanong Covid-19 surge na nararanasan sa bansa.

Inaasahan ng pamunuan ng North Luzon Expressway (NLEX) na magtutuloy-tuloy hanggang ngayong araw ang bugso ng libu-libong nagsisibalikan sa Metro Manila matapos ang holiday season.

Ayon kay NLEX Traffic Operations Department head Robin Ignacio, na-monitor nila ang pagdami ng mga sasakyan simula kahapon.

Umabot sa 10,000 sasakyan anya ang kanilang na-monitor sa Dau Exit pa lamang sa Pampanga at inaasahang madaragdagan pa ito ngayong madaling araw hanggang mamayang alas-10 ng umaga.

Karamihan ay papauwi ng Metro Manila habang may ilan pa ring bumibyahe pa-Norte.

Sa Parañaque Integrated Terminal Exchange, inihayag ni PITX spokesman Jason Salvador na nasa 160,000 hanggang 170,000 ang maaaring dumagsa sa terminal.

Inaasahan anya nilang hanggang mamaya ay magiging masikip pa rin ang dagsa ng mga pasahero dahil karamihan sa mga ito ay didiretso sa trabaho.

Tutol ang mga negosyante sa posibilidad na isapribado ang mga paliparan sa bansa.

Sa gitna ito ng naranasang aberya sa Ninoy Aquino International Airport dahilan upang makansela ang halos 300 flights at maapektuhan ang libu-libong pasahero sa unang araw ng bagong taon.

Iginiit ni Philippine Chamber of Commerce and Industry president George Barcelon na hindi maaaring isapribado ang lahat ng airport sa bansa.

Mas ligtas anya ang kanyang pakiramdam kung gobyerno pa rin ang mangangasiwa ng mga airport.

Kabilang ang flight ni Barcelon mula dubai, sa mga naapektuhan noong linggo.

Binuhay naman ni Go Negosyo Founder Joey Concepcion, Private Sector Advisory Council Member ng Marcos Administration, ang 2018 proposal na lumikha ng isang consortium upang i-modernize ang NAIA.

Kung seryoso anyang dininig ng gobyerno ang proposal, noon pa sanang isang taon hanggang 2024 sinimulan ang rehabilitasyon ng nabubulok na airport.

Pero bago pa man nanganap ang aberya, una nang inanunsyo ni Transportation secretary Jaime Bautista na bukas ang administrasyon sa mga proposal na isapribado ang pangunahing gateway ng bansa.

Sumampa na sa 44 ang nasawi bunsod ng pagbaha dulot ng pag-ulang dala ng shear line sa Visayas at Mindanao.

Batay sa pinakahuling datos ng National Disaster Risk Reduction and Management Council (NDRRMC) hanggang kaninang ala-6:00, pinakamarami sa mga nasawi ay mula sa Northern Mindanao.

Ayon sa NDRRMC, 28 ang nawawala habang 12 ang nasugatan.

Pumalo naman sa 130,000 pamilya o mahigit kalahating milyong katao na ang apektado ng kalamidad sa Northern Mindanao, Bicol Region, Zamboanga Peninsula, Davao Region, Eastern Visayas at CARAGA.

Kabilang na rito ang mahigit 15,000 pamilya o halos 67,000 indibidwal na nananatili sa mga evacuation center.

Pinagpapaliwanag ng Metropolitan Manila Waterworks Sewerage System (MWSS) Regulatory Office ang Maynilad sa paulit-ulit na water service interruptions na sineserbisyuhan ng kanilang Putatan water treatment plant sa Muntinlupa.

Ito’y bunsod ng kawalan ng public advisories at notices sa water service interruption schedules, patuloy na interruption schedules at pagdagsa ng reklamo ng customers.

Ayon kay MWSS Chief Regulator Patrick Ty, kung magpapatuloy ang sitwasyon, hindi sila magdadalawang-isip na pagmultahin ang Maynilad gaya ng kanilang ipinataw na penalty noong Oktubre kung hindi agad reresolbahin ang problema.

Nilinaw naman ni Maynilad Spokesperson Jennifer Rufo na nabawasan ang water production ng nasabing treatment plant sa muntinlupa dahil sa pinsala sa equipment ng kanilang pasilidad.

Nagpaliwanag na anya sila sa MWSS at mino-monitor ang mga hakbang na isinasagawa ng Maynilad.

Wala na umanong pag-asa ang pangako ni Pangulong Bongbong Marcos na ibaba sa P20 kada kilo ang presyo ng bigas.

Ito, ayon sa grupong Samahang Industriya ng Agrikultura (SINAG), ay dahil posibleng magmahal pa ang bigas sa susunod na taon.

Inihayag ni SINAG Chairman Rosendo So na maaaring umabot pa sa P42 ang kada kilo ng bigas sa Enero.

Ayon kay So, bagaman naglaan si Pangulong Marcos ng P4-B fertilizer subsidy, wala pang natatanggap ang mga magsasaka.

Mataas pa rin anya gastos sa pag-ani kapag walang subsidiya kaya magiging mataas din ang presyo ng bigas.

Ipinaliwanag ni So na tumaas sa World Market ang presyo ng bigas kaya’t maaaring sumabay ang mga local rice dealer sa presyo ng mga imported rice sa bansa.

Pinulong na ni Manila International Airport Authority (MIAA) General Manager Cesar Chiong ang mga kinatawan mula sa mahigit 30 airline companies sa NAIA terminals.

Ito’y upang matiyak na walang abala sa paglalakbay sa pagtatapos ng holiday.

Ayon kay Chiong, kailangangbuksan ang check-in counters sa oras at posibleng mas maaga pa, para ma-accommodate ang mga pasaherong maagang dumarating upang makaiwas sa traffic.

Batay sa mga karaniwang advisories na inilalabas ng airlines, ang mga pasahero ay pinapupunta sa paliparan tatlong oras bago ang kanilang flight  kung  international at dalawang oras para sa domestic flight.

Gayunman, wala naman umano itong silbi kung hindi rin magbubukas nang maaga ang mga counter para i-accommodate ang mga biyahero nang maaga.

Tiniyak ng PhilHealth ang pagsunod sa kautusan ng korte suprema na ibalik ang P83-M na ipinamahagi ng ahensya sa kanilang mga opisyal at empleyado noong 2014 na idineklarang iligal.

Ayon kay PhilHealth Executive Vice President Eli Dino Santos, maka-aasa ang publiko na tumalima ang PhilHealth sa pasya ng Commission on Audit (COA) na i-disallow ang P83-M na educational assistance at birthday gift benefits.

Gayunman, nanindigan si Santos na walang mali o iregularidad sa mga nasabing benepisyo dahil ibinigay nila ito “in good faith” sa mga karapat-dapat na opisyal at empleyado.

Nakatitiyak din anya ang publiko, lalo ang mga PhilHealth member na sinisinop ng state insurer ang kanilang pondo at ang pagbabayad ng benefit claims ang kanilang numero unong prayoridad.

Ang disallowance mula sa COA ang naging laman ng 21 pahinang desisyon ng supreme court noong September 27 na nagbasura sa petisyon ng PhilHealth laban sa inilabas na ruling ng komisyon noong 2018.

Isinailalim na sa state of calamity ang bayan ng Brooke’s Point, Palawan bunsod ng pagbaha dulot ng malakas na pag-ulang dala ng shear line at amihan, simula pa noong bisperas ng pasko.

Ayon kay Brooke’s Point Vice Mayor Jean Feliciano, mahigit 400 pamilya o nasa 1,500 katao na ang apektado sa pitong barangay.

Tinaya anya sa 300 pamilya ang nananatili sa evacuation centers habang naglaan na ang local government ng P9.5-M bilang tulong sa mga apektado ng abot-dibdib na baha.

Bukod sa Brooke’s Point, apektado rin ng pagbaha ang mga bayan ng Bataraza, Quezon, Narra, Sofronio Española, Balabac at Taytay.