Drew Nacino

Posibleng tumaas ang presyo ng Liquefied Petroleum Gas (LPG) sa ikalawang quarter ng taon.

Ito ang babala ni Assistant Director Rodela Romero ng Department of Energy – Bureau of Oil Industry Management bunsod ng inaasahang pagtaas ng demand sa India.

Ayon kay Romero, mangangailangan ng maraming supply ang India, lalo’t nalalapit na ang eleksyon sa nasabing bansa.

Sa kabila nito, umaasa anya ang DOE na magtutuloy-tuloy ang rollback sa LPG.

Nito lamang linggo nang simulang ipatupad ng mga oil company sa Pilipinas ang tapyas-presyo sa LPG na P4.20 at AutoLPG na P2.35 per kilogram.

Dahil naman ito sa bumababang demand at lumakas na produksyon sa Middle East.

Halos dalawang linggo pa ang aabutin bago tuluyang maibalik sa normal ang supply ng tubig sa ilang bahagi ng Cavite at Southern Metro Manila.

Kasalukuyang nakararanas ng water service interruption ang libu-libong residente sa anim na bayan sa Cavite, Las Piñas, Muntinlupa at Parañaque Cities.

Ito’y dahil umano sa nasirang sludge removal equipment sa treatment plant ng Maynilad sa Putatan, Muntinlupa.

Ayon sa Maynilad, hanggang Jan. 15, pa ang pagsasaayos sa nasabing aparato kaya magpapatuloy ang kakulangan ng tubig sa mga naturang lugar.

Tiniyak ng nasabing water concessionaire na nakikipag-ugnayan sila sa mga lokal na pamahalaan upang madagdagan ang water tankers na umiikot sa mga apektadong lugar.

Humingi naman ng paumanhin ang Maynilad sa abalang dulot ng service interruption.

Ilang pasahero sa Clark International Airport sa Pampanga ang naapektuhan din ng kanselasyon ng mga flight sa Ninoy Aquino International Airport.

Dismayado rin ang mga biyahero dahil ilang oras silang naghintay bago abisuhang kanselado ang kanilang flights.

Ayon sa Luzon International Premier Airport Development Corporation, operator ng Clark Airport, nagbalik na ang kanilang system at kaunting pasahero na lamang ang kanilang na-monitor.

Naganap ang aberya nang mag-shutdown ang himpapawid ng bansa dahil sa technical glitch ng Air Navigation Traffic System ng Civil Aviation Authority of the Philippines noong bagong taon.

Pinag-aaralan ng Department of Transportation ang posibilidad na ibalik ang libreng sakay sa EDSA Bus Carousel kaakibat ng planong pagsasapribado nito.

Ayon kay Transportation secretary Jaime Bautista, may inilaang pondong P2.1B ang kongreso para sa Contract Service Program.

Maaaring dito anya nila hugutin ang pondo para sa libreng sakay.

Idinagdag ni Bautista na gagawa ang DOTr at Land Transportation Franchising and Regulatory Board ng programa kung paano gagamitin ang P2.1B na budget.

Nito lang linggo, Enero a –1, nagtapos ang libreng sakay sa EDSA Busway kaya’t maraming mga pasahero ang naninibago at umaasang ibabalik ang free ride.

Nasa 3,000 pasahero sa Iloilo International Airport ang damay din sa naranasang aberya sa Ninoy Aquino International Airport nitong bagong taon.

Magugunitang kinansela ang flights mula at patungo sa nasabing airport sa Bayan ng Cabatuan matapos maantala ang flight operations sa NAIA sa unang linggo ng taong 2023.

Batay sa datos ng airline companies, nasa 800 pasahero ng Philippine Airlines ang apektado sa Iloilo International Airport; halos 1,400 sa  Cebu Pacific at halos 500 sa Air Asia.

Maraming pasahero rin ang nagulat at dismayado dahil ilang oras ang kanilang hinintay bago tuluyang nakaalis.

Bagaman nagbalik na ang flights mula Iloilo kahapon, marami pa rin ang kanselado.

Una nang ipinaliwanag ng Civil Aviation Authority of the Philippines na ang pagka-antala ng operasyon ay bunsod ng problema sa electrical network ng kanilang Communications, Navigation and Surveillance-Air Traffic Management System.

Epektibo pa rin ang health protocols ng bansa laban sa anumang Covid-19 variant.

Ito ang tiniyak ng Department of Health sa gitna ng muling pagsirit ng kaso sa China.

Ayon sa DOH, ang pagpapatupad ng karagdagang paghihigpit sa mga dumarating na biyahero lalo mula sa China o anumang pagbabago sa Covid-19 protocols ng bansa ay dapat na nakabatay sa siyensya at ebidensya.

Nitong Dis. 31, naglabas ng memorandum si DOH officer-in-charge Maria Rosario Vergeire na nanawagan para sa heightened alert status mula sa lahat ng manlalakbay galing china.

Isinumite ang Memo sa Office of the President at inirerekomenda ang pagpapalawig sa State of Calamity ng tatlong buwan upang matiyak na walang hadlang sa pagpapatupad sa Covid-19 protocols ng pamahalaan.

Umaasa naman ang kagawaran na ilalabas ng palasyo ang desisyon ngayong linggo.

Kinumpirma ng Department of Health at Philippine Health Insurance Corporation (PhilHealth) na natanggap na nila ang Memorandum mula sa Office of the President na nag-uutos na suspendehin ang contribution increase at income ceiling ngayong taon.

Ang increase ay alinsunod sa mga probisyon ng Republic Act 11223 o Universal Healthcare Act.

Sa isang joint statement, sinabi ng DOH at PhilHealth na tatalakayin nila bukas ang naturang issue at maaaring maglabas ng mga karagdagang impormasyon matapos ang pulong.

Ang PhilHealth ay attached agency ng DOH, kaya’t obligadong tumalima sa anumang direktiba mula sa Pangulo.

Maaaring magdalawang-isip ang mga nagbabalak bumisita sa bansa ngayong taon at malaki ang magiging epektong dulot nito sa ekonomiya at pagsusumikap ng pamahalaan na ipromote ang Pilipinas.

Ito ang reaksyon ni Senate Committee on Tourism chairperson Nancy Binay makaraang mabahala sa nangyaring aberya sa NAIA dahilan para mapilay ang operasyon at makansela lahat ng flights.

Ayon kay Sen. Binay, mabuti na lamang at walang nangyaring anumang aksidente dahil sa technical glitch sa unang araw ng taong 2023.

Ngayon anyang nagbubukas na ang turismo ng bansa ay hindi na dapat maulit ang ganitong aberya lalo’t mag-ho-host pa naman ang Pilipinas ng maraming international events ngayong taon, kabilang na ang 2023 FIBA World Cup.

Aminado ang mambabatas na nakalulungkot na laman ng bawat balita sa ibayong dagat ang nangyaring aberya sa NAIA, na pangunahing international airport ng bansa.

Kaya’t ang tanong ni Binay, paano anya magagarantiyahan sa mga dayuhang guest o turista na maganda ang magiging karanasan nila sa bansa kung hindi mahahanapan ng solusyon ang problema sa ating public transport system.

Dahil dito, umapela ang Senadora sa Department of Budget and Management tulungan ang Civil Aviation Authority of the Philippines na humanap ng kinakailangang pondo para sa modernisasyon. – ulat mula kay Cely Ortega-Bueno (Patrol 19)

Posibleng sabotahe o isang uri ng kapabayaan ang nangyaring aberya sa NAIA sa unang araw ng bagong taon dahilan para makansela lahat ng flights.

Ito ang inihayag ni Senator J.V. Ejercito makaraang igiit na dapat talagang imbestigahan ang nangyari sa NAIA upang matiyak na hindi na ito mauulit.

Para kay Ejercito, maraming dapat ipaliwanag ang Civil Aviation Authority of the Philippines (CAAP).

Dapat anyang mayroong backup ang Air Traffic Management System sa mga insidenteng tulad nang naranasan nitong linggo.

Binigyang-diin ng senador na ang kawalan ng  Functioning Radar System ay hindi lamang delikado para sa air travel bagkus maituturing itong National Security Concern.

Dahil dito, dapat na anyang ikunsidera ng gobyerno ang pagbawi sa vital utilities, tulad ng National Grid Corporation of the Philippines na kayang ilugmok ang ekonomiya kung nanaisin ng nagpapatakbo nito. – ulat mula kay Cely Ortega-Bueno (Patrol 19)

Itinanggi ng Civil Aviation Authority of the Philippines (CAAP) ang mga ispekulasyon na sinabotahe o nagkaroon ng hacking sa Air Traffic Management System dahilan para isara ang Philippine Airspace nitong linggo.

Ayon kay CAAP spokesperson Eric Apolonio, batid nila ang kumakalat na ispekulasyon sa social media sa posibleng insidente ng hacking at hindi basta technical glitch ang nangyari sa sistema.

Gayunman, nilinaw ni Apolonio na pinaka-bantay-saradong pasilidad ng CAAP ang Communications, Navigation and Surveillance Systems for Air Traffic Management kaya’t imposibleng sinabotahe ito o hinack.

Tadtad anya ng camera ang nasabing pasilidad at hindi basta puwedeng pasukin ng kahit sino kaya’t makikita kung mayroong human intervention.

Kasabay ng pagpasok ng unang araw ng taon, umabot sa 282 flights ang nakansela sa NAIA, naantala at na-divert dahil sa technical issue sa Philippine Air Traffic Management Center.

Dahil dito, nasa 56,000 pasahero ang naapektuhan at bagaman nakabalik na sa normal ang operasyon, maraming biyahero ang nadismaya matapos i-atras ang schedule ng kanilang flight.