Drew Nacino

Sumadsad na sa 580 ang karagdagang COVID-19 cases sa bansa, batay sa datos mula sa COVID-19 tracker ng Department of Health (DOH) kahapon.

Ito na ang pinaka-mababang additional COVID-19 cases na naitala ngayong taon at simula noong December 28, 2020.

Bumagsak din sa 47,471 ang active cases habang lumobo na sa 3 million 669 thousand 283 ang kabuuang kaso.

Nasa 3,564,630 naman ang total recoveries habang 57,182 ang total death toll.

Bagaman itinigil na ng DOH ang daily COVID-19 bulletin, ia-update naman ito kada linggo at tuwing Lunes inilalabas.

Nagtalaga na si Pangulong Rodrigo Duterte ng bagong Social Security System (SSS) President at CEO.

Kinumpirma ni Finance Secretary Carlos Dominguez,III na iprinomote ni Pangulong Duterte si SSS Commissioner Michael Regino bilang pangulo at nanumpa nitong Martes.

Ayon kay Dominguez, inaasahan ng punong ehekutibo na ipatutupad ni Regino ang mga hakbang na magpapahusay sa serbisyo ng ahensya at magpapalago sa reserves ng provident fund.

Bago pumasok sa gobyerno, si Regino ay nagsilbing executive ng ilang mining firms, gaya ng Agata Ventures Exploration Drilling Corporation at St. Augustine Gold and Copper Limited.

Itinanggi naman ng kalihim na sinibak sa serbisyo ni Pangulong Duterte si dating SSS President at CEO Aurora Ignacio, isang linggo matapos maharap ang ahensya sa sangkaterbang reklamo mula sa mga miyembro at pensioner.

Magugunitang, daan-daang katao ang sumabak sa mala-usad pagong na pila sa sss main branch sa Quezon City at ilan pang branch upang magsumite ng kanilang mga dokumento, matapos isailalim sa alert level 1 ang Metro Manila.

Umabot na sa 55 tripulanteng filipino ang naka-alis mula sa Ukraine.

Kabilang sa mga nadagdag ang 29 na Pinoy na tumawid sa Ukrainian border patungong Bucharest, Romania.

Sinalubong ang mga tripulanteng Pinoy ng mga opisyal ng Department of Foreign Affairs (DFA) mula sa Philippine Embassy sa Bucharest.

Binubuo ang repatriate ng dalawampung pinoy crew members ng MV Global Aglaia, dalawa mula sa MV Joseph Schulte at pito mula sa MV Star Helena.

Umalis ng Ukraine ang mga mandaragat sa pamamagitan ng pagtawid sa Moldova sa tulong ng Philippine Honorary Consulate sa Chisinau at Philippine Embassy sa Budapest, Hungary.

Minaliit ng Commission on Elections (COMELEC) ang suspensyon ng fact-checking partnership nito sa news agency na Rappler sa gitna ng mga batikos na bumigay ang poll body sa hirit ng Office of the Solicitor General (OSG) na ibasura ang kasunduan.

Nilinaw ni COMELEC Spokesman, Dir. James Jimenez na hindi lamang ang Memorandum of Agreement (MOA) sa Rappler ang kanilang inisyatibo laban sa election misinformation.

Ayon kay Jimenez, wala namang epekto ang suspensyon ng MOA sa mga kahalintulad na hakbang ng poll body at sa katunayan ay nakikipag-tulungan din sila sa iba pang social media platform.

Nitong Martes, nag-issue ang noo’y COMELEC acting chairperson Socorro inting ng memorandum na nagsususpinde sa MOA ng poll body sa Rappler sa harap ng nakabinbing petisyon ng OSG sa Supreme Court.

Ipinunto ni Jimenez na hindi naman binabaliwalang COMELEC ang kasunduan at ang suspensyon ay hindi taliwas sa nauna nilang posisyon na depensahan ang moa pero dahil may elemento ng pagtutol mula sa Korte Suprema ay hindi na nila ito kokontrahin.

Sa hirit ng OSG, nais nitong maglabas ang SC ng temporary restraining order at ideklarang void ang moa dahil umano sa paglabag sa konstitusyon at iba pang batas.

Magkakaroon ng malaking epekto sa social services ng gobyerno ang isinusulong na suspensyon ng Excise Tax sa mga produktong petrolyo.

Ito ang ibinabala ng Department of Budget and Management (DBM) sa gitna ng lumalakas na panawagang suspendihin na ang naturang buwis upang mabawasan ang epekto ng hindi maawat na oil price hike.

Ayon kay DBM Secretary Tina Rose Canda, bagaman makatutulong sa transport sector ang nabanggit na panawagan, mahihirapan naman ang gobyerno na pondohan ang ilan nitong social services at programs.

Kabilang anya sa maaaring maapektuhan ang edukasyon, kung saan mawawalan o mababawasan ng pondo para sa K-12; health facilities at medical assistance ng DOH, maging ang ayuda ng DSWD sa mga indibidwal na nasa crisis situation.

Ipinaliwanag ni Canda na kailangan ng malalimang pagtalakay sa issue ng Excise Tax Suspension at Vat Moratorium sa mga produktong petrolyo.

Isang barangay kagawad ang patay habang walo ang sugatan sa pamamaril sa kalagitnaan ng kasalan sa bayan ng San Pablo, Isabela.

Kinila ang napatay na biktima na si Girliy Telan, barangay kagawad ng Simanu Sur, San Pablo.

Kabilang naman sa nasugatan ang chairman ng Barangay Dalena na si Brixsio Gammaru.

Ayon sa Isabela Provincial Police, nagsasayawan ang mga biktima sa kasal ni Corporal Bryan Pattalitan nang biglang sumulpot ang hindi nakilalang gunman.

Si Gammaru ang target ng salarin habang nadamay si Kagawad Telan.

Blangko pa ang pulisya sa motibo sa pamamaril at pagkakilanlan ng nasa likod ng krimen.

Tinanggal na ng pamahalaang lungsod ng Baguio ang limitasyon nito sa bilang ng mga turistang pinapayagan sa summer capital.

Ayon kay Mayor Benjamin Magalong, inalis ng lokal na pamahalaan ang limitasyon upang matukoy ang threshold ng bilang ng mga turistang dumarating sa pagsasailalim sa syudad sa alert level 2 noong Pebrero.

Ang transition patungo sa new normal ay bahagi anya ng economic recovery ng lungsod.

Nasa ilalim na ng alert level 1 ang City of Pines mula Marso a–1 hanggang a-15.

Ilang parameter ang itinakda ng LGU upang maitatag ang threshold tulad ng manageability ng traffic, manageability ng mga tao, lalo na sa mga lugar na pinagkukumpulan gaya ng mga palengke at mall.

Nagulat at nadismaya ang ilang residente ng mga lungsod ng Maynila, Caloocan at Quezon matapos mawalan sila ng tubig dahil sa pagpapatupad ng Maynilad ng labingwalong oras na emergency water interruption.

Sapul sa biglaang water interruption ang Tundo, Maynila at ilang bahagi ng Quezon City habang nito namang Martes ng gabi nawalan ng tubig sa ilang bahagi ng Caloocan.

Ayon kay Maynilad Spokesperson Jennifer Rufo, kinulang ang suplay ng tubig na pumasok sa La Mesa Treatment Plant at sinabayan pa ito ng mataas na demand dahil sa init ng panahon.

Bumababa rin anya ang antas ng tubig sa Ipo Dam, Bulacan bunsod ng kakulangan ng ulan sa naturang lugar.

Ipinaliwanag ni Rufo na kinailangang agad putulin ang supply ng tubig dahil mas malaking problema kung masasaid ang imbak kaya’t hindi na nila nagawang makapagpalabas agad ng abiso.

Iginiit naman ni Rufo na nakapagpadala sila ng mensahe pero marahil sa text traffic ay hindi umano ito natanggap agad.