Drew Nacino

Ikinabahala ng mga mambabatas, poll watchdog at mga IT expert ang kawalan ng transparency sa pag-iimprenta ng mga balota at pagsasaayos ng secure digital cards na gagamitin sa May 9 elections.

Sa pagdinig ng Senate Committee on Electoral Reforms, inihayag ng Parish Pastoral Council for Responsible Voting (PPCRV) at iba pang resource person na hindi sila pinapasok ng National Printing Office sa warehouse ng COMELEC sa Sta. Rosa, Laguna.

Ito’y upang magbantay na kadalasang nilang ginagawa noong mga nakaraang halalan.

Nilinaw naman ni COMELEC Printing Committee Vice Chairperson Helen Aguila-Flores na walang “definite denial” sa anumang hiling pero pansamantalang sinuspinde ni Commissioner Marlon Casquejo ang pagsasagawa ng obserbasyon dahil sa COVID-19 restrictions.

Ibinunyag din ni Flores na 66.4% na ng mga balota ang na-imprenta, kabilang ang 32% na naipadala na para sa packing at shipping, bagay na ikinadismaya ng mga senador dahil sa kawalan ng observer.

Sa ilalim ng Omnibus Election Code, dapat payagan ng COMELEC ang kinatawan ng anumang kandidato, political party o mga organisasyon na saksihan ang pag-iimprenta at pamamahagi ng mga balota at election returns at bantayan ang lugar kung saan nag-iimprenta.

Sinopla ng gobyerno ang hiling ng business process outsourcing (BPO) companies na ituloy ang karamihan sa kanilang operasyon sa pamamagitan ng work-from-home (WFH) set-up ng kanilang mga empleyado sa susunod pang anim na buwan.

Ayon kay Finance Secretary Carlos Dominguez, Chairman ng Fiscal Incentives Review Board, pinayagan lamang ang work-from-home arrangement sa kasagsagan ng COVID-19 infection surges.

Dahil anya sa tumataas na vaccination rate sa bansa, maaari naman nang magpatupad ng safety measures para sa pisikal na pagtatrabaho ng mga empleyado, kabilang ang mga nasa information technology-business process management firms.

Bilang bahagi ng economic re-opening para sa pagpapatuloy ng mas produktibong aktibidad, hinimok ng pamahalaan ang pagkakaroon ng on-site work sa ilalim ng alert level 1.

Ipinunto pa ng kalihim na darami pa ang mga oportunidad at magiging daan sa pagbangon ng local micro, small, and medium enterprises ang pagbabalik ng mga empleyado sa mga opisina.

Dapat tiyakin ng Commission on Elections (COMELEC) ang pagiging patas atmalinis ng halalan sa Mayo a–9.

Ito ang panawagan ng election watchdog na National Citizens Movement for Free Elections (NAMFREL) matapos ang pagkakatalaga ng bagong chairman at commissioners ng COMELEC.

Ayon sa NAMFREL, dapat pangatawanan ng poll body ang malinis na eleksyon, lalo’t requirement sa Automated Election System Law ang pagkakaroon ng “transparent at credible” na halalan at mabilis at wastong resulta.

Naniniwala ang election watch dog na ang pagtalima ng comelec sa polisiya ng “transparency at inclusivity” ay mahalaga upang makuha ang tiwala ng publiko at mapatatag ang integridad ng poll body maging ng halalan.

Ipinanawagan ng ilang guro sa Commission on Elections (COMELEC) ang pagtanggal sa 20% tax sa kanilang susuwelduhin sa halalan sa Mayo a–9.

Personal na nagtungo ang grupo ng mga guro sa COMELEC headquarters sa Intramuros, Maynila upang ilatag ang kanilang panawagan.

Ayon sa grupo, dalawang beses na silang lumiham sa poll body pero wala pa rin itong tugon sa kanilang apela.

Bagaman inihayag ni bagong COMELEC Commissioner George Garcia na suportado niya ang mga guro, tanging ang kongreso at Bureau of Internal Revenue (BIR) ang makasasagot sa kanilang hirit.

Lalahok pa rin si vice presidential candidate at Davao City Mayor Sara Duterte – Carpio sa mga political caravan at motorcade sa ibang lugar kahit kanyang ipinagbawal ang mga kahalintulad na mga aktibidad sa lungsod.

Ayon kay Duterte, hindi naman bawal sa ibang lugar ang motorcade at caravan.

Dinepensahan din ng alkalde ang desisyong ipagbawal ang mga caravan at motorcade sa davao sa pagsasabing pakikiisa ito sa mga apektado ng tumataas na presyo ng basic commodities, partikular ng fuel products.

Suportado naman ni presidential bet Leody De Guzman ang hakbang ng presidential daughter habang tatalima rin sa guidelines ng Davao City ang kapwa presidentiable na si Senador Manny Pacquiao pero ipinunto nitong mahalaga ang kampanyabilang bahagi ng eleksyon.

Samantala, bagaman ipinagtaka ni presidential candidate at Senador Panfilo Lacson ang pagbabawal ni mayor inday sa mga motorcade sa lungsod gayong kaliwa’t kanan ang caravan nito sa ibang lugar, umaasa siyang aalisin ito ng alkalde.

Karagdagang panahon ang hinihiling ng Overseas Workers Welfare Administration (OWWA) para mabayaran ang mahigit 1.7 billion pesos na utang sa mga hotel na nagsilbing COVID-19 quarantine facility.

Ayon kay OWWA Administrator Hans Leo Cacdac, hinihintay pa nilang maglabas ng pondo ang Department of Budget and Management (DBM).

Nakipag-dayalogo na rin anya sila sa Philippine Hotel Owners Association (PHOA) kaugnay sa naturang issue.

Tiniyak naman ni Cacdac na mababayaran nila ang mga pagkakautang nila ngayong Marso.

Ang hotel bills ay mula sa accommodation na ipinagkaloob sa mga returning overseas filipino worker sa gitna ng tulong ng gobyerno.

Hindi pa rin natitinag ang pusta ni dating Senador Nikki Coseteng na 2 million pesos laban kay Transportation Secretary Art Tugade at iba pang opisyal ng Department of Transportation (DOTr).

Ito ang binigyang-diin ni Coseteng kasabay ng kanyang panibagong hamon sa mga nasabing opisyal na sumama sa kanyang mag-ocular inspection upang maramdaman ang hirap sa pagbiyahe ng mga mananakay patungo sa provincial buses hanggang sa kanilang destinasyon.

Sa kanyang pagdalo sa isang forum sa Quezon City, inimbitahan ng dating senador si Tugade at iba pang opisyal ng kagawaran, maging ang publiko na magkita sila mamayang alas 10 ng umaga sa tapat ng isang fastfood chain sa Edsa-Monumento, Caloocan City.

Dito anya nila malalaman kung anong klaseng hirap ang dinaranas ng mga mananakay sa paglipat-lipat ng mga terminal papunta at palabas ng Metro Manila.

Samantala, nilinaw naman ng dating mambabatas na wala siyang pagmamay-ari na kahit isang pero hindi na niya matiis ang kaliwa’t kanang reklamo na kanyang natatanggap mula sa publiko.

Dapat nang suspendihin sa lalong madaling panahon ang Excise Tax sa langis upang maiwasan ang malaking epekto ng walang prenong oil price increase sa mga mamamayan.

Ayon sa ekonomistang si House and Ways Committee Chairman, Albay 2^nd District Rep. Joey Salceda, dapat magsakripisyo muna ang pamahalaan para sa kapakanan ng taumbayan.

Bagaman malaki ang mawawalang kita ng gobyerno sa Excise Tax sa ilalim ng Train Law, malaki naman ang matitipid ng taumbayan.

Samantala, inihirit din ni Salceda na suspendihin ang koleksyon ng VAT sa langis.