Drew Nacino

Karagdagang 4,131 COVID-19 cases ang naitala sa bansa sa nakalipas na isang linggo o mula Marso a – syete hanggang a – trese.

Sa datos ng Department of Health (DOH), ang daily average new cases ngayong linggo ay nasa 590 o mas mababa ng 35% kumpara sa mga kaso noong Pebrero  a – bente otso hanggang Marso a – sais.

Sa mga bagong kaso, tatlo o 0.7% ang kasalukuyang may malubha at kritikal na karamdaman.

Mayroon namang naitalang 591 deaths kabilang ang 115 na namatay ngayong Marso.

Sa 3,598 ICU beds para sa mga COVID patient, 704 ang okupado habang 17.2% ng 27,021 non-ICU COVID beds ang kasalukuyan ding ginagamit.

Samantala, higit 64 million individuals o 71.71% na ng target na populasyon ang bakunado na kontra COVID-19 habang 11.1 million individuals ang nakatanggap na ng booster.

35 ang nasawi habang 134 ang sugatan sa missile strike ng russia sa lungsod ng Lviv, Ukraine.

 Naganap ang pag-atake sa military base ng Yavoriv International Center for Peacekeeping and Security.

 Ang naturang lungsod ay malapit lamang sa border ng Poland na isa sa mga miyembro ng Western Defense Alliance na North Atlantic Treaty Organization (NATO).

 Una nang ibinabala ni Russian Foreign Ministry na ikinukunsiderang lehitimong target ang mga convoy ng weapons shipments sa Ukraine mula sa anumang NATO member country.

 Kabilang ang planong pagsali ng ukraine sa NATO sa dahilan ng pagsiklab ng pag-atake ng Russia.

Nagpapatuloy ang “off-peak interruptions” o pagputol ng supply ng Maynilad sa ilang bahagi ng Metro Manila at karatig probinsya.

Nagsimula ang “off-peak interruptions” alas-diyes ng gabi noong Huwebes hanggang alas-6 ng umaga ng Miyerkules, Marso a –16.

 Ayon kay Ronald Padua, Water Supply Operations Head ng Maynilad, tuwing gabi ipinatutupad ang service interruption upang hindi masyadong maka-apekto sa mga consumer.

 Kabilang sa mga makararanas nito ang Barangay Catanghalan sa Bulacan, Bulacan; Barangays 1 hanggang 188 Sa Caloocan City; Bangkal at Palanan, sa Makati City; halos buong Malabon;

 Malaking bahagi ng Maynila; Navotas City; Sun Valley, Parañaque City; malaking bahagi ng Pasay City; Quezon City at Valenzuela City.

Wala ng atrasan bukas ang tinaguriang “super bigtime” oil price hike na pinakamalaki sa mga nakalipas na taon.

 Bagaman bumababa na ang presyo ng langis sa world market sa huling dalawang araw, maglalaro pa rin sa 11 pesos 80 centavos hanggang 12 pesos ang taas-presyo ng diesel.

 Aabot naman sa 7 pesos ang dagdag presyo sa kada litro ng gasoline habang 9 pesos 70 centavos hanggang 9 pesos 80 centavos sa kerosene.

 Dahil pa rin ito sa sigalot sa pagitan ng Russia at Ukraine.

 Aminado naman ang mga taga-oil industry na patuloy ang pagbaba ng presyo ng langis sa world market na kung hindi mauudlot, maaaring magkaroon ng rollback sa mga susunod na linggo.

 Una nang umapela ang Department of Energy (DOE) sa mga oil company na utay-utayin ang taas-presyo subalit wala pang tugon ang mga naturang kumpanya.

Maaari nang simulang patakbuhin ng Pilipinas ang isang nuclear power plant sa loob ng limang taon kung magpapatuloy ang utos ni Pangulong Rodrigo Duterte nang walang anumang hadlang.

Ito ang inihayag ni Philippine Nuclear Research Institute Director Carlo Arcilla sa gitna ng panawagang buksan na ang inaalikabok na Bataan Nuclear Power Plant (BNPP).

 Ayon kay Arcilla, pinakamabilis na ang pag-rehabilitate sa BNPP na maaaring tumagal ng limang taon.

 Sa katunayan anya ay nag-alok na ang South Korea na i-rehabilitate ang planta sa halagang 1.1 billion dollars.

 Nito lamang Pebrero ay inaprubahan ni Pangulong Duterte ang executive order 164 upang isama ang nuclear power sa energy mix ng bansa.

Aabot sa 27 milyong pisong halaga ng iligal na droga ang nasakote ng Philippine Drug Enforcement Agency (PDEA) – Region 10 sa Iligan City, Lanao Del Norte.

 Natimbog naman ng PDEA ang suspek na kinilalang si Arnel Asuncion sa inilargang buy-bust operation, sa Barangay Maria Cristina.

 Ayon kay PDEA-10 Director Jigger Montallana, nasabat mula kay asuncion ang marked money at limang plastic sachet ng hinihinalang shabu.

 Dalawang buwang minanmanan ang suspek at nang makakuha ng pagkakataon ay nakipag-transaksyon ang mga ahente ng PDEA at nagbigay ng 500,000 peso downpayment.

 Naniniwala ang mga otoridad na bahagi si Asuncion ng mas malaking grupo na nag-o-operate sa Mindanao.

Sumadsad na sa 46,537 ang aktibong kaso ng COVID-19 sa bansa.

 Ito’y makaraang makapagtala ang Department of Health (DOH) ng additional 564 COVID-19 cases, noong sabado.

 Sa datos ng DOH, umakyat na sa 3,670,739 ang kabuuang kaso.

 Tinaya naman sa 3,566,592 ang total recoveries habang umabot na sa 57,610 ang total deaths.

 Inilabas ng DOH ang datos sa pamamagitan ng COVID-19 tracker sa kanilang website matapos itigil ng kagawaran ang daily COVID-19 report sa halip ay tumutok na lamang sa paglalabas ng weekly report.

Posibleng mahirapang makamit ang sapat na water level sa mga dam sa gitna ng mababang tsansa ng mga pag-ulan at mataas na heat index na sumasampa na sa pinaka-mainit na temperatura ngayong taon.

 Ito’y makaraang maitala sa Dagupan City, Pangasinan ang mataas na heat index na umabot sa 51 degrees celsius noong March 6.

 Ayon sa PAGASA, ang malaking bulto ng water supply sa mga dam ay nagmumula sa pag-ulan pero kaunti lamang ito upang maabot ang itinatakdang mga lebel.

 Halos 50% ng supply ay dulot ng pag-ulan mula sa mga bagyo, pero kung walang masyadong ulan ay malabong makamit ang mga itinatakdang water level sa mga dam.

 Batay sa datos ng pagasa, bumaba ang water level sa ilang water reservoir malapit sa metro manila, tulad ng angat dam, bulacan na ngayon ay nasa 194.05 meters hanggang kahapon.

 Bumaba rin sa 192 meters ang lebel ng tubig sa pantabangan dam, nueva ecija habang nasa 169.08 meters sa magat dam pero nagkaroon naman ng minimal increase sa la mesa dam na 78.33 meters at ipo dam, 98.83 meters matapos madagdagan ng point 11 meters.

Ibinunyag ni Pangulong Rodrigo Duterte na nagsanib-pwersa na ang oposisyon at mga komunista upang guluhin ang eleksyon sa Mayo a–nwebe.

 Ayon kay Pangulong Duterte, binabantayan na ng pamahalaan ang ilang grupo, kabilang ang mga “dilawan”.

 Dahil dito, aminado ang pangulo na hindi niya matitiyak na magiging mapayapa ang halalan.

 Gayunman, wala pang pahayag ang oposisyon hinggil sa akusasyon ng punong ehekutibo.

Magpapatupad ng daily water service interruption ang Maynilad sa buong lungsod ng Malabon simula ngayong araw hanggang Miyerkules, Marso a–16.

Ito, ayon sa Maynilad, ay dahil sa mababang lebel ng tubig sa bawat dam.

Para hindi makasabay sa umiinit na panahon tuwing umaga,  magsisimula ang service interruption mamayang alas-10 ng gabi hanggang ala-6 ng umaga.

Samantala, pinaaalalahanan ng naturang water concessionaire ang mga residente na magtipid at mag-ipon ng tubig para maging handa sa anumang emergency water service interruption.

Para naman sa iba pang katanungan, maaaring tumawag sa Maynilad hotline na 1626.