Drew Nacino

Nakatakda nang i-anunsyo ng palasyo ang panibagong COVID-19 alert level classification ngayong araw.

 Alinsunod ito sa rekomendasyon ng Inter-Agency Task Force for the Management of Emerging Infectious Diseases (IATF-EID).

 Kasalukuyang nasa ilalim ng alert level 1 ang Metro Manila at 38 iba pang lugar hanggang ngayong araw.

 Una nang inilutang ni Health Secretary Francisco Duque III ang posibilidad na i-downgrade sa alert level zero ang ilang bahagi ng bansa dahil sa patuloy na pagbaba ng COVID-19 cases.

Pagbibigyan ng COMELEC ang mga kandidatong hindi nagkumpirmang dadalo pero sisipot sa mismong araw ng debate.

 Nilinaw ni COMELEC Spokespman, Dir. James Jimenez na hindi naman itataboy ang mga kandidato sakaling magpakita ang mga ito sa araw ng debate at venue sa Sofitel, sa Pasay City sa March 19 at 20.

 Ayon kay Jimenez, bibigyan ng pagkakataon ang mga kandidato na masilip ang venue na isang mahalagang hakbang dahil kailangan nilang malaman kung ano ang mga pwede at hindi pwedeng gawin at sino lamang ang kanilang maaaring isama.

 Kung ayaw naman anya ng mga ganitong oportunidad ay walang problema sa COMELEC at sakaling pumunta ang mg kandidato sa mismong araw ng debate kahit walang pasabi ay pagbibigyan pa rin naman ang mga ito.

 Aminado ang COMELEC official na handa silang maghintay sa magiging pasya ng mga kandidato at hindi naman requirement ang written confirmation upang makalahok sa debate pero sa oras na dumalo ay indikasyon ito na handa ang sinumang sumunod sa rules ng nasabing aktibidad.

 Una nang inihayag ni presidential candidate Ferdinand Marcos Jr. na hindi ito dadalo sa debate sa sabado maging ang vice presidential running mate nitong si Davao City Mayor Sara Duterte-Carpio sa linggo.

Iginiit ni Philippine Ambassador to the United States Jose Manuel “Babes” Romualdez na hindi kailangan ang muling pagtatatag ng military bases ng Amerika sa Pilipinas.

 Ito ang nilinaw ni Romualdez sa kabila ng pahayag ni Pangulong Rodrigo Duterte na handa niyang buksan ang mga pasilidad ng pilipinas para sa US sakaling umabot sa asya ang sigalot sa pagitan ng Russia at Ukraine.

 Ayon kay Romualdez, hindi na kailangan ng panibagong tratado upang muling makapagtayo ang Estados Unidos ng kanilang base militar sa bahagi ng Pilipinas dahil pansamantala lamang naman ang probisyon ng mga pasilidad.

 Taong 1991 nang ibasura ng senado ang panukala na magpapalawig sa kasunduan sa presensya ng American Military bases sa Pilipinas.

Asahan na muli ang pagtaas ng presyo ng tinapay sa mga susunod na araw.

 Ito ang ibinabala ng ekonomistang si House Ways and Means Committee Chairman Joey Salceda sa gitna ng walang prenong pagtaas ng presyo ng oil products at nagpapatuloy na bakbakan ng Russia at Ukraine.

 Ayon kay Salceda, nagkakaroon ng domino effect ang digmaan sa pagitan ng dalawang bansa kung saan ang una ay sa presyo ng langis, pangunahing bilihin, agricultural products at ngayon ay sa presyo ng tinapay.

 Inihalimbawa ng kongresista mula Albay ang naka-ambang 2 pesos at 30 centavos na dagdag-presyo sa ‘pinoy tasty’ loaf bread.

 Aminado si Salceda na kung tatagal pa ang tensyon sa pagitan ng Ukraine at Russia ay mas maraming Pinoy pa ang magugutom.

 Para anya hindi lubos na maapektuhan sa suplay sa paggawa ng tinapay, dapat nang simulang mag-angkat ng Pilipinas ng alternatibong mapagkukunan tulad sa Canada at US.

Hindi pabor ang Diocese of Balanga sa rehabilitasyon ng Bataan Nuclear Power Plant (BNPP).

 Ito’y sa kabila ng paglagda ni Pangulong Rodrigo Duterte sa executive order 164 noong Pebrero a-20 na nagpapahintulot sa paggamit at pag-aaral ng nuclear energy bilang alternatibong mapagkukunan ng enerhiya.

 Ayon kay diocese of Balanga Bishop Ruperto Santos, magdudulot lang ng panganib ang BNPP sa mga mamamayan ng Bataan lalo’t nakatayo ito sa ibabaw ng Mount Mariveles, na isang dormant volcano.

 Hindi naman anya ito magpo-produce ng karagdagang supply ng kuryente at maaaring maging mitsa ng korapsyon ang halaga ng rehabilitasyon ng planta, lalo’t balot ng katiwalian ang pagkakatayo rito.