Drew Nacino

Tinatayang 3.5 milyong pisong halaga ng mga pekeng gamot ang nasabat sa Ozamiz City, Misamis Occidental.

Ayon kay Col. Michelle Olaivar, tagapagsalita ng Police Regional Office – Northern Mindanao, nadiskubre ang over-the-counter na gamot na nakaimbak sa loob ng bahay ng suspek na kinilalang si Leonardo Duma Junior, 56 anyos.

Hinalughog anya ng raiding team at mga tauhan ng Food and Drugs Administration (FDA) ang bahay ni Duma sa Purok 6, Barangay Calabayan batay sa tatlong search warrant na inisyu ng korte noong March 5.

Inakala anya ng pulisya at FDA na small-time drugstore owner lamang ang suspek pero ikinagulat nila ang laki ng business operation nito.

Kabilang sa mga nasabat mula kay Duma ang dalawang malalaking kahon na naglalaman ng 31,700 capsules ng Loperamide at isang kahon na naglalaman ng 27,000 tablets ng Losartan.

Inaalam na ng mga otoridad ang posibleng pagkakabilang ng negosyante sa sindikatong nagpapakalat ng mga pekeng gamot sa Northern Mindanao at iba pang rehiyon.

Dismayado na kay Energy Secretary Alfonso Cusi ang isang transport group sa gitna ng hindi maawat na pagtaas ng presyo ng mga produktong petrolyo.

Ayon kay Liga ng Transportasyon at Operators of the Philippines (LTOP) National President Orlando “Ka Lando” Marquez, hindi man lang sila hinaharap ni Cusi lalo upang pag-usapan ang issue.

Nanawagan din si Marquez kay Cusi na sa halip na tutukan ang ibang issue na hindi naman saklaw ng kanyang trabaho ay dapat nitong pagtuunan ng pansin ang tunay na problema.

Natural lang na parusahan ng Comelec ang sinumang kandidatong hindi dadalo sa inorganisang debate ng poll body.

Ito ang reaksyon ng political analyst na si Professor Ramon Casiple sa ikinakasang debate ng poll body sa Marso a – 19.

Ayon kay Casiple, hindi naman mga kandidato ang masusunod sa mga debate at aktibidad na inisponsoran ng Comelec.

Hinihintay na ng mga Jeepney operator, driver at mga mananakay ang magiging pasya ng Land Transportation Franchising and Regulatory Board (LTFRB) sa hirit na dagdag-pasahe.

Ito’y sa gitna ng hindi maawat na pagsirit ng presyo ng mga produktong petrolyo bunsod na pinalala pa sagupaan ng Russia at Ukraine.

Sa isinagawang hearing kahapon sa hiling na pansamantalang ibalik ang P10 na minimum na pasahe sa jeep, wala pang naging desisyon ang LTFRB sa dalawang magkahiwalay na petisyon na itaas sa P14 hanggang P15 ang base fare sa NCR, Regions 3 at 4.

Ayon kay LTFRB Chairman Martin Delgra III, submitted for resolution na ang hiling na ibalik sa P10 ang minimum jeepney fare mula sa kasalukuyang P9 habang ang ibang hiling ay diringgin sa March 22.

Kabilang sa mga humihiling na ibalik sa P10 ang pasahe ang mga transport groups na 1-United Transport Koalisyon (1-UTAK), Pasang Masda, Alliance of Transport Operators and Drivers Association of the Philippines at Alliance of Concerned Transport Organizations.

Hinihiling naman ng liga ng transportasyon at operators sa Pilipinas ng P15 na minimum fare.

Iginigiit ng mga transport group na hindi na nila kinakaya ang sobrang taas ng presyo ng diesel kaya’t panahon na upang itaas ang pasahe lalo’t lumiliit na ang kanilang kita.

Samantala, mananatili muna sa P9 ang minimum na pasahe sa jeep hangga’t wala pang resolusyon.

Naglabas na ng Temporary Restraining Order (TRO) ang Korte Suprema laban sa ipinatutupad na oplan baklas ng Commission on Elections (Comelec).

Ibinaba ang TRO laban sa Comelec at sa tagapagsalita nitong si Director James Jimenez sa isinagawang En Banc hearing ng Supreme Court.

Kinatigan ng SC ang petisyon ng St. Anthony College of Roxas City na humihiling na pansamantalang ipatigil ang pagbabaklas ng poll body ng campaign materials na sobra ang mga sukat at wala sa pamantayan.

Partikular na rito ang mga ikinabit sa mga pribadong ari-arian at ginastusan ng mga pribadong indibidwal.

Samantala, inatasan naman kataasan-taasang hukuman ang Comelec na sumagot sa loob ng sampung araw.

Posibleng hindi na magsuot ng facemask ang publiko sa Hunyo.

Ito, ayon kay National Task Force against COVID-19 Medical Adviser, Dr. Ted Herbosa, ay kung mababakunahan ang 80% o halos 90M Pilipino.

Tuloy-tuloy naman na anya ang pagbaba ng bilang ng COVID-19 cases at wala pang naitatalang mga bagong variant sa ngayon.

Samantala, inihayag ni Herbosa na nakatakdang i-donate ng Pilipinas sa mga mahirap na bansa ang mga sobrang COVID-19 vaccine.

Dumami ang mga Filipino na nagsabing magiging maayos ang kanilang pamumuhay sa susunod na labindalawang taon batay sa Social Weather Stations (SWS) survey.

Sa isinagawang SWS 4^th quarter net optimism survey simula December 12 hanggang 16 sa 1,440 respondents, 45% ang naniniwalang gaganda ang kalidad ng kanilang pamumuhay sa taong 2022.

Kumpara ito sa 33% noong September 2021 habang ang resulta noong 4^th na ang pinaka-mataas simula noong pre-pandemic level na 48% noong December 2019.

Bumagsak naman sa 3% ang nagsabing lalalá pa ang kanilang pamumuhay habang 42% ang nagsabing walang magbabago.

Samantala, walang tugon ang nalalabing 9% ng respondents.

Sumampa na sa mahigit dalawang milyong katao ang lumikas mula sa Ukraine simula nang maglunsad ng pag-atake ang Russia noong Pebrero a–24.

Batay ito sa datos ng United Nations High Commissioner for Refugees (UNHCR).

Ayon sa UNHCR, mayorya o nasa isa punto dalawang milyon sa mga refugee ang tumawid sa kalapit na Poland kung saan nagtayo ang Polish Government ng reception center.

Nagpasa rin ang Polish Government ng batas upang mapahaba pa hanggang isa’t kalahating taon ang pananatili ng mga Ukrainian at makapagtrabaho sila sa nasabing bansa.

Samantala, mahigit 190,000 naman ang tumawid sa Hungary; nasa 140,000 sa Slovakia; halos 100,000 sa Russia at tinatayang 82,000 sa Moldova.