Drew Nacino

Tumaas ang bilang ng self-rated poor o mga filipino na itinuturing ang kanilang sarili bilang mahirap.

Batay sa Social Weather Stations (SWS) survey noong December 10 hanggang 14, 2022, umakyat sa 51% o katumbas ng 12.9 million Filipinos ang itinuturing ang kanilang sariling bilang mahirap.

Kumpara ito sa 49% o 12.6 million noong Oktubre ng nakaraang taon.

Aabot naman sa 31% ang naniniwalang nasa “borderline” sila o alanganing mahirap o hindi mahirap habang 19% ang naniniwalang hindi sila mahirap.

Pinaka-mataas ang bilang ng self-rated poor o 35% mula sa dating 30% sa balance Luzon o mga nasa labas ng metro Manila, habang nabawasan sa Metro Manila, Visayas at Mindanao.

Tumaas naman sa 34% mula sa dating 21% ang nasa “borderline” sa Visayas; 29% sa Metro Manila mula sa dating 23% habang 30% sa Mindanao mula sa dating 28% to 30%.

Nilinaw ng Light Rail Transit Authority (LRTA) na hindi pa pinal ang inaprubahang dagdag-pasahe ng Land Transportation Franchising and Regulatory Board sa LRT lines 1 at 2.

Ayon kay LRTA Administrator Atty. Hernando Cabrera, kailangan munang aprubahan ng iba pang miyembro ng LRTA board, kung saan kabilang ang LTFRB, ang petisyon na fare increase.

Hindi pa anya matatapos sa board ang pagdedesisyon sa dagdag-pasahe dahil daraan pa ito sa mabusising proseso.

Binigyang-diin ni Cabrera na isa rin sa pinaka-mahalagang proseso ay ang pagsasagawa ng public hearing bago tuluyang aprubahan ang fare hike sa lines 1 at 2.

Binigyan ng Land Transportation Franchising and Regulatory Board ang Grab Philippines ng limang araw upang ipaliwanag ang umano’y price surge at magsumite ng datos hinggil sa ilang beses silang nagpapataw ng minimum base fare na P85 para sa short trips.

Sa ilalim ng fare matrix na inaprubahan ng LTFRB noong September 2022, ang minimum fare para sa mga sedan-type transport network vehicle service ay P45; P55 para sa auv o suv-type t.n.v.s. at P35 para sa hatchback-type tnvs.

Sa huling hearing ng ahensya kahapon kaugnay sa “surge pricing” issue, inihayag ni LTFRB Chairman Teofilo Guadiz III na sa oras na makapagsumite ng paliwanag at datos ang Grab ay maglalabas sila ng desisyon.

Ayon kay Guadiz, posibleng ilabas ang desisyon ng LTFRB sa unang linggo ng Pebrero.

Layunin anya nilang maglagay ng “parameters” at isang “entity” ang dapat magtakda ng presyo, lalo’t ang gobyerno ang may kapangyarihan na mag-regulate at tumukoy kung kailan dapat magtaas ng pasahe.

Ipinunto ni Guadiz na dapat ding ipaliwanag ng Grab kung kailan dapat magpatupad ng increase at saang mga lugar dapat ipataw ang surge fee maging ang P85 minimum base fare na hindi naman aprubado ng LTFRB.

Kinuwestyon ni Senate Committee on Public Services Chairperson Grace Poe ang imbestigasyon ng Department of Transportation at Civil Aviation Authority of the Philippines (CAAP) sa nangyaring aberya sa air traffic management system nung bagong taon.

Ito, ayon kay Poe, ay dahil DOTr at CAAP mismo ang sangkot sa sitwasyon kaya’t palaisipan kung ano ang mangyayari sa imbestigasyon nila sa kanilang sarili.

Humingi naman ng paumanhin ang CAAP sa atrasadong pagbibigay ng update sa nangyaring technical glitch sa Communications, Navigation and Surveillance Systems for air Traffic Management System (CNS-ATM) sa NAIA.

Ito’y makaraang sitahin ni Senator Jinggoy Estrada kung bakit January 9 lang nakapagbigay ng update ang ahensya sa senado kaugnay sa totoong naging sira ng CNS-ATM.

Sinabi kasi ni CAAP Director General Manuel Antonio Tamayo na noong January 1 pa nila nalaman na isa sa mga circuit breaker ng air traffic system ang nagkaproblema at hindi ang uninterrupted power supply tulad ng unang lumabas sa mga balita.

Pero puna ni Estrada kung noong unang araw na nagka-aberya ay circuit breaker pala ang may problema at hindi ang UPS ay bakit ngayon lamang ito naipagbigay-alam sa Senado. — Mula sa ulat ni Cely Ortega-Bueno (Patrol 19)

Walang cctv sa equipment room kung saan nakalagay ang communications, navigation and surveillance systems for air traffic management system ng Civil Aviation Authority of the Philippines CAAP sa NAIA.

Ito ang nadiskubre sa pagtatanong ni Senate President Juan Miguel Zubiri kay CAAP Director General Manuel Tamayo sa pagdinig ng Senado hinggil sa naganap na aberya sa NAIA noong Enero a – 1.

Ayon kay Zubiri, “eye opener” para sa kanya ang natuklasan na walang cctv sa napaka-selan o napaka-sensitibong lugar kung saan matatagpuan ang napakahalagang equipment na air traffic management system.

Hindi anya ito katanggap-tanggap dahil paano malalaman kung may ibang pumasok at sinabotahe ang equipment sa loob.

Iginiit naman ni Tamayo na napakahigpit ng kanilang security protocol sa equipment room kung saan hindi basta makapapasok kahit sino.

Mayroon din anya silang special i.d. para magkaroon ng access sa naturang silid. — Mula sa ulat ni Cely Ortega-Bueno (Patrol 19)

Malabo umanong maging cyber attack ang dahilan ng aberya sa air traffic management system ng Civil Aviation Authority of the Philippines (CAAP) noong Enero a – 1.

Ito, ayon kay CAAP Executive Director Manuel Tamayo, ay batay sa parallel investigation ng Cybercrime Investigation and Coordination Center (CICC) noong Enero a – 3.

Sa kanyang pagharap kay Senador Sherwin Gatchalian sa Senate hearing kahapon, ipinaliwanag ni Tamayo ang nangyari noong bagong taon.

Sa kabila nito, inihayag ni Tamayo na ipinaubaya ng CAAP sa CICC ang forensic investigation sa circuit breaker at power transfer switch ng air traffic management system dahil wala silang kakayahan o kagamitan upang mabatid kung cyber-attack o hindi ang nangyari.

Taliwas naman ito sa unang report na ang UPS ang nagka-aberya kaya’t kinuwestyon ni Gatchalian ang naunang pahayag ng CAAP.

Samantala, muling humingi si Tamayo ng paumanhin sa mga naperwisyo at naapektuhan ng insidente at inaako nila ang responsibilidad at nangakong magiging transparent sa lahat ng gagawin at pagtiyak na ligtas ang himpapawid ng bansa.

Sinimulan na ni Senador Grace Poe ang imbestigasyon sa naganap na technical glitch sa Ninoy Aquino International Airport na naka-apekto sa mahigit animnapu’t limang libong international at domestic passengers nitong bagong taon.

Sa kanyang opening statement, inihayag ni Poe, chairperson ng Senate Committee on Public Services, na layunin ng imbestigasyon na lumikha ng paraan sa pamamagitan ng batas upang maiwasan ang ganitong insidente na lumumpo sa himpapawid ng Pilipinas.

Kabilang din sa layunin ng imbestigasyon ay isabatas ang panukalang paglikha ng transportation safety board upang mangalaga at mangasiwa sa lahat ng uri ng transportasyon sa bansa at lumikha ng patakaran sa pagpapaunlad ng sistema.

Hindi anya dapat balewalain ang epekto ng insidente sa bansa at domino effect nito.

Idinagdag ng senador na nais marinig ng Senado kung ano ang contingency plans ng Department of Transportation at pangunahing air carrier kabilang ang implementasyon ng air passenger bill of rights na inaatasan ang pamahalaan na ibalik ang gastusin ng pasahero sa nakanselang biyahe. —Mula sa ulat ni Cely Ortega-Bueno (Patrol 19)

Bahagya muling tumaas sa 12,006 ang aktibong kaso ng covid-19 sa bansa, kahapon kumpara sa 11,975 noong Miyerkules.

Ito’y makaraang makapagtala kahapon ang DOH ng karagdagang 307 covid-19 cases kumpara sa average infections na 447 noong Enero a – 2 hanggang a – 8 at 481 noong Miyerkules.

Dahil dito, umakyat sa 4,690,147 ang total caseload kabilang ang 3,991,615 recoveries at 65,526 fatalities.

Nangunguna pa rin ang NCR sa mga rehiyong may pinaka-maraming kaso sa nakalipas na dalawang linggo, 1,819; sinundan ng Calabarzon, 903 at Central Luzon, 449.

Magkakaroon ng rebate o balik-bayad ang maynilad sa mga customer nito sa Southern Metro Manila at Cavite na naapektuhan ng mahabang service interruption, kamakailan.

Ito na ang magiging ika-apat na rebate ng Maynilad simula 2021 bunsod ng problema sa Putatan water treatment facility sa Muntinlupa City.

Gayunman, wala pang detalye kung magkano ang mismong balik-bayad subalit sisikapin umano ng Maynilad at Metropolitan Waterworks and Sewerage System Regulatory Office na isama ito sa February bill.

Humingi naman ng paumanhin si maynilad Water Supply Operations Head Ronald Padua sa lahat ng naapektuhan at tiniyak ang mabilis na pagsasa-ayos sa nasirang pasilidad.

Ayon kay Padua, matindi kasi ang supply ng burak na galing Laguna lake kaya’t nagkaproblema ang tinatawag na scraper ng pasilidad o naghihiwalay ng dumi sa tubig.

Sa ngayon, pitumpu’t limang porsiyento nang tapos ang repair works sa putatan plant kaya mahigit nobenta porsiyento na ring balik sa normal ang supply ng tubig sa mga apektadong lugar.

Target naman ng Maynilad na maibalik sa isandaang porsiyento ang supply bago matapos ang buwan.

Posibleng magdulot ng bagong wave ng mas nakahahawang variants o subvariants ng covid-19  ang nararanasang surge ng mga bagong kaso sa China.

Ito ang babala ng OCTA Research Group matapos magluwag ng travel restrictions ang china kasabay ng inaasahang pagdagsa ng milyun-milyong biyahero para sa Lunar new year, sa susunod na linggo.

Ayon kay OCTA Research Fellow, Dr. Guido David, sa ngayon ay magkakahawig ang mga variant na kanilang na-mo-monitor mula Tsina, gaya ng BQ, XBB, BA.5 na pawang omicron sub-variant.

Bagaman labis anyang nakahahawa ang mga nasabing subvariant, hindi naman nagdudulot ang mga ito ng malalang sintomas.

Pero aminado si David na mas nakababahala ang paglilihim ng chinese government, lalo sa tunay na sitwasyon sa kanilang bansa at bilang ng mga nahahawa o namamatay dahil sa covid-19.

Ibinabala rin ni David na asahan na ang mas maraming covid-19 wave ngayong taon subalit maaaring hindi naman ito magiging mas malala na magreresulta sa pagdami ng mga pasyente sa mga ospital.