Drew Nacino

Mahigpit umanong binabantayan ng Department of Agriculture ang presyo ng itlog upang matukoy kung magpapatuloy ang pagtaas nito.

Batay sa price monitoring ng DA, naglalaro sa P7 hanggang P9 ang presyo ng medium-sized na itlog mula sa dating P6 noong isang taon.

Inihayag ni DA Assistant Secretary Kristine Evangelista na para matukoy kung magpapatuloy ang trend ay kailangan nilang tingnan ang cost of production at tukuyin kung ito ang dahilan nang pagmahal ng itlog.

Iimbestigahan din anya ng kagawaran ang “Layers of Traders” upang matukoy kung ito ang dahilan nang pagtaas ng presyo ng itlog.

Una nang sinabi ng Philippine Egg Board Association na nagbawas ng produksyon ng itlog dahil tumaas ang operating expenses ng mga breeders na dulot ng pagtaas ng presyo ng mga ínakay at patuka.

Naka-umang na naman ang dagdag-presyo sa tinapay, gaya ng cake at iba pang pastries.

Ito ang ibinabala ni Philippine Fedaration of Bakers Association Incorporated Spokesperson at tinapayan Festival Founder Chito Chavez sa gitna nang patuloy na pagmahal ng itlog.

Ayon kay Chavez, otomatikong apektado ang operasyon ng mga lokal na panadero kung manipis ang supply at mataas ang presyo ng itlog, na isa sa pangunahing sangkap sa paggawa ng tinapay.

Kung tataas pa ang presyo, tiyak anyang magiging malaki ang problema ng mga producer dahil hindi naman sila maaaring magbawas ng ingredient, lalo ng itlog.

Matapos ang dalawang taong suspensyon ng mga aktibidad dahil sa Covid-19 restrictions, pangakalahatang naging mapayapa ang pagdiriwang ng Sinulog, bilang bahagi ng Pista ng Sto. Niño De Cebu.

Kinumpirma ni Regional Office-Central Visayas chief, Brig. Gen. Jerry Bearis na walang masyadong naitalang “untoward incidents” maliban sa ilang insidente ng pandurukot sa south road properties.

Kabuuang 16 na contingents naman ang lumahok sa grand parade, mula sa orihinal kahapon.

Dahil dito, pinasalamatan ni Cebu City Mayor Michael Rama ang lahat ng performers, sa kabila ng desisyon ng 10 iba pang contingents na umatras dahil bunsod ng maputik na venue.

Samantala, tinanghal na grand winner sa ritual showdown ng Sinulog Festival 2023 ang contingent mula Surigao Del Norte.

Nag-uwi ang Omega De Salonera Dance Troupe ng P1 Million cash para sa free interpretation category ng ritual dance at nakatakdang mag-perform muli mamaya.

Tinatayang 10K katao ang dumagsa sa “Lakbayaw” o Lakbay at Sayaw bilang bahagi tradisyunal na prusisyon kasabay ng pagdiriwang ng pista ng Sto. Niño De Tondo sa Maynila.

Pinangunahan nina Manila Mayor Honey Lacuna at Vice Mayor Yul Servo Nieto ang pagdiriwang ng nasabing kapistahan, kahapon.

Ito ang unang beses na muling nasilayan ang lakbayaw matapos ang dalawang taong mahigpit na Covid-19 restrictions.

Matapos ang misa sa simbahan ng Tundo, 12 dance groups ang nag-perform sa Lakbayaw Dance Competition.

Dinumog naman ng mga deboto ang prusisyon bitbit ang kani-kanilang imahen ng Sto. Niño na iwinagayway  kasabay ng sigaw ng Viva Pit Señor.

Samantala, inihayag ng Manila Police District na pangkalahatang naging mapayapa rin ang kapistahan at walang naitalang anumang insidente.

Aminado ang Department of Agriculture na nagkulang sila sa resource mobilization at nagkamali sa projection, lalo sa issue ng supply at demand ng sibuyas na naka-apekto sa presyo sa mga pamilihan.

Tugon ito ni DA Deputy Spokesman, Assistant Secretary Rex Estoperez sa harap ng mga batikos sa kanilang hakbang na mag-angkat ng 21,000 metric tons ng sibuyas.

Kino-konsulta anya nila ang stakeholders, partikular ang mga magsasaka, sa pagpapasya na mag-import o magpatupad ng calibrated importation upang mapababa ang presyo at mga hakbang kontra smuggling.

Nanawagan naman si Estoperez sa publiko na iwasang magturuan o manisi, bagkus ay dapat magtulungan ang lahat upang maresolba ang problema.

Patuloy na tinututukan ng Department of Agriculture ang supply at presyo ng asukal sa pamamagitan ng Sugar Regulatory Administration (SRA).

Sa gitna ito nang muling pagtaas ng presyo sa ilang pamilihan sa Metro Manila.

Ayon kay DA deputy spokesperson Rex Estoperez, kabilang din sa kanilang mino-monitor ang nagpapatuloy na anihan maging ang distribusyon sa mga palengke.

Gayunman, ayaw din naman nilang labis na magmahal ang asukal partikular ang retail price nito dahil magiging issue ito at papasok ang gobyerno na pupuwersa sa mga magsasaka na magbaba.

Aminado naman si Pablo Azona, kinatawan ng Planters Group sa SRA na mga middleman ang nagpapataas sa presyo na nagdaragdag ng P28 sa white sugar habang P18 hanggang P20 sa brown sugar.

Muling nagmahal ang asukal sa ilang pamilihan sa Metro Manila gaya nang nangyari noong isang taon.

Batay sa monitoring ng Department of Agriculture sa Balintawak at Kamuning Markets, sa Quezon City, naglalaro na sa P90 hanggang P110 ang kada kilo  ng refined sugar o primera;

P83 hanggang P95 ang kada kilo ng washed sugar o segunda habang P80 hanggang P97 ang kada kilo ng brown sugar.

Halos ganito rin ang presyo noong Setyembre kung saan umabot sa P95 ang kada kilo ng refined; P75 para sa washed habang P70 para sa brown.

Nilinaw ni United Sugar Producers Federation of the Philippines (UNIFED) president Manuel Lamata na hindi naman ang mga nagtatanim ang nagpapataas ng presyo kundi ang mga trader at retailer.

Maaari lamang anyang mapababa ang presyo kung magmumura ang gastos, gaya sa krudo na dapat bumaba ng P40 kada litro at pataba na dapat ibalik naman sa P800.

Sa ngayon, ang millgate price ay nasa P70 hanggang P75 per kilo ng white sugar at P60 hanggang P65 kada kilo para sa brown.

Nangangailangan ang Bureau of Immigration (BI) ng mas maraming tauhan na kanilang kukunin sa pamamagitan ng kanilang online application platform.

Inihayag ni BI Commissioner Norman Tansingco na hindi bababa sa 49 na slots para sa posisyon ng immigration officer ang bakante at iba pang posisyon gaya ng mga clerk at intelligence officers.

Pinapayuhan ang mga aplikante na magtungo sa online job application portal ng ahensya sa careers.immigration.gov.ph para sa listahan ng mga bakanteng posisyon at mga kailangang requirement.

Tatanggapin ang mga aplikasyon simula Ene. 20 at ang mga may kumpletong requirements lamang ang ikukonsidera.

Ang mga mapipili naman ay kailangang sumailalim sa pagsasanay sa Philippine Immigration Academy, sa Clark, Pampanga bago ang i-deploy.

Anim na opisyal ng Department of Health ang nahaharap sa graft at malversation complaints sa office of the Ombudsman.

Kaugnay ito sa umano’y mismanagement ng P786 million na inilaan noong 2022 para sa cancer patients sa ilalim ng cancer Supportive-Palliative Medicines Access Program (CSPMAP).

Ang reklamo ay inihain ni DOH-Program Manager for Cancer at Medical Officer 4, Dr. Clarito Cairo laban kina undersecretary Berverly Lorraine Ho, Director 4 Razel Nikka Hao; Director 4 Anthony Cu; Dr. Kim Patrick Tejano; Dr. Jan Auro Laurelle Llevado at dating Director 4 Anna Melissa Guerrero habang natanggap ng Ombudsman ang kopya ng reklamo noong Disyembre a – 23.

Inakusahan ni Cairo sina Ho at mga kapwa respondent nito ng sinala-ula ang nasabing pondo at pagkupit sa public funds na labag sa Anti-Graft and Corrupt Practices Act.

Iginiit din ng complainant na malinaw ang hangarin ng mga respondent na pahinain ang kanyang technical expertise at institutional memory bilang matagal na cancer control program manager; putulin ang procurement sa DOH Central Office sa pamamagitan ng sub-allotted funds upang ma-access ang sites at pataasin ang kita ng Roche Philippines, partikular sa trastuzumab 600 mg s.c. vial na nasa ilalim ng patent rights nito.

Nagpaliwanag na ang Department of Health sa akusasyon laban sa kanila ni DOH-Program Manager for Cancer, Dr. Clarito Cairo na nagkaroon ng iregularidad sa pondong inilaan sa cancer prevention program.

Tugon ito ng DOH sa inihaing graft at malversation complaints ni Cairo laban sa ilang opisyal ng kagawaran.

Nanindigan ang DOH na dumaan sa tamang proseso at inaprubahan ng National Integrated Cancer Control Council ang lahat ng pondong may kaugnayan sa cancer programs.

Sinagot din ng kagawaran ang alegasyon na ilang ospital ang tinanggal sa nasabing programa.

Binigyang-diin ng DOH na ang pondong nakalaan sa mga pagamutan ay batay sa documented requests ng mga mismong ospital.

Sa katunayan anila ay nakatanggap cancer medicines at assitance na maaaring gamitin para sa diagnostics, treatment at iba pang suporta sa cancer patients ang mga government hospital na tinanggalan umano ng pondo.