Drew Nacino

Ikinasa na ng Sugar Regulatory Administration (SRA) ang panibagong importasyon ng asukal ngayong taon alinsunod sa utos ni Pangulong Bongbong Marcos Jr. na magkaroon ng dalawang buwang buffer stock.

Sa katunayan ay bumabalangkas na ang SRA ng plano upang mag-angkat ng nasa apatnaraan limampung libong metrikong toneladang refined sugar.

Ayon kay SRA Board Member Pablo Azcona, ipadadala ang draft ng importation plan sa Department of Agriculture (DA) at stakeholders para sa kanilang mga komento.

Magugunitang inihayag ni Pangulong Marcos Jr. na kailangan ang dalawang buwang buffer stock upang matiyak na hindi magkakaroon ng supply shortage.

Ilalaan ang aangkating asukal para sa domestic consumption at industrial use.

Naka-umang ang isa pang dagdag-singil ng Meralco bago matapos ang Enero kung hindi palalawigin ang emergency Power Supply Agreement (EPSA) sa Aboitiz Power Coporation.

Inihayag ni Meralco Spokesperson Joe Zaldarriaga na habol nila ang sapat na supply ng kuryente at matiyak na mababa ang presyo nito.

Gumagawa na anya sila ng mga hakbang upang masigurong magkakaroon ng extension ang kontrata.

Halos P6 kada kilowatt hour ang presyo ng GN Power Dinginin Plant ng Aboitiz pero kung sa spot market kukuha ang Meralco ay aabot nang hanggang P10 ang kada kilowatt hour.

Sa kabila nito, inihayag ni Meralco First Vice President Jose Ronald Valles na inabisuhan na siya ng Aboitiz na posible pang paliwigin ang EPSA na nakatakdang mapaso sa susunod na Linggo o Enero a – 25.

Bagaman “verbal” pa lamang ang abiso ng Aboitiz, aminado si Valles na hindi pa nila matiyak kung ano ang magiging capacity offer na maaaring 300 megawatts o mas mababa pa.

Aminado si bagong Defense Secretary Carlito Galvez na totoo ang napabalitang pagtatampo o pagrereklamo ng ilang opisyal ng Armed Forces of the Philippines dahil sa pagka-antala sa kanilang promotion at designation.

Ayon kay Galvez, naantala ang promotion at designation ng ilang AFP officer na papalapit na ang pagreretiro bagay na naka-apekto sa kanilang Morale.

Gayunman, nilinaw ng Kalihim na sa kanyang pag-upo bilang pinuno ng tanggulang pambansa ay agad siyang kumilos upang tugunan ang problema.

Ipinaabot din niya kay Pangulong Bongbong Marcos ang pangunahing issue sa sandatahang lakas na dapat agarang resolbahin.

Nagpapasalamat naman si Galvez kay Pangulong Marcos dahil bago tumungo sa Davos, Switzerland ay pinirmahan nito ang mga naantalang promotion at designation papers pero may ilan pang naka-tengga. —ulat mula kay Cely Ortega Bueno (Patrol 19)

Aabot sa 68% ng mga Filipino ang pabor sa planong pagbuhay sa Reserve Officers Training Corps (ROTC) para sa mga tumutungtong ng edad 18.

Batay sa isinagawang 4^th Quarter Tugon ng Masa Survey ng OCTA Research sa 1,200 respondents noong October 23 hanggang 27.

Tinanong ang mga respondent kung “sumasang-ayon ba sila sa plano na gawing mandatory ang ROTC sa mga edad 18 pataas”.

Lumabas din sa survey na 28% ng mga tinanong ang tutol sa plano.

Pinaka-marami namang sumang-ayon ay mula sa Mindanao, 75% habang pinaka-kaunti sa Metro Manila, 64%.

Magugunitang inihayag ni Senador Ronald Dela Rosa na magiging mabilis ang Kongreso, partikular ang Senado sa pagpasa ng panukalang batas na bubuhay sa mandatory ROTC, ngayong taon.

Inudyukan na ni Senador Imee Marcos ang kanyang kapatid na si Pangulong Bongbong Marcos na paigitingin na ang kampanya laban sa mga smuggler, partikular sa mga nag-pupuslit ng agricultural products, gaya ng sibuyas.

Tugon ito ng senador sa gitna nang mistulang walang katapusan na issue ng mala-gintong presyo at manipis na supply ng sibuyas at iba pang agri-products.

Sa panayam ng DWIZ, aminado si Senador Marcos na nakabuburyong na sa tila walang nangyayaring imbestigasyon ng senado dahil wala namang nahuhuli, nakukulong o nakakasuhang  smuggler.

Kung siya anya ang tatanungin ay dapat nang gumamit ang kanyang kapatid ng kamay na bakal upang tuluyang masugpo ang mga smuggler, lalo’t maliwanag pa sa sikat ng araw kung sino-sino ang mga magkakasabwat.

Samantala, ikinalungkot din ng Presidential Sister ang napaulat na may ilang magsasaka ang nagpatiwakal dahil umano sa pagkalugi sa sibuyas at ikinadismaya naman ang pagkakasabat ng customs sa kapiranggot na sibuyas na dala ng ilang flight attendant ng Philippine Airlines.

Posibleng mayroong dayuhan na kumokontrol o nagdidikta sa desisyon ng pamahalaan sa industriya ng sibuyas at iba pang agricultural products.

Ito ang hinala ni Senate Minority Leader Koko Pimentel dahil lahat umano ng pasya at patakaran ngayon ay panggigipit sa mga lokal na magsasaka pero pumapabor sa mga importer at onion trader.

Naniniwala si Pimentel na walang Filipino ang manggigipit sa kapwa Pinoy.

Tinukoy ng Senador ang desisyon ng pamahalaan na mag-angkat ng sibuyas na ayon sa mga magsasaka ay papatay sa kanila dahil sasabay sa anihan ang pagdating ng mga imported onion.

Kahit anya ang mga storage facility ay nakareserba na sa mga imported na sibuyas o traders, ganito rin umano ang ginagawa sa ibang agricultural product kaya hindi nagiging produktibo ang nasabing sektor.

Kumbinsido naman ang mambabatas na ang bansang may malaking produksyon ng sibuyas ang ‘puppet master’ o nagpapagalaw ngayon sa gobyerno.

Batay sa datos na nakalap ng DWIZ, ang China ang nangungunang onion producer sa mundo na mayroong 24 million tons na produksyon kada taon.

Lumago ng 5.7% ang cash remittances mula sa Overseas Filipinos o katumbas ng 2.64 billion dollars noong Nobyembre 2022.

Kumpara ito sa 2.5 billion dollars sa kaparehong panahon noong 2021.

Ayon sa Bangko Sentral ng Pilipinas, mayorya ng padala ay mula sa land at sea-based workers.

Mula Enero hanggang Nobyembre noong isang taon, naitala ng BSP ang 29.3 billion dollar cash remittance, kumpara sa 28.4 billion dollars sa kaparehong panahon noong 2021.

Karamihan sa mga nagpadalang OFW ay mula sa US, Singapore, Saudi Arabia at Qatar.

Itinurong isa sa dahilan ng pagtaas ng remittances ay ang Christmas Holidays at mataas na palitan ng piso kontra dolyar.

Ganap nang Filipino citizen si barangay Ginebra Import Justin Brownlee matapos itong manumpa ng katapatan sa Republika ng Pilipinas kay Senador Francis Tolentino sa isang special ceremony sa senado, kahapon.

Pinasalamatan ni Brownlee ang lahat ng sumuporta sa kanyang tinahak na landas patungo sa pagiging ganap na Pinoy sa pangunguna nina Tolentino at Senador Sonny Angara na naghain ng panukala para sa kanyang citizenship.

Aminado ang Gin Kings forward na hindi siya makapaniwala sa kanyang pinagdaanan matapos tumanggap ng malawak at malakas na suporta mula sa mamamayang Pilipino, partikular sa ilang mambabatas.

Tiniyak ni Justin na kanyang gagawin ang lahat ng kanyang makakaya upang maipagmalaki ng bawat Pinoy at tutulong upang magtagumpay ang national basketball team.

Ini-abot naman ni Tolentino kay Bronwlee ang kopya ng RA 11937 kasama si senators Bong Go at JV Ejercito.

Inaasahang makakasama na si Brownlee sa koponan ng Gilas Pilipinas at makatutulong upang ma-qualify sa FIBA World Cup at Southeast Asian Games ngayong taon.

Umaasa ang Young Farmers Challenge Club of the Philippines (YFCF) na hindi na mauulit ang sinapit ng limang magsasaka na nagpatiwakal matapos malugi sa pagtatanim at pagbebenta ng sibuyas sa Bayambang, Pangasinan.

Nag-ugat ang panawagan ni YFCF President Elvin Laceda sa isiniwalat ni Nanay Merle sa hearing ng Senado, na kabilang ang kanyang asawa sa mga nagpakamatay matapos ma-peste ang kanilang pananim ng mga harabas.

Iginiit ni YFCF President Elvin Laceda sa Senate Committee on Food and Agriculture na dapat ay maging patas ang mga trader, lalo ang mga middlemen, sa pagbili ng produkto ng mga magsasaka.

Bagaman binili ng YFCF sa maka-taong presyo ang sibuyas nina Nanay Merle, aminado siyang muli silang nalugi dahil naman sa pag-ulan.

Umaapela rin si Laceda sa Department of Agriculture at Food Terminal Incorporated na huwag baratin ang mga magsasaka, lalo’t ang pagtatanim lamang ang kanilang ikinabubuhay.

Inaasahang bubuksan muli ngayong araw sa mga motorista ang Marikina Bridge matapos isailalim sa ilang araw na pagkukumpuni bunsod ng mga nadiskubreng bitak.

Kinumpirma ni Marikina City Mayor Marcy Teodoro na patuloy nilang mino-monitor ang structural integrity ng tulay upang matiyak na ligtas itong daanan ng maraming sasakyan.

Noong Sabado anya sana bubuksan ang tulay subalit pumalya ang Deep Cone Penetration Test kaya’t inulit ito kahapon.

Ang Deep Cone Penetration Test ay isinasagawa upang matiyak na tuyo at matigas na ang sementong itinapal sa mga bitak para ito madaanan ng mga sasakyan.

Para naman sa katatagan ng naturang istruktura, tiniyak ng alkalde na pasok ito sa safety standard.

Nito lamang Ene. 6 nang madiskubre ang mga bitak na dulot umano ng Sumulong Flood Interceptor Project ng Department of Public Works and Highways kaya’t isinara ang isang bahagi ng tulay.

Nasa 250,000 hanggang 300,000 motorista ang dumaraan sa Marikina Bridge kada araw.