Drew Nacino

Umabot na sa P58 million ang halaga ng pinsala sa agrikultura ng flashfloods dulot ng ilang araw na pag-ulan sa Oriental Mindoro.

Magugunitang nakaranas ng pag-ulan ang lalawigan dala ng amihan at low pressure area sa Luzon simula noong Enero a – kwatro hanggang a – nwebe.

Ayon sa Provincial Disaster Risk Reduction Management Office, kabilang sa mga napinsala ang palayan, prutasan, gulayan at maisan maging ang mga babuyan, manukan at palaisdaan.

Aabot naman sa halos limampung magsasaka at mangingisda ang apektado ng kalamidad.

Kabilang sa pinaka-matinding nalubog ang mga bayan ng Naujan, Baco at lungsod ng Calapan.

Samantala, aabot na sa labindalawang libo apatnaraang pamilya rin ang naapektuhan sa Baco.

Ni-re-convene na ng Department of Agriculture ang kumite na tututok sa pag-monitor ng presyo at supply ng livestock at poultry products sa bansa.

Sa Special Order 19, na nilagdaan ni Agriculture Senior Undersecretary Domingo Panganiban, ipinag-utos ng DA ang pagbuhay sa price and volume watch committee for livestock and poultry.

Binuo ang nasabing lupon alinsunod sa DA Special order 124 noong isang taon.

Ayon kay Agriculture Assistant Secretary Kristine Evangelista, makatutulong ang pagbuhay sa watch committee at advisory groups upang mabatid kung sapat ang supply ng anumang commodity, partikular ng karne.

Magsisilbi ang kumite bilang technical advisory body sa DA secretary sa issue ng supply and demand situation ng livestock commodities, presyo at volume, maging volume gaps ng meat products.

Inatasan din itong bumuo ng mga hakbang upang matugunan ang mga issue sa supply, importation, prices at inventories.

Magiging bahagi nito ang assistant secretary for consumer affairs bilang chairperson at director ng Bureau of Animal Industry bilang co-chairperson.

Kabilang naman sa mga magkakaroon ng kinatawan sa kumite ang national livestock program, Philippine Council for Agriculture and Fisheries, National Meat Inspection Service at Philippine Carabao Center.

Wala pa ring tugon ang Pilipinas, partikular si Pangulong Bongbong Marcos sa hiling na dayalogo ni Ukrainian President Volodymyr Zelensky upang talakayin ang papel ng bansa sa Ukraine-Russia war.

Ayon kay Denys Mykhailiuk, Chargé D’affaires ng Ukrainian embassy sa Malaysia, nais makausap ni Zelensky si Pangulong Marcos sa pamamagitan ng telepono.

Kinakausap na anya nila ang Department of Foreign Affairs dalawang beses sa isang buwan simula pa noong Hunyo 2022 subalit wala pa itong sagot.

Samantala, wala pa ring tugon ang malakanyang maging DFA kaugnay ng isyu.

Magsisimula na ngayong buwan na matanggap ng mga empleyado ng gobyerno ang kanilang ika-apat na tranche ng mandatory salary increase.

Ang pinaka-bagong umento sa sahod ang huling bahagi ng mandatory increase sa ilalim ng Republic Act 11466 O Salary Standardization Law of 2019, na tinatawag ding “SSL V”.

Ayon kay Budget Secretary Amenah Pangandaman, makatutulong ang dagdag-sweldo sa mga government worker na apektado nang walang-awat na pagsirit ng inflation.

Kinikilala anya ng pamahalaan ang hindi matatawarang dedikasyon ng mga manggagawa sa kanilang sektor na nagsisilbi sa bayan.

Saklaw ng RA 11466 ang lahat ng posisyon para sa civil personnel, regular, casual o contractual man, appointive o elective, full-time o part-time sa mga sangay ng ehekutibo, lehislatibo at hudikatura.

Hindi naman kabilang dito ang mga military at uniformed personnel; mga nasa constitutional commissions at iba pang constitutional offices; state universities and colleges, maging ang mga government-owned or controlled corporations.

Target ng Senado na maipasa ngayong unang quarter ng taon ang panukalang mag-a-amyenda sa batas na nagtatakda ng tatlong taong fixed term sa matataas na opisyal ng Armed Forces of the Philippines.

Ito ang inihayag ni Senate President Juan Miguel Zubiri sa harap ng napapabalitang “sigalot” sa hanay ng militar.

Ayon kay Zubiri, naniniwala silang ang pag-amyenda sa Republic Act 11709 ay makatutulong sa katatagan ng AFP at magiging daan upang mawala ang tampo ng junior military officers.

Nagkausap na anya sila ni Senate Committee on National Defense Chairman Jinggoy Estrada hinggil dito kung saan may binuo na silang technical working group para pag-aralan ang panukalang amendment sa naturang batas.

Una nang inamin ni Estrada isang linggo bago sila mag-christmas break, na nilapitan siya ng isang opisyal mula sa Presidential Legislative Liason Office at hiniling na agad nilang ipasa ang panukalang amendment dahil sinertipikahan na itong urgent ng pangulo.

Gayunman, naubusan na anya sila ng panahon noon para ipasa ito bukod sa hindi niya nais madiktahan sa dapat gawin ng mataas na kapulungan ng Kongreso. — Mula sa ulat ni Cely Ortega-Bueno (Patrol 19)

Plano ni Migrant Workers Secretary Toots Ople na bumuo ng Memorandum of Agreement sa NAIA at Civil Aviation Authority of the Philippines (CAAP).

Ito’y para agad silang maabisuhan kapag may mga aberya sa NAIA at makaresponde sa mga apektadong ofw gaya nang nangyari noong Enero a – 1.

Sa consultative meeting sa pangunguna ni Senate Committee on Migrant Workers Chairman Raffy Tulfo sa mga opisyal ng DMW, sinabi ni Ople na wala namang naireport sa kanila na ofw na nagka-problema sa employer matapos ang technical glitch sa NAIA.

Gayunman, hindi lang anya nila matukoy kung may mga ofw na nagbayad ng penalty pero kung mayroon man ay dapat itong ipaalam sa kanilang tanggapan upang maikonsulta sa CAAP.

Idinagdag pa ng kalihim na hindi sila nasabihan ng NAIA at CAAP sa nangyari at nalaman na lamang sa balita ang aberya kaya’t hindi nila agad natugunan ang mga naabalang ofw sa airport.

Samantala, makikipagpulong ang DMW sa Manila International Airport Authority at CAAP kaugnay ng nasabing issue habang imbitado rin ang kagawaran sa pagdinig ng senate committee on public services hinggil sa technical glitch, ngayong araw. — Sa ulat ni Cely Ortega-Bueno (Patrol 19)

Kinasuhan na sa piskalya ang driver ng Toyota Landcruiser na umararo sa labindalawang sasakyan sa Mandaluyong City na ikinasugat ng 13 katao.

Kasong reckless imprudence resulting to multiple physical injuries at damage to properties ang kinakaharap ng suspek na si Dominador Varga.

Si Varga ay dalawang dekada nang nagsisilbing driver ng pamilya ni Atty. Paul Roldan, na may-ari ng sports utility vehicle at tumatayong abogado ng suspek.

Lulan din ng sasakyan ang anak ni Roldan na si Jose Marie, disi nwebe anyos, nang maganap ang aksidente sa kalagitnaan ng rush hour, pasado alas otso ng umaga noong Martes.

Kinumpirma ng Mandaluyong City Police na negatibo sa alcohol test si Varga maging ang nakababatang roldan.

Iginiit ng suspek na nawalan siya ng control sa manibela nang maganap ang aksidente.

Samantala, susuriin ng pulisya ang sasakyan upang mabatid kung posibleng nagkaroon ng mechanical error.

Kinalampag ng isang grupo ang tanggapan ng National Telecommunications Commission (NTC) BILANG panawagang ipahinto ang pagpaparehistro ng mga sim.

Ayon sa Grupong Junk Sim Registration Network, maraming nahihirapan sa registration dahil sa kakulangan ng i.d., walang maayos na signal at hindi lahat ay naka-touchscreen phone, bukod pa sa pangamba sa data privacy.

Ayon kay Maded Batara III, tagapagsalita ng grupo, pahamak ang Sim Registration Law dahil nalalagay sa alanganin ang privacy ng isang tao.

Hindi naman umano mababawasan ang cybercrime sa sim registration dahil magbabago lang ang mga modus ng mga scammer o kriminal.

Sa kabila nito, inihayag ng DICT-Cybercrime Investigation and Coordinating Center na nabawasan na ang mga reklamo sa hotline 1326, indikasyong mas nagiging maayos na ang proseso ng sim registration.

Pinaplano naman ng NTC na magpadala ng assisted registration service centers sa mga lugar na mahina o walang signal.

Tiniyak ni NTC officer-in-charge Ella Blanca Lopez na nakikipag-ugnayan na sila sa mga telco upang matutukan ang mga nasabing lugar.

Pansamantalang sarado sa mga motorista ang west bound lane ng Marikina bridge upang bigyang-daan ang pagsasaayos nito matapos makitaan ng mga bitak.

Kinumpirma ni Marikina City Mayor Marcy Teodoro na nitong Enero a – 6 ay nakatanggap sila ng sumbong mula sa isang concerned citizen na nakakita sa bitak sa tulay kung saan may drainage project.

Matapos ang inspeksyon, nakita ang tatlumpung metrong bitak sa bukana ng tulay na dulot ng drainage project na ginagawa ng sub-contractor ng Department of Public Works and Highways.

Ayon kay Teodoro, napasukan na rin umano ng tubig ang hukay dahil sa mga pag-ulan nitong nagdaang linggo.

Umapela naman ang alkalde sa DPWH Na aksyunan ang kanilang hinaing at nagbabalang magdedemanda ang lgu kung hindi tutugunan ang problema.

Pinasusupinde rin ng lokal na pamahalaan ang DPWH project dahil mayroon anyang safety issue na dulot ang mga bitak sa tulay.

Samantala, nangako naman ang kagawaran ng agarang aksyon at isinara muna ang bahagi ng isang lane ng tulay na papuntang Cubao.

Nagsasgawa na rin ang DPWH-National Capital Region, ng geotechnical investigation upang aksyunan ang nangyari.

Ilang biyahe ng barko patungong mga probinsya ang sinuspinde dahil sa masamang panahon.

Ayon sa Philippine Ports Authority (PPA), kabilang sa mga hindi pinabyahe kahapon ang mga patungong Zamboanga, Sulu at Tawi-Tawi.

Ito’y dulot ng malakas na ulan at banta ng low pressure area sa mga nabanggit na lugar.

Inabisuhan naman ng PPA ang mga biyahero na maghintay ng travel advisory bago pumunta sa mga pantalan upang maiwasan ang abala.