Drew Nacino

Ipinawalang bisa ng Korte Suprema ang Joint Marine Seismic Undertaking (JMSU) sa pagitan ng Pilipinas, China at Vietnam.

Sa botong 12-2-1, inihayag ng Supreme Court en banc na labag sa batas ang nabanggit na kasunduan dahil pinayagan nitong lumahok ang 100% na foreign corporations para sa paghahanap ng likas na yaman nang hindi tumatalima sa safeguards na inilaan ng 1987 Constitution ng Pilipinas.

Ang JMSU ang kasunduan sa pagitan ng Philippine National Oil Company, China National Offshore Oil Corporation at Vietnam Oil Gas Corporation, para sa Oil explorations sa West Philippine Sea.

Nakasaad sa isang clause ng kasunduan ang pagsasagawa ng joint research kung may langis sa naturang lugar.

Gayunman, nanindigan ang SC na malinaw na nilabag ng JMSU ang Section 2, Article 12 ng saligang batas na nagsasaad na ang mga Exploration, Development at Utilization ng Natural Resources ay dapat nasa ilalim ng kontrol at pangangasiwa ng estado.

Nag-ugat ang kaso sa Petition for Certiorari and Prohibition na inihain nina dating Bayan Muna Partylist Representatives Satur Ocampo at Teddy Casiño.

Sa harap ng sinasabing “gulo” sa Sandatahang Lakas ng Pilipinas, inihayag ni Senator JV Ejercito na dapat i-prayoridad ni bagong Defense secretary Carlito Galvez ang pagka-isahin ang Armed Forces of the Philippines.

Ayon kay Ejercito, isa ding hamon kay Galvez ang isyu sa pag-amyenda sa batas hinggil sa tatlong taong fixed term sa mga top officials ng AFP.

Maganda naman anya ang intensyon ng batas dahil maiiwasan nito ang “Revolving Door Policy” kung saan nagtatalaga o nagpo-promote ng isang AFP official kahit sa maikling panahon na lang ito manunungkulan para lang mapagbigyan.

Gayunman, aminado si Ejercito na ilan sa kanyang mga kasamang Senador ang nagsabing kailangan nilang amyendahan ang batas upang maging katanggap-tanggap sa mga sundalo, lalo na sa mga masasagasaan ang promosyon.

Kumpiyansa naman si Senator JV na kwalipikado si Galvez sa posisyon bilang Defense Secretary at wala rin itong magiging problema kapag isinalang sa Commission on Appointments para sa kumpirmasyon. —ulat mula kay Cely Ortega Bueno (Patrol 19)

Pinagpapaliwanag ng Land Transportation Franchising and Regulatory Board ang ride-hailing company na Grab Philippines kung paano ang computation nito ng pasahe at surge rates.

Sa muling pag-arangkada ng pagdinig kahapon, inatasan ni LTFRB Board Member, Atty. Mercy Paras-Leynes ang Grab na maglabas ng mas detalyadong eksplanasyon.

Ipinunto naman ni Grab Legal Counsel, Atty. Jason Arteche na ipinatutupad ang surge fare kapag walang gaanong mga sasakyang mag-a-accommodate ng malaking bilang ng mga pasahero.

Una nang inireklamo ng Lawyers for Commuter Safety and Protection sa LTFRB na naaabuso ang surge rates kaya’t dapat magkaroon ng malinaw na patakaran upang hindi malagay sa alanganin ang mga pasahero.

Dapat bigyan ng ride-hailing company na Grab ang mga pasahero ng partikular na mga oras kung kailan dapat ipatupad ang surge charge.

ito ang panawagan ng grupong lawyers for commuter safety and protection (LCSP) kasabay ng muling pag-arangkada ng pagdinig ng Land Transportation Franchising and Regulatory Board sa issue kahapon.

Ayon kay LCSP President, Atty. Ariel inton, kahit hindi Pasko ay laging may pasahero at mayroong traffic congestion at rush hour kaya’t dapat maging malinaw ang pagpapataw ng surge rate ng Grab.

Pinapatawan din anya ng P85 ng Grab ang short trips o mga biyaheng wala pang apat na kilometro na isang paglabag sa fare matrix ng LTFRB.

Ibinabala naman ni Inton na may katapat na multang P5,000 ang bawat overcharge ng Grab kaya’t dapat lamang nitong ipaliwanag nang maigi ang issue sa kanilang surge rate.

Gayunman, nilinaw ng Grab na wala umano silang control sa surge charge dahil otomatiko itong ipinapataw ng kanilang app.

Patuloy ang paglakas ng piso kontra dolyar.

Sa datos ng Bangko Sentral ng Pilipinas (BSP) nagsara ang palitan kahapon sa P54.87 kada U.S. dollar.

Kumpara ito sa P55.11 na exchange rate noong Lunes.

Ito na sa ngayon ang pinaka-malakas na performance ng piso simula noong Hunyo 30 ng isang taon kung saan umabot sa P54.97 centavos ang palitan.

Kabilang sa itinuro ng BSP na dahilan ng paglakas ng piso ay pagtaas ng remittances mula sa mga Overseas Filipino noong holiday season.

Aarangkada na ang buena manong dagdag-singil ng MERALCO ngayong taon.

Ito, ayon sa Meralco, ay makaraang sumipa ang generation charge ng P33.16 per kilowatt hour dahil nagmahal ang singil ng independent power producers, partikular ang First Gas Sta. Rita at San Lorenzo.

Dahil ito sa mas mahal na binibiling panggatong ng mga nasabing power producer bunsod ng kakulangan ng suplay ng natural gas mula sa malampaya.

Nagmahal din ang kuryente sa wholesale electricity spot market ng P68.8 per kilowatt hour dahil sa kakulangan ng suplay at tatlong araw nagdeklara ng yellow alert noong Disyembre.

Nadagdagan din ang kinukuhang kuryente sa WESM matapos suspendihin ng Court of Appeals ang power supply agreement ng South Premier Power Corporation sa MERALCO.

Humuhugot naman ng Kuryente ang Meralco sa GNPOWER dinginin limited pero hanggang january 25 lamang at mas mahal ito sa hinihinging increase ng s.p.p.c.

Para sa mga kumokonsumo ng 200 kilowatt per hour, madaragdagan ng P124 ang singil; P196 para sa 300 kilowatt per hour; P248 para sa 400 kilowatt hour at P310 para sa 500 kilowatt hour.

Maaaring bumaba sa P100 hanggang P150 ang presyo ng kada kilo ng sibuyas matapos aprubahan ni Pangulong Bongbong Marcos ang importasyon ng karagdagang 22,000 metric tons ng nasabing produkto.

Ayon kay Department of Agriculture Deputy Spokesperson Rex Estoperez, inaasahang darating ang imported onions bago o sa mismong Enero 27.

Ito’y upang hindi masabay sa kasagsagan ng anihan ng lokal na sibuyas sa Pebrero.

Kailangan anya nilang magbigay din ng limitasyon kung kailan at gaano karaming volume ang aangkatin para ma-protektahan ang mga lokal na magsisibuyas.

Hindi rin dapat bumaba sa production cost ng mga magsasaka ang presyo kaya’t masasabing tama lamang ang P100 hanggang P150 pesos na kada kilo.

Humihingi ng karagdagang panahon ang Saudi Arabia sa gobyerno ng Pilipinas upang maplantsa ang mga detalye ng pagbabayad sa naunsyaming sweldo ng mga Overseas Filipino Worker.

Kinumpirma ni DMW secretary Toots Ople na bibiyahe sana ang ilang opisyal ng Department of Migrant Workers sa Saudi noong Disyembre pero hiniling ng Saudi Ministry of Human Resources and Social Development na ipagpaliban ang pulong.

Ito, ayon kay Ople, ay dahil nilinaw ng nasabing Saudi Government Agency na hindi sila ang responsable sa pag-proseso ng unpaid claims.

Nais anila ng Saudi Ministry of Human Resources na maglaan pa ng karagdagang panahon para sa ilang detalye nang sa gayo’y kanyang makausap ang tamang opisyal o tao sa tanggapan ni Saudi Crowned Prince Mohammed Bin Salman.

Batay sa datos ng DMW, nasa 10,000 filipino workers ang hindi pa nakatatanggap ng kanilang sahod na aabot sa kabuuang P29.2B nang magkatanggalan sa trabaho matapos sumadsad sa economic crisis ang saudi arabia noong 2015.

Muling tiniyak ng Department of Transportation na aayusin nito ang pasilidad at equipment sa Ninoy Aquino International Airport.

Ito’y upang hindi na maulit ang aberya noong bagong taon kung saan mahigit 280 flights at nasa 56,000 pasahero ang naapektuhan.

Sa pagharap sa imbestigasyon ng House Committee on Transportation, siniguro ni Transportation secretary Jaime Bautista na gumagawa na sila ng paraan upang mabigyan ng permanenteng solusyon ang problema sa Air Traffic Management System sa NAIA.

Ayon kay Bautista, nagpaabot na rin sila ng rekomendasyon kay Pangulong Bongbong Marcos.

Isa anya sa solusyon na gagawin ng DOTr ay ang paglalagay ng backup system ng Traffic Management and Communication na mangangailangan ng P13B para sa upgrade.

Para rin mapabilis ang pagsasaayos ng problema, idinagdag ng kalihim na kailangang agad amyendahan ang kasalukuyang ipinatutupad na Procurement Law.

Nangako naman si Bautista na tututukan din nila ang iba pang hinaing ng mga pasahero sa airport, kabilang ang hindi maayos na Ticket booking, Airport congestions, mahabang pila, Immigration issues at Baggage System.   —ulat mula kay Jopel Pelenio (Patrol 17)

Nakikipag-areglo na sa mga biktima ang may-ari ng Toyota Landcruiser na umararo sa 12 iba pang sasakyan sa Mandaluyong City, kahapon.

Lulan ng SUV ang 19-anyos na estudyanteng si Jose Marie Roldan at kanilang family driver na si Dominador Varga nang maganap ang karambola sa kanto ng San Miguel Avenue at Shaw Boulevard.

Ayon sa Mandaluyong City Police, nagsimulang makabangga ng ibang sasakyan ang Landcruiser sa kahabaan ng San Miguel Avenue sa gitna ng rush hour, dakong alas 8:30 ng umaga.

Nawalan umano ng kontrol sa manibela ang driver dahilan para salpukin at araruhin ang ibang mga sasakyan na ikinasugat naman ng labingtatlong indibidwal.

Nakipag-usap na sa mga biktima si Atty. Paul Roldan, ang may-ari ng SUV at ama ng estudyanteng pasahero at tiniyak na handang tumulong sa pagpapagamot sa mga nasugatan.

Itinanggi naman ng nakatatandang Roldan ang posibilidad na ang kanyang anak ang nagmamaneho ng sasakyan.

Samantala, magsisimula ngayong araw ang inquest proceedings laban sa SUV Driver kung saan si Atty. Roldan na rin ang tatayong legal counsel.