Drew Nacino

Pinaigting na ng National Capital Region Police Office (NCRPO) ang kanilang operasyon laban sa lahat ng klase ng iligal na sugal.

Ipinag-utos ni NCRPO Chief, Maj. Gen. Felipe Natividad sa lahat ng district directors, police chiefs at station commanders na maglunsad ng all-out war kontra illegal number games.

Ito’y matapos ang direktiba ni Interior Secretary Eduardo Año na magsagawa ng masidhing kampanya laban sa illegal gambling, kabilang ang peryahan ng bayan.

Una nang inihayag ng PNP na namamayagpag pa rin ang peryahan ng bayan kahit sinuspinde na ito ng Philippine Charity Sweepstakes Office at Office of the President.

Batay sa record ng NCRPO, aabot na sa 370 katao ang inaresto dahil sa iligal na sugal simula Mayo 1 hanggang 15.

Kinumpirma ng Philippine Statistics Authority (PSA) na umabot na sa mahigit 10.5 million Philippine Identification Cards (Phil ID) ang idineliver sa buong bansa.

Ayon kay PSA Undersecretary Dennis Mapa, National Statistician at Civil Registrar General, katumbas ang nasabing bilang ng 33.7% ng target na ipamahagi ngayong taon.

Kinilala naman ni Mapa ang pagsisikap ng kanilang partner agencies at field offices na malaki ang papel sa produksyon at delivery ng Phil ID Cards sa mga registrants.

Samantala, tinututukan na rin ng PSA ang pagsasa-ayos sa kanilang PhilSys mobile application, na digital version ng Phil ID na maaaring gamitin sa public at private transactions.

Bahagyang nadagdagan ang mga pamilyang Filipino na ikinukunsidera ang kanilang sarili na mahirap batay sa quarterly survey ng Social Weather Stations (SWS) noong April 19 hanggang 27.

Sa naturang survey, 43% o 10.9 na milyong pamilya ang nagsabing sila ay mahirap, 34% ang nagsabing sila ay nasa “borderline poor” habang 23% ang nagsabing hindi sila mahirap.

Kumpara ito sa December 2021 survey na 10.7 million Filipino families o 43% ang ikinukunsidera ang kanilang sarili na mahirap, 39% ang nasa “borderline poor” habang 19% ang hindi mahirap.

Ipinaliwanag ng SWS na ang bahagyang paglundag ng self-rated poverty sa bansa ay bunsod ng magkahalong pagtaas sa Mindanao at Metro Manila at pagbaba naman sa Visayas at Balanced Luzon.

Samantala, aabot naman sa 1.5 milyong Pinoy ang bagong mahirap.

Nakatakda na ring itaas ang minimum na sahod ng mga manggagawa sa Ilocos, Cagayan Valley at CARAGA Regions.

Ito kinumpirma ng Department of Labor and Employment (DOLE) makaraang maglabas na rin ng Wage Hike Order ang kani-kanilang Regional Tripartite Wages and Productivity Boards (RTWPB).

Alinsunod sa Wage Order RB1-21, inaprubahan ang 60 hanggang 90 pesos na dagdag-sahod sa Ilocos Region na ibibigay sa loob ng dalawa hanggang tatlong tranches.

Sa sandaling maibigay na nang buo, magiging 372 hanggang 400 pesos na ang minimum wage sa rehiyon mula sa kasalukuyang 282 hanggang 340 pesos.

Aprubado na rin ng wage board ang 500 at 1,500 pesos na monthly wage increase para sa mga domestic worker sa mga lungsod at first-class municipalities maging sa iba pang munisipalidad kaya’t aabot na ang monthly wage rate nila sa 5,000 pesos.

Samantala, 50 hanggang 75 pesos naman ang aprubadong umento sa Cagayan Valley na hahatiin din sa dalawa hanggang tatlong bigayan kaya’t magiging 400 hanggang 420 pesos na ang sahod mula sa kasalukuyang 345 hanggang 370 pesos.

Sa CARAGA Region naman, inaprubahan na rin ang dagdag 15 pesos sa cost of living allowance at 30 pesos sa sahod kaya’t magiging 350 na mula sa kasalukyang 305 pesos ang basic pay.

Epektibo ang mga umento, 15 araw matapos itong ilathala sa mga pahayagang may Regional Circulation.

Nadiskubre ng mga otoridad ang malawak na illegal drug trade sa loob ng Quezon City Jail Male Dormitory makaraang masamsam ang aabot sa pitundaang gramo ng kush, mga baril at iba’t-ibang improvised weapons.

Ito’y matapos ang isinagawang dalawang araw na “Oplan Greyhound” ng Quezon City Police District at Bureau of Jail Management and Penology sa loob ng piitan.

Kasunod ito nang sumiklab na riot sa nasabing kulungan noong Biyernes, Mayo 13 na ikinasawi ng isang preso at ikinasugat ng siyam na iba pa.

Tinawag naman ng Quezon City Jail na “Stage Riot” ang insidente dahil base sa natanggap nilang intelligence report, isang grupo o Ang Batang City Jail lamang ang pasimuno ng gulo.

Layunin umanong mapatalsik sa puwesto si Jail Warden, Supt. Michelle Bonto upang malaya silang makapagbenta ng iligal na droga sa loob ng bilangguan.

Ito na sa ngayon ang pinakamaraming kontrabandong nasabat ng mga otoridad sa loob ng Quezon City Jail Male Dormitory.

Nagpaabot na ng pagbati ang Malakanyang kay Maria Filomena Singh sa pagkakatalaga sa kanya ni Pangulong Rodrigo Duterte bilang bagong Associate Justice ng Korte Suprema.

Si Justice Singh ay nagsilbi bilang Associate Justice ng Court of Appeals.

Ayon kay Presidential Communications Secretary at Acting Presidential Spokesman Martin Andanar, kampante silang maipagpapatuloy ni Singh ang “judicial excellence at independence” ng Supreme Court.

Si Singh ang ika-194 na mahistrado ng kataas-taasang hukuman at sinasabing huling appointee ni Pangulong Duterte sa SC bago bumaba sa puwesto sa June 30.

Pinalitan ng bagong mahistrado si Dating Associate Justice Estela Perlas-Bernabe na nagretiro noong Mayo 14.

Si Singh ay kapatid ni Health Spokesperson, Undersecretary Maria Rosario Vergeire.

Itinalaga na ni Pangulong Rodrigo Duterte si Court of Appeals Justice Maria Filomena Singh bilang bagong associate justice ng Korte Suprema.

Kinumpirma ni Executive Secretary Salvador Medialdea na nanumpa si Singh kay Chief Justice Alexander Gesmundo kagabi.

Si Singh ang pumalit kay Supreme Court Associate Justice Estela Perlas-Bernabe na nagretiro noong Mayo 14.

Ang bagong mahistrado ang sinasabing pinakahuling appointee ni Pangulong Duterte sa Supreme Court (SC) bago bumaba sa puwesto sa June 30.

Magiging isa rin si Singh sa mga mahistradong pinakaha-mahabang panahong magsisilbi sa SC bago ang kanyang mandatory retirement sa taong 2036. —sa ulat ni Bert Mozo (Patrol 3)

Naglagay na ang Philippine Coast Guard (PCG) ng limang ‘navigational buoys’ o boya na may nakakabit na watawat ng Pilipinas sa apat na kritikal na isla sa West Philippine Sea.

Sa kabila ng tensyon sa pinag-aagawang karagatan, ang mga boya na may habang tatlumpung talampakan, ay inilagay sa mga isla ng lawak, likas, parola at pag-asa na nasa loob ng Exclusive Economic Zone ng Pilipinas.

Pinangunahan ni PCG Commandant, Admiral Artemio Abu ang pagdating ng limang PCG vessels na siyang nagsakay sa mga boya at naglagay sa naturang mga isla na isinagawa simula Mayo 12 hanggang 14.

Ayon kay Abu, hindi naman hinarang ng mga chinese vessel ang mga barko ng Pilipinas na nagtungo sa mga naturang lugar.

Kabilang sa mga nagdala ng mga buoy ang BRP Corregidor, BRP Bojeador, BRP Suluan, BRP Capones at Tug Boat Habagat na nakabalik na kahapon.

Magsisilbi rin ang mga boya na gabay ng mga mangingisda at barko na daraan sa West Philippine Sea at maghahatid ng mensahe na ang katubigang malapit dito ay ikinukunsiderang “Special Protected Zones”.