Drew Nacino

Bigo pa rin ang Department of Health na maabot ang target na makapagbakuna ng 23 million COVID-19 vaccine booster sa ilalim ng “PinasLakas” vaccination drive.

Aminado si DOH Officer-In-Charge Maria Rosario Vergeire na 1, 729, 547 pa lamang ang nabigyan ng booster o 7% ang kanilang natuturukan mula sa kabuuang target hanggang October 8.

Ayon kay Vergeire, base sa pag-aaral ay maaari pang tumaas ang Admission sa mga ospital sa Setyembre o Oktubre kung hindi darami ang magpapaturok ng booster.

Dahil dito, muling nanawagan ang opisyal sa publiko na magpabakuna bilang proteksyon kontra COVID-19.

Posibleng maging isang super-spreader event ng COVID-19 ang pamamahagi ng Department of Social Welfare and Development ng educational cash aid sa mga mahihirap na pamilya.

Ito ang ibinabala ni Health Reform Advocate at Bataan Provincial Health Consultant, Dr. Tony Leachon matapos dumugin ng mga tao ang headquarters ng DSWD sa Quezon City at satellite offices nito sa iba pang bahagi ng bansa, noong Sabado.

Nagresulta pa ito sa gulo at stampede na ikinasugat ng ilang nagpunta para lang makakuha ng financial assistance.

Para maiwasang maulit ang ganitong insidente, iminungkahi ni Leachon na maaari namang gawing alphabetical ang pamamahagi kada pamilya at gawin ito sa highly-ventilated area.

Dapat din anyang i-require mag-facemask ang mga kukuha at abisuhan ang mga magulang kung sana bakunado ang tatanggap ng ayuda.

Bukod dito ay maaari ring magbahay-bahay ang DSWD o sa mga eskwelahan na lang ipamahagi ang cash assistance sa tulong ng DSWD, Departments of Education at Interior and Local Government.

Hiniling ng National Parents-Teachers Association (NPTA) Philippines ang pagkakaroon ng tatlong class shift para sa ilang paaralan sa pagsisimula ng Academic Year 2022-2023 ngayong araw.

Ito, ayon kay NPTA Philippines president Willy Rodriguez, ay sa gitna pa rin ng presensya ng COVID-19 pandemic.

Maaari anyang magpatupad ng tatlong shift sa sandaling kulangin ang mga silid-aralan.

Tiniyak ni Rodriguez na handa ang mga magulang sa pagbubukas ng klase sa kabila ng mga hamon na kinakaharap, tulad ng kakulangan ng mga classroom dahil sa dumaraming mag-aaral kada taon.

Samantala, iminungkahi ng NPTA na dagdagan ang palapag ng mga school building at gawing 6 stories ang itatayong mga gusali sa halip na apat na palapag lamang upang makapag-accommodate ng mas maraming estudyante.

Bahagya muling bumaba ang karagdagang daily COVID-19 cases sa bansa.

Sa datos ng Department of Health kahapon, nakapagtala ng 3, 643 additional COVID-19 infections kumpara sa 3, 715 noong Sabado.

Dahil dito, bumaba pa sa 35, 271 ang aktibong kaso kahapon kumpara sa 36, 146 noong Sabado.

Sumampa naman sa 3, 855, 804 ang total case load, kabilang ang 3, 759, 176 recoveries at 61, 357 deaths.

Sa kabila nito, nananatiling mababa ang mga bagong kaso ng COVID-19 kumpara sa average daily cases na 4,001 simula August 8 hanggang 14.

Samantala, nangunguna pa rin ang Metro Manila sa may pinaka-maraming nagkasakit sa nakalipas na dalawang linggo, 14, 128 cases; sinundan ng CALABARZON, 8,441 at Central Luzon, 4, 785.

Anggulong “crime of passion” at “love triangle” ang nakikitang motibo sa pamamaril at pamamaslang sa tatlo katao sa Taguig City, kahapon.

Napag-alaman ng Taguig City Police na suspek sa pamamaslang ang dating kasintahan ng isa sa mga biktima na si Marie Angelica Belina.

Kinilala ni Taguig Police acting Chief, Col. Robert Baesa ang suspek na si Julian Paningbatan Jr., alyas Jimboy, dating kinakasama ni Belina at sinasabing miyembro ng Philippine Navy.

Batay sa CCTV footage, nakitang magkausap sina Paningbatan at Belina bago umalingawngaw ang magkakasunod na putok ng baril sa Barangay Fort Bonifacio, dakong alas-3:20 ng madaling araw.

Pabalik na sana si Belina ng Japan bilang Overseas Filipino Worker nang maganap ang krimen.

Patay din sa insidente sina Tashane Joshua Branzuela, kasalukuyang live-in partner ni Marie at Grab driver na si Mark Ian Desquitado na maghahatid sana kina Belina sa airport.

Patuloy na tinutugis ng mga otoridad si paningbatan na sinasabing naka-AWOL o Absent without Leave sa Navy.

Tatlo ang patay makaraang pagbabarilin sa Taguig City, kahapon.

Kinilala ang mga biktimang sina Marie Angelica Belina, 25-anyos, isang Overseas Filipino Worker; estudyanteng si Tashane Joshue Branzuela, 22- anyos at Mark Ian Desquitado, 35- anyos, isang grab driver.

Ayon sa Taguig City Police, dakong alas 3:20 ng madaling araw nang maganap ang insidente sa tapat ng transient house na tinutuluyan ng mag-live-in partner na sina Belina at Branzuela sa Barangay Fort Bonifacio.

Naisugod pa si Branzuela sa Taguig-Pateros District Hospital pero idineklarang dead on arrival matapos ang halos kalahating oras.

Batay sa pahayag ng isang saksi na nasa loob din ng bahay, magkakasunod na putok ng baril ang umalingawngaw at matapos nito ay nakita na niyang nakahandusay sa sahig ang mga duguang biktima.

Pabalik na sana si Belina sa Japan at magpapahatid kay Desquitado sa airport nang bigla umanong sumulpot ang isang lalaki at pinagbabaril ang mga biktima.

Sinasabing kakilala ni Belina ang suspek na nakatakas naman lulan ng isang van.

Hindi na kailangan ng Pilipinas na magpatupad ng mahigpit na restriksyon sa biyahe ng mga turista kontra monkeypox virus.

Ito’y sa kabila ng naitalang ikatlong kaso ng monkeypox sa bansa.

Ayon kay Infectious Disease Expert, Dr. Rontgene Solante, ang mahalaga ay balaan o bigyan ng tamang impormasyon ang mga turistang darayo sa Pilipinas na maaari silang mahawaan ng monkeypox.

Importante rin anya na ipagbigay-alam sa mga health official ng mga biyahero kung mayroon silang sintomas.

Nanawagan naman si Solante sa publiko na laging maghugas ng kamay bilang bahagi ng health protocol laban sa monkeypox.

Dalawa ang patay sa sunog na sumiklab sa Ormoc City, Leyte.

Kinilala ang mga nasawi na sina Belen Sumalinog, 62- anyos at anak nitong si Lyndon Sumalinog Mendoza, 36- anyos.

Dakong alas-2 ng madaling araw kahapon nang sumiklab ang apoy sa bahay ng mga biktima sa Barangay Cogon.

Ayon sa Ormoc City Fire Station, na-trap umano ang mag-ina sa loob ng kanilang bahay.

Malaki na ang apoy nang magising ang mga kapitbahay kaya’t hindi na nasaklolohan ang mga biktima na walang kasama nang maganap ang insidente.

Dalawang bahay naman ang nadamay sa sunog na naapula dakong alas-4 ng madaling araw.

Aabot sa P1.8 million ang halaga ng mga naabo o napinsalang ari-arian habang inaalam na ang sanhi ng pagkalat ng apoy.

Nasa 400 pamilya ang nawalan ng tirahan makaraang lamunin ng apoy sa Sta. Mesa, Maynila.

Pasado alas-10 kagabi nang sumiklab ang sunog sa Valencia Street.

Ayon kay Fire Senior Supt. Crosbee Gumowang, Director ng Manila Fire District Office, nagsimulang kumalat ang apoy sa bahay ng isang Raniel Urbano at mabilis na nadamay ang mga katabing-bahay na gawa sa light materials.

Umakyat sa ikatlong ilarma ang sunog bago tuluyang naapula dakong alas- 12:40 kaninang madaling araw.

Wala namang nasaktan habang tinatayang kalahating milyong piso ang halaga ng mga naabo o napinsalang ari-arian.

Inaalam na ng Manila Fire District Office ang sanhi ng sunog.

Ipinag-utos na ni Bureau of Customs Commissioner Yogi Filemon Ruiz ang pagsasagawa ng imbestigasyon sa apat na rice shipments na ibinagsak sa Port of Iloilo mula Vietnam.

Ito’y makaraang makatanggap si Ruiz ng mga ulat na mismong mga BOC official sa Iloilo ang nagbigay basbas upang i-diskarga ang nasa 38,400 metric tons ng bigas simula noong August 4 hanggang 13.

Nagkakahalaga ang nasabing kargamento ng P1 billion na lulan ng 20 cargo vessels.

Ayon kay Ruiz, nakikipag-ugnayan na ang Aduwana sa iba’t ibang stakeholders na nakatutok sa inspeksyon ng mga shipment, gaya ng Bureau of Plant Industry (BPI) ng Department of Agriculture.

Itinanggi naman ni BOC-Port of Iloilo District Collector Ciriaco Ugay ang alegasyon ng Rice Smuggling sa Iloilo Port dahil wala umanong “history” nang pagpupuslit ng bigas sa nasabing pantalan.

Nilinaw din ng BOC-Collection District 6 na mayroong mga clearance at permit ang kinukwestyong kargamento mula sa BPI alinsunod sa Rice Tariffication Law.