Drew Nacino

Bumaba na sa 33, 774 ang aktibong kaso ng COVID-19 sa bansa, kahapon kumpara sa 35, 271 noong linggo.

Ito’y makaraang makapagtala ng karagdagang 3, 077 cases ang Department of Health, kahapon.

Ang new cases ay mababa sa average daily cases na naitala noong August 15 hanggang August 21 na 3, 412.Umakyat naman sa 3, 858, 838 ang total case load, kabilang ang 3, 763, 768 recoveries at 61, 386 deaths.

Samantala, nangunguna pa rin ang Metro Manila sa mga rehiyong may pinaka-maraming infections kada rehiyon sa nakalipas na dalawang linggo na 14, 128 cases; sinundan ng CALABARZON, 8, 441 at Central Luzon, 4, 785.

Pinagpapaliwanag na ng Metropolitan Waterworks and Sewerage System Regulatory Office ang Maynilad hinggil sa ka-aanunsyo lamang nitong service interruptions.

Ayon sa MWSS, kailangang ipaliwanag ng Maynilad ang kabiguang abisuhan ang mga customer sa bagong interruption schedules at mga issue sa likod ng pagkaantala ng serbisyo mula August 14 hanggang September 1.

Pina-alalahanan din ng MWSS ang nasabing water concessionaire na mag-post ng abiso sa social media, partikular na sa Facebook at Twitter at sa traditional media at magkaroon ng text blasts dalawang araw bago ang interruptions.

Inatasan din ng MWSS ang Maynilad na tumalima sa mga inaanunsyo nitong service interruption, paigtingin ang tankering operations at koordinasyon sa mga apektadong barangay upang mabawasan ang epekto ng kakulangan sa supply ng tubig.

Pinagsusumite rin ang Maynilad ng konkretong plan of action at maglatag ng mga solusyon upang tugunan ang madalas na water supply at quality issues sa west zone at pabilising maibalik ang normal na serbisyo sa mga customer.

Iginiit ni Vice President at Education secretary Sara Duterte – Carpio na hindi dapat maging hadlang sa pagbalik ng mga estudyante sa In-person classes ang kakulangan sa mga silid-aralan.

Ito’y sa kabila ng mga ulat mula sa ilang paaralan hinggil sa kakulangan sa mga classroom.

Sa kanyang talumpati sa National School Opening Day Program sa Dinalupihan Elementary School sa Bataan, inihayag ni VP Sara na ilang paaralan sa Visayas at Mindanao ang nangangailangan ng agad na rekonstruksyon dahil sa epekto ng Bagyong Odette.

Hindi anya rason ang kakulangan ng educational infrastructure, gaya ng classrooms sa ilang lalawigan upang pigilan ang mga batang magtungo sa mga paaralan.

Para tugunan ang classroom shortage, nagpatupad ng shifting schedules, isa sa umaga at isa sa hapon — upang pagkasyahin ang mga estudyante, habang pinananatili ang physical distancing.

Samantala, idinagdag ni Duterte na hindi na rin dapat maging dahilan ang COVID-19 pandemic upang hindi papasukin ang mga mag-aaral sa face-to-face classes.

Itinuturing na mabagal ang pagkalat ng monkeypox virus sa bansa matapos matukoy ang ikalawa at ikatlong kaso ng sakit ilang linggo makalipas mapaulat ang unang kaso.

Iginiit ng Infectious Disease expert na si Dr. Edsel Salvaña na ang monkeypox ay hindi gaanong nakahahawa kumpara sa COVID-19 at ang mga sintomas ay lumalabas dalawa hanggang tatlong linggo matapos ma-infect ang isang indibidwal.

Ayon kay Salvaña, batid naman na kumakalat ang virus pero inaasahan nilang mabagal ang pagka-detect sa mga ito at mayroon ding ilang indikasyon na asymptomatic ang pagkalat nito.

Kailangan anyang paigtingin pa ang mga protocol at pag-detect sa mga kaso ng monkeypox at mas maging alerto ang publiko.

Naniniwala din ang medical expert na ang pagsunod ng mga pilipino sa Health protocols Kontra COVID-19 ang maaaring dahilan ng mabagal na pagkalat ng monkeypox.

Ramdam na ang pagbaba sa P70 ng kada kilo ng presyo ng asukal o retail price nito sa Metro Manila.

Ito’y makaraang tumalima ang mga supermarket at grocery chain owner sa hirit ni Pangulong Bongbong Marcos na ibaba ang presyo ng asukal sa P70 mula sa P90 hanggang P110 kada kilo.

Pinapurihan naman ni PBBM ang walang pag-iimbot na pasya ng mga negosyante na batid na kailangan bawasan ang kanilang dapat sana’y magiging tubo para sa kapakanan ng mga consumer.

Ayon sa Punong Ehekutibo, ang desisyon na ito ng mga traders ay patunay na nananaig pa rin ang diwang Pilipino ng ‘Bayanihan’ at pagmamahal sa bayan.

Alinsunod sa kautusan ng Pangulo, nakipag-usap si Executive secretary Victor Rodriguez sa malalaking supermarket owner, gaya ng SM Supermarket, Robinsons Supermarket at Puregold Supermarket.

Bukod dito, nakipagpulong din si PBBM sa mga miyembro ng Philippine Chamber of Food Manufacturers Incorporated upang pag-usapan ang problema sa kakulangan ng supply ng asukal sa bansa.

Matagumpay ang isinagawang plebisito noong Agosto a – 20 para pagtibayin ang paglikha sa Barangay New Canaan bilang isang regular at natatanging barangay sa Bayan ng Alabel, Saranggani.

Ito ang inihayag ni Commission on Elections chairman George Garcia matapos ang Flag raising ceremony sa Comelec kahapon.

Nakatakda ring magsagawa ang poll body sa Setyembre a – 3 ng plebisito para pagtibayin naman ang conversion ng Bayan ng Calaca sa isang Component City ng Lalawigan ng Batangas.

Kasado na rin ang plebisito para sa paghahati sa dalawang dibisyon ng Maguindanao sa Setyembre a – 17.

Naunsyami ang unang araw sana ng pagbabalik-klase ng mga estudyante sa pre-school hanggang Elementary sa lalawigan ng Cagayan.

Ito ang kinumpirma ni Governor Manuel Mamba dahil sa epekto ng Bagyong Florita sa Northern Luzon.

Ayon kay Mamba, prayoridad ang kaligtasan ng mga mamamayan, lalo ng mga bata laban sa epekto ng bagyo, gaya ng flashfloods at landslides.

Tinututukan din anya nila ang mga preparasyon para sa posibleng evacuation dahil sa posibleng pagland-fall ng bagyo.

Pinaigting na ng ilang Local Government sa Central Luzon ang kampanya Kontra Dengue lalo’t naitala sa rehiyon ang pinakamaraming kaso ng naturang sakit sa Pilipinas.

Simula Enero a – 1 hanggang Hulyo a – 30, aabot na sa 18, 664 ang dengue cases sa Region 3 o 18% ng kabuuang bilang ng mga kaso sa bansa.

Kabilang sa mga puspusang nagpapatupad ng kampanya kontra Dengue ang mga Bayan ng San Miguel at Barangay Minuyan sa Norzagaray, Bulacan.

Sa Bulacan ang may pinakamaraming kaso ng Dengue sa rehiyon.

Namahagi ang LGU ng San Miguel ng mga pamplet na may impormasyon hinggil sa pag-iwas sa sakit na dala ng lamok habang nagsagawa ng disinfection sa mga bahay sa Barangay Minuyan.

Nag-fogging naman sa Cabanatuan City, Nueva Ecija at pinuntahan ang mga paaralan na humiling ng tulong laban sa dengue bilang preparasyon sa balik-eskuwela ngayong araw habang nagkaroon din dengue misting sa Tarlac City.

Samantala, inihayag ni DOH Officer-In-Charge Maria Rosario Vergeire na bukod sa paglilinis at disinfection, naglunsad din ng preventive measures ang mga sangay ng kagawaran.

Naglaan din anya ng dagdag-pondo sa mga ospital bilang paghahanda.

Pinapurihan ng Sugar Planters Groups ang pagtatalaga ni Pangulong Bongbong Marcos ng bagong Sugar Regulatory Administration acting Administrator at dalawa pang miyembro ng Board nito.

Kabilang sa mga nagpahayag ng suporta sina Enrique Rojas, Pangulo ng National Federation of Sugarcane Planters; Raymond Montinola, Pangulo ng Confederation of Sugar Producers at Danilo Abelita, Pangulo ng Panay Federation of Sugarcane Farmers.

Umaasa anila ang mga naturang grupo na pananatilihin ng mga bagong-talagang opisyal ang pagiging “consultative” ng SRA sa paggawa ng mga desisyon.

Kampante rin ang mga Sugar planter na mahigpit na i-mo-monitor ng mga bagong SRA official ang sugar supply at demand situation, at gagawa ng mga hakbang, tulad ng posibilidad ng pag-a-angkat ng karagdagang asukal.

Ito’y upang matiyak ang stable sugar supply at patas na presyo para sa mga consumer at producer.

Una nang itinalaga ni PBBM si David John Thaddeus Alba bilang SRA acting Administrator, Pablo Luis Azcona bilang Board Member na kumakatawan sa Sugar Planters at Maria Mitzi Mangwag bilang Board Member na kumakatawan sa sugar millers.

Nakatakda namang manumpa kay Pangulong Marcos ang mga bagong opisyal ng ahensya sa Malakanyang mamaya.

Inalis na ng PHIVOLCS ang Alert level 1 sa Bulusan Volcano sa Sorsogon.

Sa bulletin kahapon ng PHIVOLCS, wala ng mga naitalang volcanic earthquakes sa Bulusan simula pa noong ikatlong linggo ng Hulyo.

Indikasyon ito na nabawasan na ang hydrothermal activity ng bulkan.

Nabawasan din ang sulfur dioxide emission sa 230 tons per day noong July 25 hanggang August 5 kumpara sa 1, 900 tons per day noong June 5 hanggang 12.

Gayunman, ipinagbabawal pa rin ang pagpasok sa 4 kilometer permanent danger zone.

Magugunitang nakapagtala ng phreatic eruptions sa Bulusan Volcano noong June 5 at June 12 dahilan upang matabunan ng abo ang ilang barangay.