Drew Nacino

Tumataas naman ang mga severe at critical na kaso ng COVID-19 nitong mga nagdaang linggo.

Ito ang kinumpirma ni Department of Health Officer-in-Charge Maria Rosario Vergeire matapos iulat na mayroong 811 severe at critical cases na na-admit sa mga ospital noong Agosto a – 21.

Ayon kay Vergeire, ang nasabing bilang ay 9.7% ng kabuuang COVID-19 admissions.

Gayunman, hindi pa naman anya lumalampas sa 1, 000 o 10% na threshold ang bilang ng mga severe at critical case.

Sa 23, 883 additional COVID-19 cases simula Agosto a – 15 hanggang a – 21, 101 individuals ang mga bagong malubha o kritikal na kaso.

Sinuspinde ng Malakañang ang trabaho sa gobyerno at pasok sa mga paaralan sa ilang lugar simula kahapon hanggang ngayong araw.

Alinsunod ito sa utos ni Pangulong Bongbong Marcos bunsod ng masamang panahong dulot ng Bagyong Florita.

Saklaw ng suspensyon ang trabaho sa mga tanggapan ng gobyerno at klase sa mga pampublikong paaralan sa Metro Manila, Cavite, Rizal, Bulacan, Laguna, Zambales at Bataan.

Ayon kay Press secretary Trixie Cruz-Angeles, nasa diskresyon na ng mga may-ari o head ng mga pribadong paaralan at tanggapan kung magsususpinde ng trabaho at klase.

Gayunman, inirerekomenda anyang tumalima rin sa kahalintulad na hakbang ang mga nasa Private School at Office.

Una nang nagsuspinde ng klase sa lahat ng antas sa mga pribado at pampublikong paaralan sa Ilocos Sur, Ilocos Norte, Pangasinan, La Union, Cagayan, Pampanga at Nueva Ecija dahil sa bagyo.

Kumbinsido si Agriculture Undersecretary Domingo Panganiban na artipisyal lamang ang kakulangan sa supply ng asukal.

Naniniwala si Panganiban na malaki ang tsansang bumaba ang presyo ng asukal kung ang supply na iligal na inimbak sa mga bodega ay inilabas sa merkado.

Ayon kay Panganiban, nakapag-produce at nakapag-ani, nag-mill, pinagbili sa trader ang mga asukal at pagdating sa trader, ni-release ang kalahati pero itinago ang nalalabing supply.

Kaya rin anya tumagal ng dalawa tatlong buwan bago makapag-produce ay nagkaroon ng hoarding dahil inipit ang supply dahilan upang walang mabili ang mga consumer.

Samantala, ikinakasa na ng DA, Sugar Regulatory Administration at Bureau of Customs ang posibleng mga kasong isampa laban sa mga nasa likod ng artificial shortage ng asukal.

Bukod dito ay magsasagawa rin ng imbestigasyon ang Senate Blue Ribbon Committee hinggil sa “sugar fiasco” ngayong araw.

Walang pondo sa ilalim ng panukalang P5.268 Trillion National Budget para sa taong 2023 ang P500 na dagdag sa Social Pension ng Indigent o mahirap na Senior citizens.

Ito ang inamin ni Budget and Management secretary Tina Rose Marie Canda matapos isumite ang proposed national budget sa kamara kahapon.

Ayon kay Canda, kailangan ng P24.5 Billion na karagdagang pondo para maitaas sa P1, 000 ang buwanang pensyon ng mga lolo’t lola mula sa kasalukuyang P500.

Hindi pa anya matukoy kung saan huhugutin ang pondo para sa dagdag-pensyon.

Sa kabila nito, tiniyak ng Kalihim na makikipag-ugnayan ang DBM sa mababang kapulungan ng Kongreso para maremedyuhan ang budget sa social pension.

Black-eye ang inabot ng dalawang lalaki matapos gulpihin ng ilang residente dahil sa pagtatangka umanong dukutin ang isang batang babae sa Biñan City, Laguna.

Naganap ang insidente sa Barangay Malamig noong Sabado.

Ayon sa Biñan City Police, batay sa salaysay ng menor de edad na babae, papalabas siya ng gate nang sapilitang hilahin ng dalawang lalaki at may isa pa umano na nagsilbing lookout.

Nagsisigaw umano ang bata para humingi ng tulong kaya’t naalerto ang mga magulang nito dahilan upang tumakbo ang mga suspek.

Gayunman, nasakote ng mga residente ang dalawa at kinuyog habang ang isa nilang kasamahan ay nakatakas.

Nahaharap naman sa reklamong Forcible Abduction ang dalawang lalaki.

Samantala, nilinaw ng pulisya na isolated case lamang ang insidente sa kabila ng mga social media post hinggil sa laganap umanong kidnapping.

Nanumpa na kay Pangulong Bongbong Marcos sa Malakañang ang mga bagong opisyal ng Sugar Regulatory Administration (SRA).

Itinalaga ni Pangulong Marcos ang mga bagong miyembro ng SRA bilang bahagi ng rigodon sa ahensya matapos magbitiw ang ilang dating opisyal na nakaladkad sa sugar fiasco.

Kabilang sa mga nanumpa sina David John Thaddeus Alba bilang administrator ng SRA kapalit ni Hermenegildo Serafica;

Maria Mitzi Mangwag, kinatawan ng sugar millers at Pablo Luis Azcona bilang kinatawan naman ng sugar planters.

Kumpiyansa si PBBM na malalampasan ng mga bagong opisyal ang mga hamong kinakaharap sa sugar industry.

Matapos ang Oath-taking, pinulong ng Pangulo ang mga nasabing SRA member kaugnay sa pagtiyak sa supply ng nasabing produkto.

Nagdulot ng bahagyang pagbigat ng daloy ng trapiko sa ilang bahagi ng Metro Manila ang unang araw ng pagbabalik ng mga estudyante sa face-to-face classes.

Pero nilinaw ni MMDA Traffic Engineering Center chief Neomie Recio na manageable naman ang traffic congestion sa mga pangunahing kalsada sa Metro Manila.

Ayon kay Recio, hindi naabot ang inaasahang volume ng mga sasakyan kahapon.

Kabilang sa mga nakaranas ng traffic build-up ang bahagi ng Ateneo De Manila University sa Quezon City at De La Salle-Greenhills sa Mandaluyong subalit na-i-saayos matapos ang halos isang oras.

Ganito rin ang naranasan sa southbound lane ng Commonwealth Avenue sa Quezon City.

Ito, ayon kay MMDA spokesman Crisanto Saruca Jr., ay bunsod ng kakulangan ng public utility buses sa bahagi ng Commonwealth-Litex.

Samantala, 226 na motorista ang nahuling lumabag sa number coding scheme.

Pangkalatahang naging maayos at walang aberya ang pagsisimula ng klase para sa School Year 2022-2023.

Inihayag ni Department of Education spokesman Michael Poa na wala pang natatanggap na ulat ang kagawaran ng anumang insidente kaugnay ng pagbubukas ng klase hanggang alas- 9:20 kahapon ng umaga.

Tiniyak naman ni Poa na patuloy ang kanilang monitoring sa mga paaralan.

Umabot sa 28 milyong mag-aaral ang nagbalik-eskwela sa unang araw ng School Year 2022-2023 kahapon.

Binalaan ni Interior secretary Benhur Abalos ang mga personnel ng Bureau of Jail Management and Penology na nasasangkot sa ilegal na droga at iba pang ilegal na aktibidad.

Sa kanyang pahayag sa 31st Anniversary ng Bureau of Jail Management and Penology, iginiit ni Abalos na kailangang linisin ang mga personnel ng BJMP upang mailayo ang mga preso sa ilegal na droga, pagpasok ng electronic communication gaya ng cellphone, pagpasok ng baril, patalim at iba pang kontrabando sa mga piitan.

Ayon sa Kalihim, patuloy ang isinasagawang programa ng BJMP upang mapigilan at masawata ang pagpasok ng COVID-19 sa mga bilangguan at ang rehabilitasyon sa mga Persons Deprived of Liberty (PDL).

Iminungkahi rin ni Abalos ang pagsasagawa ng drug test sa mga PDL sa buong bansa upang matukoy kung gumagamit ng ilegal na droga ang mga ito.

Para naman anya maisagawa ang rehabilitasyon ng mga PDL ay kailangang maresolba ang siksikan sa mga kulungan.

Umabot naman sa 23, 883 ang bagong kaso ng COVID-19 mula Agosto a – 15 hanggang a – 21.

Ayon sa Department of Health, ang average na bilang ng bagong kaso kada araw ngayong linggo ay nasa 3, 412, mas mababa ng 15% kumpara sa mga kasong naitala noong August 8 hanggang 14.

Kabilang sa mga nadagdag ang 101 severe at critical cases.

Samantala, mayroong naitalang 321 additional deaths kung saan 90 ay noong August 8 hanggang 21.