Naniniwala ang isang infectious disease expert na mayroon nang local transmission monkeypox virus sa Pilipinas matapos makumpirma ang ika-4 na kaso ng monkeypox sa bansa.
Sa panayam ng DWIZ kay Dr. Rontgene Solante, ipinaliwanag nito na isa sa mga indikasyon ay hindi bumiyahe o walang travel history sa ibang bansa ang mga pasyente.
Gayunman, mahalaga anyang matukoy ng Department of Health kung sino ang mga nakasalamuha ng ika-4 na Pilipinong tinamaan ng virus.
Umabot na sa mahigit 1,300 pamilya o nasa 4,000 katao na ang apektado ng Bagyong Florita sa Northern Luzon.
Ito ang kinumpirma ng National Disaster Risk Reduction and Management Council (NDRRMC) matapos lumabas ng Philippine Area of Responsibility ang bagyo, kanina.
Ayon kay NDRRMC spokesman Mark Timbal, karamihan sa mga naapektuhan ay mula sa Ilocos, Cagayan Valley at Cordillera Administrative Regions.
Nagdulot din anya ng landslides at flashfloods ang malakas na pag-ulan sa mga nasabing rehiyon, maging sa Bicol.
Samantala, inaalam pa ng NDRRMC ang halaga ng mga napinsalang imprastraktura at agrikultura.
Nanumpa na kay Pangulong Bongbong Marcos ang mga bagong opisyal ng Philippine Amusement and Gaming Corporation (PAGCOR).
Itinalaga ni Pangulong Marcos sina Alejandro Tengco bilang chairman at chief executive officer ng PAGCOR habang President at Chief operating officer si Juanito Sañosa.
Si Tengco ang magiging kapalit ni Andrea Domingo bilang Chairman at CEO.
Nanumpa naman bilang mga bagong miyembro ng Board of Directors ng nasabing Regulatory Body sina Engineer Francis Democrito Concordia, Gilbert Remulla at Jose Maria Ortega.
Nahirapan namang pumasok sa ikalawang araw ng face-to-face classes ang mga estudyante sa Malabon City makaraang salubungin ng baha bunsod ng malakas na ulang dala ng Bagyong Florita.
Kabilang sa mga nakaranas ng baha ang ilang estudyante sa Barangay Tugatog at Catmon kahapon ng umaga.
Ilang sasakyan naman ang tumigil sa kalsada habang nahirapang tumawid ang mga mag-aaral at kanilang mga magulang sa baha sa Governor Pascual Avenue.
Dakong tanghali na nang magdeklara ang City Government ng Malabon ng class suspension dahil sa malakas na ulan.
Kasabay din nito ang kautusan ni Pangulong Bongbong Marcos na suspendihin ang trabaho sa gobyerno at klase sa lahat ng lebel sa public school simula kahapon hanggang ngayong araw.
Saklaw ng suspension ang Metro Manila, Cavite, Laguna, Rizal, Bulacan, Zambales at Bataan.
Apat katao ang isinugod sa Cagayan Valley Medical Center (CVMC) sa Tuguegarao City matapos magtamo ng mga sugat dulot ng Bagyong Florita.
Kabilang sa nasugatan ang isang 28-anyos na residente na nagtangkang iligtas ang kanyang kalabaw pero nahulog kaya’t kailangang isailalim sa operasyon.
Ayon kay Dr. Glenn Matthew Baggao, Medical Director ng nasabing pagamutan, isang sampung taong gulang naman ang nabagsakan ng puno dahil sa lakas ng hanging dala ng bagyo.
Samantala, inilikas anya ang mga pasyente sa unang palapag ng CVMC makaraang bumaha pero wala namang nasaktan sa staff ng ospital.
Inilabas na ng Malakañang ang listahan ng Regular Holidays at Special Non-Working days para sa susunod na taon.
Alinsunod ito sa Proclamation 42 ni Pangulong Bongbong Marcos na nilagdaan naman ni Executive secretary Victor Rodriguez noong Lunes, Agosto a – 22.
Nakasaad sa proklamasyon na deklarado bilang Regular holidays sa taong 2023 ang bagong taon, January 1; Araw ng Kagitingan, April 9; Maundy Thursday, April 6; Good Friday, April 7;
Labor Day, May 1; Independence Day, June 12; National Heroes Day, August 28; Bonifacio Day, August 30; Pasko, December 25 at Rizal Day, December 30.
Kabilang naman sa Special Non-Working Days ang EDSA People Power Revolution Anniversary, February 25; Sabado De Gloria, April 8; Ninoy Aquino Day, August 21; Todos Los Santos, November 1;
Pista De La Immaculada Concepcion, December 8; huling araw ng taon, December 31 at additional Special non-Working Day naman ang November 2, araw ng mga patay.
Nakasaad din sa proklamasyon na ang deklarasyon ng National Holidays para sa paggunita ng Eid’l Fitr at Eid’l Adha ay ilalabas matapos madetermina ang eksaktong petsa alinsunod sa Islamic Calendar o Lunar Calendar.
Samantala, inatasan ng Palasyo ang Department of Labor and Development na bumalangkas ng mga alituntunin para sa nabanggit na proklamasyon.
Asahan na ng mga Public School Teacher na hindi pa nakatatanggap ng 5,000 peso cash allowance mula sa gobyerno na makukuha na nila ito ngayong linggo.
Ito ang tiniyak ng Department of Education, lalo’t matatapos na ang distribusyon sa Metro Manila.
Ayon kay DepEd spokesperson Michael Poa, na-download na nila ang pondo at sinimulan na ang pamamahagi sa pamamagitan ng mga School Division Office.
Target anya nilang maipamahagi ang cash allowance sa lahat ng guro sa buong bansa ngayong linggo.
Una nang inihayag ng Kagawaran na layunin ng cash allowance na tulungan ang mga guro sa paghahanda sa bagong School Year.
Bukod pa ito sa P3.7 Billion na nakalaan para sa mga pampublikong paaralan bilang karagdagang maintenance and other operating expenses.
Dalawa ang patay sa bus accident sa Lalawigan ng Isabela sa kasagsagan ng malakas na ulang dulot ng Bagyong Florita.
Ilang oras matapos mag-landfall ang bagyo sa Bayan ng Maconacon, isang Victory Liner Bus ang tumagilid sa gilid ng National Highway at bumangga sa isang poste ng kuryente sa Bayan ng Naguillan.
Ayon sa Naguilian Municipal Police, patungong Sampaloc, Maynila mula Tuguegarao City, Cagayan ang sasakyan nang ma-aksidente dakong alas-11 kahapon ng umaga sa Barangay San Manuel.
Hindi umano na-control ng driver ang brake dahil sa dulas ng kalsada.
Anim na pasahero ang lulan ng bus nang maganap ang trahedya.
Sumadsad pa sa 1, 735 ang additional COVID-19 cases ang naitala sa bansa kahapon.
Ito na ang pinakamababang daily tally simula noong July 13 at kauna-unahang pagkakataon sa nakalipas na 35 araw na nasa below 2, 000 na ang bilang ng mga kaso.
Ang mga naitalang additional cases kahapon ang ika-limang sunod na araw na unti-unting bumababa ang mga bagong kaso.
Sa datos ng Department of Health, lumagpak naman sa 31, 542 ang aktibong kaso kahapon kumpara sa 33, 774 noong lunes.
Dahil dito, umabot na sa 3, 860, 537 ang total caseload kabilang na ang 3, 767, 569 recoveries habang tumaas sa 61, 426 ang death toll.
Pinaka-marami pa rin ang naitalang kaso sa nakalipas na dalawang linggo sa National Capital Region, 14, 575; CALABARZON, 8, 476; Central Luzon, 4, 881; Western Visayas, 2, 504 at Cagayan Valley na mayroong 2, 221.
Bumababa na ang bilang ng COVID-19 cases sa buong bansa.
Ayon kay OCTA research fellow, Dr. Guido David, nasa .97% na lamang ang reproduction rate habang nasa negative 14% ang growth rate.
Batay sa Department of Health, nakapagtala ang bansa ng 23, 883 na karagdagang COVID-19 cases sa nakalipas na linggo o average 3, 412 daily infections mula August 15 hanggang 21 o mababa ng 15% kumpara sa nakalipas na linggo.
Sa Metro Manila, bumaba ng 12% ang COVID-19 cases kumpara sa nakalipas na linggo at bumaba na sa 1.04% ang reproduction rate.
Umaasa anya sila na matatapos na ang Omicron wave sa Pilipinas, lalo’t lampas na ang bansa sa peak ng COVID-19 infections.
Samantala, naniniwala naman si David na nakatutulong ang vaccination drive ng gobyerno upang mapababa ang mga kaso ng nasabing sakit.