Drew Nacino

Ilalarga na bukas ng Senate Blue Ribbon Committee ang imbestigasyon sa nabulilyasong importation ng 300,000 metric tons ng asukal.

Sa panayam ng DWIZ, inihayag ni Senator Francis Tolentino, Chairman ng nasabing kumite, kabilang sa mga imbitado ang mga dating opisyal ng Sugar Regulatory Administration.

Nilinaw naman ni Tolentino na hindi pa ligtas sa mga pananagutan ang mga SRA official na nag-resign kamakailan.

Ibabatay anya ang lahat ng magiging aksyon at rekomendasyon ng kumite sa mga ebidensya, batas at regulasyon.

Mahigpit na tututukan ng MMDA ang daloy ng trapiko, partikular sa mga school zone, ngayong unang araw ng pagbabalik-eskwela.

Ito ang tiniyak ni MMDA Traffic Operations Chief Bong Nebrija sa gitna ng inaasahang pagbuhos ng mga sasakyan, partikular sa EDSA.

Ayon kay Nebrija, plantsado na rin ang lahat ng kanilang koordinasyon sa mga local government unit at iba pang ahensya.

Kabilang anya sa kanilang mga hamong kahaharapin ang masikip na daloy ng trapiko sa ilang bahagi ng Mandaluyong at San Juan City.

Tinawag na fake news ng San Jose Municipal Police Station sa batangas ang panibagong kumakalat na mga text message kaugnay sa pangunguna umano ng puti at green van ng mga bata at dalaga.

Iginiit ni Maj. John Conrad Villanueva, hepe ng San Jose Police na walang katotohanan ang mga balitang nakikita sa social media maging sa mga kumakalat na text message.

Matagal na anyang nakarating sa kanilang tanggapan ang pekeng impormasyon at muling kumalat dahil sa papalapit na ang pagbabalik-eskwela.

Pinayuhan naman ni Villanueva ang publiko na huwag basta-basta maniwala sa mga kumakalat na mga nasabing impormasyon.

May basbas na ni Pangulong Bongbong Marcos ang pag-a-angkat ng 150,000 metric tons ng asukal.

Ito ang kinumpirma ni Press Secretary Trixie Cruz-Angeles makaraan ang pulong sa malakanyang ni Pangulong Marcos kasama si Senate President Juan Miguel Zubiri at mga nasa sugar industry.

Ayon kay Cruz-Angeles, mismong malalaking business owner na gumagamit ng asukal sa kanilang produkto ang nakausap ni PBBM noong Miyerkules.

Gayunman, wala pa anyang itinakdang panahon kung kailan mag-i-import ng asukal.

Welcome para sa mga employer ang panukalang magbawas ng holiday sa bansa.

Aminado si Sergio Ortiz-Luis, president ng Employers Confederation of the Philippines na magastos para sa mga employer ang magbigay ng double pay sa mga empleyado na pumapasok tuwing holidays.

Marami naman anya sa mga holiday ang hindi alam ng mga empleyado kung ano ang talagang ipinagdiriwang.

Ayon kay Ortiz-Luis, sa katunayan ay umaabot na isang buwan kung pagsasama-samahin ang lahat ng holiday sa bansa.

Bukod dito ay marami ring manggagawa mula sa manufacturing o construction industry ang apektado ng holidays dahil sila ay “no work, no pay.”

Inihayag naman ni Trade Union Congress of the Philippines, Vice President Louie Corral na ginastusan na ang pagsasabatas ng pagdaragdag ng non-working holidays, kaya hindi na dapat muling pagkagastusan ang pagpapanukala na bawasan ang mga ito.

Sakaling bawasan ay paglabag anya ito sa Labor Code Article 100 na diminution of benefits.

Ipinanawagan ni Corral na sa halip na magbawas ng holidays, tutukan na lang ang pagbabawas singil sa kuryente at ibang isyu tulad ng food security na nagpapahirap sa mga pilipino.

Dalawang warehouse ng asukal ang sinalakay ng Bureau of Customs katuwang ang iba pang government agency sa mga lungsod ng San Fernando, Pampanga at San Jose Del Monte, Bulacan.

Alinsunod ito sa utos ni Pangulong Bongbong Marcos na ipatupad ang “visitorial powers” sa lahat ng mga bodega o customs bonded warehouse upang masiyasat ang imbentaryo, partikular ang mga imported agricultural products at mabatid kung may nagaganap na “hoarding”.

Tinatayang 44,000 sacks o katumbas ng P220 million ang halaga ng mga nakumpiskang mga  nakaimbak na asukal na hinihinalang inimport mula Thailand, bukod pa sa mga nadatnang mga sako ng corn starch, harina flour, plastic products at mga plastic barrel ng mantika.

Pinasok ng mga otoridad ang bodega na matatagpuan sa New Public Market, barangay Del Pilar, San Fernando at natiyempuhan ang Chinese-Filipino warehouse keeper na si Jimmy.

Sinalakay din ang dalawang warehouse na pag-aari ng isang Victor Chua sa San Jose Del Monte City.

Batay sa natanggap na impormasyon ng BOC, ginagawa umanong imbakan ng mga hino-hoard na asukal ang mga nasabing bodega upang pataasin ang presyo sa merkado.

Nasa 7,000 metrikong tonelada o isandaan apatnapung libong bags ng asukal mula Thailand ang hinarang ng Bureau of Customs sa port of Subic.

Naharang ang bulto-bultong refined sugar matapos i-diskarga ng cargo vessel na M/V Bangpakaew (bang-pa-kiw) kahapon.

Ayon kay Customs Commissioner Yogi Filemon Ruiz, “recycled” ang import documents na iprinisenta ng nasabing barko.

Isinagaw ang aduwana ang operasyon alinsunod sa pinaigting na kampanya ng pamahalaan laban sa iligal na pag-aangkat ng mga agri-product, tulad ng asukal.

Kinumpirma ng Department of Education na wala silang natanggap na abiso na planong magsara ng Colegio de San Lorenzo sa Quezon City.

Inihayag ni DepEd Spokesman Michael Poa na nalaman lamang nila ang pagsasara ng nabanggit na paaralan nang pumutok ang balita.

Noong Lunes ay nagulantang ang mga estudyante nang biglang i-anunsyo ng nasabing pamantasan sa isang general assembly na permanente na itong magsasara.

Tiniyak naman ng paaralan na magkakaroon ng full refund sa enrollment fees at tutulungan ang mga estudyante na lumipat sa ibang eskwelahan.

Sa kabila nito, posible pa ring maharap sa reklamo ang pamunuan ng Colegio de San Lorenzo.

Hinikayat ng grupo ng magsisibuyas ang gobyerno na ipagpaliban muna ang pag-aangkat ng puting sibuyas.

Ito, ayon sa Valiant Cooperative ng Nueva Ecija, ay dahil sapat pa naman ang pulang sibuyas ng bansa upang matugunan ang kasalukuyang demand.

Inihayag ni Luchie Cena, pangulo ng Valiant Cooperative na inaasahan sa unang bahagi ng taong 2023 ang anihan ng puting sibuyas.

Nagbabala naman si Cena ng posibleng epekto sa lokal na industriya sakaling mag-angkat ngayon ng mga sibuyas.

Kung talaga anyang kailangang mag-import ay dapat kaunti lamang hangga’t maaari dahil may alternatibo namang solusyon at ito ay ang pulang sibuyas na di hamak na mas mahaba ang buhay kumpara sa puti.

Samantala, nangangamba umano ang mga magsasaka na maging talamak muli ang smuggling ng pulang sibuyas dahil dito.

Inilabas ng MMDA Ang listahan ng mga kalsadang sakop ng ipinapatupad na number coding scheme.

Ayon sa MMDA, epektibo ang “no window hour policy” sa lahat ng circumferential at radial roads sa Metro Manila.

Kabilang sa mga radial roads ay ang Roxas Boulevard mula C.M. Recto hanggang MIA Road; Taft Avenue mula Lawton hanggang Redemptorist; Osmeña Highway mula Quirino Avenue hanggang Nichols Interchange;

Shaw Boulevard mula Ramon Magsaysay Boulevard hanggang Pasig Boulevard; Ortigas Avenue mula Santolan hanggang Imelda Avenue; Aurora-Magsaysay Boulevards mula Legarda hanggang C-5 Katipunan;

España-Quezon Ave. at Commonwealth Ave. mula Carlos Palanca hanggang Quezon Ave. hanggang Commonwealth Ave. hanggang Mindanao Ave; a. Bonifacio mula Blumentritt hanggang EDSA-Balintawak;

Sa circumferential roads naman ay kasama rin ang C.M. Recto mula Roxas Bouelvard hanggang Legarda; A.H. Lacson Ave, Quirino Ave mula Roxas Boulevard hanggang R-10 at C.P. Garcia avenue mula Commonwealth Ave hanggang South Superhighway.

Kabilang din sa number coding scheme ang iba pang lansangan gaya ng a. Mabini street mula Samson road hanggang C-3, Caloocan; Alabang Zapote road mula alabang hanggang real street Quirino Ave at Mcarthur Highway mula Monumento circle hanggang Valenzuela-Meycauyan boundary.