Drew Nacino

Halos 500 motorista ang natiketan ng MMDA sa unang araw ng implementasyon ng expanded number coding scheme.

Karaniwang dahilan ng mga violator na natiyempuhan mula ala syete hanggang alas diyes ng umaga ay hindi nila alam na ibinalik na ang pang-umagang number coding scheme.

Gayunman, inihayag ni MMDA Spokesperson Crisanto Saruca, Jr. na hindi na katanggap-tanggap ang rason ng mga nahuli dahil tatlong araw namang nagkaroon ng public awareness campaign.

Pinatawan naman ang mga violator ng P300 na multa at para sa mga naka-strike three ay LTO na anya ang magpapasya kung isasailalim ang mga motorista sa seminar o babawian ng lisensya.

Sa expanded number coding scheme, pinagbabawalan ang mga sasakyan, depende sa huling numero ng kanilang plaka, na dumaan sa edsa at iba pang pangunahing kalsada mula ala syete hanggang alas diyes ng umaga at mula ala singko ng hapon hanggang alas otso ng gabi.

Kailangang maglunsad na ang gobyerno ng epektibong “geriatric programs” o medical specialty na nakatutok sa kalusugan ng matatanda.

Ito, ayon kay Commission on Population Development (POPCOM) Executive Director Juan Antonio Perez, ay upang matiyak ang aktibo at kalusugan ng “ageing community” sa bansa.

Dapat din anyang mag-develop ng mga “caring program” na maaaring ilagay sa bahay o institusyon, gaya ng home for the aged.

Binigyang-diin ni Perez na mahalaga ring bigyan ng access ang mga lolo’t lola sa paghahanapbuhay kaya’t panahon na para ikunsiderang itaas ang kasalukuyang compulsory retirement age na animnapu’t lima.

Una nang inihayag ng Philippine Statistics Authority na umabot na sa 9.2 million ang bilang ng mga pilipinong edad na sisenta pataas noong taong 2020 o na-doble kumpara sa 4.6 million noong taong 2000.

Naaresto na ng Philippine National Police sa Camarines Sur ang suspek sa kaso ng 15 anyos na babaeng siklista na natagpuang patay sa madamong bahagi ng Bustos, Bulacan, kamakailan.

Kinilala ang suspek na si Gaspar Maneja, Jr., alyas Jose Francisco Santos, na huli umanong nakasama ng biktimang si Princess Marie Dumantay, grade 9 student at residente ng San Jose Del Monte City, Bulacan.

Ayon kay PNP Spokesperson, Col. Jean Fajardo, nasakote si Maneja ng pinagsanib na pwersa ng Police Regional Office-5 Criminal Investigation and Detection Group at mga elemento ng Bulacan Provincial Police Office sa barangay Veneracion sa bayan ng Pamplona, kahapon ng umaga.

Natunton ng mga otoridad ang sasakyang ginamit ni Maneja na Toyota Wigo na may plakang EAE-2913 na nakarehistro sa kanyang nakababatang kapatid na si Jomer.

Gayunman, nang tanungin ng mga otoridad si Jomer ay inamin nitong simula pa noong Agosto 2021 ay wala na sa kanya ang sasakyan at dahil hindi na kayang tustusan ang buwanang hulog kaya’t ipinasalo ito sa kanyang kuya.

Batay sa salaysay ng mga testigo, nakitang sumakay si Dumantay sa Wigo ng suspek noong Agosto a – diyes at kinumpirma rin ng mga vendor sa barangay Bonga Menor, Bustos na madalas gamitin ng suspek ang sasakyan.

Ang mga testigo rin anya ang nagbigay sa mga otoridad ng plate number ng sasakyan kaya’t nagkaroon ng pagkakataon para maipa-verify ito sa LTO.

Nahaharap naman ang suspek sa kasong rape with homicide at paglabag sa P.D. number 38 o Using Fictitious Name and Concealing True Name sa prosecutor office, sa Malolos City bukod pa ito sa standing warrant of arrest sa dalawa pang kaso ng child abuse at rape.

Isang lalaking delivery rider na dinukot sa isang gasolinahan sa Taal, Batangas ang natagpuang patay sa Sariaya, Quezon.

Kinilala ng PNP-Calabarzon ang biktimang si Eugene del Rosario, 25 anyos na natagpuan sa eco-tourism road sa sitio pontor, barangay Bignay 2.

Nadiskubre kahapon ang bangkay ni Del Rosario na nakadapa at binalutan ng packaging tape ang ulo at kamay.

Ayon kay Lt. Col. William Angway, hepe ng Sariaya Police, may tama rin ng bala sa ulo at likod si Del Rosario.

Posible anyang pinatay sa ibang lugar ang biktima at itinapon lamang sa sariaya upang iligaw ang mga otoridad.

Batay sa cctv footage, kakababa lamang ni Del Rosario mula sa bus noong Martes ng gabi nang pwersahang bitbitin ng ilang armadong lalaking lulan ng isang kulay gray na sports utility vehicle at gray sedan sa barangay mahabang Ludlod, sa Taal.

Inaalam na ng pulisya ang motibo sa pamamaslang at sino o anong grupo ang nasa likod ng krimen.

Humirit na si Pangulong Bongbong Marcos, Jr sa mga trader na ibaba hanggang P70 ang kada kilo ng presyo ng asukal.

Ayon kay Pangulong Marcos, nakikipag-negosasyon na ang gobyerno sa mga negosyante na nag-alok ng P80 kada kilo pero kanyang hihilingin na ibaba pa hanggang P70.

Naaawa anya ang punong ehekutibo sa mga mamamayan at umaasang mapagbibigyan ng mga negosyante ang kanyang hirit na tapyasan ang presyo ng asukal.

Iginiit naman ng pangulo na may supply pa ang bansa kaya’t hindi pa kailangang mag-import sa ngayon.

Tatlong paaralan na sa Quezon City ang handang sumaklolo sa mga estudyante na apektado nang biglaang pagsasara ng Colegio de San Lorenzo (CDSL).

Kinumpirma ni Quezon City Mayor Joy Belmonte na bukas ang Trinity University of Asia, Thames International School at Quezon City University na tanggapin ang mga apektadong estudyante.

Nakikipag-ugnayan na rin anya ang pamahalaang lungsod sa iba pang eskwelahan.

Inihayag din ni Belmonte na aabot sa pitundaan labingpitong estudyante mula nursery hanggang grade 12 habang animnaraan limampu’t dalawa sa kolehiyo ang naapektuhan ng pagsasara ng CDSL.

Isandaan pitumpu’t dalawa anya sa mga college student ay ga-graduate pa naman ngayong school year.

Tiniyak din ng alkalde ang tulong para sa mga gurong nawalan ng trabaho sa pamamagitan ng public employment and service office.

Inirekomenda ni Bangko Sentral ng Pilipinas Governor Felipe Medalla na magpatupad din ang gobyerno ng tariff scheme sa imported sugar.

Bunsod ito ng panawagan ng manufacturers na payagan ang pag-a-angkat ng karagdagang asukal bagay na tinututulan naman ng mga sugar farmer.

Ayon kay Medalla, sa halip na mga quota, mas maiging payagan ang stakeholders na mag-import nang may taripa na isang paraan din upang mapigilan ang korapsyon.

Mababawasan din anya ang red tape at posibleng smuggling kung magpapataw ng taripa sa imported sugar.

Gaya ng rice tariffication law, ipinunto ni Medalla na maaaring mapunta ang mga revenue sa mga magsasaka sa halip na sa mga bureaucrat na maaari namang tumanggap ng mga “under-the-table payment o padulas” para sa import allotment.

Binigyang-diin ng BSP chief na isang leksyon na natutunan sa rice tariffication ay ang taripa ang pinaka-transparent at episyenteng proteksyon.

Bumuo na ng technical working group ang Land Transportation Office upang tutukan ang mga isyu kaugnay ng no-contact apprehension policy (NCAP).

Sa kabila ito ng kaliwa’t-kanang kontrobersya na kinakaharap ng NCAP na ipinatutupad sa limang lungsod sa Metro Manila.

Ayon kay LTO Chief at DOTr Assistant Secretary Teofilo Guadiz III, naniniwala sila na ang pinaka-mabisang paraan upang maisaayos ang mga issue ay sa pamamagitan ng pag-uusap ng LTO, MMDA at mga lgu.

Umaasa anya sila na magiging bukas ang mga alkalde ng MAYNILA, Quezon City, Valenzuela, Parañaque at Muntinlupa Cities sa mga proposal para sa mas maayos na implementasyon ng naturang polisiya.

Posibleng isagawa ang meeting sa pagitan ng LTO, MMDA at mga lgu sa mga susunod na araw.

Sa ilalim ng no-contact apprehension, ginagamit ang state of the art cameras na may artificial intelligence at gumagana ng bente kwatro oras upang makunan ang mga plaka ng mga sasakyang lumalabag sa traffic rules and regulations.

Ipadadala naman “digitally” sa mga motorista ang kanilang notices of violation.

Isa pang petisyon na tumutol sa implementasyon ng no-contact apprehension (NCAP) ang inihain sa Korte Suprema.

Hiniling ng petitioner na si Atty. Juman Paa sa Supreme Court na ideklarang labag sa batas ang NCAP at ipatigil ang implementasyon ng Ordinance 8676 na ipinasa ng Manila City Council noong 2020.

Alinsunod sa ordinansa, pinapayagan ang Manila Traffic and Parking Bureau na pagmultahin ang mga traffic violator na mahuhuli at makukunan ng traffic cameras.

Kabilang si Paa, na residente ng Maynila, sa mga motoristang pinagmulta ng P20,360 dahil umano sa traffic violation.

Iparerehistro sana ng petitioner ang kanyang s.u.v. sa Quezon City noong Hunyo pero kinailangan muna niyang magbayad ng multa sa Maynila dahil sa apat na traffic violations na obstruction ng pedestrian lane noong Mayo hanggang Hunyo 2021.

Nasa P2,000 ang multa para sa first offense; P3,000 para sa second offense habang tig-P4,000 para sa third at fourth offenses.

Pinatawan din si Paa ng P7,360 na interest at surcharge para sa non-payment pero kanyang nilinaw na wala siyang natanggap na anumang notice ng violations.

Iginiit ng petitioner na hindi siya dapat patawan ng surcharges at iba pang interests dahil nabigo ang MTPB na ipaalam ang kanyang unang violation.

Samantala, napag-alaman ni Paa na napunta sa Taguig City ang notice of violations sa halip na sa kanyang bahay sa Maynila.

Ipinunto ng abogado na nalabag ang kanyang “right to due process” dahil nawalan siya ng pagkakataon na magpaliwanag sa traffic enforcer o tumalima sa 10-day administrative protest na nakasaad sa ordinansa.

Namemeligro na ring magmahal ang mga matatamis na sitsirya dahil sa pagtaas ng presyo ng asukal.

Ito ang inamin ni Philippine Confectionary Biscuit Snacks Association President Kissinger Sy sa gitna ng numinipis na supply ng refined sugar.

Magugunitang sumirit na sa mahigit P100 ang kada kilo ng refined sugar sa ilang pamilihan.

Ayon kay Sy, posibleng apektado na rin ng sugar price increase ang mga manufacturer ng mga matatamis na sitsirya.

Hindi na anya nakapagtataka kung may ilang maliit na negosyo na kulang sa pambili ng asukal ang magsara o magtipid.

Samantala, bukod sa tinapay ay nakatakda na ring itaas ng mga panadero ang presyo ng cake at iba pang pastry dahil sa mahal na asukal, mantika at iba pang cost input.

Inihayag ni Philbaking President Johnlu Koa na posibleng sa setyembre pa ipatupad ng adjustment sa presyo ng kanilang mga produkto depende sa magiging tugon ng Department of Trade and Industry sa kanilang hiling.