Drew Nacino

Nasa 9,500 personnel ang itatalaga ng National Capital Region Police Office para sa seguridad ng milyun-milyong mag-aaral na magbabalik eskuwela simula sa Lunes, Agosto a – 22.

Ayon kay NCRPO Director Brig. Gen. Jonnel Estomo, kanyang pupulungin ang unit commanders upang talakayin ang kanilang operasyon sa pagbubukas ng school year 2022-2023.

Tiniyak din ng bagong hepe ng NCRPO ang pagpapaigting sa random checkpoints at police visibility sa Metro Manila.

Bagaman aminado si Estomo na limitado ang resources ng NCRPO, kumpiyansa siyang susuportahan ng local government units ang kanilang security measures, bukod pa sa pagpapatuloy ng war on drugs.

Nananatiling ligtas ang pagbiyahe sa iba’t-ibang tourist destination sa Pilipinas.

Ito ang tiniyak ng Department of Tourism sa kabila ng hakbang ng United States Centers for Disease Control and Prevention (CDC) na ilagay ang Pilipinas sa ilalim ng alert level 3 para sa “high-level of covid-19”.

Pinawi naman ni Tourism Secretary Christina Frasco ang pangamba ng mga biyahero kahit mahigit sa kalahati ng dalawandaan tatlumpu’t limang lugar na mino-monitor ng CDC ay nasa ilalim ng nasabing level.

Kampante anya sila sa mga inilatag na health guidelines sa bansa upang ma-balanse ang kaligtasan at pagbiyahe ngayong panahon ng new normal.

Sa pagtaya ng Department of Health hanggang nitong Agosto a – 15, umabot na sa mahigit 72 milyong Filipino na ang fully vaccinated.

Ipinanawagan ni Infectious Disease Expert Dr. Rontgene Solante na kailangang magpatupad ng mandatory covid-19 vaccination para sa mga guro sa gitna ng lalargang face-to-face classes sa Lunes.

Layunin nitong magkaroon ng wall of immunity sa mga paaralan, lalo’t hindi pa nagwawakas ang covid-19 pandemic.

Ayon kay Solante, kahit malapit na ang pagbabalik-eskwela, marami pa ring mga guro ang hindi pa nagpapabakuna.

Kailangan anyang maging mabuting halimbawa ang mga teacher sa mga estudyante sa pagsunod sa vaccination.

Hinikayat naman ng health expert ang mga guro at estudyante na sumunod sa minimum public health standards gaya ng pagsusuot ng face masks, paghuhugas ng kamay at pagtitiyak na mayroong proper ventilation sa mga silid-aralan.

Maglulunsad si Pangulong Bongbong Marcos ng malawakang balasahan sa Sugar Regulatory Administration.

Ito’y sa gitna nang pagbibitiw sa tungkulin ng ilang mataas na opisyal ng ahensya dahil sa kontrobersiyal na sugar import resolution.

Inihayag ni Pangulong Marcos, na tumatayong kalihim ng Department of Agriculture, na layunin ng naka-umang na re-organisasyon sa SRA na i-promote ang paglago ng sugar industry ng bansa.

Maaari anyang matapos ngayong linggo ang isasagawang rigodon.

Bumuo na ang Commission on Audit (COA) ng task force upang imbestigahan ang umano’y overpriced laptops para sa public school teachers.

Ito, ayon kay Department of Education Spokesman Michael Poa, ay makaraang hilingin nila sa COA na magkasa ng fraud audit sa mga biniling laptop.

Ang mga nasabing electronic gadget ay binili ng Department of Budget and Management-Procurement Service para sa DepEd.

Dahil dito, inanunsyo naman ni Senate Blue Ribbon Committee Chairman Francis Tolentino na kasado na sa Agosto a – 25 ang imbestigasyon ng mataas na kapulungan ng Kongreso.

Wala ng buhay nang matagpuan ang isang binatilyo na 4 na araw ng nawawala.

Kinilala ng Quezon City Police District-Criminal Investigation and Detection Unit ang biktimang si Raniel Reano, disi sais anyos.

Ayon sa QCPD, narekober si Reano sa isang malalim na butas sa construction site sa center island ng EDSA-Bansalangin sa Veterans Village, Quezon City, kahapon.

Dakong alas kwatro ng hapon nang ma-i-ahon si Reano ng special rescue unit ng Bureau of Fire Protection (BFP-SRU) at Metropolitan Manila Development Authority.

Nagpatulong ang BFP-SRU na makuha ang bangkay matapos ipagbigay-alam ng mga magulang ng biktima sa mga opisyal ng barangay Veterans Village ang sinapit ng binatilyo.

Kabilang ang pamilya ni Reano sa mga palaboy na naninirahan sa center island ng EDSA-BANSALANGIN

Inaalam na ng pulisya kung itinulak ang binatilyo sa butas o aksidente itong nahulog.

Nagtaas na rin ng singil ang ilang Medium, Small and Micro-Enterprises dahil sa umaalagwang presyo ng asukal at ilan pang sangkap.

Sa ilang tindahan ng Milktea sa Caloocan, nagtaas na ng hanggang P6.00 ang kada cup ng kanilang produkto maging ang ilang pastries shop sa Cubao, Quezon City.

Inihayag ng Philippine Chamber of Commerce and Industry (PCCI) na maraming kompanya na maliit o malaki ang apektado ng pagtaas ng presyo ng asukal.

Ayon kay PCCI president George Barcelon, bahagyang bumagal ang produksyon ng mga beverage manufacturer habang pansamantalang tumigil ang operasyon ng ilang maliit na negosyo.

Inihirit naman ni Restaurant owners of the Philippines (RESTO PH) president Eric Teng sa gobyerno na mag-angkat muna ng asukal upang mapahupa ang presyo nito sa merkado.

Dapat din anyang tulungan ng pamahalaan ang Sugar Farmers para maparami ang local supply, lalo’t mahalaga ang asukal sa “dietery life” at halos lahat ng pagkain ay mayroon nito, tulad ng instant coffee at cake.

Sa halip na makatipid, mas magiging magastos para sa gobyerno kung tuluyang ipagpapaliban ang nakatakdang Barangay at Sangguniang Kabataan (SK) Elections sa Disyembre a – 5.

Ito ang inamin ni Comelec chairman George Garcia makaraang aprubahan ng House Committee on Suffrage and Electoral Reforms sa botong 10-2 ang mga panukalang ipagpaliban ang nasabing halalan.

Ayon kay Garcia, sa katunayan ay kailangang maglabas ng karagdagang P5-B ang pamahalaan dahil kailangang mag-resume ang voter registration kung tuluyang i-po-postpone ang eleksyon.

Sa kanyang pagharap sa Hearing sa Kamara, ipinaliwanag ng Poll body chief na magreresulta rin sa mas maraming botante at kailangan ng mas maraming election paraphernalia at workers kung i-re-reschedule ang Barangay at SK polls sa December 4, 2023.

Samantala, sumang-ayon naman ang ilang Kongresista sa pahayag ni Garcia gaya nina Quezon City Representatives Franz Pumaren at Marivic Co-Pilar na kapwa aminadong “maling akala” ang paniniwalang makatitipid sa pondo ang gobyerno kung ipagpapaliban ang halalan.

Limang araw bago ang pagbabalik-eskwela, ilang paaralan ang nalubog sa baha bunsod ng walang tigil na pag-ulan sa mga Lalawigan ng North Cotabato at Maguindanao.

Kinumpirma ni Ditchel Annagoe, Principal ng Malabuwaya Elementary School sa Bayan ng Kabacan, North Cotabato na nasa P500-K halaga ng computers, printers, aklat at printed modules ang hindi na magagamit matapos malubog sa tubig.

Ganito rin ang sinapit ng ilan pang public schools sa mga Barangay Lumayong at Dilangalen na kapwa malapit sa Pulangi River na umapaw dahil sa malakas na pag-ulan.

Mahigit 100 computer sets naman ang nasira sa Datu Udtog Matalam High School sa Bayan ng Pagalungan, Maguindanao.

Tinaya ng Department of Education sa mahigit P1-M na ang halaga ng mga napinsalang kagamitan sa mga nabanggit na paaralan habang ina-assess pa ang lawak ng pinsala ng baha sa iba pang school facilities.

Sa kabila nito, tuloy pa rin ang pagbabalik-klase ng mga mag-aaral sa ilalim ng Cotabato Schools Division simula Agosto a – 22.

Nakatakdang magpakawala muli ng tubig ang Magat Dam sa Lalawigan ng Isabela ngayong araw.

Ito, ayon sa National Irrigation Administration-Magat River Integrated Irrigation System (NIA-MARIIS), ay upang mapanatili ang ligtas na lebel ng tubig ng dam.

Magsisimula ang pagpapakawala mamayang alas-2 ng hapon at inaasahang aabot ng 200 cubic meters per second o katumbas ng 1, 000 drums ng tubig ang papakawalan.

Patuloy na tumataas ang lebel ng tubig sa Magat Reservoir dahil sa nararanasang pag-ulan dulot ng Habagat.

Sa datos ng flood forecasting and warning system dam operation hanggang kahapon, nasa 188.85 meters above sea level ang tubig sa naturang reservoir o halos abot na sa spilling level na 190 meters.