Drew Nacino

Inaasahan na sa susunod na taon ang initial delivery ng BrahMos Missile System sa Pilipinas.

Ito ang kinumpirma ni Indian Ambassador to the Philippines Shambhu Kumaran matapos tanungin ng ilang mamamahayag sa 75th Independence Day Celebration ng India sa Taguig City, noong Lunes.

Ayon kay Kumaran, bagaman walang partikular na petsa kung kailan darating ang mga missile, maayos naman ang proseso sa pag-acquire ng mga nasabing armas.

Enero a – 28 nang lumagda ang Department of National Defense ng kontrata sa pagbili ng Indian-Made Brahmos Medium-Range Ramjet Supersonic Cruise Missiles na nagkakahalaga ng P18.9 billion.

Sa ilalim ng kontrata, makakukuha ang Pilipinas ng tatlong missile batteries, na binubuo ng mobile autonomous launchers at tracking systems.

Maaaring paliparin ang naturang cruise missile mula sa mga warship, fighter jet, submarine at land-based defense equipment.

Pwede ring kargahan ng warheads ang BrahMos at may kakayahang tamaan ang target sa layong 300 kilometers.

Otomatikong excused sa klase ang mga estudyanteng tatamaan ng COVID-19 sa pagsisimula ng face-to-face classes.

Ito ang tugon ni Department of Education spokesman Michael Poa kaugnay sa posibleng pagbibigay ng tulong ng DepEd sa mga estudyante na magkakasakit.

Ayon kay Poa, sa halip na assistance, ang magagawa lamang nila ay i-excuse sa klase ang mga mag-aaral na mayroong sintomas.

Nanawagan naman ang DepEd official sa mga magulang na huwag nang papasukin sa paaralan ang kanilang mga anak na makikitaan ng sintomas ng COVID-19.

Maaari anyang lumipat sa modular learning o online learning ang mga batang magkakasakit depende sa kaso.

Samantala, inatasan din ng kagawaran ang mga eskwelahan na magkaroon ng sariling infection containment plan o strategies upang mapangasiwaan ang mga estudyanteng matatamaan ng COVID-19.

Pinagkokomento na ng Supreme Court ang Land Transportation Office, Metropolitan Manila Development Authority at 5 Local Government Units sa Metro Manila sa petisyon ng transport groups laban sa No-Contact Apprehension Policy (NCAP).

Ito ang kinumpirma ni SC spokesman, Atty. Brian Keith Hosaka makaraang talakayin kahapon ng mga mahistrado sa kanilang Regular En banc session ang petisyon ng mga transport group.

Sa En banc resolution, inatasan din ng SC ang LTO at mga LGU na magkomento kung bakit hindi dapat patawan ng Temporary Restraining Order ang NCAP.

Binigyan naman ng Korte Suprema ang mga respondent ng 10 araw para makapaghain ng kanilang komento.

Ang mga naghain ng petisyon ay ang grupong KAPIT, Pasang-Masda, ACTO at ALTODAP at bukod sa LTO at MMDA respondent din ang mga Local Government ng City of Manila, Quezon City, Valenzuela City, Parañaque City at Muntinlupa City.

Kinukuwestyon ng petitioners ang ligalidad ng implementasyon ng NCAP dahil wala umano itong basehan sa ilalim ng R.A. 7924 na enabling charter ng MMDA at RA 4136 na lumikha sa LTO.

Ipinatupad ng limang LGU ang NCAP alinsunod sa February 2016 resolution ng MMDA.

Gayunman, nakasaad sa argumento ng mga transport group na wala namang balidong batas o ordinasang ini-adopt ang mga Local City Councils na nagpapahintulot sa MMDA na palawakin ang Traffic Rules and Regulations.

Ipinunto pa ng petitioners na “Invalid” ang mga ordinansa ng mga LGU na nagbigay-daan sa NCAP dahil walang ipinasang batas ang kongreso na magpapahintulot sa implementasyon ng nasabing polisiya.

Suportado ni MMDA Task Force Special Operations chief Bong Nebrija ang Nationwide Implementation ng No-Contact Apprehension Policy (NCAP).

Ito’y sa kabila ng mga reklamo ng operators at motorista sa paniningil umano ng malaking multa ng mga Local Government Unit na nagpapatupad ng nasabing polisiya.

Ayon kay Nebrija, mas maiging magkaroon NCAP ang lahat ng lungsod upang magkaroon ng Universal Traffic Rule.

Bagaman nakatutulong sa Traffic Enforcers sa pagsita sa violators, aminado si Nebrija na kailangang talakayin sa stakeholders ang mga isyung bumabalot sa polisiya.

Kamakailan ay kinuwestyon ng ilang transport group sa Supreme Court ang ligalidad ng NCAP at ipinanawagan ang suspensyon nito dahil sa hindi na umano makatarungang paniningil ng multa.

Muling nakapagtala ng mga pagyanig sa Bulkang Taal sa nakalipas na 24 oras.

Ayon sa PHIVOLCS, umabot sa 17 volcanic earthquakes ang naitala sa Taal kahapon.

Nagbuga rin ang bulkan ng 3,802 tonnes ng sulfur dioxide simula noong Lunes.

Nagkaroon naman ng upwelling o pag-akyat ng mainit na volcanic fluids sa main crater lake at na-obserbahan umano ang Volcanic Smog o Vog.

Nakitaan pa ang Taal ng “voluminous emission” ng usok na umabot hanggang 1, 500 meters ang taas patungo sa hilagang-silangang direksyon.

Samantala, bahagya ring namaga ang Taal Volcano Island at Western Taal Caldera habang umimpis ang Eastern Taal Caldera.

Muling binalaan ng PHIVOLCS ang publiko hinggil sa posibleng panganib gaya ng steam-driven, phreatic, gas-driven explosions dulot ng taal, na kasalukuyang nasa Alert Level 1.

Naghain na ng petisyon sa Supreme Court ang ilang transport group upang pigilan ang pagpapatupad ng kontrobersyal na No-Contact Apprehension Policy (NCAP) sa ilang lungsod sa Metro Manila.

Ang mga Petitioner ay binubuo ng Kilusan sa Pagbabago ng Industriya ng Transportasyon (KAPIT), Pasang-Masda, ALTODAP at ACTO.

Ayon kay Atty. Vigor Mendoza, Lead Counsel at National Chairman ng KAPIT, layunin ng Petition for Certiorari na ideklarang unconstitutional ang NCAP.

Inihirit din ni Mendoza at ng mga nabanggit na grupo na maglabas ng Temporary Restraining Order o Cease and Desist Order.

Sa kanilang petisyon, ipinunto nina Mendoza na walang ligal na batayan ang NCAP dahil hindi naman ito nakasaad sa RA 7924 na nagsisilbing enabling charter ng MMDA at RA 4136 na lumikha sa LTO.

Suportado naman ng transport groups ang panawagan ni LTO chief Teofilo Guadiz na suspendihin ng mga Local Government Unit ang pagpapatupad ng NCAP at resolbahin muna ang ilang issue, partikular ang penalties sa registered owners ng private at public utility vehicles.

Iginiit ni Mendoza na bagaman nagpatupad ng mga ordinansa ang mga LGU bilang suporta sa resolusyon, invalid pa rin ito dahil wala namang batas na ipinasa ang kongreso na nagpapahintulot sa implementasyon ng No-Contact Apprehension.

Tangi anyang nakasaad sa RA 4136 ay pinapayagan ang face-to-face apprehension at ang traffic violations ay pananagutan ng mga nahuhuling driver at hindi ng registered owners.

Samantala, ipinaliwanag ni Mendoza na mas pinili nilang idiretso sa SC ang petisyon sa halip na sa mga Lower Court muna dahil Korte Suprema rin naman ang reresolba ng lahat ng legal issues.

Nakarating na rin sa Pilipinas ang global phenomenon ng aging population.

Kinumpirma ng Commission on Population and Development o POPCOM na batay sa Philippine Statistics Authority, ay dumami ang bilang ng matatanda sa bansa o sumampa sa 8.5% noong 2020 kumpara sa 5.9% noong 2000.

Ayon sa POPCOM, na-doble sa 9.2 million ang mga Pilipinong edad 60 pataas noong 2020 kumpara sa 4.5 million sa nakalipas na dalawang dekada.

Ito’y dahil sa bumubuting health at socioeconomic conditions sa bansa bukod pa sa mas nagiging mulat na ang mga senior citizen sa “healthier lifestyles”.

Nangunguna ang Japan sa may pinaka-malaking populasyon ng senior citizen o 27% ng kabuuang 125 million.

Hindi isinasantabi ng Department of Transportation ang posibilidad ng paglalagay ng cable car system upang maibsan ang mabigat na daloy ng trapiko, lalo sa Metro Manila.

Ayon kay transportation secretary Jaime Bautista, bukas naman ang gobyerno sa panukala ni senador Robin Padilla na maglagay ng cable car.

Sa katunayan anya ay may mga pag-aaral na noon ang DOTr sa nasabing plano at ginagamit na rin naman ang cable cars bilang urban transport sa ilang bansa sa Latin America.

Inatasan na ni Bautista ang kanyang Undersecretary for Road Transport and Infrastructure na pag-aralan ang suhestiyon ng senador.

Matatandaan sa ilalim ng Duterte administration ay nagsagawa ang DOTr ng French government-funded feasibility study sa pagbuo ng cable car system sa pagitan ng Marikina at Pasig.

Sumampa na sa halos 4,000 ang average new daily COVID-19 cases sa bansa.

Ayon kay Department of Health Officer-In-Charge Maria Rosario Vergeire, mula August 3 hanggang 9, aabot na sa 3,993 ang COVID cases o mataas ng 12% kumpara sa average noong nakaraang linggo.

Indikasyon din anya ito na halos na-doble ang seven-day moving average kumpara sa 2,258 cases per day noong Hulyo.

Sa kabila nito, nilinaw ni Vergeire na nasa low risk pa rin sa COVID-19 ang Pilipinas.

Dumami ang mga public school sa bansa na magsasagawa ng face-to-face classes simula sa Lunes, Agosto 22.

Inihayag ng Department of Education na 90% na ng 47,000 public schools ang handa para sa face-to-face classes ngayong taon kumpara sa 76% na nagkasa ng in-person classes noong 2021.

Ayon kay DepEd undersecretary Epimaco Densing III, karamihan sa mga pribadong paaralan ay magpapatupad pa rin ng blended learning hanggang Oktubre 31.

Sa pagbubukas ng klase sa Lunes, may opsyon anya ang mga eskwelahan na magsagawa ng remote classes, blended learning mode o in-person classes.

Gayunman, lahat ng pampubliko at pribadong paaralan ay kailangang magsagawa ng in-person classes pagsapit ng Nobyembre, alinsunod sa DepEd order 34.