Drew Nacino

Patuloy ang preparasyon para sa biyahe ni Pangulong Bongbong Marcos sa Estados Unidos na nakatakda sa susunod na buwan.

Ito’y upang dumalo sa United Nations General Assembly sa New York para sa kanyang unang foreign visit sa International Diplomatic Arena kung saan inaasahan siyang magtatalumpati.

Ayon kay Philippine Ambassador to U.S. Jose Manuel Romualdez,  may ilang bilateral meetings ang nakalinya na dadaluhan ng Pangulo pero hindi naman binanggit kung kasama ang pulong kay U.S. President Joe Biden.

Una nang inihayag ni Romualdez na nais niyang magkaroon ng hiwalay na Inaugural Bilateral Summit sa pagitan nina Pangulong Marcos at Biden sa Washington D.C. na may napagkasunduan ng petsa ngayong taon.

Habang nasa Amerika, nakatakda ring makipagkita si PBBM sa iba’t ibang American Business Groups at Investors na nais na palawigin ang kanilang operasyon sa Pilipinas.

Wala ng buhay nang matagpuan ang isang dalagitang siklista na unang napaulat na nawawala sa Lalawigan ng Bulacan.

Kinilala ang biktimang si Princess Marie Dumantay, 15- anyos na narekober sa isang madamong lugar sa Bypass Road sa Barangay Bonga Menor, Bustos.

Natagpuan si Princess na nakadapa, may mga pasa, mga pasó ng sigarilyo at suot ang puting T-shirt na may chinese characters, itim na short, puting medyas at pares ng rubber shoes.

Ayon kay Rolando Dumantay, Agosto a – 9 nang hindi na umuwi sa bahay ang kanyang anak.

Nagpasya naman ang pamilya ng biktima na iuwi ang labi ni Princess sa kanilang bahay sa Navotas City.

Nagsasagawa na ng imbestigasyon ang Bulacan Provincial Police Office upang matukoy kung sino ang mga posibleng nasa likod ng krimen.

Sinuspinde ng Philippine Overseas Employment Administration ang implementasyon ng Expanded Compulsory Insurance Coverage para sa land-based returning at directly hired Overseas Filipino Workers.

Alinsunod ito sa utos ni Migrant Workers secretary Susan Ople at Subject ng Department Order Number 228 na ininsyu naman ng Department of Labor and Employment noong October 2021.

Ayon kay Ople, makatitipid ang mga umuuwing OFW ng P1, 700 na halaga ng Mandatory Insurance Coverage at mababawasan ang requirements ng gobyerno dahil sa suspensyon.

Gayunman, mananatili anya ang mandatory insurance coverage para sa mga Newly-hired OFW alinsunod sa batas.

Itinalaga ni Pangulong Bongbong Marcos si dating Agriculture Secretary Domingo Panganiban bilang Undersecretary ng Department of Agriculture.

Sa isang Facebook post, inihayag ni Pangulong Marcos, na siyang kalihim ng DA, na naganap ang oath-taking noong Biyernes, Agosto a – 12.

Nagsilbi si Panganiban bilang Agriculture Secretary sa termino nina Dating Pangulong Joseph Estrada at Gloria Macapagal-Arroyo.

Sa ilalim ng termino ni Panganiban, ipinagpatuloy nito ang implementasyon ng Agriculture and Fisheries Modernization Act bilang comprehensive framework at platform para sa rural development ng gobyerno sa kanyang panunungkulan noong Enero 2001.

Sa kanya namang ikalawang termino, idinivelope ang kabuuang 203, 000 hectares ng idle lands at lumikha ng 313, 000 jobs sa ilalim ng goal 1 at 10 outstanding markets na tinukoy sa Goal 2.

Tutol ang Employers Confederation of the Philippines (ECOP) sa panukalang batas na magtatanggal sa compulsary retirement age na 65.

Ipinunto ni ECOP president Sergio Ortiz-Luis na bagaman maaari namang bigyan ng pagkakataon na makapagtrabaho pa ang mga senior citizen, hindi na dapat pang gumawa ng batas hinggil dito.

Dapat anya ay maging optional lamang kung papanatalihin pa o hindi ang mga empleyadong tumungtong na sa retirement age.

Ipinaliwanag ni Ortiz-Luis na maaaring magkaroon ng negatibong implikasyon ang nasabing panukala, lalo sa mga foreign investor at maaaring makompromiso ang productivity ng isang kumpanya.

Aarangkada na simula ngayong araw ang Oplan Balik Eskwela (OBE) ng Department of Education.

Layunin ng taunang OBE program na tiyakin ang maayos na pagbubukas ng klase sa mga pampublikong paaralan para sa School Year 2022-2023 simula Agosto a – 22.

Ayon sa DepEd, ang pagsisimula ng Oplan Balik Eskwela ay hudyat ng kanilang determinasyon na tumalima sa academic calendar, na nagtatakda ng class opening sa susunod na lunes.

Ito’y sa kabila ng mga panawagan mula sa ilang sektor na ipagpaliban ang pagbabalik-eskwela sa iba’t ibang kadahilanan.

Pangungunahan mamaya ni Education undersecretary Epimaco Densing paglulunsad ng OBE.

Samantala, inihayag naman ni DepEd spokesman Michael Poa na simula August 22 hanggang October 31 ay mayroong option ang mga paaralan na magpatupad ng in-person, blended o full distance learning.

Gayunman, dapat anyang magkaroon na ng in-person classes sa lahat ng eskwelahan simula Nobyembre a – 1.

Kinuwestyon ni Albay 2^nd District Rep. Joey Salceda ang pangongolekta ng mga multa mula sa No-Contact Apprehension Policy (NCAP) ng pribadong sektor, sa pamamagitan ng Private-Public Partnership (PPP)

Ayon kay Salceda, kuwestiyonable na ang ligalidad ng NCAP dahil sa pangongolekta ng pribadong sektor.

Ipinunto ng mambabatas na bagaman ligal ang mga PPP, tila ginagamit anya ito ng mga Local Government Unit para sa implementasyon ng naturang polisiya.

Ipinunto ng Kongresista na hindi maaaring i-atang ng gobyerno ang pangongolekta ng multa sa mga private company gaya ng ginagawa ng mga LGU sa NCAP.

Orihinal anya itong Legislative Power na iginawad sa Executive Branch para sa implementasyon pero hindi maaaring i-atang sa mga pribadong kumpanya.

Binigyang-diin ni Salceda na tanging ang estado ang mayroong “Police Power” na mangolekta ng multa mula sa mga polisiyang ipinatutupad ng gobyerno, tulad ng NCAP at hindi dapat maging “subject” sa isang commercial agreement sa pagitan ng pamahalaan at pribadong sektor.

152 pamilya o 772 katao ang nagsilikas at nagpalipas ng gabi sa evacuation center sa Mandaue City, Cebu dahil sa pagbaha bunsod ng malakas na pag-ulan.

Pawang mga Taga-Sitio Laray, Barangay Umapad ang mga naapektuhan ng pagbaha noong Sabado.

Ayon kay Mandaue City Disaster Risk Reduction and Management Office chief Buddy Ybañez, pansamantalang tumuloy ang mga evacuee sa Umapad Elementary School.

Bukod sa malakas na pag-ulan, kabilang din sa mga sanhi ng pagbaha ang pag-apaw ng Butuanon River.

Agad naman anyang nag-uwian ang mga nasabing residente kahapon.

Samantala, pitong pamilya ang nawalan ng bahay matapos ang landslide sa Sitio Tapoko Lessandra Miramonte, Barangay Pit-Os sa Cebu City.

Lumikas ang mga naturang residente pero saglit umuwi ang mga ito sa kanilang mga bahay na nagtamo ng mga bitak-bitak, upang kumuha ng mga kagamitan at nagbalikan sa mga evacuation center.

Nananatili sa Alert level 1 ang Bulkang Taal sa Batangas sa gitna ng patuloy na low-level unrest at pagbubuga ng volcanic smog.

Ayon sa PHIVOLCS, aabot na sa 3, 945 tonnes per day ang ibinubugang sulfur dioxide ng bulkan bukod pa sa mainit na volcanic fluid sa main crater, na nagdudulot ng “Vog” o Volcanic Smog.

Naobserbahan din ang nasa 2, 100 meters na taas ng usok patungo sa timog-timog kanlurang direksyon.

Samantala, wala namang naitalang volcanic earthquakes o low-level background tremors.

Nito lamang Biyernes ay kabuuang 13, 572 tons ng volcanic sulfur dioxide ang ibinuga ng bulkan mula sa main crater nito, na nagdulot ng Vog sa Taal Caldera.

Lumampas na sa forecast volume para sa buong buwan ng Agosto ang rainfall volume na naitala sa Lalawigan ng Cebu sa nakalipas na dalawang linggo.

Ayon kay PAGASA-Visayas chief Al Quiblat, umabot na sa 230 millimeters o ikinukunsiderang “above normal” ang rainfall volume sa Cebu.

Nakapagtala anya ng 157.9 millimeters na normal average rainfall ngayong buwan para sa nakalipas na tatlong dekada.

Pero noong Agosto a – 3, nasa 107 millimeters ng ulan ang naitala habang 66 millimeters noong Agosto a – 4.

Nangangahulugan ito na nalampasan na ang monthly average sa loob lang ng dalawang araw na pag-ulan, hindi pa kasama ang mga pag-ulang naranasan noon pang mga nakalipas na araw.

Ipinaliwanag ni Quiblat na ang “abnormal” rainfall ngayong buwan ay dahil sa La Niña phenomenon, na nagdudulot ng malakas na mga pag-ulan sa Pilipinas at mga karatig bansa.