Drew Nacino

Nasa Singapore na si Pangulong Bongbong Marcos para sa kanyang ikalawang state visit.

Mag a-ala una ng tanghali kahapon nang dumating si Pangulong Marcos sa Singapore Changi Airport.

Bukod sa Cabinet Members gaya nina Press secretary Trixie Cruz-Angeles at Migrant Workers Secretary Susan Ople, kasama rin ni PBBM si First Lady Liza Marcos at Presidential son, Ilocos Norte Rep. Sandro marcos.

Humarap naman ang Pangulo sa Filipino Community sa University Cultural Center at nakipag-kamustahan sa mga OFW, dakong ala-6 kagabi.

Sa tala ng DFA, mahigit 200K ang mga manggagawang Pinoy sa Singapore, kabilang ang nasa 80K domestic workers.

Bukas si Pangulong Bongbong Marcos na magtayo ng government-owned malls sa Pilipinas.

Ito’y upang i-promote ang Micro, Small and Medium-sized Enterprises at mga lokal na produkto.

Naisip ni Pangulong Marcos ang nasabing ideya makaraang i-tour siya ni Indonesian president Joko Widodo sa isang mall na pinatatakbo ng gobyerno sa Jakarta.

Ayon kay PBBM nais niyang gayahin ang state-owned mall bilang bahagi ng One Town, One Product Program ng Pilipinas para sa mga MSME na layuning isulong ang inclusive local economic growth.

Welcome rin anya kay Widodo ang nasabing panukala lalo’t maraming pagkakahalintulad ang Pilipinas at Indonesia sa karanasan sa MSME.

Dapat mismong ang National Government ang magpasya kung luluwagan o hindi ang polisiya sa pagsusuot ng facemask.

Reaksyon ito ni OCTA research group, Prof. Guido David sa Executive Order ng Cebu City Local Government na gawing optional ang pagsusuot ng facemask sa mga pampublikong lugar, maliban sa medical facilities.

Ayon kay David, dapat magkaroon ng isang pasya at boses hinggil sa mga polisiyang ipinatutupad laban sa COVID-19 pandemic.

Kahit anya mayroong mga datos na nagsasabing mababa ang mga kaso ng COVID-19 sa Cebu City o kahit saanmang lugar, magkakaroon lamang ng kalituhan kung magkakaiba ang polisiya na ipatutupad ng bawat LGU.

Bahagya pang bumaba ang COVID-19 positivity rate sa lalawigan ng Cebu.

Sa datos ng OCTA research group, bumaba sa 6.2% ang positivity rate sa Cebu hanggang nitong Setyembre a – 3 kumpara sa 8.9% noong Agosto a – 27.

Ayon kay OCTA research group fellow, Prof. Guido David, ang Cebu ang may pinaka-mababang positivity rate sa lahat ng probinsya sa labas ng Luzon.

Gayunman, nananatili anya sa moderate risk ang nasabing lalawigan.

Samantala, bumaba rin sa 7.2% ang positivity rate sa Iloilo mula sa 9.5% noong Agosto a – 25; 6.6% sa bataan at 8.9% sa Pangasinan.

Dapat maghihinay-hinay at mag-isip ang mga nagbabalak na gawin na ring boluntaryo ang pagsusuot ng facemask sa Metro Manila.

Tugon ito ni DOH Technical Advisory Group Member, Dr. Rontgene Solante sa tanong kung panahon na bang gayahin ng Metro Manila ang polisiya ng Cebu City na “optional” na pagsusuot ng facemask sa mga pampublikong lugar maliban sa medical facilities.

Ayon kay Solante, maaari namang gayahin ng Metro Manila ang Cebu City, pero hindi ngayong mayroon pang COVID-19 pandemic.

Mayroon anyang metrics na dapat pagbatayan tulad ng bilang ng mga kaso, positivity rate at higit sa lahat ang vaccination, partikular ang booster shots, bago luwagan ang polisiya sa pagsusuot ng facemask.

Nangangamba si Solante na kung hindi na i re-require sa mga tao ang pagsusuot ng facemask sa mga pampublikong lugar ay hindi na mararamdaman ng mga ito ang kahalagahan ng pagpapabakuna laban sa COVID-19.

Isang hearing na lang ang dapat gawin sa Sim Card Registration Bill.

Ito, ayon kay Senate President Juan Miguel Zubiri, ang imumungkahi sa Senate Committee on Public Services na pinamumunuan ni Senator Grace Poe.

Ipinunto ni Zubiri na malawak at malalim na ang kanilang naging pagtalakay sa naturang Bill sa nakalipas na 18th Congress kaya’t hindi na kailangang magsagawa pa ng mga pagdinig.

Ngayong marami na anyang mga Senador at mga mamamayan ang biktima ng spam messages at scammer, mahalagang maipasa agad ang panukalang batas na naglalayong irehistro lahat ng simcard.

Nakasaad din sa nasabing bill na lahat ng bibili ng simcard ay kailangang magpresenta ng dalawang I.D. na inisyu ng gobyerno.

Sa ganitong paraan, sinumang magpadala ng text scam ay maaaring ipadala ang numero sa National Telecommunication Commission upang ireport at madali ring matutukoy kung sino ang may-ari ng simcard na ginagamit sa scam.

Sa halip na ngayong araw ay bukas itinakda ang pagdinig ng Public Services Committee sa simcard registration at iba pang panukalang batas na naglalayong maprotektahan ang publiko laban sa mga scammer.

Walang mahuhugot ang DSWD na P66.2 million budget na cash benefit para sa 662 centenarians sa ilalim ng panukalang 2023 National Budget.

Ito ang inamin ni DSWD secretary Erwin Tulfo sa isinagawang House Appropriations Panel Hearing hinggil sa panukalang 194 billion peso budget ng kagawaran para sa susunod na taon.

Ayon kay Tulfo, hindi pinagbigyan ng Department of Budget and Management ang kanilang  request  para sa pondo ng Centenarians Act na magbibigay sana ng  100,000 peso cash sa mga Pinoy na nakaabot sa edad 100 pataas.

Kabilang din sa unfunded items sa ilalim ng DSWD ay ang 25 billion peso budget para sa implementasyon ng 500 peso social pension hike para sa indigent senior citizens.

Hinimok naman ni Albay 1^st District Rep. Edcel lagman, may-akda ng nasabing batas, ang kagawaran na maglatag ng agarang hakbang, lalo’t ang mga benepisaryo ay nasa takipsilim na ng kanilang buhay.

Samantala, umapela ang kalihim sa kongreso na itaas ang budget ng DSWD para sa assistance to individuals in crisis situations na ngayon ay nasa P19 billion lamang o mababa sa naging request ng departamento.

Nakatakda nang ilabas ngayong linggo ng gobyerno ang desisyon sa mandatory mask mandate, matapos paluwagin ng Cebu City ang polisiya sa trial period.

Ayon kay Interior secretary Benhur Abalos, nakausap na niya si Cebu City Mayor Michael Rama hinggil sa implementasyon ng Executive Order 5, kung saan umiiral ang trial at observation period sa non-obligatory wearing ng face masks hanggang sa katapusan ng taon.

Kung pamamarisan anya ng ibang Local chief Executive si Rama ay maaaring magkaroon ng kalituhan sa mga polisiya sa pagpapatupad ng face mask mandate, lalo’t hindi pa nawawala ang banta ng COVID-19.

Ipinunto ni Abalos na ang mahalaga ay mayroong proseso habang kanya na ring isinangguni ang issue sa Inter-Agency Task Force for the Management of Emerging Infectious Diseases.

Nilinaw naman ng Kalihim na nirerespeto nila ang otonomiya ng bawat Local Government Unit subalit mayroong National Law na dapat ding sundin.

Lunes nang maglabas si Mayor Rama ng Executive Order 6, na may probisyon sa naunang kautusan, gaya ng trial period sa non-obligatory masking mula September 1 hanggang December 31, 2022 at otomatikong pag-aalis sa polisiya.

Hiniling na ng Department of Foreign Affairs ang Executive Clemency o Pardon para sa convicted Pinay na si Mary Jane Veloso, na hinatulan ng kamatayan sa kasong drug smuggling.

Kinumpirma ni Press secretary Trixie Cruz-Angeles na kabilang ang Clemency at Pardon sa mga tinalakay nina Foreign affairs secretary Enrique Manalo at counterpart nitong si Indonesian Foreign Minister Retno Marsudi sa Jakarta.

Kasabay ito ng State visit ni Pangulong Bongbong Marcos kay Indonesian president Joko Widodo, noong linggo.

Isasangguni muna anya ni marsudi sa kanilang Ministry of Justice ang kaso ni Mary Jane.

Samantala, tiniyak ni Angeles na tuloy-tuloy ang pagbigay ng Consular Services ng Philippine Embassy kay Veloso na nasa mabuting kalagayan sa Wonosari Women’s Penitentiary sa Yogyakarta.

Isinisi ng mga Telecommunication Company sa mga sindikato ang nagkalat na malawakang personalized text scams na natatanggap ng mga subscriber kada araw.

Inihayag ni Anton Bonifacio, Chief Information Security Officer ng Globe Telecom, kailangang mahanap ang source ng text scams sa pamamagitan ng pagpapakalat ng law enforcement bodies.

Ayon kay Bonifacio, maaaring may local operating center ang mga sindikato na dapat tuntunin at posible ring sa phone apps nakukuha ng mga scammer ang data ng mga user.

Sinabi naman ni Angel Redoble, First Vice President at chief Information Security Officer ng PLDT-Smart Telecom, nasa 400 million text scam at 11 billion phishing sites na ang kanilang na-block.

Mabilis at papalit-palit anya ang mode ng text scams na ginagawa ng sindikato sa likod ng text scams at automated din umano ang karamihan sa mga natatanggap ng mga users.

Tiniyak naman nina Bonifacio at Redobla na sinisikap ng mga Telco na bawasan ang bilang ng nakakatanggap ng mga text scam.

Bukas ilalarga ng Senado ang pagdinig hinggil sa malawakang Text Scams sa bansa.