Drew Nacino

Nanganganib magkaroon ng kakulangan ng supply ng de latang sardinas sa bansa.

Ito ang ibinabala ng grupo ng manufacturers kung ninipis ang supply ng tamban, na karaniwang ginagamit sa produksyon ng sardinas.

Isinisi ng Canned Sardines Association of the Philippines ang limitadong supply sa Fisheries Law na nagpapahintulot sa mga mangingisdang manghuli lamang ng tamban sa Municipal Waters na sagana sa tamban.

Gayunman, inihayag ni CSAP Vice President Ed Lim na maliit na bangka lamang ang pinapayagan kaya’t maliit din ang kapasidad ng mga ito na makapanghuli ng mas marmaing tamban o hanggang tatlong banyera lang na hindi sapat upang supplyan ang canning factory.

Bukod dito, itinakda rin ng Bureau of Fisheries and Aquatic Resources ang tatlong buwang closed-fishing season ng tamban sa Zamboanga Peninsula simula Disyembre hanggang Marso.

Nakadagdag din anya sa problema ang mataas na presyo ng krudo at raw materials sa produksyon, tulad ng lata kaya’t namemeligrong numipis ang supply at tumaas pa ang presyo ng sardinas.

Sa kasalukuyan ay naglalaro na sa P39 hanggang P40 ang kada kilo ng tamban kumpara sa P26 noong bago magkaroon ng COVID-19 pandemic.

Muling ipinanawagan ng grupong Filipino Nurses United (FNU) sa gobyerno na isaayos ang kondisyon ng mga Nurse sa bansa, kabilang ang pagbibigay ng 50,000 peso basic salary kada buwan.

Ito’y upang mahikayat ang kanilang mga kasamahan na manatili sa Pilipinas, sa halip na mangibang-bansa.

Ayon kay (FNU) Vice President Eleanor Nolasco, ang hinihinging ‘entry salary’ na 50,000 sa pampubliko at pribadong nurses ay makatutulong na mamuhay sila ng disente, lalo’t mahalaga ang kanilang papel sa promosyon at proteksyon ng kalusugan ng mga Pinoy.

Sa ngayon ay mahigit 100K nurses sa private sector ang sumasahod lamang umano ng P537 kada araw sa Metro Manila habang mas mababa pa sa labas ng National Capital Region o kumpara sa minimum wage na P570 sa NCR.

Bagaman P35,000 ang minimum salary sa public hospitals, matindi naman anya ang sakripisyo ng mga nurse dahil sa dami ng trabaho at pasyente.

Inihayag din ni Nolasco na may pondo naman para sa salary hike at pagkuha ng dagdag 42,000 Nurses ang pamahalaan na maaaring hugutin sa ‘unprogrammed funds’.

Samantala, suportado naman ni DOH Officer-In-Charge, Undersecretary Maria Rosario Vergeire ang panawagan ng FNU at iginiit sa Department of Budget and Management at mga mambabatas na gumawa na ng hakbang para maisabatas ito.

Nasa 300 empleyado at mahigit 140 retirees ng Intercontinental Broadcasting Corporation (IBC)13 ang nanganganib mawalan ng trabaho at benepisyo sa sandaling magsara ang nasabing TV Network sa susunod na taon.

Ayon kay IBC President Hexilon Alvarez, labis na maaapektuhan ang buhay ng mga nasabing manggagawa at kanilang pamilya sa pagsasara kung hindi paglalaanan ng pondo sa 2023 budget ang istasyon.

Hindi lamang anya sa mga empleyado mayroong obligasyon ang Government-controlled network, kundi maging sa kanilang retirees na hindi pa nakatatanggap ng buong halaga ng ipinangako sa kanila sa ilalim ng Collective Bargaining Agreement.

Inihayag din ni Alvarez na noon pa umapela ang IBC sa Department of Budget and Management upang mag-issue ng erratum sa proposed 2023 National Budget.

Samantala, nanawagan naman si IBC Employees’ Union President Alberto Liboon kay Pangulong Bongbong Marcos na maglatag ng aksyon upang maiwasan ang pagsasara ng network.

Nagsampa na ng reklamo ang PNP-Anti-Kidnapping Group at kapatid ng isang Pharmaceutical Executive laban sa 11 indibidwal kaugnay sa pagkawala at pagpatay sa nasabing opisyal sa Taguig City.

Reklamong Kidnapping for Ransom, Murder at Arson ang inihain sa Department of Justice ng PNP-AKG at ni Alpha Seranilla, kapatid ng negosyante at Pharmaceutical Executive na si Eduardo Tolosa.

Batay sa imbestigasyon, bago mag-tanghali noong July 19 nang magtungo si Tolosa sa Tagaytay City kasama ang isang hindi pa nakikilalang indidbiwal.

Dakong hapon nang tawagan ng 50-anyos na biktima ang isa niyang empleyado at inutusan itong ihanda ang 102,700 dollars at 2,800 euro na cash mula sa kumpanya, mga mamahaling relos na rolex at hublot.

Sa nabanggit ding petsa huling nakita ang biktima sa Bonifacio Global City, Taguig City kung saan ini-abot sa kanya ng empleyado ang pera at mga relos subalit matapos nito ay hindi na siya natawagan.

Nakunan naman sa CCTV ang isang hindi nakilalang lalaki naman na nag-maneho ng SUV ng biktima sa C5-SLEX Southbound pero makalipas ang isang araw ay natagpuang sunog ang sasakyan sa Pampanga.

Isang Executive din sa kumpanya ni Tolosa ang nakatanggap ng text messages na humihingi ng P100 million ransom simula noong August 26 hanggang September 1.

Ayon sa PNP-AKG, dalawa sa mga respondent ang sumuko sa kanila noong August 8 at nagpahayag ng kahandaang magbahagi ng impormasyon.

Nakasaad sa complaint na apat pa umanong indibidwal ang nag-execute ng extra-judicial confessions na nagsasabing kabilang sila sa naglibing at nagsunog sa bangkay ni Tolosa.

Tinalakay na nina Foreign Affairs secretary Enrique Manalo at Indonesian Counterpart nitong si Retno Marsudi ang kaso ni Mary Jane Veloso.

Ito ang kinumpirma ni Press secretary Trixie-Cruz Angeles matapos ang pulong nina Manalo at Marsudi sa Indonesia, kahapon.

Patuloy anyang humahanap ng solusyon ang Department of Foreign Affairs para kay Veloso, na na-convict sa kasong Drug Trafficking makaraang mahuling nagpuslit ng 2.6 kilo ng heroin sa Yogyakarta, noong 2010.

Gayunman, nilinaw ni Cruz-Angeles na hindi pa idinedetalye ni Manalo ang nilalaman ng napag-usapan nila ng Indonesian Official.

Hindi pa rin matiyak kung binuksan o hindi ni Pangulong Bongbong Marcos ang nasabing issue kay Indonesian President Joko Widodo nang magkaharap sila kahapon.

Isang sakong palutang-lutang sa dagat ang narekober ng ilang mangingisda sa Puerto Galera, Oriental Mindoro.

Nang sipatin ang nilalaman ng sako, tumambad sa mga mangingisda ang bangkay ng isang lalaki.

Ayon sa Pulisya, walang pang-itaas na damit at nakasuot ng kulay brown na shorts ang hindi pa nakikilalang biktima nang matagpuan sa Barangay Balatero.

Wala ring tape at nakitang sugat sa katawan ng biktima, na pinaniniwalang pagkalunod ang ikinamatay pero palaisipan kung bakit ito nakasilid sa sako.

Pinaniniwalaan ding apat hanggang pitong na araw nang palutang-lutang sa dagat ang biktima.

Nagsasagawa na ng imbestigasyon ang mga otoridad upang matukoy ang pagkakakilanlan ng biktima.

Arestado ang isang pulis matapos ireklamo ng panghahalay umano sa siyam na taong gulang na anak ng kaniyang live-in partner sa Valenzuela City.

Kinilala ang suspek na si Corporal Reynold Aggabao Panao, 38- anyos, nakatalaga sa Dalandanan Police Sub-Station.

Ayon kay Valenzuela Police Chief, Col. Salvador Destura, nahaharap si Panao sa reklamong Two counts of Rape at Child Abuse.

Naganap anya ang panghahalay noong Hulyo at naulit nitong Setyembre.

Batay sa imbestigasyon, nagsimula ang panghahalay wala pang isang buwan simula nang magsama ang suspek at ina ng biktima.

Nagkakaroon umano ng pagkakataon ang suspek na isagawa ang kahalayan habang wala sa bahay ang ina paslit.

Samantala, nasa pangangalaga na ng Lokal na Pamahalaan ng Valenzuela City ang biktima habang tumanggi munang magbigay ng pahayag si Panao.

Muling nag-alboroto ang Bulkang Kanlaon sa Negros Island matapos makapagtala ng 11 volcanic earthquakes.

Sa kabila nito, inihayag ng PHIVOLCS na nananatili sa Alert level 1 ang kanlaon habang namataan ang pagbuga ng usok sa bunganga ng bulkan na may taas na 200 meters.

Mahigpit namang ipinagbabawal ang pagpasok sa 4-kilometer radius permanent danger zone sa paligid ng Kanlaon.

Ipinagbabawal din ang pagpapalipad ng anumang uri ng eroplano malapit sa bulkan dahil sa banta ng pagsabog.

Nasa P1.8 billion na halaga ng iba’t ibang klase ng kalakal, kabilang ang lokal at imported na mga asukal, ang nadiskubre ng bureau of customs sa sorpresang inspeksyon sa isang bodega sa Nasugbu, Batangas.

Inilunsad ng BOC ang inspeksyon sa bodega ng Central Asucarera Don Pedro sa Barangay Lumbangan.

Nadiskubre ng ADUWANA ang tinatayang 181,000 sacks ng imported na brand ng pure refined sugar mula Thailand at 197,590 sacks ng lokal na Don Pedro White Sugar na tumitimbang ng 50 kilo bawat isa.

Pansamantala namang ikinandado ang nasabing bodega upang siguraduhin na walang makakapasok at makakalabas dito.

Ito na sa ngayon ang isa sa pinaka-malaking operasyon na isinagawa ng customs simula nang ilarga nila ang pag-i-inspeksyon sa mga imbakan ng asukal noong Agosto.

“Hindi dapat kaawaan ang mga terorista at kriminal”.

Ito ang binigyang-diin ni Vice President Sara Duterte- Carpio matapos ang kanyang pakikipagpulong sa mga opisyal ng Armed Forces of the Philippines, Philippine National Police, Bureau of fire Protection at Bureau of Jail Management and Penology.

Kabilang sa tinalakay nina V.P. Sara, na itinalagang Officer-In-Charge habang nasa ibang bansa si Pangulong Bongbong Marcos, ang pagpapanatili ng kapayapaan at kaayusan sa bansa.

Ayon kay Duterte-Carpio, layunin ng pulong na palakasin ang umiiral na ugnayan at paigtingin ang Inter-Agency Cooperation sa issues ng National Security.

Iginiit ng Pangalawang-Pangulo na makababangon lamang ang bansa mula sa COVID-19 pandemic kung matutugunan ang mga banta sa seguridad.

Gayunman, nilinaw ni VP Inday na wala naman silang natatanggap na impormasyon o natalakay na terror threat.

Hindi rin anya napag-usapan sa pulong ang CPP-NPA-NDF, pero tiniyak sa security sector na ang Offices of the President at Vice President ay nasa likod nila sa paglaban sa insurhensya.