Drew Nacino

Tututukan ng Department of Health ang anumang mga bagong usbong na sakit.

Ito ang tiniyak ng Kagawaran kasabay ng pahayag ni DOH-OIC, Undersecretary Maria Rosario Vergiere na mayroong platform kung saan nalalaman ang mga bagong diskubre o mga sakit na muling lumalabas.

Partikular na tinukoy ni Vergeire ang International Health Regulation na mayroong koordinasyon sa iba’t ibang bansa hinggil sa iba’t ibang sakit na na mo-monitor, gaya ng cluster ng Pneumonia sa Argentina.

May kapasidad at kakayahan naman anya ang Research Institute for Tropical Medicine (RITM) na i-monitor ang naturang sakit na pinaghihinalaang legionaires disease.

Sisimulan nang imbestigahan ng Senado bukas ang iba’t ibang reklamo hingil sa text scams at tatalakayin ang mga panukalang batas para masolusyunan ito.

Pangungunahan ni Senator Grace Poe ang pagdinig bilang Chairperson ng Committee on Public Services.

Kabilang sa ipatatawag sa pagdinig ang National Privacy Commission, Department of Information and Communications Technology at Telecommunications Companies.

Pagpapaliwanagin din ang Department of Trade and Industry sa naglipanang text blasters at paggamit ng iba pang gadgets para sa mga aktibidad ng panloloko.

Bukod sa spam texts marketing ng iba’t ibang produkto, kinumpirma ng Senador na nakatanggap na rin siya ng mga mensahe at tawag mula sa mga taong nagpapanggap na opisyal ng gobyerno at humihingi ng tulong pinansyal.

Kabilang sa Panukalang Batas na tatalakayin ay ang Sim Card Registration Bill na target ni Senator Poe na maaprubahan sa Nobyembre.

Aminado si Poe na kailangan nilang mag-double time upang maipasa ang nasabing panukala na nakikitang nilang solusyon kontra sa laganap na text scams, lalo’t naging sopistikado na dahil nagagamit na mismo ang personal data ng mga subscriber. —ulat mula kay Cely Ortega Bueno (Patrol 19)

Kinuwestyon ni Senador Alan Peter Cayetano ang pagmamatigas ng University of the Philippines na huwag ibalik ang kanilang College Entrance Examination.

Sa Organizational Meeting ng Senate Committee on Science and Technology, aminado si Cayetano na nagtataka siya kung bakit hanggang ngayon ay hindi maibalik ang UPCAT gayung ang ibang Unibersidad ay nakagawa na ng sistema para sa Entrance Examination.

Nangangamba si Cayetano na dahil sa sistemang ipinatutupad ngayon ng UP ay napapakawalan ang ‘Best of the Best Students’, lalo ang mga nagmula sa Science Schools sa iba’t ibang panig ng bansa.

Kabilang sa tinukoy ng Senador ang Philippine Science High School (PISAY) na noong ipinatutupad ang UPCAT ay kasama sa Top 12 Schools na mataas ang ranking sa examination na may average passing rate na 97% hanggang 99%.

Gayunman, nang mawala ang UPCAT, bumaba sa 60.55% ang passing rate ng applicants mula sa PISAY.

Nais naman tanungin ng mambabatas ang U.P. kung saan napupunta ang pondo para sa kanilang Entrance Examination.

Ipinaalala ng Senador na ang kalidad ng edukasyon ay hindi lamang naka-depende sa faculty ng Pamantasan kundi maging sa uri ng kanilang mga estudyante. —ulat mula kay Cely Ortega Bueno (Patrol 19)

Ang buong Senate Blue Ribbon Committee na ang magdedesisyon kung pipilitin o hindi si Executive Secretary Victor Rodriguez na dumalo sa imbestigasyon sa tinaguriang sugar fiasco.

Ayon kay Committee chairman Francis Tolentino, tatalakayin nila ito sa panibagong pagdinig mamaya kung saan nag-abiso na si Rodriguez na hindi makadadalo.

Mahalaga anyang dumalo muli ang Palace official para malinawan ang ilang usapin partikular sa Sugar Order Number 4.

Ipinunto ni Tolentino na bilang Abogado ay kailangang magpaliwanag ang Executive Secretary.

Pagpapakita rin ng respeto ng Ehekutibo sa Lehislatura na Co-equal branch ng gobyerno ang muling pagharap ni RODRIGUEZ dahil indikasyon na masigla at malusog na sistema ng demokrasya.

Sa liham ni Rodriguez sa Blue Ribbon, sinabi nito na  hindi siya makadadalo dahil abala siya sa mga biyahe sa ibayong dagat ni Pangulong Bongbong Marcos.

Iginiit pa nito na nasagot na daw nya ang lahat ng tanong ng mga Senador ukol sa Sugar Order 4 na tinukoy niyang draft o balangkas lamang at tiniyak na kaisa siya ng Senado sa paglaban sa katiwalian. —ulat mula kay Cely Ortega Bueno (Patrol 19)

Nasa Indonesia na si Pangulong Bongbong Marcos Jr., para sa kanyang tatlong araw na state visit.

Ayon kay Pangulong Marcos, nakatakda silang magpulong ni Indonesian president Joko Widodo at sasaksihan ang paglagda ng ilang agreement kaugnay sa defense, security, creative economy at culture.

Umaasa rin si PBBM, na tumatayong Kalihim ng Department of Agriculture, na maka-e-engganyo ang Pilipinas ng Indonesian investors sa agriculture at energy sector.

Gayunman, hindi bibisitahin ni Pangulong Marcos ang filipina death row convict na si Mary Jane Veloso.

Matapos ang pagbisita sa Indonesia, nakatakda ring bumiyahe ang Punong Ehekutibo sa singapore bukas.

Ilang kasunduan din sa nasabing pagbisita ang nakatakdang lagdaan.

Humihirit ang isang Transport group ng dayalogo sa Land Transportation Franchising and Regulatory Board (LTFRB) upang talakayin ang mga petisyon sa kanilang hiling na dagdag-pasahe sa jeep.

Dos pesos na fare hike ang hiling ng Liga ng Transportasyon at Operators sa Pilipinas (LTOP) maging ng Federation of Jeepney Operators and Drivers Association of the Philippines.

Ito’y dahil sa walang-prenong pagtaas ng presyo ng mga produktong petrolyo sa kabila ng minsanang pagpapatupad ng rollback.

Ayon sa LTOP, nasa kamay na ng LTFRB ang pagpapatupad ng win-win solution para sa lahat ng stakeholders.

Bukod sa mga jeepney operator, humihiling din ang bus operators ng increase ng 4 pesos para sa ordinary trip habang 7 pesos para sa air-conditioned trip.

Bagaman nagpatupad ng bigtime price hike ang mga kumpanya ng langis noong isang linggo, biglang kambyo naman ang mga ito ng bigtime ding rollback na ilalarga bukas.

Una nang inihayag ng LTFRB na nakatakda itong maglabas ng desisyon sa fare hike petitions ng mga transport group ngayong buwan.

Positibo ang pananaw ng pamilya ni Mary Jane Veloso na bubuksan ni Pangulong Bongbong Marcos ang kaso ng naturang Pinay na nasa death row sa Indonesia, kay Indonesian president Joko Widodo.

Ito ang inihayag ni Cesar Veloso, ama ni Mary Jane, sa gitna ng kauna-unahang official foreign trip ni PBBM.

Ayon sa nakatatandang Veloso, umaasa silang matatapos na ang kaso ni Mary Jane, na 12 taon nang nakapiit.

Nananalangin din anya sila na mabibigyan o kung hindi man ay mababanggit ni Pangulong Marcos kay Widodo ang issue ng clemency upang makalaya ang anak.

Taong 2015 nang bigyan si Mary Jane ng reprieve sa kanyang Death Sentence matapos ang last minute appeal ni dating Pangulong Noynoy Aquino kay Widodo na payagang tumestigo ang nakababatang Veloso laban sa kanyang mga recruiter.

Tinitimbang pa ni Pangulong Bongbong Marcos ang mga isyung bumabalot sa Executive Order sa Cebu City hinggil sa boluntaryong pagsusuot ng face masks.

Ayon kay Press secretary Trixie Cruz-Angeles, hinihintay pa ni Pangulong Marcos ang developments sa isinasagawang intervention ng Department of Interior and Local Government.

Una nang inihayag ni Interior secretary Benhur Abalos na pumayag ang Cebu City Local Government na ipagpaliban ang implementasyon ng naturang kautusan.

Gayunman, nilinaw ni Cebu City Mayor Mike Rama na nilagdaan na niya ang Executive Order.

Iginiit naman ng Department of Health na magiging mas mahirap ang pag-control sa COVID-19 pandemic kung magkakaroon ng magkakaibang protocols sa iba’t ibang panig ng bansa.

Dalawa umanong big-time drug trafficker ang arestado sa buy-bust operation sa Imus City, Cavite.

Kinilala ng Cavite Provincial Police Office ang mga suspek na sina Asnihaya Mimbalawag at Naif Ampuan, kapwa 20- anyos at residente ng Marawi City.

Nasakote ng mga otoridad ang dalawang suspek sa isinagawang operasyon sa Barangay Pasong Buwaya 2 kung saan nasabat mula sa kanila ang mahigit dalawang milyong pisong halaga ng shabu.

Ayon sa Dangerous Drugs Board, kabilang sina Mimbalawag at Ampuan sa drug watch bilang high-value individual sa bansa.

Kapwa nasa kustodiya na ng pulisya ang mga suspek at nahaharap sa kasong paglabag sa Comprehensive Dangerous Drugs Act of 2002 habang tinutunton na ang source ng iligal na droga.

Nagpaliwanag naman ang Occidental Mindoro Consolidated Power Corporation (OMCPC) bilang tugon sa panawagan ni Governor Eduardo Gadiano na aksyunan ang perwisyong dulot ng kakulangan ng supply ng kuryente.

Ayon kay OMCPC president Calvin Genotiva, hindi sila makapag-o-operate nang maayos kung hindi sila babayaran ng Occidental Mindoro Electric Cooperative (OMECO).

Aabot anya sa P258 million ang dapat nilang kolektahin mula sa OMECO na bahagi ng ipinataw na penalty ng Energy Regulatory Commission sa OMECO kaugnay ng pagka-antala ng Competitive Selection Process (CSP).

Ang CSP ay subsidiyang binabayaran ng National Power Corporation at bahagi ng buong universal charge on missionary electrification, pero pinasagot ng ERC sa OMECO ang 50% ng bayarin.

Sa pinakahuling power update ng OMECO, kulang na kulang umano sila sa supply ng krudo at nakikipag-tulungan na sa OMCPC para mapabilis ang proseso ng pagbiyahe ng fuel supply.

Dumating na sa Mindoro ang tatlong fuel truck ng OMCPC mula sa Batangas Port.

Magugunitang nawalan muli ng kuryente ang ilang bahagi ng mga Bayan ng San Jose, Magsaysay, Rizal at Calintaan noong Huwebes pero naibalik din matapos magpaandar ng 20 megawatt unit ang OMCPC.

Gayunman, pansamantala lamang ito dahil 20,000 liters lamang ng krudo ang nabili ng OMCPC kaya’t nitong sabado ay muling nag-shutdown ang planta sa Pulang Lupa, Central maging sa Tayamaan, Mamburao.