Drew Nacino

Kinondena ni Governor Eduardo Gadiano ang Occidental Mindoro Electric Cooperative (OMECO) at Occidental Mindoro Consolidated Power Corporation (OMCPC) dahil umano sa mga kapabayaan sa pagsu-supply ng kuryente kung saan ang mga mamamayan ang naghihirap.

Ang OMECO ang nag-iisang distribution utility habang ang OMCPC ang pribadong power supplier sa naturang lalawigan.

Ayon kay Gadiano, simula pa noong una ay walang tigil na ang pagbuo nila nina Congressman Odie Tarriela at Vice Governor Diana Apigo-Tayag ng mga posibleng hakbang upang makatulong sa paghahanap ng pangmatagalang solusyon sa problema sa kuryente.

Nakipag-dayalogo na anya sila sa Department of Energy, Energy Regulatory Commission at National Power Corporation kaya’t nabigyang-linaw ang mga kautusuan gayundin ang mga napag-usapang kasunduan.

Gayunman, nagpapatuloy ang banta ng power shutdown at rotational brownout kaya’t nananawagan si Gadiano sa OMECO at OMCPC para sa mas maliwanag na aksyon upang maiwasan ang perwisyo sa bawat members-consumers-owners.

Pangungunahan ng Department of Foreign Affairs sa halip na ang Department of Migrant Workers ang paghawak sa kaso ni Mary Jane Veloso, ang pinay na nasa death row sa Indonesia dahil sa drug-related case.

Ito ang nilinaw ni Migrant Workers secretary Susan Ople sa gitna ng pagbisita sa Indonesia ni Pangulong Bongbong Marcos.

Ipinunto ni Ople na DFA ang mas naka-aalam ng estado ng kaso at mas mahalagang magkaroon ng isang boses para sa napaka-sensitibong issue.

Nito lamang Biyernes ay nagpadala ng liham ang mga magulang ni Veloso kay Pangulong Marcos, sa pamamagitan ng DMW, upang hilingin na iuwi na si Mary Jane.

Gayunman, inihayag ng Kalihim na ipinasa na niya sa DFA ang naturang liham at nakipag-usap na rin siya kay Foreign Affairs secretary Enrique Manalo at kabilang sa tinalakay ang kaso ni Veloso.

Umaasa naman si Ople na bubuksan ni Secretary Manalo ang nasabing issue kay PBBM.

Dumami umano ang kaso ng rape na kinasasangkutan ng mga menor de edad sa Davao City, ngayong taon.

Sa datos ng Davao City Police Office, mahigit kalahati sa isandaang naisampang kasong Rape simula Enero hanggang Agosto ay pawang menor de edad ang biktima.

68 sa mga kaso ay may mga biktimang edad 12 hanggang 17 habang nasa 91 babae at 9 na lalaki ang mga complainant.

40 suspek naman ang naaresto at 60 pa ang pinaghahanap.

Nagsasagawa na ng lecture ang pulisya para sa mga mag-aaral hanggang High School hinggil sa “safe and unsafe touch” upang bigyang babala ang mga bata sa mga posibleng krimen, gaya ng panggagahasa at anumang pang-aabuso.

Pumirma na rin ng kasunduan ang city Government at Department of Education upang mapabilang ang Gender-related crimes, tulad ng Sexual abuse sa ituturo sa mga estudyante para madagdagan ang kaalaman ng mga bata hinggil dito.

Bahagya muling tumaas sa 24,067 ang mga kaso ng COVID-19 sa bansa kahapon kumpara sa 23,571 noong Sabado.

Ito’y makaraang makapagtala ang Department of Health ng karagdagang 2,321 COVID-19 cases dahilan upang sumampa naman sa 3,891,318 ang total case load.

Gayunman, ito na ang ika-8 sunod na araw na mas mababa sa 30,000 ang aktibong kaso ng COVID-19.

Umakyat naman sa 3,805,340 ang recoveries habang nasa 62,011 na ang death toll matapos madagdagan ng 49.

Nangunguna pa rin ang Metro Manila sa mga rehiyong may pinaka-maraming COVID infections o 9,564 sa nakalipas na dalawang linggo; sinundan ng CALABARZON, 4,611 at Central Luzon, na may 3,064.

Tatlong anggulo ang tinitignang motibo ng mga otoridad sa pamamaril sa isang abogada at anak nito sa Mandaue City, Cebu.

Nakaligtas sa naturang insidente ang mag-inang sina Atty. Karen Gonzalez at Jeremy Keith, 19- anyos.

Naniniwala si LT. Col. Frank Oriol, Deputy director for Operations ng Mandaue City Police Office, na may kinalaman sa trabaho ng biktima ang motibo sa pananambang.

Ayon kay Oriol, bukod sa pagiging Abogada, manager din si Gonzalez ng Business Marketing and Development Department ng Cebu Port Authority at nagsusulat sa isang pahayagan sa Cebu.

Maaari anyang may kinalaman ang krimen sa mga kasong hinahawakan ni Gonzalez, pagiging empleyado ng Cebu Ports Authority o paghihiganti.

Dakong alas 8:30 ng gabi noong Miyerkules nang pagbabarilin ang mag-ina sa Hernan Cortes Avenue, Barangay Banilad.

Minamaneho ni Atty. Gonzalez ang kanyang kotse sa nasabing lugar nang biglang tambangan ng mga hindi nakilalang salaring lulan ng motorsiklo.

Samantala, nag-alok na ang Integrated Bar of the Philippines-Cebu Chapter ng 50,000 peso reward sa makapagtuturo sa pagkakakilanlan ng mga salarin o makapagbibigay ng impormasyon para sa ika-reresolba ng kaso.

Ipinasara na ng Department of Migrant Workers (DMW) ang isang Recruitment Agency sa Makati City dahil sa patuloy na pag-recruit ng mga nais mag-abroad kahit walang lisensya.

Inihayag ni Migrant Workers secretary Susan Ople na na-ipadlock na ng Anti-Illegal Recruitment Branch ng ahensya ang mga opisina ng Azizzah International Manpower Services, Incorporated.

Hunyo a-15 nang kanselahin ng Philippine Overseas Employment Administration ang lisensya at akreditasyon ng Azizzah dahil sa iba’t ibang paglabag at reklamo ng mga naghahanap ng trabaho.

Patuloy anyang nag-isyu ng mga job order para sa house helper at skilled worker sa Saudi Arabia ang naturang recruitment agency, naniningil ng mga placement fee na katumbas ng isang buwang suweldo mula sa mga aplikante, kahit kanselado na ang lisensya nito.

Isinagawa ng DMW ang operasyon katuwang ang Southern Police District sa tanggapan ng Azizzah sa Palanan, Makati City.

Hinimok ng kagawaran ang mga biktima ng illegal recruitment na makipag-ugnayan sa Anti-Illegal Recruitment Branch sa pamamagitan ng facebook account nito o iulat ang mga naturang krimen sa dmw.gov.ph.

Hinimok ng isang agricultural group ang Kongreso na i-repeal na Republic Act 8172 o Act for Salt Iodization Nationwide na mas kilala bilang asin law upang buhayin ang local salt industry.

Ayon kay Philippine Chamber of Agriculture and Food Incorporated (PCAFI) President Danilo Fausto, liliham siya sa Kongreso upang ipabatid ang issue na naka-aapekto sa local salt industry.

Una rito ay ang kabiguan ng Department of Budget and Management na maglaan ng kahit isang sentimo sa isinumiteng budget proposal sa Kongreso na para sa produksyon o development ng industriya ng asin.

Dapat din anyang magkaloob ang gobyerno ng kapital o puhunan sa local salt producers.

Aminado si Fausto na sa nagtigil-operasyon na ang salt producers sa Cavite, Bulacan, Ilocos Region at Dasol, Bolinao at Sto. Tomas sa Pangasinan dahil sa asin law.

Bukod dito ay hirap din anya ang local producers na kumuha ng permit para mag-manufacture ng asin.

Binigyang-diin din ni Fausto ang kabiguan ng Department of Trade and Industry na tumalima sa nasabing batas na nagbibigay-mandato sa DTI na tulungan at suportahan ang local salt manufacturers sa pag-upgrade ng kanilang production technologies.

Sa datos ng Department of Agriculture, nasa limampung libong pilipino ang umaasa sa industriya ng asin habang ang taunang salt requirement ng bansa ay aabot sa 600,000 metric tons.

Nagdeklara na ang local government ng Tanza, Cavite ng dengue outbreak sa gitna ng tumataas na kaso ng nasabing sakit.

Simula Enero hanggang Agosto ngayong taon, umabot na sa 207 cases ang naitala sa Tanza kumpara sa 125 cases sa kaparehong panahon noong 2021 at 109 cases sa kaparehong panahon noong 2020.

Ayon kay Tanza Municipal Health Officer Ruth Punzalan, pinaigting na nila ang preventive measures, pinalakas ang information dissemination at pakikipag-ugnayan sa mga barangay leader laban sa dengue.

Ang patuloy anyang pag-ulan ang isa sa mga sinisi ng lokal na pamahalaan sa pagtaas ng naturang virus na nakukuha sa kagat ng lamok.

Aminado naman si Punzalan na maaaring umabot sa 500 ang dengue cases bago magtapos ang taon kung maglalatag ng mga intervention upang mapigilan ang pagkalat ng virus.

Posibleng magbalik na sa normal ang online services ng SSS ngayong araw.

Ito’y matapos ang sunog sa data center room ng SSS main office sa Quezon City noong madaling araw ng linggo.

Tiniyak ni SSS Spokesperson Fernan Nicolas na gagawin lahat ng state-insurer ang lahat upang maibalik sa normal ang kanilang operasyon.

Ayon kay Fernan, sa ngayon ay ilang transaction, gaya ng salary loan at maternity benefit claims, ang hindi ma-aasikaso ng SSS branches at maaari lamang i-proseso online.

Maaari na naman anyang i-access ng mga employer ang SSS pages.

Muling siniguro ni Fernan sa mga miyembro ng SSS na walang datos na nasira o nawala sa sunog dahil may backup server naman ang ahensya.

Tiniyak ng Department of Foreign Affairs na walang nasaktan at ligtas ang mga Filipino sa kabila ng mga bakbakan sa Tripoli, Libya.

Ayon kay DFA Spokesperson Ambassador Maria Teresita Daza, patuloy na minomonitor ng Philippine Embassy sa Tripoli ang sitwasyon.

Muling inabisuhan ni Daza ang mga pinoy sa nasabing bansa na iwasan munang lumabas ng bahay o magtungo sa mas ligtas na mga lugar habang nagpapatuloy ang bakbakan.

Dapat din anyang tawagan ang hotline numbers ng embahada para sa agarang tulong kung kailangan.

Umabot na sa mahigit tatlumpu ang patay sa bakbakan sa pagitan ng magkalabang paksyon ng gobyerno sa Libya.

Pinag-a-agawan ng dalawang panig ang control sa oil resources ng naturang bansa.