Drew Nacino

Target ng satellite-based internet service provider Starlink, na pag-aari ng Amerikanong bilyonaryong si Elon Musk ang 100% full coverage sa Pilipinas sa kalagitnaan ng susunod taon.

Ito ang kinumpirma ni Department of Information and Communications Technology Secretary Ivan John Uy.

Ayon kay Uy, saklaw lamang ng mga satellite ng Starlink ang mga bansa sa northern hemisphere, pero tiniyak naman sa kanya ng nasabing kumpanya na ma-ko-cover na ng kanilang serbisyo ang buong Pilipinas.

Nakatakda anyang mag-launch ang Starlink sa bansa sa katapusan ng taon, bilang kanilang kauna-kaunahang first venture sa Southeast Asia.

Nito lamang mayo nang makakuha ng approval ang Starlink mula sa National Telecommunications Commission upang i-rehistro ang kanilang negosyo sa bansa bilang isang value-added service provider.

Sa sandaling maging operation, mag-o-operate ang Starlink ng high-speed low latency satellite internet service na may download speed na 100 hanggang 200 megabits per second sa mas mura umanong halaga.

Bahagya pang bumaba sa 27,497 ang aktibong kaso ng covid-19 sa bansa.

Ito’y makaraang makapagtala ang Department of Health ng karagdagang 2,573 covid cases kahapon.

Ang mga bagong kaso ay mababa sa average cases na naitala noong August 22 hanggang 28 na 2,752.

Dahil dito, nasa 3,877,110 ang total case load kabilang ang 3,787,893 recoveries at 61,720 deaths.

Nangunguna pa rin ang Metro Manila sa may pinaka-maraming infections sa mga rehiyon sa nakalipas na dalawang linggo na 12,444; sinundan ng Calabarzon, 6,323 at Central Luzon, 4,075.

Sa Metro Manila, Quezon City ang may pinaka-maraming naitalang kaso sa nakalipas na dalawang linggo na 2,956; sinundan ng Cavite, 2,143 at Laguna, 1,625, na kapwa naman nasa Calabarzon.

Gumugulong na ang negosasyon sa posibleng pagtanggal sa deployment ban sa Saudi Arabia.

Kinumpirma ni Department of Migrant Workers Assistant Secretary Venecio Legaspi na mayroon ng negosasyon at team na pupunta sa Saudi Arabia bago dumating si Secretary Susan Ople.

Ayon kay Legaspi, dahil sa ban na ipinatupad ng Department of Labor Employment noong Nobyembre ay malaki ang nawawalang halaga sa gobyerno.

Inilarga ang deployment ban sa household service workers dahil sa hindi pa binabayarang sweldo para sa overseas filipino workers sa Saudi Arabia.

Isa ang sugatan sa panibagong sunog na sumiklab sa Sta. Mesa, Maynila.

Kinilala ang biktimang si Arnel Villareal, residente ng barangay 633.

Ayon sa Bureau of Fire Protection, dakong alas 12:47 ng tanghali kahapon nang magsimula ang sunog na kumalat sa apat na kabahayan sa Valencia street.

Umabot ito sa ikalawang alarma bago tuluyang naapula dakong alas-2 ng hapon.

Aabot sa P75,000 ang halaga ng mga napinsala o naabong ari-arian habang inaalam na ang sanhi ng pagkalat ng apoy.

Agosto a–21 nang matupok din ang maraming kabahayan sa naturang barangay kung saan nasa apatnaraang pamilya ang naapektuhan.

Iniimbestigahan ng Department of Education ang alegasyong sexual harassment ng mga guro sa mga estudyante sa isang paaralan sa bacoor city, cavite.

Aminado si DepEd Spokesman Michael Poa na ang alegasyon ay labis na nakababahala pero kanyang tiniyak na sineseryoso ito ng ahensya.

Ayon kay Poa, nagsasagawa na ng imbestigasyon ang schools division office sa mga alegasyon ng sexual harassment ng anim na guro ng Bacoor National High School sa ilang estudyante.

Magugunitang nagsumbong ang mga mag-aaral hinggil sa malalasuwa umanong mensahe ng mga guro.

Ipinakita ito sa pamamagitan ng screenshots ng umano’y pag-uusap sa messenger na naglalaman ng “sexual advances” at “inappropriate comments” ng mga guro sa mga mag-aaral.

Dahil dito, hindi anya binigyan ng teaching load ang anim na guro habang nagsasagawa ng imbestigasyon.

Inalmahan ng may-ari ng pinakamalaking sugar miller sa bansa ang alegasyon na nagho-hoard sila ng asukal.

Ito’y makaraang mag-inspeksyon ang Bureau of Customs sa warehouse ng Crystal Sugar Company sa Bukidnon at Cagayan de Oro City, kung saan mahigit 466,000 na sako ng asukal ang nadiskubre alinsunod sa utos ng pangulo.

Ayon kay Crystal Sugar Company, Incorporated owner Pablo Lobregat, maling impormasyon ang ibinibigay ng source sa malakanyang o inililigaw ang palasyo upang sabihing mayroong hoarding.

Iginiit ni Lobregat na hindi naman hoarding ang kanilang ginagawa bagkus nagsisilbi lamang silang bodega dahil karamihan ng mga asukal ay hindi sa kanila.

Iniimbak lamang sa kanilang warehouse ang mga asukal hanggang sa i-withdraw ang mga ito ng mga may-ari.

Ang nadiskubre anyang sako-sako ng asukal noong isang linggo ay kumakatawan lamang sa 15% ng halos 3 milyong bag na na-produce nila ngayong taon.

Sa ilalim ng “quedan” o mandatory warehouse receipt system, 66% sugar supply sa mga warehouse ay pagmamay-ari ng planters habang 34% ang ibinebenta sa millers.

Sa kabila nito, naniniwala si Lobregat na kulang talaga ang suplay ng asukal.

Sinita ng Commission on Audit (COA) ang Procurement Service ng Department of Budget and Management (PS-DBM) dahil sa P3 billion na halaga ng high-yield investment sa LandBank of the Philippines (LBP) at Development Bank of the Philippines (DBP).

Ayon sa COA, hindi umano otorisado ang PS-DBM na mag-invest at wala sa mandato nito na mag-invest sa high-yield savings account.

Pumalya rin ang PS-DBM na ibalik ang investment sa Bureau of Treasury na labag sa Executive Order 431 na inilabas noong May 30, 2004.

Ipinunto ng state auditors na ang non-return ng P3-billion investment sa treasury ay taliwas sa Department of Finance-DBM-COA Joint Circular 04-2012.

Nakasaad sa circular na lahat ng dormant account, maging unnecessary special at trust funds, ay dapat na ibalik sa general fund.

Tumutukoy ang dormant accounts sa mga koleksyon na otorisado ng batas na i-deposit sa authorized government depository bank at nananatiling inactive sa loob ng mahigit 5 taon.

Pinalagan ng Philippine General Hospital Workers Union ang pagtapyas sa panukalang pondo ng ospital para sa 2023 budget.

Mula sa kasalukuyaang P6.3 billion ngayong taon ay magiging P5.4 billion na lamang sa susunod na taon ang magiging budget ng PGH.

Base ito sa ‘spending plan’ ng gobyerno kung saan kakaltasan ng P890 million na pondo ang nabanggit na pagamutan.

Iginiit ni All Up Workers Union-Manila-PGH President Karen Faurillo na hindi katanggap-tanggap at nakababahala ang pagtapyas sa budget dahil maaapektuhan ng kanilang pondo ang ibinibigay nilang serbisyo sa mga pasyente.

Mas higit anyang kailangan ng PGH ng pondo habang nagta-transition ang bansa sa ‘new normal’ dahil sa pagiging pinakamalaking ‘covid-19 referral facility’ nito.

binigyang-diin ni Faurillo na sa katunayan ay mas kailangan pa ng PGH ng dagdag na P10-bilyong pondo nang tumama ang pandemya para sa mag–upgrade ng mga pasilidad, kagamitan at iba pang resources.

Kalaboso ang isang pulis matapos maaktuhang naglalaro sa isang casino sa Pasay City.

Kinilala ang suspek na si Maj. Rolando Isidoro, 51-anyos, naka-assign sa personnel holding and accounting section ng PNP-Police Security Protection Group.

Dinakip si Isidoro ng PNP-Integrity Monitoring and Enforcement Group (IMEG) habang naglalaro ng slot machine ng resorts world manila noong Sabado ng gabi.

Ayon kay imeg director, brig. Gen. Warren De Leon, isinagawa ang operasyon matapos makatanggap ng mga ulat mula sa isang concerned citizen na madalas si isidoro sa naturang casino.

Mahaharap ang suspek sa kasong paglabag sa article 231 ng revised penal code, bukod pa sa administrative case dahil sa paglabag sa PNP rules.

Magugunitang naglabas ng memorandum ang pambansang pulisya na nagbabawal sa lahat ng PNP personnel na tumambay o maglaro sa loob ng mga casino.

Ito’y makaraang ituro ang ilang pulis na sangkot umano sa ilang kidnapping incident, maging sa operasyon ng mga loan shark sa casino o nagpapautang sa mga natatalong player.

Nanindigan si Finance Secretary Benjamin Diokno na pagsasayang lamang ng pondo ng gobyerno ang pamumudmod ng financial assistance o ayuda kaugnay sa COVID-19 pandemic.

Ayon kay Diokno, dapat na itong itigil lalo’t limitado lamang ang fiscal space ng bansa.

Ipinunto ng kalihim na “fully recovered” na ang Pilipinas sa epekto ng pandemya kaya’t hindi na kailangang mamahagi ng karagdagang ayuda sa mga mahirap na pamilya.

Ang dapat anyang ipagpatuloy ay ang distribusyon ng iba pang financial assistance gaya ng social protection programs para sa senior citizens.

Sa katunayan, aminado si Diokno na pinag-iisipan na ng gobyerno na limitahan na ang bilang ng mga benepisyaryo ng ayuda sa mga mayroong national ID, bilang insentibo para sa mga kumuha nito.