Drew Nacino

Pumayag na umanong makipag-areglo ang pamilya ng nasawing security guard matapos mabundol ng SUV habang nagmamando ng daloy ng trapiko sa Dasmariñas City, Cavite.

Kinumpirma ni Dasmariñas City police chief, Lt. Col. Juan Oruga na pinakawalan na nila ang Mitsubishi Montero driver na si Primo Mallari Salarda.

Ito, ayon kay Oruga, ay matapos magkaroon ng “amicable settlement” sa pagitan nina Salarda at pamilya ng biktimang si Rodolfo Mejos, 52-anyos.

Agosto 22 nang maganap ang aksidente sa tapat ng Orchard golf and country club sa barangay Abad Santos Avenue, barangay Salawag kung saan naka-assign si Mejos.

Mabilis ang takbo ni Salarda kaya’t tumilapon ang security guard at hindi na umabot nang buhay sa ospital.

Bagaman sinampahan ng reklamong paglabag sa anti-drunk driving law si Salarda, iniurong na ito dahil sa kasunduang pinasok ng pamilya ng biktima sa driver.

Wala pang pasya ang Talisay City Police sa Cebu kung kakasuhan o hindi ang babaeng nag-post sa social media ng isang fake kidnapping incident sa barangay Cansojong na naganap noong August 25.

Inihayag ni lt. Col. Randy Caballes, hepe ng Talisay City Police Station na kung mayroong sapat na basehan na laban kay Graciella Maurice Aliño, ay magsasampa sila ng kaso bukas.

Agosto 26 nang mag-viral sa social media ang post ni Aliño hinggil sa dinukot umanong babae sa Uldog street.

Lulan si Aliño ng motorsiklo nang madaanan ang isang babaeng sumisigaw pero sa halip na beripikahin ay ipinost agad ito sa social media na kanya namang tinawag na insidente ng kidnapping.

Naalarma naman si mayor Gerald Anthony “Samsam” Gullas sa nabanggit na online post at ipinag-utos ang pagsasagawa ng imbestigasyon habang nag-public apology na kalauna’n si Aliño.

Samantala, hinimok ni Caballes ang mga residente na huwag basta mag-post ng mga unverified incident at tsismis sa social media dahil may kaakibat itong parusa o kaso.

Nag-alok na ng P100,000 pabuya si Cavite 4^th District Rep. Elpidio “Pidi” Barzaga para sa sinumang makapagtuturo sa kinaroroonan ng motorcycle-riding gunman na bumaril at pumatay sa isang traffic enforcer sa Dasmariñas City noong Sabado.

Inihayag ni Barzaga, chairman ng House Committee on Natural Resources, na ang pabuya ay makatutulong upang mapabilis ang pagresolba sa kaso.

Dismayado at kinondena rin ng Kongresista ang nasabing insidente.

Batay sa CCTV footage, nakikipag-usap si Edgard Quiroga sa isang motorista nang biglang sumulpot ang hindi pa nakikilalang rider at pinaputukan ang biktima.

Nakasuot ang suspek ng pula at itim na helmet, kulay gray na pang-itaas na may mahabang manggas at maong na pantalon at nakasakay sa kulay pula at itim na Yamaha MIO na walang plaka.

Isang lolo na tatlong araw nang nawawala ang natagpuan sa latian sa bayan ng Cortes, Bohol.

Kinilala ang senior citizen na si Bernardo “Narding” Concon, 78-anyos, dating chairman ng barangay Salvador na Agosto 24 pa napaulat na nawawala.

Malakas at ligtas si Concon nang mahanap ng mga rescuer at volunteer sa latian, noong Sabado ng hapon.

Ayon kay chief master sergeant Danilo Balane, deputy chief ng Cortes Municipal Police, nawala si Lolo Narding matapos pumunta sa burol ng isang kaibigan.

Batay anya sa CCTV footage, huling nakita si Concon sa Malayo Norte basketball court, na halos isang kilometro ang layo mula sa kanyang bahay.

Nitong Sabado, natunton ng volunteer na si Danilo Rosal si Mang Narding matapos sundan ang tunog ng mga nagbabalag-bagang alimango at mga bakas ng paa at dito na niya nadatnan si concon na nakaupo sa buhangin.

Umaasa pa rin ang Philippine National Police na buhay pa ang 34 na sabungerong nawawala simula pa noong Enero.

Ito’y kahit wala pang natatanggap na anumang “proof of life” ng mga nawawalang sabungero.

Ayon kay PNP spokesperson, Col. Jean Fajardo, mayroon na silang mga impormasyon ng mga posibleng pinuntahan o pinagdalhan ng mga sabungero pero kailangan pa nila itong beripikahin.

Ipagpapatuloy anya nila ang imbestigasyon hanggang makita ang mga nawawala.

Una nang ibinunyag ng PNP-Criminal Investigation and Detection Group na may tumawag sa mga pamilya ng 34 na nawawalang sabungero at inalok ng tig-isang milyong piso.

Sa kondisyon ito na hindi na itutuloy ang paghahanap sa kanilang mga nawawalang kaanak.

Itinanggi ni Police Regional Office Director, Brig. Gen. Cezar Pasiwen ang mga ulat na may mga hindi kilalang lalaki na lulan ng puting van ang nagtatangkang mandukot ng mga bata.

Ayon kay Pasiwen, inabisuhan na ng pulisya ang publiko na maging alerto at mapagmatyag sa tunay na sitwasyon upang mabatid nila kung ano ang totoong impormasyon sa fake news.

Pinaalalahanan din ng pulisya ang sinumang magpapakalat ng mga unverified report, lalo sa social media na may kaakibat itong mga konsekwensya.

Hinimok naman ni Pasiwen ang publiko na i-sumbong sa pinaka-malapit na police station o sa pamamagitan ng official social media account ng PNP kung may naberipikang mga impormasyon ng kidnapping at iba pang krimen.

Bumuo na ang Philippine National Police ng Special Investigation Task Group na tututok sa kaso ng 34-anyos na lalaking tatlong linggo nang nawawala matapos dukutin sa Lian, Batangas.

Ipinag-utos na rin ni PNP chief, Gen. Rodolfo Azurin Jr. sa Batangas Provincial Police ang pagsasagaw ang malalimang imbestigasyon sa insidente.

Agosto 5 nang dukutin ng mga armadong lalaking nakasakay sa sports utility vehicle si Rodrigo Catibog habang lulan ng motorsiklo kasama ang kanyang girlfriend sa barangay Bungahan.

Nakaligtas ang girlfriend ni Catibog na si alyas Gean habang dinala patungo sa direksyon ng barangay Poblacion ang nobyo.

Samantala, inatasan na rin ni azurin ang Police Regional Office-4A na paspasan na ang imbestigasyon sa insidente ng pagdukot naman sa delivery rider na si eugene del rosario sa bayan ng taal.

Magugunitang dinampot din ng mga armadong lalaki na nakasakay ng SUV si Del Rosario sa isang gasolinahan sa Taal pero kalauna’y natagpuang patay sa Sariaya, Quezon.

Umakyat na sa 1.13 billion pesos ang halaga ng pinsalang dulot ng bagyong Florita sa sektor ng agrikultura.

Ayon sa Department of Agriculture-Disaster Risk Reduction and Management Operations Center, mahigit 6,600 magsasaka rin ang naapektuhan.

Nagmula ang mga ito sa Cordillera Administrative Region, Ilocos, Cagayan Valley, Central Luzon at Bicol Regions.

Tinaya sa 66,633 metric tons ang volume loss at halos 50,000 ektaryang agricultural land ang apektado.

Kabilang sa pinaka-matinding pinadapa ang mga maisan o 90.79% ng mga apektadong agricultural products na katumbas ng 1 billion pesos.

Aabot naman sa 11,000 hectares ng palayan din ang nasalanta o katumbas ng 82.8 million pesos na halaga ng pinsala.

Sa ikatlong sunod na araw, muling nakapagtala ng below 3,000 COVID-19 cases sa bansa.

Batay sa datos ng Department of Health, umabot sa 2,318 ang mga bagong kaso ng COVID-19 kahapon.

Kabilang dito ang 54 new deaths kaya’t sumampa na sa 61,667 ang death toll.

Dahil dito, bumaba pa sa 28,525 ang active cases habang sumampa na sa 3,874,641 ang total cases.

Umakyat na rin sa 3,784,449 ang recoveries.

Samantala, pinaka-marami o 782 sa mga bagong infections ay mula sa Metro Manila.

Umabot na sa mahigit P3-milyong ang halaga ng pinsalang dulot ng bagyong florita sa sektor ng agrikultura.

Ayon sa DA, ang nasabing halaga ay katumbas ng total volume loss na 220 metric tons ng agricultural products, na naka-apekto sa tatlundaan at sampung magsasaka at 628 hectares ng agricultural land.

Pinaka-matinding nakaranas ng pinsala ang mga palayan na may total volume loss na 217 metric tons o P2.9 million sa Northern Luzon.

Damay din ang mga gulayan, partikular ang mga high-value crop maging ang fishing sector.

Tiniyak naman ng DA ang tulong sa mga apektadong magsasaka at mangingisda.