Drew Nacino

Umakyat na sa tatlong bata ang patay makaraang matupok ang isang residential area sa Quezon City, kagabi.

Hinihinalang tulog ang mga biktima kaya’t hindi na nakalabas nang magsimulang kumalat ang apoy sa barangay Obrero mag-a-alas dose ng hatinggabi.

Tinatayang walumpung pamilya o nasa tatlundaang katao naman ang naapektuhan sa naturang sunog sa father Martinez street.

Ayon sa Quezon City Bureau of Fire, umabot sa unang alarma ang sunog bago tuluyang naapula dakong ala una kaninang madaling araw.

Halos tatlumpung kabahayan naman ang nadamay habang inaalam na ang sanhi ng pagkalat ng apoy at halaga ng mga napinsala o naabong mga ari-arian.

Dapat managot sa batas ang ilang dating opisyal ng Sugar Regulatory Administration (SRA) at sugar millers sa nabulilyasong planong importasyon ng 300,000 metric tons ng asukal.

Ito ang iginiit ng United Sugar Producers Federation of the Philippines (Unifed) sa harap ng ilalabas na rekomendasyon ngayong araw ng Senate Blue Ribbon Committee matapos ang imbestigasyon sa sugar fiasco.

Partikular na idiniin ni Unifed President Manuel Lamata sa kontrobersya sina dating SRA Administrator Hermenegildo Serafica at Philippine Sugar Millers Association President Pablo Lobregat.

Ayon kay Lamata, naniniwala silang nagkaroon ng sabwatan sa pagitan nina serafica at grupo ni Lobregat.

Sa katunayan ay noon pa anya nila inirereklamo ang mga kabulastugan ni serafica sa SRA pero ngayon lamang ito naungkat.

Kinumpirma ng Philippine Airlines na isa sa kanilang pasahero ang naka-isolate sa Hong Kong makaraang magpakita ng sintomas ng monkeypox virus.

Ayon kay PAL Spokesperson Cielo Villaluna, Setyembre a – 5 nang dumating sa Hong Kong ang lalaking pasahero ng PAL flight PR300.

Inabisuhan naman ni Villaluna ang lahat ng pasaherong nakasalamuha ng lalaki na i-monitor ang kanilang kalusugan at agad magpatingin sa doktor kung mayroong nararamdamang sintomas.

Maaari rin anyang makipag-ugnayan sa centre for health protection ng Hong Kong department of health.

Nakikipag-ugnayan na rin ang PAL sa Department of Health ng Pilipinas kaugnay sa nasabing kaso ng monkeypox. —sa ulat ni Raoul Esperas (Patrol 45)

Posibleng simulan na ngayong taon ng China ang importasyon ng durian mula Pilipinas.

Ito ang kinumpirma ni Chinese Ambassador Huang Xilian batay sa resulta ng assessment na isinagawa ng isang team ng mga eksperto na inorganisa ng kanilang embahada.

Ayon kay Huang, nagtungo sa Davao region ang team upang maghanap ng durian na i-e-export sa China.

Karamihan anya ng durian sa China ay iniimport at sa katunayan ay umabot sa 882,000 tons noong isang taon o katumbas ng 4.21 billion dollars ang inangkat ng kanilang bansa.

Matatagpuan sa Davao region ang mga high quality at masarap na durian na pang-export quality.

Sinuspinde ng Taiwan ang VISA-free privilege nito para sa mga pilipino.

Nilinaw ni Ministry of Foreign Affairs Spokesperson Jeanette Ou na pansamantala lamang ito at subject for review.

Bukod sa Pilipinas, suspendido rin ang VISA-free entry sa Taiwan ng Chile, Dominican Republic, Israel, Japan, Republic of Korea, Nicaragua, Singapore, Malaysia, Thailand, Brunei at Russia.

Ipagpapatuloy naman ng Bureau of Consular Affairs ang VISA waivers para sa United States, Canada, Australia, New Zealand at ilan pang European countries simula September 12.

Hindi idinetalye ng ahensya ang dahilan nang suspensyon ng VISA-free privelege para sa mga nasabing bansa.

Balik-bansa na si Pangulong Bongbong Marcos matapos ang 4 na araw na state visit sa Indonesia at Singapore.

Alas diyes bente singko kagabi nang dumating si Pangulong Marcos sa Ninoy Aquino International Airport Terminal 2, sa Pasay City.

Sa kanyang arrival speech, ipinagmalaki ni PBBM na aabot sa P800 billion investment deal ang kanyang iniuwi mula Indonesia at Singapore.

Kabilang anya sa dalawampu’t dalawang letter of intent at memorandum of agreements na sinelyuhan ang mga investment para sa renewal energy, e-commerce, defense at agriculture sectors.

Binigyang-diin ng pangulo na makatutulong ang mga nasabing kasunduan sa economic recovery ng Pilipinas at makalilikha ng mas maraming trabaho para sa mga pinoy.

Unti-unti na umanong bumababa ang dengue cases sa National Capital Region.

Batay sa datos ng DOH – Metro Manila Center for Health Development, bumaba ng 12,869 ang kaso ng dengue NCR simula January 1 hanggang September 5.

Gayunman, mataas pa rin ito ng 111% kumpara sa kaparehong panahon noong isang taon dahil kaunti ang mga taong lumalabas ng bahay.

Ayon kay Metro Manila CHD Assistant Director Dr. Aleli Sudiacal, nasa dalawampung porsyento o 2,544 ng total cases sa rehiyon ay pawang bata na edad 5 hanggang 9.

Dahil dito, umapela si Sudiacal sa publiko na panatilihin ang kalinisan sa kapaligiran, partikular sa bahay upang maiwasan ang dengue na dala ng lamok, lalo ngayong tag-ulan.

Posibleng pumalo hanggang P400 ang kada kilo ng baboy ngayong ‘ber’ months o habang papalapit ang holiday season.

Ito, ayon sa Pork Producers Federation of the Philippines (PROPORK), ay dahil sa bumababang supply dulot ng mga kaso ng african swine fever (ASF).

Batay sa price monitoring ng Department of Agriculture, tumaas sa P370 ang kada kilo ng baboy mula P355 kada kilo sa mga pamilihan sa Metro Manila, kumpara noong nakaraang linggo.

Inihayag ni PROPORK Vice President Nicanor Briones na marami ang tinamaan ng ASF sa northern Luzon at Mindanao habang mabilis ding ibinebenta ang mga baboy kahit kulang sa timbang.

Sa datos ng Bureau of Animal Industry, dumarami ang mga lugar sa bansa na isinasailalim sa red o infected zone simula noong Hunyo dahil sa nasabing sakit.

Muli namang nanawagan si Briones sa gobyerno na bilisan ang pamamahagi ng indemnification sa mga hog raiser na tinamaan ng ASFF upang mahikayat silang i-report kung tumama ang sakit sa kanilang lugar.

Hinimok ng National Privacy Commission (NPC) ang Kamara na gawing “future-proof” ang sim card registration bill.

Ayon kay NPC Deputy Commissioner Leandro Aguirre, kapag walang future-proofing ang nasabing panukala ay hindi mapipigilan ang paglaganap ng text scam.

Ang “future-proofing” ay hakbang upang hindi maapektuhan ang isang bagay ng mga hamong maaaring kaharapin sa paglipas ng panahon.

Halimbawa nito ang s.m.s. spoofing, na isang uri ng scam kung saan nagpapanggap ang perpetrator bilang opisyal o authentic business entity upang makapanloko ng biktima kahit nasa ibang bansa.

Isa anya ito sa mga hindi maaaring tugunan ng sim card registration kaya’t umaasa sila sa NPC na ikukunsidera ng Kongreso ang future proofing ng bill.

Ipinunto ni Aguirre na kung magiging sapilitan ang pagpa-rehistro ng sim cards, tiyak na hahanap ng ibang paraan ang mga tao na hindi sasaklawin ng naturang panukala.

Sa kabila nito, suportado ng privacy watchdog ang sim card registration bill dahil marami itong mga katangiang tinataglay upang ma-protektahan ang mga mamamayan laban sa krimen.

Dalawang sunog ang sumiklab sa magkahiwalay na lugar sa Maynila.

Ayon sa mga tauhan ng Manila Disaster Risk Reduction and Management Office (MDRRMO), unang naitala ang sunog sa bahagi ng Villafojas street sa Tondo, Maynila alas-4:26 ng hapon.

Umabot sa unang alarma ang sunog na tumagal ng mahigit isang oras bago idineklarang fire under control alas-5:43 ng hapon.

Samantala, isa pang sunog ang sumiklab sa Dagonoy street, barangay 773 sa San Andres Bukid, Maynila na umabot sa ikalawang alarma.

Nagsimula ang sunog alas-5:08 ng hapon bago idineklarang fire under control alas-6:26 ng gabi.

Patuloy pang nagsasagawa ng imbestigasyon ang mga otoridad para alamin ang dahilan ng sunog sa nabanggit na lugar.