Drew Nacino

Babagsak din sa kamay ng PNP ang grupo o sindikatong nasa likod ng nagkalat na text scam sa bansa.

Ito ang tiniyak ni PNP Spokesperson, Col. Jean Fajardo bilang tugon sa dumaraming reklamo ng mga text message mula sa hindi pa natutukoy na grupo.

Ayon kay Fajardo, kumikilos na ang PNP-Anti-Cybercrime Group upang matukoy ang utak ng text blast.

Posible anyang organized group ang utak ng scam na layuning manloko at manamantala.

Kahapon ay nagsagawa ang senado ng imbestigasyon kaugnay sa naglipanang text spams at scams na bumibiktima sa milyun-milyong gumagamit ng mobile phones.

Nagdagdag ng security features ang ilang e-wallet na madalas na ginagamit sa bansa sa gitna ng nagkalat na text scams na hinihinalang kumuha ng impormasyon mula sa mga nasabing platform.

Kabilang sa naglagay na ng karagdagang seguridad sa  kanilang online payment services ang globe at smart.

Ayon kay Anton Bonifacio, Chief Information Security Officer ng Globe Telecom, na may hawak ng G-Cash, tinatakpan na nila ang buong pangalan ng padadalhan ng pera sa kanilang app.

Inihayag naman ni Smart Chief Information Security Officer Angel Redoble, na may hawak ng Maya, na nagsagawa na sila mga simulation upang masuri ang problema.

Naniniwala ang globe at smart na sinasamantala ng cyber criminals ang lehitimong features ng digital applications.

Hindi anya nila nais mawala o mapunta kung kaninong cyber-criminal ang mga pinaghirapang pera ng mga tumatangkilik sa kanilang serbisyo.

Samantala, nilinaw naman ni Bonifacio na walang nangyayaring data breach o leak sa G-cash system at kanyang tiniyak ang integridad ng datos ng mahigit 66-M nilang users.

Tatlo ang sugatan habang 780 pamilya ang nawalan ng bahay matapos ang sunog sa Barangay Balingasa, Quezon City, kahapon.

Kinilala ang mga nasugatang sina John Robert Castillo, 20-anyos; Melbert Beltran, 35-anyos, kapwa residente sa naturang lugar at Charlie Gerais, 30-anyos na fire volunteer.

Ayon sa Bureau of Fire Protection, pasado alas-11 ng umaga nang umakyat sa ikatlong alarma ang sunog bago maapula dakong alas-3 ng hapon.

Aabot sa  400 kabahayan ang naabo sa sunog na pinaniniwalaang nagmula sa poste ng kuryente.

Tinaya naman ng BFP  2.9-M ang halaga ng mga natupok o napinsalang ari-arian.

Tagumpay ang isinagawang Simultaneous Nationwide Earthquake Drill na kinatampukan ng face-to-face exercises, na kauna-unahang pagkakataon nang magsimula ang COVID-19 pandemic noong March 2020.

Pinasalamatan naman ng Office of Civil Defense (OCD) ang publiko sa naging partisipasyon sa third quarter National Simultaneous Earthquake Drill (NSED).

Hinimok naman ng OCD ang mga stakeholder na magsagawa ng sabay-sabay na drills bilang suporta sa NSED habang mahigpit na sinusunod ang minimum public health standards.

Nagsimula ang programa alas- 8 ng umaga kahapon na may ceremonial pressing ng “button” na idinaos sa Macea Building sa Legazpi Village, Makati City.

Kabilang sa isinagawa ang full-scale exercise upang subukan ang response capabilities ng Makati City Government unit sa pagkakataong may 7.2 magnitude na lindol.

 Nagkasundo na sina DFA Secretary Enrique Manalo at Chinese Foreign Minister Wang Yi na muling magkaroon ng bilateral consultation mechanism sa issue ng West Philippine Sea.

Ito ang kinumpirma ni Manalo sa pagdinig ng Senate Committee on Foreign Relations kahit wala pa siyang binanggit na petsa kung kailan isasagawa ang konsultasyon.

Inihayag din ng kalihim na nasa 388 diplomatic protests na ang inihain ng bansa laban sa China noong Duterte Administration; 48 sa kasalukuyang administrasyon, habang dalawang protest notes laban sa Vietnam.

Gayunman, sinabi ni Senator Imee Marcos na Chairperson ng Senate Committee on Foreign Relations na tila wala namang nangyayari sa mga protesta na anya ay parang nag-aasaran lang ang Pilipinas at China.

Aminado si Marcos na nakakahiya na mistulang dine-deadma at hindi niya mabatid kung nagsisilbi na lamang “record keeping” ang diplomatic protests.

Sinang-ayunan naman ito ni manalo na inamin ding hindi sapat ang protesta upang magtagumpay. —ulat mula kay Cely Ortega Bueno (Patrol 19)

Dismayado si Senate Committee on Public Services Chairperson Grace Poe sa National Telecommunications Commission (NTC) sa gitna ng talamak na text spams at scams.

Sa pagdinig ng komite, ibinahagi ni NTC Commissioner Gamaliel Cordoba na ngayong taon ay tatlo pa lang ang kanilang text blasts na nagbabala sa mga subscriber na huwag maniwala sa mga text scam.

Gayunman, pinuna ito ni Poe at iginiit na sa dami ng natatanggap na text scam kada araw ay kulang ang bilang ng text blasts na nagawa ng NTC.

Pinuna rin ng senador si Cordoba dahil hindi nito kabisado ang hotline ng NTC na maaaring pagsumbungan ng mga nakakatanggap ng mga text scam at spam.

Aminado naman ang NTC na na-block na nila ang mga numerong sangkot sa scam mula sa walundaan lamang na reklamo sa hotline na 896 677-22; 892-04464 at 891-3251.

Ipinunto ng mambabatas na sadyang kaunti ang natanggap na reklamo ng ahensya dahil hindi ito alam ng publiko.—ulat mula kay Cely Ortega Bueno (Patrol 19)

 Tila sinisi pa ng Department of Agriculture ang mga magsasaka sa nararanasang oversupply ng bawang at repolyo.

Ito’y makaraang ihayag ni DA Senior Undersecretary Domingo Panganiban na tanim nang tanim ang mga magsasaka ng bawang at repolyo nang hindi iniintindi ang merkado para sa kanilang ani.

Tugon ito ni Domingo sa isyu ng oversupply ng bawang sa Batanes at repolyo naman sa Benguet.

Ayon sa DA Official, bagaman nagtatanim ang mga magsasaka sa Batanes at Benguet ng kanilang regular crop ngayong panahon, hindi naman nila batid kung may bibili ng mga ito.

Para anya matugunan ang pangamba, tutulong ang kagawaran sa mga magsasaka na magtanim ng iba pang crop bilang kapalit ng kanilang mga regular na pananim upang tumugma sa kasalukuyang pangangailangan ng merkado.

Palalakasin din ng DA ang value acts system approach para matiyak na may bibili ng ani ng mga magsasaka.

Suportado ni Pangulong Bongbong Marcos ang hirit na magbigay ng budget para sa pagbili ng next generation COVID-19 vaccines na maaaring mas epektibo laban sa OMICRON variants.

Inihayag ni DOH Officer-In-Charge, Undersecretary Maria Rosario Vergeire na naniniwala si Pangulong Marcos na dapat ibigay ang pondo para sa bagong bakuna.

Ayon kay Vergeire, batid nilang sa susunod na taon ay maglalabas ng mga bagong klase ng mga bakuna kaya’t dapat lamang itong paglaanan ng budget.

Binigyang-diin ng opisyal na ang pagbili ng mga bagong henerasyong bakuna ay kailangan dahil mayroon mataas pa rin ang kaso ng COVID-19 sa mga fully vaccinated.

Naka-isolate na rin ang anim na crew ng Philippine Airlines flight PR-300 na sinakyan ng lalaking kauna-unahang monkeypox case ng Hong Kong.

Ang anim na flight crew ng PAL na umalis ng Manila noong September 5 patungong Hong Kong ay pawang close contact ng lalaking pasaherong nakitaan ng sintomas ng nasabing virus.

Kinumpirma ni PAL Spokesperson Cielo Villaluna na inabisuhan sila ng kanilang company physician na obserbahan ang flight crew kahit pa walang sintomas ang mga ito ng monkeypox.

Ayon kay Villaluna, kahit ang eroplano na wala namang monkeypox issue ay sasailalim sa mandatory aerosol disinfection.

Nagpadala na rin anya sila ng manifesto ng flight PR300 sa DOH at Hong Kong health authorities upang makatulong sa pagtunton sa mga pasaherong nakasalamuha ng lalaking pasyente.  —sa ulat ni Raoul Esperas (Patrol 45)

Kumporme ang ilang senador sa rekomendasyon ng Inter-Agency Task Force (IATF) na gawing optional ang pagsusuot ng face mask sa outdoor areas at hindi matataong lugar.

Ayon kay Senator Jinggoy Estrada, dahil IATF ang nagrekomenda ay maaaring nangangahulugang ligtas na ang hindi pagsusuot ng face mask sa labas ng bahay.

Naniniwala si Estrada na basta’t fully vaccinated ay maaaring hindi na nga kailangang magsuot ng face mask kapag nasa open spaces.

Suportado rin ni Senator JV Ejercito ang rekomendasyon ng task force at naniniwala siyang kailangan na lamang magsuot ng facemask kapag nasa indoor areas at matataong lugar.

Inihayag naman ni Senator Ronald Bato Dela Rosa na ang IATF ang mas naka-aalam kung ano ang dapat gawin at ipatupad kaya’t naniniwala siya na pinag-aralan at may basehan ang kanilang rekomendasyon.

Gayunman, aminado si Dela Rosa na bilang isang covid survivor ay takot pa rin siya na magtanggal ng face mask kaya’t magsusuot pa rin siya nito kahit nasa labas.