Drew Nacino

Pinaigting na ng National Capital Region Police ang police visibility sa gitna ng mga napapaulat na insidente ng pagdukot.

Ito ang tiniyak ni NCRPO spokesman, Lt. Col. Dexter Versola matapos maglabas ang Philippine Chinese Chamber of Commerce and Industry Incorporated (PCCCII) ng datos na umabot na sa 56 ang insidente ng pagdukot.

Ayon kay Versola, nakipag-ugnayan na rin sila sa PCCCII upang matutukan ang datos at maresolba ang mga kaso ng pagdukot, partikular sa ilang Chinese na may kaugnayan sa operasyon ng Philippine Offshore Gaming Operator.

Muli namang inabisuhan ng PNP official ang publiko, lalo ang mga netizen na iwasang mag-post o mag-share ng mga hindi beripikadong impormasyon ng mga umano’y kidnapping incident.

Nagpasalamat si Cebu Governor Gwendolyn Garcia sa National Government sa muling pagkilala sa mga polisiyang ipinatutupad ng provincial government kontra COVID-19 pandemic.

Ito’y makaraang irekomenda ng Inter-Agency Task Force kay Pangulong Bongbong Marcos na luwagan ang polisiya sa mandatory wearing ng face mask sa open spaces.

Aminado si Garcia na kahit nagkaroon ng kaunting hindi pagkaka-unawaan noon ang National government at LGU ng Cebu province, maayos naman sa ngayon ang ugnayan nila sa mga bagong miyembro ng IATF.

Nito lamang hunyo ay nagkaroon ng hindi pagkaka-intindihan ang gobernadora, IATF at Department of Interior and Local Government sa magkaiba nilang posisyon sa facemask policy.

Una nang nag-issue si Garcia ng Executive Order 16 noong June 8 upang payagan ang optional na pagsusuot ng face mask sa open spaces sa lalawigan bagay na tinutulan naman ng DILG at IATF.

Sinimulan na ng Department of Public Works and Highways ang pagdi-disenyo para sa initial major project proposal bilang solusyon kontra baha sa Bulacan at Pampanga.

Ayon kay DPWH secretary Manuel Bonoan, kinomisyon na nila ang planning at engineering consulting firm na Woodfields Consultants Incorporated sa paggawa ng epektibo at episyenteng plano para sa Pampanga River Basin sa Central Luzon.

Ang nasabing River Basin ang isa sa mga lugar na pinaka-lantad sa pagbaha.

Nakipag-ugnayan na anya si DPWH Senior Undersecretary Emil Sadain sa Woodfields para sa itatayong Pampanga River Floodway Flood Control Project na may Retarding swamp sa San Antonio Swamp at Pampanga Delta Development Program Phase 2.

Ang naturang proyekto ang sasalo sa lahat ng tubig mula Nueva Ecija, Pampanga at Bulacan.

Isinusulong ng Department of Health ang karagdagang buwis sa junk food at sweetened beverages, bilang solusyon kontra obesity o katabaan at upang mapataas ang revenue para sa Universal Healthcare Program.

Ayon kay DOH Officer-In-Charge, Undersecretary Maria Rosario Vergeire, mababawasan din ang konsumo sa mga nasabing produkto, kung papatawan ng dagdag-buwis gaya ng alcoholic drinks at tobacco products.

Batid naman anya ng lahat ang epekto sa kalusugan nang labis na pag-konsumo ng junk foods at sweetened beverages.

Ipinaliwanag ni Vergeire na marami ng mga pag-aaral na kapag naumpisahan ng bata ang mga ganitong uri ng pagkain, lumalaking obese ang mga ito at lantad sa iba’t ibang non-communicable diseases.

Wala namang inilatag na partikular na proposal ang DOH sa dagdag-buwis, pero inihayag ng opisyal ng kagawaran na ang additional revenue ay gagamitin upang pondohan ang Universal Healthcare Law.

Sa ilalim ng nasabing batas, otomatikong naka-enroll ang lahat ng Filipino sa National Health Insurance Program.

Optional na rin ang pagsusuot ng face mask sa outdoor spaces sa lalawigan Negros Occidental.

Alinsunod ito sa Executive Order na nilagdaan ni Governor Eugenio Jose Lacson, noong Biyernes.

Ang nasabing kautusan ay “effective immediately” sa buong lalawigan maliban sa indoor spaces at medical facilities.

Ang Negros Occidental na ang ikatlong lugar sa bansa na nagpatupad ng optional na pagsusuot ng face masks sa outdoors spaces matapos ang Cebu City at lalawigan ng Iloilo.

Ito’y matapos ang sinasabing “verbal approval” ni Pangulong Bongbong Marcos sa rekomendasyon ng Inter-Agency Task Force na gawin na lamang boluntaryo ang pagsusuot ng face mask sa labas ng bahay.

Gayunman, nilinaw ni Press Secretary Trixie Cruz-Angeles na hindi pa isinasapinal ang nasabing polisiya.

Bahagya muling umakyat sa 25,684 ang aktibong kaso ng Covid-19 sa bansa.

Ito’y makaraang makapagtala ang Department of Health ng karagdagang 2,230 Covid-19 cases kahapon dahilan naman upang sumampa na sa 3,906,629 ang total case load.

Mayroon ding naitalang 16 additional deaths kaya’t sumampa na sa 62,304 ang fatalities habang lumobo na sa 3,818,281 ang recoveries.

Samantala, halos kalahati sa mga bagong infections o 1,056 Cases ay mula sa Metro Manila.

Nagpaabot ng pagbati si Pangulong Ferdinand “Bongbong” Marcos Jr., sa Filipina Tennis Sensation na si Alex Eala.

Ito’y makaraang masungkit ng 17-anyos na atleta ang kampyonato sa U.S. Open Junior Girls’ Singles.

Sa kanyang facebook page, ipinagmalaki at ikinagalak ni Pangulong Marcos ang makasaysayang panalo ni Eala sa nasabing torneyo.

Isa na naman anyang Pinay ang nagwagayway ng ating bandila sa isang international competition at nagpapasalamat ang sambayanang Pilipino sa tagumpay na ini-alay ni Alex.

Dinagit ni Eala korona ng US Open Girls’ Singles makaraang pataubin si Lucie Havlickova ng Czech Republic sa score na 6-2, 6-4, kahapon.

Ito na sa ngayon ang pinaka-malaking tagumpay na nakamit ng isang Pilipino sa larangan ng tennis simula nang malaglag si Alex sa semi-finals ng 2020 French Open na sinapit din ni Felix Barrientos noong 1985.

Pinangunahan ni Pangulong Ferdinand “Bongbong” Marcos Jr., ang paggunita sa ika-105 kaarawan ng kanyang yumaong amang si dating Pangulong Ferdinand Marcos Sr., kahapon.

Bukod sa Pamilya Marcos, dinaluhan din ng malalapit nilang kaibigan at supporters ang nasabing aktibidad sa Libingan ng mga Bayani sa Taguig City, kung saan nakahimlay ang dating pangulo.

Nagpasalamat naman si PBBM sa lahat ng dumalo at mga walang-sawang sumusuporta sa kanilang pamilya.

Ayon sa nakababatang Marcos, ang magandang performance hanggang sa mga susunod na taon ang tanging paraan upang masuklian niya ang suportang ibinubuhos sa kanya ng taumbayan.

Ang kanya anyang pagka-panalo sa pagka-pangulo ay maituturing na pagkabuhay muli ng mga pangarap at pagmamahal ng kanyang ama sa bayan.

Hinimok naman ni Pangulong Marcos ang sambayanan na panatilihin ang nag-aalab na pag-asa at pagkakaisa na nagsisilbing gabay anuman ang hangarin at gawin sa hinaharap bilang pagsisilbi sa pinaka-mamahal na bansang Pilipinas.

Ang pagbabalik sa in-person classes ang isa sa mga maaaring dahilan nang pagtaas ng kaso ng COVID-19 positivity rate sa Metro Manila.

Ayon kay OCTA Research Fellow, Dr. Butch Ong, inasahan na ang pagtaas ng positivity rate dahil sa increased mobility ng mga tao na pumapasok sa mga trabaho at paaralan.

Nitong setyembre 6 nakapagtala ng 12.7% positivity rate sa National Capital Region(NCR), mula 12.1% noong 2.

Gayunman, bumababa ang kaso ng COVID-19 sa bansa ngayong buwan kumpara noong Agosto.

Hinimok naman ni Ong ang publiko, partikular ang mga mag-aaral at guro na ugaliing sumunod sa health and safety protocols.

Ikinanando na ng Bureau of Customs ang ilang bodega sa Meycauayan City, Bulacan makaraang makatanggap ng impormasyon na smuggled ang mga iniimbak nilang asukal.

Katuwang ang ilang pulis at sundalo, 9 na bodega ang sinalakay ng Customs Intelligence And Investigation Service-Manila International Container Port (CIIS-MCIP) simula noong Miyerkules hanggang kahapon.

Ayon kay CIIS-MICP Chief Alvin Enciso, 6 sa mga warehouse ang nakitaan ng nasa 180,000 sako ng asukal na hindi pa mabatid kung local o imported.

Nakatanggap din anya sila ng tip na ni-re-repackk ang mga imported o smuggled na asukal upang mag-mukhang locally manufactured.

Gayunman, itinanggi ng isa sa mga warehouse manager na sangkot sila sa sugar repacking at may mga hawak silang dokumento na ligal ang mga asukal sa kanilang bodega.