Drew Nacino

Inasahan na ang unti-unting pagtaas ng Covid-19 cases sa Metro Manila.

Ito ang nilinaw ni OCTA research fellow, Dr. Guido David makaraang tumaas ang reproduction number at positivity rate.

Ayon kay David, natural lamang na tumaas ang kaso ng Covid-19, lalo’t dumami ang mga taong lumalabas ng bahay.

Sa datos ng OCTA, sumampa sa 13.3% ang Covid positivity rate noong September 9 kumpara sa 12.1% noong September 2 sa National Capital Region.

Ang positivity rate ang bilang ng isinagawang tests kung saan positibo sa Covid-19 ang resulta.

Batay sa benchmark positivity rate ng World Health Organization, ang below 5% na napanatili sa loob ng dalawang linggo ay indikasyon na kontrolado ang virus transmission.

Tumaas din sa 1.11 ang reproduction number sa NCR noong September 7 kumpara sa 0.93 noong August 31, nangangahulugang dumami ang infections sa rehiyon.

Sa kabila nito, ikinukunsidera namang mababa ang Average Daily Attack Rate ng NCR  kahit bahagya itong umakyat sa 5.58 per 100,000 population.

Beberipikahin na ng Department of Energy ang sanhi ng forced power outages na naka-apekto sa ilang lugar sa Luzon.

Tiniyak ni Energy secretary Raphael Lotilla sa publiko na i-ba-validate ng team mula sa ahensya ang kondisyon ng mga transmission lines at mga apektadong power plant.

Ayon kay Lotilla, tila ang kakulangan o kawalan ng supply ng krudo ng ilang planta ang sanhi ng forced outages.

Kahapon ay isinailalim ng National Grid Corporation of the Philippines ang Luzon Grid sa “Red alert” mula ala una ng hapon hanggang ala-6 ng gabi at Yellow alert mula alas-10 ng umaga hanggang ala-1 ng hapon at ala-5 ng hapon hanggang alas-9 kagabi.

Ipinagbigay-alam din anya sa kanila ng MERALCO na inabisuhan na nito ang interruptible load program participants sa posibleng manual load dropping.

Isinasailalim sa Yellow alert ang isang lugar kapag bumaba sa ideal level ang supply ng kuryente habang Red alert kung matindi na ang kakulangan sa power supply na maaaring magresulta sa rotating power interruption.

Ikinabahala na ng Land Transportation Office ang lumulobong bilang ng mga kaso ng drunk driving o mga nagmamaneho kahit nakainom ng alak.

Ito’y matapos i-ulat ng Law Enforcement Service-Anti-Drunk and Drugged Driving Enforcement Unit ng LTO na sa 402 car crash incidents na nirespondehan, 353 ang nasa impluwensya ng alak o lasing.

Sa nasabing bilang, mayroong 15 fatalities habang 232 ang injured.

Nagbabala naman ang ahensya sa sinumang mahuhuling nagmamaneho nang nakainom o mahigit .05 percent ng alcohol ay mahaharap sa kasong paglabag sa Republic Act 10856 o Anti-Drunk and Drugged Driving Act of 2013.

Bahagyang bumaba sa 25,292 ang aktibong kaso ng COVID-19 sa bansa kahapon kumpara sa 25,684 noong linggo.

Sa datos ng DOH kahapon, nakapagtala ng 2,038 additional COVID-19 cases kaya’t sumampa na sa 3,908,295 ang kabuuang kaso.

Kabilang na rito ang 3,820,691 recoveries at 62,342 death toll.

Gayunman, ang mga bagong kaso ay mababa sa average number na daily infections simula noong September 5 hanggang 11 na 2,197.

Samantala, nangunguna pa rin ang Metro Manila sa may pinaka-maraming infections sa nakalipas na dalawang linggo na 9,201; sinundan ng CALABARZON, 3,795 at Central Luzon, 2,361.

Aabot sa isang milyon kada taon o nasa anim na milyong housing units sa loob ng anim na taon ang target na ipatayo ng Department of Human Settlement and Urban Development (DHSUD).

Ito ang inihayag ni Housing secretary Jose Rizalino Acuzar sa budget hearing ng house committee on appropriations matapos tanungin ni Valenzuela City 2^nd District Rep. Eric Martinez sa plano ng gobyerno sa malaki pang backlog sa pabahay.

Ayon kay Acuzar, sa 2023 budget ng DHSUD ay kalahating milyong residential units ang planong ipatayo sa National Capital region habang ang iba ay sa iba’t ibang rehiyon.

Hinimok naman ni Martinez ang kagawaran na silipin ang mga ‘idle’ o hindi nagagamit na lote ng gobyerno bilang posibleng pagtayuan ng Socialized Housing Project.

Iminungkahi rin ng Kongresista na i-prayoridad na maging benepisyaryo ng Government Housing Projects ang mga public school teacher, health care worker o medical frontliner, uniformed personnel at iba pang government workers.

Suportado ng OCTA research group ang kautusan ni Pangulong Bongbong Marcos na luwagan ang face mask mandate sa bansa.

Ayon sa OCTA, naniniwala silang dapat pagbatayan ang siyensya sa anumang pagbabago sa polisiya sa pagtiyak sa kaligtasan ng publiko.

Umaasa anya sila na magtatakda ang Marcos Administration ng “set of triggers” para sa muling pagpapatupad ng facemask sa outdoor spaces sakaling magkaroon na naman ng COVID-19 surge.

Kahapon ay nag-issue inilabas ng malakanyang ang Executive Order no. 3 ng Pangulo na nagpapahintulot sa optional use ng facemask sa open spaces at non-crowded outdoor areas na may maayos na ventilation.

Arestado ang isang babae matapos umanong magtangkang mandukot ng bata sa Barangay Old Balara, Quezon City.

Ayon kay QCPD-6 station commander, Lt. Col. Morgan Aguilar, nagpanggap ang babae na dati umanong kasambahay ng pamilya ng limang taong gulang na biktima.

Gayunman, itinanggi anya ng ina ng bata ang pahayag ng suspek.

Batay sa imbestigasyon, pumasok ang babae sa bahay makaraang maiwang bukas ng amain ng bata ang pinto upang bumili ng kape pasado ala-5 ng madaling araw noong linggo.

Naabutan anya ng amain ng bata ang babae kaya’t  isinumbong sa Barangay.

Bagaman inamin ng suspek na nandudukot sila ng mga bata kapalit ng pera, agad namang binawi ng babae ang naturang pahayag.

Nahaharap na sa patong-patong na kaso ang suspek habang inaalam na kung mayroon itong mga kasabwat.

Suportado ng National Telecommunications Commission (NTC) ang pagsasabatas ng National Telecommunications Bill na muling inihain sa 19^th Congress.

Sa gitna ito nang naglipanang mga text scam at spam na pumuputakte sa milyun-milyong mobile phone user sa bansa.

Aminado si NTC deputy commissioner Edgardo Cabarios na malakas ang loob ng mga nasa likod ng text scam dahil hirap ang gobyerno na matunton o ma-trace at maparusahan sila.

Hangga’t wala anyang batas na susugpo sa mga scammer ay asahang lalaganap pa rin ang modus ng mga ito at maraming posibleng ma-biktima.

Aminado si Senate Committees on Public Services and Economic Affairs Chairperson Grace Poe na walang partikular na ahensya ang dapat managot sa naglipanang text scam at spam.

Nilinaw ni Poe na bagaman ang National Telecommunications Commission ang dapat mangasiwa sa mga ganitong uri ng problema, kulang naman sa kapangyarihan at kakayahan ang NTC.

Mahalaga anyang maipasa na ang Sim Card Registration Bill dahil kahit paigtingin ang kampanya laban sa mga scammer, mawawalan naman ng saysay ang pagpupursige ng mga otoridad kung walang pangil ang batas.

Nagkasundo na ang PNP at Chinese Community para sa ikareresolba ng kaso ng kidnapping na karamiha’y may kaugnayan umano sa Philippine Offshore Gaming Operators (POGO) industry.

Kinumpirma ni PNP-Anti-Kidnapping Group Director, Brig. Gen. Rodolfo Castil na nakipag-pulong na sila sa Philippine Federation of Chinese Commerce and Industry, Incorporated (PCCCII).

Naganap ang pulong makaraang ilabas ng PCCCII ang datos na umabot na 56 ang kaso ng kidnapping sa bansa sa nakalipas lamang na 10 araw, bagay na kinokontra ng PNP.

Gayunman, taliwas anya ito sa datos ng PNP-AKG na nakapagtala lamang ng 29 kidnapping cases simula Enero hanggang Setyembre ngayong taon.

Sa nasabing bilang, inihayag ni Castil na 15 ay may kaugnayan sa POGO, 13 ay traditional kidnapping cases at isang may kaugnayan sa casino operation.