Drew Nacino

Tiniyak ng Land Transportation Office at German Information Technology Provider nitong Dermalog na reresolbahin ang mga problemang kinakaharap ng publiko sa pakikipag-transaksyon sa ahensya.

Kabilang sa mga solusyong ilalatag ang Activation ng Motor Vehicle Registration Information System, na pinaniniwalaan ng LTO at Dermalog na makatutulong upang mabawasan ang mahabang pila sa mga LTO office.

Ito’y makaraang ibasura ng Supreme Court ang petisyon ng isang Anti-Corruption Watchdog na humihirit na ipatigil ang implementasyon ng P836 million na kontrata ng LTO sa Dermalog para sa delivery ng mga lisensya.

Ayon kay LTO chief Teofilo Guadiz, suportado nila ang Motor Vehicle Registration Information System sa Public Portal ng Land Transportation Management System para sa renewal ng mga sasakyan upang mabawasan ang mahabang pila.

Sa oras anya na i-activate, maaaring makapag-renew ng mga sasakyan nang hindi na kailangang magtungo sa mga tanggapan ng ahensya sa iba’t ibang panig ng bansa.

Hati ang mga Local Government Unit sa bagong polisiya ng Pamahalaan na luwagan ang paggamit sa face mask sa outdoor settings sa gitna ng COVID-19 pandemic.

Ito ang naobserbahan ng Department of Health sa maagang pagpapatupad ng Executive Order number 3 ni Pangulong Bongbong Marcos na nagpapahintulot sa boluntaryong pagsusuot ng face masks sa pampublikong lugar, maliban sa mga crowded area.

Ayon kay DOH Officer-In-Charge, Undersecretary Maria Rosario Vergeire, sa unang araw pa lamang ng implementasyon ay marami ng mga LGU ang nagtatanong kung maaari na nilang ipatupad ang polisiya.

Mayroon din naman anyang ibang LGU na nais manatili ang umiiral na restriksyon at hindi pa rin papayag na walang face masks ang mga tao, lalo sa labas ng bahay.

Bagaman naglabas ng kautusan, napansin din ng DOH na marami pa rin namang naka-facemask sa mga pampublikong lugar.

Ipinag-utos na ng Sugar Regulatory Administration (SRA) na ilaan ang lahat ng locally produced na asukal ngayong taon at sa taong 2023 para sa domestic consumption.

Alinsunod sa Sugar Order 1, ang 100% ng raw sugar production na naani ngayong taon ay dapat na  i-classify bilang “B” o domestic sugar market.

Ang crop year 2022-2023 ay nagsimula ngayon lamang Setyembre at magtatapos sa Agosto a – 31 ng susunod na taon.

Sa pagtaya ng ahensya, halos 1.9 million metric tons ang domestic raw sugar production para sa 2022-2023 crop year.

Nilagdaan ang sugar order ni Pangulong Ferdinand “Bongbong” Marcos Jr., na kasalukuyang kalihim ng Department of Agriculture.

Lumagda rin sa nasabing kautusan sina Agriculture undersecretary Domingo Panganiban, acting SRA administrator David John Thaddeus Alba, SRA acting board members ma. Mitzi Mangwag at Pablo Luis Azcona.

Pinagpapaliwanag ng National Privacy Commission (NPC) ang ilang websites ng online gambling at cryptocurrency ang kanilang posibleng kaugnayan sa pagkalat ng mga text scam messages sa bansa.

Batay sa imbestigasyon ay idini-diretso ng ilang link at Uniform Resource Locators (URL), na kinabibilangan ng personalized spam messages, ang mga user sa gambling at cryptocurrency sites.

Hindi naman tinukoy ng NPC ang mga website na may direct link sa mga spam messages.

Ayon kay NPC Public Info and Assistance chief Roren Marie Chin, hindi mabatid kung saan gagamitin ang mga personal na impormasyon na nakalap ng mga gambling at cryptocurrency sites.

Gayunman, maaari anyang gamitin ang mga naturang impormasyon upang gumawa ng isa pang account at makakuha ng pera sa mga bank account ng isang partikular na user.

Nakikipag-ugnayan naman ang ahensya sa telecommunication companies at iba pang government agencies, gaya ng National Bureau of Investigation para sa “Intelligence Sharing” upang maresolba ang problema sa scam messages.

Sakaling mapatunayan na may kaugnayan sa paglipana ng text scams, mahaharap sa kasong paglabag sa Section 25 ng Data Privacy Act o Unauthorized Processing ang mga administrator ng website, pagmumultahin ng hanggang P5 million at makukulong ng hanggang tatlong taon.

Dismayado na ang mga transport group sa mabagal na pagproseso ng rehistro ng sasakyan at pag-renew ng lisensya sa Land Transportation Office dahil umano sa kapalpakan ng dayuhang information technology provider ng ahensya.

Inihayag ni Liga ng Transportasyon at Operaytor sa Pilipinas (LTOP) National president Orlando “Ka Lando” Marquez na apektado na ang sektor ng transportasyon sa mala-usad pagong na pag-poproseso ng lisensya at rehistro.

Sa isang press conference kahapon, iginiit ni Ka-Lando na damay na rin sa makupad na sistema ng I.T. provider ng LTO na Dermalog ang kabuhayan ng mga tsuper na namamasada.

Ganito rin ang sentimyento ng Pangkalahatang Sanggunian Manila at Suburbs Drivers Association (PASANG-MASDA), Alliance of Transport Operators and Drivers Asssociation of the Philippines, PISTON, Alliance of Concerned Transport Organization at Federation of Jeepney Operators and Drivers Association of the Philippines.

Nanawagan naman si PASANG-MASDA National president Roberto “Ka Obet” Martin kay Pangulong Ferdinand “bongbong” Marcos Jr., na makialam na sa problema sa LTO dahil ang publiko ang lubos na nahihirapan.

Dahil din anila sa pagbagal ng Land Transportation Management System, hindi maiiwasang magpabalik-balik ang mga tsuper para lang makumpleto ang kanilang transaksyon pero ang kapalit naman nito ay ang ilang araw na walang kita.

Magugunitang ikinadismaya rin ng bagong talagang si LTO assistant secretary, Atty. Teofilo Guadiz III ang makupad na pagproseso ng drivers license sa mga tanggapan ng ahensya na pinamamahalaan ng German IT provider na Dermalog.

Positibo ang Department of Tourism na makatutulong sa industriya ng turismo na makabangon mula sa COVID-19 pandemic ang pagluluwag sa face mask policy sa outdoor settings.

Ayon kay DOT secretary Christina Frasco, batay sa mga datos ng ibang bansa ay nakatutulong sa mabilis na recovery ng ekonomiya ang pagluluwag ng health protocols.

Kabilang na anya rito ang pagdami ng mga turistang dumarating.

Kampante si Frasco na makahahabol ang Pilipinas sa Economic Recovery sa ASEAN region dahil ang nasabing polisiya ang paraan upang maibalik ang kumpiyansa sa sektor ng turismo, partikular sa pagbiyahe.

Nitong Lunes, inanunsyo ng Malacañang na aprubado na ni Pangulong Bongbong Marcos ang Executive Order 3 na nagpapahintulot sa boluntaryong pagsusuot ng face mask sa outdoor spaces.

Ibinasura ng Supreme Court ang petisyon ng isang Anti-Corruption Watchdog kontra sa pagpapatupad ng P836 million peso contract ng Land Transportation Office sa isang German Technology Company para sa delivery ng mga lisensya.

Ang nasabing petisyon ay inihain ng Anti-Trapo Movement upang ipatigil ang 2017 deal ng LTO sa Dermalog para sa pagbili ng mahigit walong milyong plastic license cards na mayroong five-year validity.

Sa 25 pahinang desisyon matapos ang promulgasyon, inihayag ng S.C. na ang kawalan ng legal standing ng petitioner na dumulog sa Korte ang  dahilan nang pagkakabasura ng petisyon.

Ipinunto ng Korte Suprema na nabigo rin ang petitioner na patunayan na binaliwala ng LTO ang constitutional at statutory prohibitions sa pag-award sa kontrata sa Dermalog.

Nag-ugat ang kaso sa 2017 deal sa pagitan ng LTO at private firms na NEXTIX, Dermalog Identification Systems at CFP strategic transaction advisors para sa pagbili ng plastic license cards.

Kinuwestyon ng Anti-Trapo Movement ang kontrata sa S.C. at iginiit na nilabag ng ahensya ang umiiral na Procurement Laws pero ipinunto ng Korte Suprema na walang Grave Abuse of Discretion sa panig ng LTO nang i-award nito ang kontrata.

Ang Dermalog ang kasalukuyang information technology system provider ng LTO.

Ang nasabing kumpanya ang sinisi ng ilang LTO official sa pagkaka-delay ng renewal ng mga lisensya bunsod ng mga aberya at nagdulot ng kaliwa’t kanang perwisyo sa mga vehicle owners.

Himalang nakaligtas ang isang lalaki matapos magtangka umanong magpakamatay sa Quezon City.

Tumalon mula sa ikatlong palapag ng SM Fairview sa Quirino Highway ang hindi pinangalanang lalaki at bumagsak sa mga kutson na naka-display sa ground floor.

Ayon sa National Capital Region Police Office, isa sa mga rumorondang security guard ang naka-saksi sa nasabing insidente.

Napansin ng ilang guwardya na tila wala sa sarili ang lalaki bago ito tumalon.

Walang kahit anong galos ang lalaki at nasa maayos nang kondisyon makaraang bumagsak sa apat na patong ng kutson.

Agad namang itinurn-over ang lalaki sa pamilya nito at posibleng isailalim sa psycho-social intervention.

Pabor ang Department of Health na luwagan na ang face mask mandate para sa mga non-vulnerable sector at low-risk settings.

Inihayag ni DOH Officer-In-Charge Maria Rosario Vergeire sa Budget Briefing ng ahensya sa House Appropriations Committee, na nagpasya sila base sa anunsyo ng World Health Organization na maaari nang tumutok ang face mask mandate sa vulnerable sector.

Nilinaw ni Vergeire na hindi saklaw ng “Optional” na pagsusuot ng face mask ang mga senior citizen, mga may commorbidity, bata, sa mga sumasakay sa mga pampublikong transportasyon at mga crowded area.

Iginiit ng DOH official na walang anumang magiging kompromiso sa pagsusuot ng face masks pero hindi naman idinetalye kung kailan magiging epektibo ang nasabing polisiya.

Samantala, binigyang-diin ni Vergeire na ang pagluluwag sa face mask policy ay hindi nangangahulugang tapos na ang Covid-19 pandemic.

Nakikipag-ugnayan na ang Department of Health sa dalawang monkeypox vaccine manufacturers.

Ayon kay DOH Officer-In-Charge, Undersecretary Maria Rosario Vergeire, isa sa mga bakuna ay hindi maaaring iturok sa mga may comorbidity.

Ang isa namang bakuna ay mas mahal o nagkakahalaga ng 210 dollars ang kada dose nito pero sa unang quarter pa ng susunod na taon maaaring simulang i-deliver sa bansa.

Sa kanyang pagharap sa deliberation para sa 2023 budget ng DOH sa House Committee on Appropriations, inamin ni Vergeire na tinitimbang nila kung may pangangailangan bang bumili ng mga bakuna.

Sa ngayon anya ay hindi pa rin matukoy kung pawang mga local case ba ang apat na tinamaan ng nasabing virus dahil hindi pa rin malinaw ang case history ng monkeypox sa bansa.