Drew Nacino

Kinuwestyun ni Senator Grace Poe ang tila news blackout sa serye ng kidnapping sa bansa.

Ayon kay Poe, nakababahala na mistulang mga otoridad ang nagpapatupad ng news blackout.

Iginiit ng senador na sa gitna ng takot at pangamba ng publiko sa mga report ng umano’y pagdukot, tila walang naririnig na opisyal at beripikadong impormasyon mula sa PNP.

Dapat anyang beripikahin ng pambansang pulisya maging ng NBI ang mga napapabalitang kaso ng kidnapping.

Aalamin ni Poe sa PNP sa pagdinig ng Senado ngayong araw kung bakit nagkaroon ng news blackout.

Ipinunto ng mambabatas na hindi dapat baliwalain ng PNP ang mga report mula sa mga concerned citizen at mga organisasyon dahil maaaring ang mga dinudukot ay gagamitin sa mas matinding krimen, tulad ng prostitution at human trafficking.

Nakatakdang imbestigahan ng Committee on Public Order and Dangerous Drugs na pinamumunuan ni Senator Ronald Dela Rosa ang umano’y serye ng kidnapping sa bansa. — Sa ulat ni Cely Ortega-Bueno (Patrol 19)

Inilunsad na sa isang barangay sa Tanza, Cavite ang rice for mosquito program.

Sa ilalim ng programa, bibigyan ng isang kilong bigas ang mga makahuhuli o makakapatay ng isang platong lamok sa barangay Sanja Mayor.

Layunin nitong matugunan ang dumaraming kaso ng dengue sa bayan na kasalukuyang nasa ilalim ng state of calamity dahil sa outbreak ng nasabing sakit.

Ayon kay Barangay Chairman Peter Aricayos, kailangan gumamit ang mga residente ng plastik na plato na papahiran ng mantika o langis at i-wawasiwas o ihahampas sa makikitang lamok.

Wala naman anyang itinakdang bilang kung ilang lamok ang kailangang dumikit sa plato.

Nasa sampung kabang bigas ang inilaan ng barangay para sa naturang programa na magtatagal hanggang Setyembre a – trenta.

Puspusan din ang malawakang paglilinis sa lgu ng Tanza upang puksain ang mga posibleng pinamumugaran ng lamok.

Tinatayang P8 million naman ang inilabas na pondo mula sa quick response program ng Municipal Disaster Risk Reduction and Management Fund bilang tugon sa dengue outbreak.

Binuksan na ng DSWD ang online registration at licensing ng Social Welfare and Development Agencies (SWDA) at accreditation ng Social Welfare Development Programs at Services.

Bunsod ito ng muling paglulunsad ng pinaigting at pinahusay na DSWD regulatory e-services.

Kailangang magsumite ng kanilang aplikasyon ang mga SWDA kabilang na ang documentary requirements at makatanggap ng real-time updates sa aplikasyon.

Kabilang din ang data validations upang matiyak na mas kaunti lamang ang human error at tanging mga accurate information ang nakaimbak.

Personal namang sinaksihan ni DSWD Secretary Erwin Tulfo ang aktuwal na online process ng registration ng SWDA account upang makita kung paano gumana ang platform.

Ang swdas at iba pang service providers ay maaaring magrehistro sa pamamagitan ng regulatory.dswd.gov.ph.

Tila “undecided” pa si Pangulong Ferdinand “Bongbong” Marcos Jr., kung ibabalik o hindi ang parusang kamatayan.

Sa isang taped interview na ipinalabas sa kanyang 65^th birthday kahapon, inamin ni Pangulong Marcos na isang mabigat na issue ang death penalty dahil mayroong practical at moral issue na bumabalot dito.

Isa anya sa mga dapat mabatid ay kung may karapatan ba ang lipunan na kumitil ng sarili nitong mamamayan.

Ayon kay PBBM, dapat ding maglabas ng datos hindi lamang sa Pilipinas kundi maging sa ibang bansa, na napipigilan ng death penalty ang sinuman na gumawa ng mga karumal-dumal na krimen.

Sa issue naman ng War on Drugs, nilinaw ng Pangulo na nais muna niyang ma-plantsa ang lahat ng polisiya kaya’t hindi niya masyadong binabanggit ang issue sa publiko.

Naniniwala ang punong ehekutibo na bagaman isang internal matter ang War on Drugs, magpapatuloy ito pero sa iba at bagong paraan bagay na binabalangkas pa ng kanyang administrasyon.

Pabor si Health Reform Advocate at dating Philippine College of Physician President, Dr. Tony Leachon sa hirit ng Department of Health na patawan ng dagdag-buwis o isama sa sin tax law ang mga junk food at matatamis na inumin.

Ayon kay Leachon, dapat munang tukuyin ang mga partikular na junk food at sweetened beverages na dapat patawan ng additional tax upang mapataas ang revenue na gagamitin naman sa Universal Health Care Program.

Kailangan anya ng DOH ang tulong ng Pangulo, mga mambabatas at private sector dahil tiyak na maraming malaking kumpanya ang aalma.

Gayunman, naniniwala rin si Leachon na mahabang panahon ang gugugulin sa pagpapatupad ng dagdag-buwis sa mga nasabing produkto gaya ng sinapit ng Sin Tax at hindi pa ito napapanahon dahil may mga dapat ikunsidera, tulad ng epekto sa ekonomiya ng inflation.

Hindi umano patas at maraming butas ang inilabas na Committee report ng Senate Blue Ribbon sa Sugar importation fiasco.

Ito ang inihayag nina Senate Minority Leader Koko Pimentel at Deputy Minority Leader Risa Hontiveros makaraang ilabas ang kanilang sariling report.

Nakasaad sa kanilang report na walang sapat na factual at legal basis upang kasuhan ng kriminal at administratibo ang mga lumagda sa kontrobersyal na Sugar order number 4.

Ito ay sina Suspended Agriculture Undersecretary Leocadio Sebastian, dating Sugar Regulatory Administration Administrator Hermenegildo Serafica at SRA board members, Atty. Roland Beltran at Gerardo Valderrama.

Ayon kay Pimentel, maging ang direktiba sa Bureau of Immigration na ilagay sa “Look out Bulletin sina Sebastian ay wala ring factual at ligal na batayan.

Tinukoy sa kanilang Committee report na ‘In good faith’ ang paglagda nina Sebastian sa S.O 4 bunsod na rin ng memorandum na nagbibigay kapangyarihan kay Sebastian na lumagda sa ngalan ng Pangulo.

Para anya makasuhan ng paglabag sa Anti-Graft and Corrupt Practices Act at Anti-Agricultural Smuggling Act, kailangang napatunayan sa imbestigasyon na ‘In bad faith’ ang ginawa ng mga opisyal.

Samantala, kinuwestyun naman ni Hontiveros ang pananahimik ng Kumite sa accountability ni Executive secreary Vic Rodriguez.

Nakalulungkot anya na bigo o sadyang iniwasan ng Blue Ribbon na talakayin ang naging papel ni Rodriguez sa kontrobersya gayong malinaw naman na agad na-i-communicate sa Palace official ang pag-iisyu ng Sugar order 4.  —ulat mula kay Cely Ortega Bueno (Patrol 19)

Aprubado na sa ikalawang pagbasa sa Kamara ang House Bill 4673, na layuning ipagpaliban sa Disyembre ang Barangay at Sangguniang Kabataan Elections.

Isinumite ang Bill at Committee Report 33 nito sa plenary session para sa deliberasyon.

Layunin ng panukala na itakda sa unang Lunes ng December 2023 ang nasabing halalan sa halip na sa Disyembre a– 5 ngayong taon.

Ito’y upang lubusang makapaghandaan ng Comelec at Local Government Units at magpatupad ng corrective adjustments sa honoraria ng poll workers.

Nakasaad din sa Bill, na dapat magsimula sa tanghali ng January 1 ang termino ng mga mahahalal na Barangay at SK officials sa December 2023.  —ulat mula kay Tina Nolasco (Patrol 11)

Hindi pa napapanahon na gawing Optional ang pagsusuot ng face mask sa indoor spaces.

Binigyang-diin ito ni DOH OIC, Undersecretary Maria Rosario Vergeire sa gitna ng inilabas na Executive Order 3 ni Pangulong Bongbong Marcos na nagpahintulot na gawin na lamang boluntaryo ang pagsusuot ng face mask sa outdoor areas.

Ayon kay Vergeire, hindi nila inirerekomenda sa publiko na magtanggal ng face mask sa mga indoor space o mga crowded area.

Marami na anyang scientific evidence na malaki ang posibilidad nang hawaan ng sakit, tulad ng COVID-19 sa mga siksikang lugar.

Hinimok naman ni Vergeire ang mga vulnerable individual, partikular ang mga hindi pa bakunado kontra COVID-19, senior citizen at immunocompromised na magsuot pa rin ng face mask.

Ibinabala rin ng DOH official kahit nasa open spaces ay “Advisable” lamang ang paghuhubad ng face mask sa low-risk setting na may low-risk individuals.

Nanganganib maulit ang kakapusan ng reserbang kuryente sa Luzon grid na maaaring mauwi sa malawakang brownout.

Babala ito ng National Grid Corporation of the Philippines (NGCP) matapos isailalim sa yellow at red alert ang Luzon grid noong Lunes dahil sa kakulangan ng power reserve sa gitna ng lumalaking demand.

Ayon kay NGCP spokesperson Cynthia Alabanza, sintomas ng mas malaking problema ang nangyari noong Lunes.

Hindi naman anya kalakihan ang pa-sobrang supply ng kuryente na kapag may pumalyang malaking planta ay yellow o red alert na agad ang resulta.

Simula 2017 ay wala pang 1,000 megawatts ang nadagdag sa reserba kada taon sa ilalim ng Duterte Administration na maliit kumpara sa lumalaking demand dahil sa paglago ng ekonomiya.

Binigyang-diin ni Alabanza na batay sa mga pag-aaral ay dapat 1,800 megawatts ang power reserves na idaragdag sa grid kada taon upang sumabay sa lumalaking demand subalit hindi naman umaabot ng 1,000 megawatts kada taon.

Sang-ayon naman ang Department of Energy kaya’t dapat na umanong mangontrata ang mga distribution utilities, kooperatiba at NGCP upang may mga magtayo ng mga planta.

Pero para sa NGCP na hindi naman ganoon kadali ang pagtatayo ng mga planta dahil aabutin ng hanggang limang taon bago maging operational o itayo ang mga ito.

Mas malaking problema ang maaaring kaharapin sa patuloy na pagnipis ng power reserves sa Luzon grid.

Ito ang pangamba ng National Grid Corporation of the Philippines matapos isailalim sa yellow at red alert ang Luzon grid dahil sa kakulangan ng power reserve sa gitna ng lumalaking demand.

Ayon kay NGCP spokesperson, Atty. Cynthia Alabanza, dapat tutukan ng gobyerno at stakeholders ang mga hakbang upang mas maging matatag ang buong power system ng bansa.

Bilang bahagi anya ng ordinaryong operasyon, may mga pagkakataong papalpak ang mga power plant maging ang distribution grid.

Sa katunayan, aminado si Alabanza na may ilang planta na ang kasalukuyang naka-forced outage o unplanned maintenance schedule.

Noong Lunes lumagpak sa 10,727 megawatts ang power reserves kaya’t kinapos para sa peak demand na 10,585 megawatts.