Patay ang isang Person Deprived of Liberty habang dalawang iba pa ang sugatan kasunod ng nangyaring pananaksak sa maximum security compound sa New Bilibid Prison.
Nangyari ang insidente sa Gate 1-A, Quadrant 4 ng compound kahapon ng umaga.
Hindi naman tinukoy ng Bureau of Corrections ang pagkakakilanlan ng pdl na sangkot sa insidente.
Patuloy naman ang isinasagawang imbestigasyon at ipinag-utos na rin ng BUCOR ang paghihigpit para sa seguridad ng PDLs at mga staff.
Epektibo na ngayong buwan ang mas mataas na kontribusyon sa Social Security System.
Ayon sa SSS, ito’y alinsunod sa social security act of 2018 na nilagdaan ni dating pangulong Rodrigo Duterte.
Dahil dito, nasa 15% na ang monthly contribution rate ng mga miyembro na nasa pribadong sektor.
Saklaw nito ang mga business employer at kanilang empleyado, household employer at mga kasambahay, gayundin ang mga self-employed, voluntary at mga land-based OFW members.
Kasado na sa Enero 7 ang full cabinet meeting na pangungunahan mismo ni Pangulong Ferdinand Marcos Jr.
Ayon kay Presidential Communications Office Acting Secretary Cesar Chavez, kabilang sa mga tatalakayin sa pulong ang mga legacy project, gaya ng big-ticket programs at official development assistance-funded projects.
Kabilang sa legacy projects ni PBBM ang pagkakaroon ng specialty hospitals na layong pangalagaan ang kalusugan ng bawat Pilipino.
Kasama rin dito ang housing o murang-pabahay para sa mahihirap, at food self-sufficiency.
Isa naman sa ongoing big-ticket projects ng pamahalaan ang ‘integrated disaster risk reduction and climate change adaptation project,’ na layong maibsan ang pagbaha sa low-lying areas ng pampanga.
Samantala, nagkaroon naman ng ‘comparing of notes’ sina PBBM at Executive Secretary Lucas Bersamin, bilang paghahanda sa kauna-unahang full cabinet meeting ng administrasyon ngayong taon.
Noong nakaraang taon, nagkaroon ng dalawang full cabinet meetings si PBBM, dalawa ring special cabinet meetings at apatnaput siyam na sectoral cabinet meetings. – mula sa ulat ni Gilbert Perdez (Patrol 13)
Hindi pa umano naipatutupad nang maayos ang Solo Parent Law o ang Republic Act no. 11861 kaya hindi pa rin nararamdaman ang mga benepisyo nito.
Ito ang ibinahagi ni ACT-CIS Partylist Rep. Erwin Tulfo, nang matanong hinggil sa benepisyo para sa mga solo parents na umaabot sa 15 million ang bilang sa Pilipinas, batay na rin sa World Health Organization ngunit kalahati lamang dito ang nasa poverty line.
Aniya, sa ilalim ng Expanded Solo Parent Act of 2022, dapat may monthly allowance na 1,000 ang mga indigent single parents at diskwento sa mga certain grocery items.
Ayon pa sa House Deputy Majority Leader, pati ang discounts sa grocery items ng mga solo parents ay hindi pa rin naipapatupad.
Kaya iminungkahi ng kongresista na baguhin o amyendahan ang batas at kunin na lang sa national government ang pondo para sa pagbibigay ng allowance sa mga indigent solo parents.
Inaagnas na nang matagpuan ang bangkay ng isang Pinay Overseas Filipino Worker sa Kuwait.
Nakita sa bakuran ng kanyang amo ang bangkay ng nasabing pinay na dalawang buwan nang nawawala.
Ayon kay Foreign Affairs Undersecretary Eduardo De Vega, nasa “advanced state of decomposition” na ang bangkay.
Mismo aniyang kapatid ng suspek ang nag-report na nawawala ang biktima.
Nadakip at nakakulong na ngayon ang suspek na napag-alamang dati nang may criminal record.
Kinumpirma ng Office of Civil Defense na tatlong indibidwal ang namatay sa magkakasunod na epekto ng shear line at Intertropical Convergence Zone sa ilang bahagi ng bansa noong Disyembre.
Ayon kay OCD Undersecretary Ariel Nepomuceno, maliban sa mga nasawi, mayroon ding dalawang nawawala.
Sinabi naman ng National Disaster Risk Reduction and Management Council na ang mga pag-ulang dala ng ITCZ ay nagdulot ng pagbaha at landslides sa ilang bahagi ng Davao Occidental, Davao Del Sur, at Davao Oriental noong December 26, 2024.
Aabot sa mahigit 16,000 pamilya ang naapektuhan ng ITCZ at mahigit 1,000 bahay ang napinsala.
Kaugnay nito, sinabi ni Usec. Nepomuceno na patuloy na makikipag-ugnayan ang mga otoridad sa pagasa upang paigtingin ang mga paghahanda sa epekto ng shear line at ITCZ.
Pumalo na sa 534 ang kabuuang bilang ng firecracker-related injuries na naitala ng Department of Health.
Batay sa datos ng kagawaran, ang nasabing bilang ay mas mababa ng 9.8% kumpara sa 592 cases na naitala noong nakalipas na taon.
Pawang edad 19-anyos pababa ang nasa 322 biktima habang mahigit 200 naman ang edad 20 pataas, na karamihan ay lalaki.
Ayon pa sa DOH, ang kwitis na ang nangungunang dahilan ng firecracker injuries, na sinundan ng boga, mga hindi kilalang paputok, 5-star at whistle bomb.
Plano ng Department of Agriculture na pababain pa ang presyo ng mga ibinebentang bigas sa ilalim ng ‘rice for all’ program nito.
Ayon kay Agricuture Assistant Secretary at spokesman Arnel De Mesa, target nilang pababain pa ito sa 38 hanggang 39 pesos kada kilo.
Sa ngayon, nasa 40 pesos per kilo ang well-milled rice na ibinebenta sa ilang Kadiwa ng Pangulo Centers sa Metro Manila.
Samantala, sinabi pa ni Asec. De Mesa na ilulunsad na rin ngayong buwan ang Sulit Rice at Nutri Rice Programs ng pamahalaan.
Kaugnay nito, tiniyak ng opisyal na maganda pa rin ang kalidad ng ‘Sulit Rice’ na tinatawag din na 100% broken rice, na nasa 35 hanggang 36 pesos kada kilo.
Nasa 37 hanggang 38 pesos naman ang Nutri Rice na nasa pagitan ng well milled at brown rice, na siksik aniya ng sustansya.
Ang isang babae na hinahanap ang kaniyang tunay na pamilya, literal na natagpuan ito sa kaniyang mga kaibigan!
Ang buong kwento, alamin.
Sa isang pambihirang pagkakataon, natagpuan ng trentay sais anyos na si Cassandra Madison ang kaniyang mga kapatid na siyang nagsimula lamang sa isang haka-haka.
Habang nagtatrabaho sa isang restaurant sa Connecticut noong 2013 ay nakilala ni Cassandra ang kaniyang naging matalik na kaibigan na si Julia Tinetti.
Makalipas ang ilang taon ng pagkakaibigan, 2021 nang nadiskubre ng dalawa na sila pala ay siblings by blood! Hindi rin naman maipagkakaila ang koneksyon ni Cassandra at Julia dahil sa malaking pagkakahawig nilang dalawa.
Pero hindi pa riyan nagtatapos ang journey ni Cassandra sa paghahanap sa kaniyang pamilya dahil makalipas ang ilang taon, kamakailan lang ay napag-alaman ng dalawa na mayroon pa pala silang kapatid na lalaki!
Sa isa nga namang mapaglarong tadhana, ito pala ay ang lalaki na nakilala ni Cassandra noong siya ay elementary pa lamang na si Thomas Buonaguirio na kaniya ring naging childhood friend!
Ang tatlo pala ay pare-parehong adopted mula sa Dominican Republic, ngunit ayon kay Madison ay hindi raw nag-match ang kani-kanilang adoption papers.
Ngunit makalipas ang ilang taon ay nakilala na rin ni Cassandra ang kaniyang tunay na ama na si Adriano Luna at doon nakumpirma na tunay nga silang magkapatid ni Julia.
Samantala, matapos magkaroon ng panandaliang pagkalito sa pagitan ng mag-aama dahil ayon kay Adriano ay wala siyang pinaampon na baby boy.
Pero matapos alalahanin ang kanilang nakaraan at pagtagpi-tagpiin ang kwento, sinabi ng magkapatid na panandaliang naghiwalay ang kanilang mga magulang at nagibangbayan kung saan niya ipinanganak si Thomas.
Gayunpaman, ayon kay Julia ay hindi rin daw malinaw sa kanila ang lahat dahil hindi pa nasasagot ang lahat ng mga tanong nila.
Ikaw, anong masasabi mo sa pambihirang kwento na ito?
Ibinida ng pamahalaan ang malawak na suporta para sa mga Micro, Small, and Medium Enterprises (MSMEs) at start-up companies sa bansa.
Ayon kay Department of Science and Technology Secretary Renato Solidum Jr., kasalukuyang tumutulong ang 91 technology business incubation hubs para sa pagpapaunlad ng mga negosyo.
Aniya, ang naturang mga hub ay pinopondohan ng dost sa loob ng dalawang taon bilang suporta sa mga state universities and colleges at private higher education institutions sa pagsulong ng mga innovation.
Dagdag pa ni Solidum, na may mga start-up grants ang ahensya upang suportahan ang mga teknolohiyang ginagamit ng mga start-up company kung saan, isa aniya sa mga tampok na proyekto ngayong taon ay ang paggamit ng artificial intelligence (AI) sa mga sari-sari stores.
Makatutulong aniya ang isang start-up na gumagamit ng AI upang mas mapaganda pa ang operasyon ng mga sari-sari store.