Para kay Philippine Amalgamated Supermarkets Association President Steven Cua,mas mararamdaman ng mga manggagawang Pilipino ang dagdag-sahod kung pagaanin ang gastusin ng mga mamamayan upang mas maramdaman ang benepisyo ng dagdag-sahod.
Ayon kay Cua, dapat pagtuunan ng gobyerno ang pagpapababa ng presyo ng mga pangunahing pangangailangan tulad ng pagkain, gayundin ang gastusin sa edukasyon at pagpapagamot.
Aniya, kung mas mababa ang halaga ng mga pangunahing bilihin at serbisyo, mas magiging kapaki-pakinabang ang umento sa sahod para sa mga manggagawa.
Samantala, hinikayat din ni Cua ang mga manggagawa na maging responsable sa paggastos ng kanilang kita.
Giit niya, kung mapupunta lamang sa sugal, bisyo o labis na pag-inom ng alak ang dagdag na sahod, hindi rin ito mapakikinabangan ng pamilya ng isang wage earner.
