Pumalo sa record-high na P16.09 trillion pesos ang utang ng pilipinas sa pagtatapos ng November 2024.
Ayon sa Bureau of Treasury, mas mataas ito ng 0.4% o P70.7 billion pesos kumpara sa national debt noong Oktubre.
Ito’y dahil sa net financing at epekto ng paghina ng piso.
Sa kabuuang utang, P10.92 trillion pesos ang domestic debt, habang umabot naman sa P5.17 trillion pesos ang external obligations o perang inutang sa ibang bansa.
Tinalakay sa kauna-unahang full cabinet meeting ng admninistrasyong Marcos ngayong taon ang 16 na flagship projects o malalaking proyektong pang-imprastraktura sa ilalim ng Department of Transportation.
Sa press briefing sa Malacañang, sinabi ni Transportation Secretary Jaime Bautista na kabilang sa mga proyektong kailangang maipatupad bago matapos ang termino ni Pangulong Ferdinand Marcos Jr., ang North-South Commuter Railway Project na magsisimula sa Clark International Airport hanggang Calamba, Laguna.
Ayon pa sa Kalihim, kabilang din sa mga proyektong ito ang MRT-4 at MRT-7;
Gayundin ang LRT line 1 extension project; Cebu International Container Port Terminal, PNR South Long-Haul Project, at Mindanao Railway Project.
Aminado naman si Sec. Bautista na may mga hamon silang kinakaharap sa ibang mga proyekto kaya naantala ang pagpapatupad nito.
Sa kabila nito, tiniyak ng Kalihim na nagpapatupad na sila ng mga hakbang para makausad ang mga nasabing proyekto at matiyak na maipatutupad ang mga ito bago matapos ang termino ni Pangulong Marcos. – Mula sa ulat ni Giblert Perdez (Patrol 13)
Normal ang magkaroon ng mga aberya o hindi inaasahang pangyayari sa mga okasyon na labis na pinaghahandaan katulad na lang ng kasal. Pero sa China, ang groom na mismo ang gumawa ng eksena na siyang ikinawindang ng mga bisita!
Ang buong kwento, alamin.
Sa isang video na in-upload sa social media, makikita ang bride at groom na naglalakad sa aisle patungo sa isang stage habang ang mga bisita ay nagsisigawan at nagpapalakpakan sa saya.
Unti-unting nanahimik ang mga bisita at sabay-sabay na tumutok sa isang malaking screen sa stage kabilang na ang ikinakasal.
Hindi nagtagal ay napalitan ng gulat at pagkadismaya ang boses ng mga tao dahil sa hindi inaasahang nasaksihan na video.
Matapos noon ay tinulak ng groom ang bride kung kaya napaatras ito at ibinato sa lalaki ang hawak na bouquet.
Kung bakit ganoon na lang ang panggagalaiti ng groom? Iyon ay dahil nabuking nito na nangangaliwa pala ang kaniyang bride at ang masaklap pa ay ang sariling brother-in-law pala nito ang kalaguyo!
Ang nasabing video na napanood ng mga bisita sa kasal ay ang sensitibong video ng bride kasama ang kaniyang brother-in-law!
Ayon sa ulat, aksidente lamang na nadiskubre ng groom ang pangangaliwa ng bride sa pamamagitan ng camera na inilagay niya sa kanilang bahay.
Dahil dito, naisipan ng groom na ibulgar ang tinatagong sikreto ng babae sa araw mismo ng kanilang kasal upang masiguro na malalaman ng kanilang mga pamilya at kaibigan ang kasalanang ginagawa nito.
Matagumpay man na nagawa ng groom ang plano, nakatanggap pa rin ito ng mga negatibong komento mula sa mga netizen katulad ng isang nagsabi na sana ay nakipaghiwalay na lang ang lalaki sa halip na nagsayang ng libu-libong pera sa kasal.
Ikaw, ano ang gagawin mo kung ikaw ang malagay sa sitwasyon ng groom?
Hindi na lingid sa kaalaman ng karamihan na ang fashion ay pabago-bago at patuloy na nagiging modern. Pero sino nga ba ang mag-iisip na aabot sa punto na pati ang bubble wrap ay maaari na ring isuot ng mga tao?
Kung saan ito matatagpuan, alamin.
Sa isang video na pinost ng uploader na nagngangalang Yana Vansovich, na-feature ang panibago at kakaibang klase ng mga damit sa boutique na ZNWR na binansagang “Balenciaga of Belarus” na hindi maipagkakailang agaw pansin dahil maihahalintulad ito sa isang bubble wrap.
Sa video, makikita ang tila tipikal na bubble wraps na ginagamit para ipambalot sa mga fragile products, ngunit ang kaibahan nga lang ay korte itong bistida at coat na maaaring isuot ng isang tao.
Maririnig sa video na pabirong inalok ni Yana sa mga babaeng viewer na naghahanap ng dress ang nasabing bubble wrap dress na kaniyang nakita sa Minsk Dana Mall sa Belarus.
Mayroong pang mga nagsabi na ang mga damit na ito ay maaaring gamiting “anti-stress” dahil puwede itong putukin katulad ng ginagawa sa mga normal na bubble warp.
Pero huwag iismolin ang bubble wrap dress at jacket na ito dahil limited lang ito at nagkakahalaga ng 280 at 380 Belarussian Rubles na katumbas ng 5,000 pesos at mahigit 6 thousand Pesos.
At dahil sa kakaibang fashion statement kung kaya’t ayon sa social media account ng ZNWR, mabilis na na-sold out ang bubble wrap jacket.
Ikaw, gugustuhin mo bang suotin ang bubble wrap dress na ito?
Kasalukuyan nang pinoproseso ng department of foreign Affairs at Philippine Embassy sa Abu Dhabi ang mga documentary at administrative requirements para sa agarang pagpapauwi sa mahigit 200 Pilipino na ginawaran ng pardon sa United Arab Emirates.
Batay sa anunsyo ng DFA, umabot sa 220 pinoy ang napalaya matapos silang mabigyan ng pardon bilang bahagi ng pagdiriwang ng ika-53 taong National Day ng UAE.
Binigyang diin ng ahensya, na ito ay resulta ng direktang pakikipag-usap ni Pangulong Ferdinand Marcos Jr., kay his Excellency Sheikh Mohammed Bin Zayed Al Nahyan noong Nobyembre nang nakaraang taon.
Nabatid na ang mga napalayang Pinoy ay nahaharap sa iba’t ibang kaso sa nasabing bansa.
Matatandaang noong June 2024, nasa 143 Pilipino rin ang nabigyan ng pardon kasabay ng pagdiriwang ng Eid Al-Adha. -Mula sa ulat ni Gilbert Perdez (Patrol 13)
Isang kakaibang innovation ang ginawa ng mga miyembro ng Faculty of Engineering sa University Of Santo Tomas.
Ito ay ang pagpapakilala sa isang robot na malaki ang maitutulong sa mga ospital.
Kung paano ito nagsimula, alamin.
Muling sinubok ang Pilipinas nang tuluyang pumutok ang COVID-19 pandemic sa Pilipinas noong taong 2020, kaparehong panahon kung kailan nagsimulang i-develop ng project team leader na si Anthony James Bautista at ng kaniyang team ang robot na si Lisa.
Ang pangalang Lisa ay hango sa Logistics Indoor Service Assistant.
May kakayahang itong humalili sa mga healthcare worker sa pamamagitan ng pagbibigay ng minor assistance katulad ng paghahatid ng mga kagamitan kabilang na ang medical supplies, mga dokumento, at may kakayahan din na magsagawa ng remote consultation sa mga pasyente sa pamamagitan ng tablet na nakakabit dito.
Bukod pa riyan, gumagamit din ito ng Lidar sensor na siyang dahilan para matukoy ng robot ang mga direksyon at pasilidad na binabaybay niya sa loob ng ospital.
Ayon kay Dr. Bautista, ginawa nila ang robot para magsilbi itong means of communication sa mga doktor at mga pasyente, ngunit nabago ito at naging alinsunod na sa pangangailangan ng mga ospital.
Samantala, sa tulong ng pondo mula sa Department of Science and Technology-Philippine Council for Health and Research Development, naging posible at matagumpay ang nasabing proyekto.
Ikaw, may naiisip ka rin bang bagong innovation na makakatulong sa mga manggagawang Pilipino?
Pinawi ng Department of Health, ang pangamba ng publiko kaugnay sa sinasabing bagong virus na kumakalat sa China.
Sa eksklusibong panayam ng DWIZ, sinabi ni Health Asec. Albert Domingo, na maraming disease concerns ang nagaganap sa buong mundo na hindi aniya nakararating o nairereport sa departamento.
Ayon sa opisyal, hindi dapat seryosohin at katakutan ang kumakalat na balita dahil normal lang aniya na may naitatalang iba’t ibang sakit lalo na sa malamig na panahon.
Aniya, maliban sa MPOX virus, wala pang bansa ang nagdeklara ng public health emergency.
Tiniyak naman ni Asec. Domingo ang mahigpit na pagbabantay ng kanilang departamento kaugnay sa mga sakit na naitatala sa bansa.
Kalimitan ay umiiwas ang ibang tao sa mga inuming may alcohol dahil kung masosobrahan ay magdudulot ito ng masamang epekto sa pangangatawan at maaari ring magresulta sa isang sakit. Ngunit sa Ohio, USA, isang centenarian ang nagsabi na ang alak daw ay nakatulong sa pagpapahaba sa kaniyang buhay!
Ang buong kwento, alamin.
Sa isang nakatutuwang kuwento, nitong december 16 ay nagdiwang ng kaniyang 106th birthday si Florence Hackman na binansagang “Fireball Flo” dahil mahilig pala ito sa fireball whisky!
Kasalukuyang naninirahan si Flo sa isang assisted living community sa Ohio, USA na Traditions of Deerland sa Loveland.
At kahit lagpas isandaan na ang edad ni Flo, nanatili pa rin siyang aktibo pati na rin ang kaniyang mga kaibigan sa pagsali sa happy hour sa kanilang tinitirhan.
Pati na rin sa paglalaro ng bingo at iba pang activities ay hindi nawawala si Flo.
At para masagot ang tanong kung bakit humaba nang ganoon ang buhay ni Flo? Ito ay dahil sa pagiging positibo at masiyahin niya. Higit sa lahat, sinabi niya rin na ang paborito niya inumin na whisky ay malaki ang tulong para umabot siya sa ganitong edad.
Sa katunayan, sa pagdiriwang ni Flo ng kaniyang 105th birthday ay niregaluhan siya ng manufacturer ng fireball cinnamon whisky!
Si Flo ay nabyuda nang pumanaw ang kaniyang husband of 71 years noong 2011 at nagkaroon ng maraming anak na siya namang nagbigay din sa kaniya ng maraming apo at apo sa tuhod.
Gayunpaman, hindi na kataka-taka na nakatuntong sa edad na 106 si Flo dahil nananalaytay na pala ito sa kaniyang dugo! Ayon kay Flo, ang kaniya raw nanay ay umabot din noon sa edad na 104!
Ikaw, nais mo rin bang mag-celebrate ng birthday ng hanggang sa 106 years old?
Dating magkasintahan, nagkabalikan after 49 years at muling nagpakasal sa edad na 94 at 89.
Ang buong kwento, alamin.
Sa Denver, Colorado, USA, nakilala ni Fay Shober ang kaibigan ng kaniyang mga kuya na si Robert Wenrich na sa murang edad ay nagsabi na agad na pakakasalan siya nito.
Nobyembre naman ng 1951 nang totohanin ito ni Robert dahil talaga ngang pinakasalan niya si Fay at nagkaroon sila ng mga anak.
Ngunit matapos ang 24 years na pagsasama ay nag-divorce ang dalawa noong 1975 at nagkaroon ng kani-kaniyang mga buhay, ikinasal sa iba, at nagkaroon ng mga bagong pamilya.
Ikinasal si Fay kay Don Gable at nagsama sila sa loob ng 42 years bago namatay ang lalaki 2 years ago. Habang si Robert naman na siyam na taon nang biyudo ay napangasawa si Carol Shultz, ngunit binawian din ng buhay si Carol.
Ngunit matapos maghiwalay sa loob ng 49 years, muling natagpuan nila Fay at Robert ang isa’t isa at muli ring nagpakasal!
Ayon naman sa kanilang bunsong anak na si Carol na siyang nag-asikaso sa ikalawang kasal ng kaniyang mga magulang, para raw teenagers ang mga ito na in love na in love pa rin sa isa’t isa.
Sinabi rin ng newlyweds na ngayon lang sila nagkaroon ng pagkakataon na mag-date dahil busy sila noon sa pagpapalaki sa kanilang mga apat na anak.
Kung kaya naman ngayon ay madalas mag-bonding ang mga ito sa magpalipas ng oras sa Hollywood Casino Morgantown at paglalaro ng baraha sa bahay.
Dagdag pa ni Carol, marami raw ang nakakakilala sa kaniyang mga magulang dahil ang pictures pala ng mga ito ay naka-display sa Parkhill Jewelry kung saan sila nagpasukat ng wedding ring.
Ikaw, naniniwala ka rin ba na love is sweeter the second time around?
Mariing kinondena ng Makabayan Bloc, ang panghihimasok ng U.S. Warship sa Pilipinas nang walang permiso o hindi otorisado.
Ayon kay assistant minority leader at Gabriela Women’s Party Rep. Arlene Brosas, walang pakundangan ang pagpasok sa karagatan ng Pilipinas ng US Carrier Strike Group One sa pangunguna ng USS Carl Vinzon sa pagitan ng Leyte at Mindanao nito lamang Disyembre a-26.
Malinaw aniya na paglabag sa sandatahang lakas ng militar; pagyurak sa kasarinlan; at soberanya ng bansa ang ginawa ng US warship.
Maituturing anya na banta sa seguridad ng Pilipinas ang nuclera-capable warship na iniskortan ng USS William Lawrence, USS Sterett at USS Princeton na mapanganib para sa Filipino communities.
Binigyang diin ng mambabatas, na hindi dapat hinahayaan ng pamahalaan ang estados unidos na gawing military outpost ang bansa.
Iginiit ni Cong. Brosas, na dapat paigtingin ang depensa sa soberanya ng bansa at hindi dapat gawing war playground ng Amerika o extension ng Pentagon ang Pilipinas.