Nagbanta ang bandidong grupong Abu Sayyaf na pupugutan ang apat na construction workers na kanilang binihag.
Ito ay kung mabibigo umanong magbayad ng P4-M ransom ang pamilya ng apat na bihag.
Batay sa ulat, nagpadala ang Abu Sayyaf ng larawan ng mga bihag sina Joel Adanza, Felimon Cordero, Edmundo Ramos at Jayson Baylosis na walang suot na damit pantaas at tinututukan ng mataas na kalibre ng baril, sa pamilya ng mga ito sa Zamboanga City.
Iniutos pa umano ng mga bandido na humingi ng tulong sa alkalde ng lungsod na si Mayor Beng Climaco para sa pagbabayad ng ransom money.
Matatandaang ang mga nasabing bihag ay dinukot noong Hulyo 15 sa Patikul, Sulu kung saan dalawa sa kanilang mga kasamahan ang nakatakas.
2 sundalo patay matapos maka-engkwentro ang mga hinihinalang Abu Sayyaf
Patay ang dalawang sundalo habang sugatan ang isa pa matapos maka-engkwentro ang mga hinihinalang miyembro ng Abu Sayyaf Group sa Sulu kaninang 4:20 ng madaling araw.
Ayon kay Armed Forces of the Philippines (AFP) Joint Task Force Sulu Commander Brig. General Cirilito Sobejana, una silang nakatanggap ng impormasyon kaugnay ng presensya ng mga bandido sa Sitio Langhub, Barangay Pang, Kalingalan Caluang.
Agad naman silang nagpadala ng tropa sa nasabing lugar kung saan naganap ang bakbakan tumagal ng kalahating oras.
Dagdag ni Sobejana, ang nasabing engkwentro ay bahagi ng operasyon ng militar para mapalaya ang nasa 23 mga bihag na hawak pa rin ng Abu Sayyaf Group.
Samantala, lima naman ang nasawi sa panig ng bandidong grupo habang nasa pitong matataas na kalibre ng mga baril ang narekober ng militar ayon kay Sobejana.