Walang kinalaman ang Malacañang sa nangyaring paglalayag ng US Warship Vessel sa 12 nautical miles ng pinag-aagawang Scarborough Shoal na una nang inalmahan ng bansang China.
Ayon kay Presidential Spokesperson Harry Roque, hindi maaring maging problema ng Pilipinas ang problemang pinasok ng Amerika, lalo na’t mayroon nang independent foreign relations ang bansa.
Pahayag ng tagapagsalita ng Palasyo, may sariling taktika ang Pilipinas pagdating sa pakikipag-ugnayan sa China hinggil sa isyu ng West Philippine Sea.
Una nang sinabi ng China na nilabag ng US ang kanilang soberenya at inilagay pa nito sa malubhang sitwasyon ang Chinese vessels.