Magpapakalat ng mahigit pitumpung libong personnel ang Philippine National Police upang matiyak at mapanatili ang seguridad ng publiko sa mga simbahan sa buong bansa para sa pagsisimula ng tradisyunal na “Simbang Gabi.”
Ayon kay PNP Acting Chief Lt. Gen. Jose Melencio Nartatez Junior, ipatutupad ang hakbang sa ilalim ng programang “Ligtas Paskuhan 2025,” kung saan itinataas sa heightened alert ang lahat ng yunit habang nagsisimula ang tradisyunal na misa sa gabi at madaling-araw sa December 15 at 16, na inaasahang dadaluhan ng milyun-milyong debotong Katoliko hanggang bisperas at mismong araw ng Pasko.
Dagdag pa ng hepe ng PNP, paiigtingin ng pambansang pulisya ang kanilang foot patrols, checkpoints, at pag-ikot ng kanilang mobile units sa paligid ng mga simbahan, habang pinalalakas ang koordinasyon sa mga lokal na pamahalaan, barangay officials, at tauhan ng mga simbahan para sa epektibong crowd management at paghahanda sa mga emergency.
Ayon kay Lt. Gen. Nartatez, kabilang sa kanilang pangunahing alalahanin ang mga posibleng insidente ng pagnanakaw at pandurukot.
Kaugnay nito, pinaalalahanan ng hepe ng pambansang pulisya ang mga nagsisimba na maging mapagmatyag, siguraduhing ligtas ang kanilang mga gamit, at agad ireport ang anumang kahina-hinalang gawain.
