Nakumpiska ng mga otoridad ang 6,000 litro ng gasolina at diesel sa isang checkpoint sa Barangay Sta. Cruz, Placer, Surigao Del Norte.
Ayon kay Police Brig. Gen. Joselito Esquivel ng Caraga-Philippine National Police (PNP), naaresto ang dalawang lalaking may lulan ng elf truck kung saan nadiskubre ang gasolina at diesel.
Wala umanong maipakitang mga dokumento o permit ang mga suspek para sa kanilang kargamento.
Napagalamang binili ang mga dala nila sa isang gasolinahan sa Barangay San Pedro Alegria at dadalhin sana sa Dinagat Islands.
