Limang suspek na ngayon ang tinutugis ng Philippine National Police o PNP kaugnay sa pagkakapaslang kay Father Richmond Nilo sa Zaragoza, Nueva Ecija.
Ayon kay Police Chief Superintendent Amador Corpuz, Regional Director ng Central Luzon PNP, nakita sa kuha ng CCTV na ang dalawa sa mga salarin ay sakay ng kotse habang ang tatlong iba pa ay sakay ng motorsiklo na nakitang nagtungo sa kapilya ni Father Nilo.
Tukoy na aniya ang isa sa mga suspek ngunit kanila pang kinukumpirma ang pagkakakilanlan nito.
Samantala, tatlong motibo na rin ngayon ang tinitignan ng pulisya kaugnay sa pamamaslang sa pari.
Una rito ay ang posibleng away sa lupa, pangalawa ay ang pagtulong niya sa mga biktima ng pangmomolestya at ang pangatlo ay ang alitan sa relihiyon.
—-