Laya na ang 3 Pilipinong nakakulong sa Saudi Arabia.
Ayon sa Department of Foreign Affairs (DFA), ang una ay sinentensyahan ng limang taong pagkakakulong at pinagbabayad ng P300,000 pesos na blood money matapos patayin ang kapwa Pilipino noong 2011.
Ang nasabing OFW ay binigyan ng royal clemency ng Saudi King matapos bayaran ang pamilya ng nabiktima niya at nakabalik na ng Pilipinas noong Mayo 14.
Ang ikalawa naman ay sinentensyahan makulong ng 4 na taon at 200 hagupit matapos patayin ang kanyang sanggol noong ito’y nanganak sa tirahan ng kanyang employer sa Buraydah noong 2011.
Nakatanggap naman ito ng royal clemency bago kumpletuhin ang kanyang sentensya maging ang pagsagawa ng hampas at nakabalik ito ng Pilipinas noong Hunyo 11.
Para sa pangatlong Pilipino, kinasuhan ito ng murder matapos patayin ang isang Saudi policeman sa hail noong 2012 ngunit nanindigan ang Pinoy na self–defense ang ginawa niya kaya’t tuluyan siyang inabswelto at nakabalik ng Pilipinas noong Hunyo 17.
67 Pinoys, na-repatriate na mula Libya
Samantala, 67 Pilipino mula sa Libya ang inilikas at nakabalik na sa Pilipinas.
Ipinabatid ng DFA na 38 Pilipino ang na repatriate naman mula sa Tobruk, Libya noong Hunyo 21.
Kaugnay nito, halos 4,000 Pinoy ang nananatili pa sa nasabing bansa kaya’t iginigiit ng DFA ang panawagan sa mga ito na tumalima sa nakataas na alert level 4 o mandatory repatriation.
By Judith Larino | Kevyn Reyes