28 ang patay habang kritikal naman sa ospital ang nasa 60 indibidwal matapos uminom ng spiked liquor o alak na may mataas na volume o content sa Western India.
Ayon kay senior government official na si Mukesh Parmar, nangyari ang insidente sa dalawang distrito sa Ahmedabad at Botad na sakop ng Gujarat State ng nabanggit na bansa kung saan, ipinagbabawal ang pagmamanupaktura, pagbebenta at pagkonsumo ng alak.
Sa imbestigasyon ng mga otoridad, ang nainom na alak ng mga biktima ay may halong kemikal pero hindi pa matukoy kung ano ang ginamit para baguhin ang naturang alak.
Napag-alaman na karaniwang ginagamit ang naturang kemikal sa mga mumurahing alak na kayang palakasin ang stamina ng sino mang iinom nito.
Sa ngayon, nagpapatuloy pa ang imbestigasyon kung sino ang nasa likod ng insidente.