Binatikos ng Catholic Bishops’ Conference of the Philippines o CBCP ang ginawang paninira ng Maute Group sa isang simbahan sa Marawi City.
Ayon kay Marawi Bishop Edwin dela Peña, malinaw na ang ginawang panununog at pagsira sa mga santo dito ay pambabastos sa pananampalatayang Kristiyano.
Aniya, hindi katanggap- tanggap ang ginawa ng naturang teroristang grupo dahil maituturing itong gawa ng demonyo.
Kaugnay nito, tinawag naman ni ARMM o Autonomous Region in Muslim Mindanao Governor Mujiv Hataman na un-islamic o hindi naaayon sa turo ng Islam ang ginawa ng mga Maute.
Ayon kay Hataman, malaki ang posibilidad na ginawa ito ng grupo upang lumabas na away relihiyon ang kanilang ginagawa at malayo sa anggulong terorismo.
Sa kabila nito, hinikayat ni Hataman ang Muslim at Kristiyano na magkaisa sa panahon na ito at huwag hayaan na manaig ang plano ng Maute Group.
Kalat na nga sa social media ang video footage habang sinisira ng mga miyembro umano ng Maute Group ang mga imahen at krus sa loob ng Saint Mary’s Cathedral sa Marawi City.
Ipinakita ang video footage na kuha umano ng teroristang grupo nang kanilang salakayin ang simbahan noong Mayo 23.
Hindi rin nakaligtas ang mga larawan nina Pope Francis at Pope Emeritus Benedict XVI na kanila namang pinunit.
Ayon kay Marawi Bishop Edwin dela Peña sa St. Mary’s Cathedral dinukot din ng mga bandido si Fr. Chito Suganob at ang kanyang mga kasamahan.
Mariin anyang kinokondena ng Simbahang Katolika ang paninira ng mga terorista na tinawag niyang blasphemy o kalapastangan sa Diyos at gawain ng diyablo.
By Rianne Briones / Drew Nacino
Ayaw munang tumanggap ni Sylvia Sanchez ng role na kahalintulad ng kanyang naging pagganap kay Nanay Gloria sa isang teleserye sa Kapamilya network.
Ayon kay Sylvia, bagama’t talagang minahal niya ang kanyang karakter ay hinay- hinay daw muna sa heavy drama dahil talagang nakakapagod ito at mahirap.
Kaya naman sa halip na drama, horror naman ang bagong gagawing proyekto ngayon ni Sylvia na isang pelikula na kabilang sa Cinema One Originals.
By Rianne Briones
Photo: Screengrab from arjoatayde / Instagram
Pasok agad sa semi-finals ang Barangay Ginebra Gin Kings makaraang ilaglag sa unang round pa lamang ng quarter finals ang GlobalPort Batang Pier.
Inilampaso ng Ginebra ang GlobalPort sa score na 96-85 sa Game 1 ng Best of 5 series ng quarter finals, sa kanilang paghaharap sa Araneta Coliseum, kagabi.
Hawak ng Gin Kings ang twice-to-beat advantage dahil sa pagiging number 1 nito sa elimination round.
Kumamada ng 39 points si Justine Brownlee kabilang ang tatlong 3-point shot habang nag-ambag ng 21 points ang bigman ng Ginebra na si Japeth Aguilar.
Susunod na makakasagupa ng Ginebra ang mananalo sa bakbakang TNT Katropa at Meralco Bolts.
By Drew Nacino
Photo: PBA Images
Naniniwala si Davao City Mayor Sara Duterte na mahalaga ang pagkakaaresto sa ama ng Maute brothers upang tuluyan nang matuldukan ang paghahasik ng kaguluhan ng ISIS sa Marawi City, Lanao del Sur.
Magugunitang naaresto si Cayamora Maute, ama nina Omar at Abdullah Maute na kabilang sa mga leader ng Dawlah Islamiya Wilayat Al-Masriq o ISIS East Asia Division.
Pinapurihan din ni Duterte ang Task Force Davao na nakahuli sa nakatatandang Maute sa isang checkpoint sa Toril, kahapon ng umaga.
Magpapagamot umano si Cayamora sa Davao City nang maaresto kasama ang kanyang ikalawang asawa na si Kongan Alfonso Balawag; anak na si Norjannah Balawag Maute, asawa nitong si Benzarali Tinglao at kanilang driver na si Aljon Salazar Ismael.
By Drew Nacino
Unti-unti na ring nababawasan ang bilang ng mga guro sa nakalipas na pitong (7) taon.
Ito’y bunsod ng patuloy namang pagtaas ng bilang ng mga gurong bumabagsak sa Licensure Examination for Teachers o LET.
Ngayong taon, 10.39 percent ang passing rate para sa examination ng mga naghahangad na maging elementary school teachers, ang pinakamababa simula noong 2010.
Tinukoy ng Philippine Business for Education na ang pagsasanay ng mga Teacher Education Institutions o TEI sa kanilang mga estudyante ang maaaring ugat ng problema.
Sa tinatayang dalawanlibong TEI na namonitor noong 2009 hanggang 2013, 59 percent ng elementary TEI at 63 percent ng secondary TEI ang hindi nakaabot sa LET national passing rate.
Classroom shortage
Aminado ang Department of Education o DepEd na problema pa rin nila ang kakulangan sa mga silid-aralan.
Ayon kay DepEd Secretary Leonor Briones, nasa labing-walong libo (18,000) pang classroom ang kailangang ipatayo.
Tiniyak naman ni Briones na masosolusyonan ang matagal ng problema sa kakulangan ng silid-aralan sa loob lamang ng tatlo hanggang apat na buwan.
Gayunman, hindi naman anya problema ang budget bagkus ay ang lugar na pagtatayuan lalo sa Metro Manila kung saan kinakapos na ng espasyo na pagpapatayuan ng mga gusali.
By Drew Nacino
Sumampa na sa mahigit isandaan limampu (150) ang nasawi sa suicide bombing sa Kabul, Afghanistan.
Ayon kay Afghan President Ashraf Ghani, hanggang ngayon ay hindi pa mabatid kung anong grupo ang nasa likod ng pambobomba noong isang linggo lalo’t itinanggi na ito ng grupong Taliban.
Gayunman, ipinunto ni Ghani na panahon na para sa Taliban na yakapin ang kapayapaan o harapin ang mga konsekwensya.
Inilunsad naman ng Afghanistan Kabul Process for Peace and Security Cooperation na lalahukan ng mga kinatawan mula sa dalawampu’t tatlong (23) bansa kabilang ng US at Pakistan.
By Drew Nacino
Pinaiimbestigahan ng isang catering firm sa gobyerno ang umano’y anomalya sa bidding of contracts na siyang nagsusuplay ng pagkain sa mga preso sa lahat ng detention facilities sa ilalim ng Bureau of Corrections.
Ginawa ni Atty. Lorna Kapunan, Legal Counsel ng MKCSI o Mang Kiko Catering Services Inc. ang pahayag bunsod ng diarrhea outbreak sa NBP o New Bilibid Prison sa Muntinlupa noong nakaraang linggo.
Ang MKCSI ang nagsusuplay ng pagkain sa mga preso ng New Bilibid Prison sa nakalipas na 11 taon.
Ipinabatid ni Kapunan na nagpadala na sila ng sulat kay Justice Secretary Vitaliano Aguirre patungkol sa sinasabing iregularidad bago pa man ang nangyaring outbreak, subalit wala pang tugon dito ang kalihim.
By Meann Tanbio
Umaabot na sa 123 sugatang sundalo ang dinala sa Camp Evangelista sa Cagayan de Oro City mula nang umusbong ang sagupaan sa pagitan ng militar at Maute Terror Group sa Marawi City.
Sunud-sunod ang dating kahapon ng mga helicopter sa Camp Evangelista, lulan ang mga sundalong nasugatan sa bakbakan sa Marawi.
Kabilang sa isinugod sa kampo ay isang opisyal ng militar na nasugatan nang mapasok ang sinasabing stronghold ng Maute Group.
Kabuuang 43 sundalo naman ang naka-confined sa Camp Evangelista, habang ang apat (4) na iba pa ay na-admit sa pribadong hospital.
By Meann Tanbio
Inilabas ng A.P. o Associated Press ang isang ekslusibong video kung saan mapapanood kung paano pinlano ang pagsalakay ng Maute Terror Group sa Marawi City.
Sa naturang video na tumagal ng isang minuto at tatlumpu’t anim na segundo, makikita ang pulong ng mga pinaniniwalaang militante ukol sa nilulutong pag-atake sa Marawi, kung saan nabanggit ang mga planong hakbang tulad ng pangingidnap sa paaralan, pagharang sa mga kalsada at pananakot sa mga sibilyan.
Makikita din sa video ang leader ng Abu Sayyaf group at sinasabing “Emir” ng ISIS sa Pilipinas na si Isnilon Hapilon na pinangungunahan ang pag-atake sa Marawi.
Nakasuot si Hapilon ng dilaw at itim na scarf sa ulo at nasa kanyang tabi ang isang baril.
Kaugnay nito, mayroon nang kopya ang militar ng naturang video kung saan mismong si AFP Chief of Staff Eduardo Año ang nagkumpirma na si Hapilon nga ang nasa video.
By: Meann Tanbio