Iimbestigahan ng AMLC o Anti-Money Laundering Council ang mahigit 50 Milyong Pisong cash at mga tseke na may halagang P27 Million na nakumpiska ng tropa ng militar mula sa kuta ng Maute Group sa Marawi City.
Ayon kay Presidential Spokesman Ernesto Abella, tiyak na kabilang ang AMLC sa gagawing pagsisiyasat.
Tumanggi naman si Abella na magkomento kung may posibilidad bang ma-lift ang bank secrecy law, at sa halip ay sinabi nitong hintayin na lamang ang proseso ng imbestigasyon
By: Meann Tanbio
Itinalaga ni Pangulong Rodrigo Duterte ang asawa ni Tourism Secretary Wanda Tulfo-Teo na si Roberto Teo bilang member of the Board of Directors ng Landbank of the Philippines Leasing and Finance Corporation.
Inilabas ng Malacañang ang appointment paper ni Roberto Teo kahapon.
Taong 2014, nagsilbi si Roberto Teo bilang board member ng Tourism Infrastructure and Enterprise Zone authority.
Tumayo rin siya bilang pinuno ng Davao City Investments Promotion Center noong 2008.
By Meann Tanbio
Nasa final stage na ang militar sa kanilang operasyon sa Marawi City laban sa Maute Terror Group.
Gayunman, inamin ni AFP Public Affairs Office Chief Lt/Col. Edgard Arevalo sa programang “Balita Na, Serbisyo Pa” na pahirapan pa rin ang kanilang pakikipag-bakbakan sa mga terorista lalo’t marami pang Improvised Explosive Device ang nakakalat sa lugar.
Bagama’t sinabi ni Arevalo na hindi na magtatagal ang ginagawang bakbakan ngayon ng militar sa mga bandido ngunit ginagawa nila ang lahat para matapos ito sa lalong madaling panahon.
Pakingan: bahagi ng pahayag ni AFP Public Affairs Office Chief LT/Col. Arevalo
Sa usapin naman ng bounty na nakapatong sa ulo nila Isnilon Hapilon at ng magkapatid na Omar at Abdullah Maute, nilinaw ni Arevalo na wala silang interes sa pabuya sa halip ang tinututukan nila ay mapulbos ang mga bandido.
Pakingan: bahagi ng pahayag ni AFP Public Affairs Office Chief LT/Col. Arevalo
By: Jaymark Dagala / BNSP
Inaalam na ng militar kung totoo ang ulat na patay na ang isa sa mga lider ng Maute terror group na si Omar Maute.
Ito’y ayon kay AFP Chief of Staff Gen. Eduardo Año ay batay sa nakuha nilang impormasyon na nuon pang Mayo 28 napatay si Omar sa Marawi, limang araw mula nang sumiklab ang bakbakan.
Duda si Año sa nasabing impormasyon dahil malaki pa aniya ang posibilidad na buhay pa rin ito.
Magugunitang naglaan si Pangulong Rodrigo Duterte ng tig-limang Milyong Pisong bounty para kina Omar at sa kapatid nitong si Abdullah habang dagdag na Sampung Milyon naman ang ipinataw para kay ISIS Emir at Abu Sayaf Leader Isnilon Hapilon.
By: Jaymark Dagala / Jonathan Andal
Nabunyag na walang emergency response team ang security provider ng Resorts World Manila na NC Lanting Security Specialist Incorporated.
Ito ang lumabas sa inisyal na imbestigasyon ng PNP SOSIA o Supervisory Office for Security and Investigation Agencies kaugnay ng trahedya sa nasabing hotel-casino nuong isang linggo.
Ayon kay C/Supt. Jose Mario Espino, direktor ng PNP SOSIA, napigilan sana ang pag-atake ni Jessie Carlos kung may grupo lamang na naka-standby na emergency group na reresponde nuong mga panahong iyon.
Hindi rin alam ng mga guwardiya kung sino ang tatakbo para pigilan si Carlos dahil may binabantayan silang puwesto at hinintay pa nila ang mga pulis para ma-contain ang area.
Binabawasan din ng Resorts World ang bilang ng mga guwardiya tuwing madaling araw kung saan, tig-isa lamang ang ipinoposte sa mga entrada at exit points maging ang mga roving duty.
By: Jaymark Dagala / Jonathan Andal
Sinuspinde na ng pamahalaan ang pagpapadala ng mga manggagawang Pinoy sa bansang Qatar bunsod ng nararanasang diplomatic crisis duon.
Ito’y ayon kay Labor Secretary Silvestre Bello III makaraang putulin na ng mga malalaking Arab States ang kanilang diplomatic ties sa nasabing bansa dahil sa pagsuporta umano nito sa terorismo.
Ayon kay Bello, pansamantalang ititigil na rin ng gubyerno ang pagpo-proseso sa mga dokumento ng mga Pinoy workers na nais magtungo sa Qatar.
Gayunman, nilinaw ng kalihim na walang silang ipatutupad na repatriation sa mga Pinoy na nasa Qatar ngunit patuloy nilang tututukan ang sitwasyon duon sa tulong ng mga opiyal mula sa DFA o Department of Foreign Affairs.
By: Jaymark Dagala / Aya Yupangco
Naglabas ng sama ng loob si Pangulong Rodrigo Duterte sa mga Moro na aniya’y nagpapagamit sa mga terorista para makapasok sa bansa.
Sa kaniyang pagharap sa 602nd infantry brigade ng Philippine Army sa Camp Lucero sa North Cotabato kahapon, kinuwesyon ng Pangulo kung bakit nakapasok ang mga dayuhang terorista sa bansa.
Kasunod nito, tiniyak ng Pangulo na hindi niya tatantanan ang mga terorista na kumukubkob ngayon sa Marawi hanggang sa kahuli-hulihang patak ng dugo ng mga ito.
By: Jaymark Dagala / Aileen Taliping
Nanindigan si Pangulong Rodrigo Duterte na kaniyang gagawin ang lahat para mapulbos lamang ang mga teroristang naghahasik ngayon ng lagim sa Marawi City at iba pang panig ng Mindanao.
Ginawa ng Pangulo ang pahayag sa kaniyang pagharap sa mga sundalo sa 602nd infantry brigade ng Philippine Army sa Camp Lucero sa North Cotabato kahapon.
Hindi naitago ng Pangulo ang kaniyang inis at pagkadismaya sa mga terorista na aniya’y ayaw sa katahimikan at kaayusan ng bansa.
Kumpiyansa ang Pangulo na pinopondohan ng mga sindikato ng droga ang mga terorista na siyang ginagamit nito para makapaghasik ng takot at pangamba sa publiko.
By: Jaymark Dagala
Nanindigan ang Malakaniyang na walang nilalabag na batas at may sapat na dahilan si Pangulong Rodrigo Duterte para ibagsak ang batas militar sa Mindanao.
Ito ang reaksyon ni Presidential Chief Legal Counsel Atty. Salvador Panelo kasunod ng inihaing petisyon sa Korte Suprema na kumukuwesyon sa ligalidad ng Martial Law sa rehiyon.
Ayon kay Panelo, mayruong access sa intel reports ang Pangulo at magpapasya ito batay sa natanggap niyang impormasyon mula mismo sa kaniyang mga tauhan sa ground o kung saan nangyayari ang gulo.
Handa rin ang Pangulo na i-alay ang sariling buhay para sa kapakanan ng nakararami dahil mayruon aniya itong political will at hindi nito ugaling manahimik na lamang at magmukmok sa isang sulok dahil lamang sa takot na mabatikos.
By: Jaymark Dagala / Aileen Taliping